Hwɛɖɔtɔ́ 20 - MAWUXÓWÉMA

Izlayɛ́li ví lɛ́ɛ dɔn tó nú akɔta Bɛnjamɛ́ɛ tɔn

¹ Izlayɛ́li ví lɛ́ɛ bǐ ɖó gbe kpɔ́ bó sɛ yěɖée kplé ɖo Misipa ɖo Mawu Mavɔmavɔ nukɔn; to lɛ́ɛ bǐ mɛ wɛ yě gosín, bɛ́ sín Dan ɖo totaligbé káká yi Bɛ̌-Ceva ɖo tofɔligbé, bó gosín Galadi ɖo zǎnzǎnhwe jí.

² Gǎn lɛ́ɛ kpó súnnu e ɖo akɔta Izlayɛ́li tɔn mɛ lɛ́ɛ bǐ kpó wá togun Mawu tɔn sín kplé énɛ́ ɔ́ tɛnmɛ. Sɔ́ja e nyɔ́ hwǐ zán ganjí lɛ́ɛ adɔ̌kpo ko (400.000) wɛ zɔn afɔ wá.

³ Bɔ súnnu e ɖo Bɛnjamɛ́ɛ sín akɔta ɔ́ mɛ lɛ́ɛ se ɖɔ Izlayɛ́li ví ɖé lɛ́ɛ yi Misipa. Izlayɛ́li ví lɛ́ɛ ka ɖɔ: “Mi ɖɔ lě e nǔ baɖabaɖa énɛ́ ɔ́ jɛ gbɔn ɔ́ nú mǐ.”

⁴ Énɛ́ ɔ́, nyɔ̌nu e è hu ɔ́ sín asú, Levíi ví ɔ́, yí xó bó ɖɔ: “Nyɛ kpó asi ce kpó wɛ wá gletoxo Giveya tɔn mɛ ɖo Bɛnjamɛ́ɛ yíkúngban jí, bó ná dɔ́ fínɛ́,

⁵ bɔ Giveyanu lɛ́ɛ ka fɔ́n gǔ dó jǐ ce, bó xá xwé e gbe un ɖe ɔ́ zǎn mɛ. Yě jló ná hu mì; yě hú gǎn asi ce bó ɖó xó xá ɛ káká bɔ é kú.

⁶ Un ka zé asi ce sín cyɔ bó já lobo má sɛ́ dó Izlayɛ́li sín akɔta lɛ́ɛ bǐ, ɖó nǔ nyanya, nǔ dó abaɖa ɖé wɛ nyí nǔ énɛ́ ɔ́ e yě dó sin ɖo Izlayɛ́li é.

⁷ Izlayɛ́li ví lɛ́ɛ mi, ée mi bǐ wá kplé ɖo fí din é ɔ́, mi ná nɔ kpɔ́ bó gbéjé nǔ énɛ́ ɔ́ kpɔ́n lobo ɖe gbeta ɖé tɔ́n.”

⁸ Togun ɔ́ bǐ ka ɖó gbe kpɔ́ bó ɖɔ: “Mɛ ɖěbǔ ná yi goxɔ sá ɖo mǐ mɛ ǎ; mɛ ɖěbǔ ka ná lɛ́ kɔ yi xwé ǎ.

⁹ Nǔ e mǐ ná bló nú Giveya din ɔ́ ɖíe: mǐ nǎ nyi akɔ,

¹⁰ bó ná cyán súnnu e ɖo akɔta Izlayɛ́li tɔn lɛ́ɛ ɖokpó ɖokpó mɛ lɛ́ɛ wǒvlɔ́ɖó wǒvlɔ́ɖó, bɔ yě ná nɔ hɛn nǔɖuɖu yi jó nú ahwangɔnu e ná tɔ́n ahwan Giveyanu lɛ́ɛ é. Yě ná tɔ́n ahwan Giveyanu lɛ́ɛ ɖó nǔ nyanya e yě wa ɖo Izlayɛ́li ɔ́ wú.”

¹¹ Énɛ́ ɔ́, Izlayɛ́li ví lɛ́ɛ bǐ yí gbe, bó ná nɔ kpɔ́ bó tɔ́n ahwan Giveyanu lɛ́ɛ.

¹² Akɔta tɛnmɛ tɛnmɛ e ɖo Izlayɛ́li lɛ́ɛ sɛ́ mɛ dó Bɛnjamɛ́ɛ hɛ̌nnu lɛ́ɛ bǐ mɛ ɖɔ: “Nɛ̌ nǔ ká nyí gbɔn, bɔ nǔ baɖabaɖa mɔ̌hunkɔtɔn jɛ ɖo to mitɔn mɛ?

¹³ Mi jó mɛ e dó nǔ baɖabaɖa mɔ̌hunkɔtɔn sin lɛ́ɛ nú mǐ; nǔɖégótegó Giveya tɔn lɛ́ɛ ɔ́, mi jó yě nú mǐ, nú mǐ ná hu yě, bó ná sú nǔ nyanya wiwa kún dó ɖo togun Izlayɛ́li tɔn mɛ.” Lo ɔ́, Bɛnjamɛ́ɛ ví lɛ́ɛ jló ná ɖótó nɔví yětɔn Izlayɛ́li ví lɛ́ɛ ǎ.

¹⁴ Yě gosín toxo yětɔn tɛnmɛ tɛnmɛ lɛ́ɛ mɛ wá kplé ɖo Giveya, bó ná fun ahwan xá Izlayɛ́li ví lɛ́ɛ.

¹⁵ Gbe énɛ́ ɔ́ gbe ɔ́, Bɛnjamɛ́ɛ sín sɔ́ja e gosín toxo yětɔn lɛ́ɛ bǐ mɛ wá, bó nyɔ́ hwǐ zǎn ganjí lɛ́ɛ ɔ́, adɔ̌kpo ɖě děgba ɖě afɔwó (26.000) wɛ è xa yě dó; è ka xa Giveyanu lɛ́ɛ d'é mɛ ǎ; sɔ́ja yědɛɛ lɛ́ɛ tɔn e syɛ́n ganjí lɛ́ɛ bló nǔwɔntɔn kanwe ko (700).

¹⁶ Đo ahwangɔnu énɛ́ ɔ́ mɛ ɔ́, sɔ́ja syɛ́nsyɛ́n nǔwɔntɔn kanwe ko (700) wɛ ɖ'é mɛ bó nyí amyɔnɔ. Yě mɛ ɖokpó ɖokpó sixú nyi klohwán dó xo ɖa ɖokpó ná, ma xogblá.

¹⁷ Akɔta Izlayɛ́li tɔn ɖě lɛ́ɛ ɔ́, yědɛɛ lɛ́ɛ ɖó sɔ́ja adɔ̌kpo ko (400.000), bɔ è kplɔ́n ahwanfunfun yě.

¹⁸ Izlayɛ́li ví lɛ́ɛ yi Betɛ́li bó yi kan nǔ byɔ́ Mawu bó ná tunwun akɔta yětɔn e ɖó ná tɔ́n ahwan Bɛnjamɛ́ɛ sín mɛ lɛ́ɛ jɛ nukɔn é. Bɔ Mawu Mavɔmavɔ ɖe Judáa sín akɔta ɔ́.

¹⁹ Ée ayǐ hɔ́n tlóló ɔ́, Izlayɛ́li ví lɛ́ɛ wlí ali bó yi ɖó gɔnu ɖó Giveya kpá.

²⁰ Énɛ́ ɔ́ gúdo ɔ́, yě ɖidó ahwan fun xá Bɛnjamɛ́ɛ sín mɛ lɛ́ɛ gbé, bó to yěɖée ɖó ahwanfunfun lɔ jí kpan nukɔn Giveya.

²¹ Gbe énɛ́ ɔ́ gbe ɔ́, Bɛnjamɛ́ɛ sín mɛ lɛ́ɛ tɔ́n sín toxo ɔ́ mɛ, bó hu Izlayɛ́li ví lɛ́ɛ adɔ̌kpo ɖě afɔwó (22.000).

^22-23 Izlayɛ́li ví lɛ́ɛ yi Mawu Mavɔmavɔ nukɔn bó ji gbɛvíhan káká yi jɛ gbadanu. Yě kan nǔ byɔ́ Mawu Mavɔmavɔ, bó ná tunwun nú è ɖǒ ná lɛ́ tɔ́n ahwan ɖěvo nɔví yětɔn Bɛnjamɛ́ɛ sín mɛ lɛ́ɛ a jí. Mawu Mavɔmavɔ ka ná gbe tɔn yě. Énɛ́ ɔ́, Izlayɛ́li ví lɛ́ɛ sín ahwankánɖó lɛ́ɛ ɖó akɔ́nkpinkpan bó sɔ́ ahwan nú, bó lɛ́ to yěɖée ɖó fí e yě nɔ́ ɖ'ayǐ é.

^24-25 Yě lɛ́ tɔ́n ahwan Bɛnjamɛ́ɛ sín mɛ lɛ́ɛ. Đo azǎn wegɔ́ élɔ́ gbe e yě kpé ahwan ɔ́, Bɛnjamɛ́ɛ sín mɛ lɛ́ɛ tɔ́n sín Giveya bó hu Izlayɛ́li ví lɛ́ɛ sín sɔ́ja e è kplɔ́n ahwanfunfun ganjí lɛ́ɛ děgba ɛnɛ afɔwó (18.000).

²⁶ Énɛ́ ɔ́, Izlayɛ́li togun ɔ́ bǐ yi Belɛti. Mɛ lɛ́ɛ jínjɔ́n fínɛ́ ɖo Mawu Mavɔmavɔ nukɔn, bó ná ji gbɛvíhan, bɔ gbe énɛ́ ɔ́ gbe ɔ́, yě nɔ nǔ ma ɖu sin ma nu káká jɛ gbadanu. Yě sá vɔ̌ e è nɔ dó zo lɛ́ɛ kpó kɔnɖókpɔ́vɔ́ lɛ́ɛ kpó nú Mawu Mavɔmavɔ.

^27-28 Đó hwe énɛ́ ɔ́ nu ɔ́, akɔjijɛgbá Mawu tɔn ɔ́, Betɛ́li wɛ é ɖe. Pínxási e nyí Eleazáa ví, bó nyí Aalɔ́ɔn vívú ɔ́ wɛ nyí gǎn ná. Izlayɛ́li ví lɛ́ɛ kan nǔ byɔ́ Mawu Mavɔmavɔ bó ná tunwun nú yě ɖó ná lɛ́ yi fun ahwan xá nɔví yětɔn Bɛnjamɛ́ɛ sín mɛ lɛ́ɛ, abǐ yě ní gbɔ a jí. Mawu Mavɔmavɔ ka yí gbe nú yě ɖɔ: “Mi yi, un ná jó yě nú mi sɔ.”

²⁹ Izlayɛ́li ví lɛ́ɛ fɔ sɔ́ja lɛ́ɛ tɔ lɛ́dó Giveya.

³⁰ Énɛ́ ɔ́ gúdo ɔ́, azɔn atɔngɔ́ élɔ́ din ɔ́, yě lɛ́ to yěɖée ɖó ahwanfunfun lɔ jí kpan nukɔn toxo ɔ́ ɖi azɔn we ɖě lɛ́ɛ ɖɔhun, bó tɔ́n ahwan Giveya.

³¹ Bɛnjamɛ́ɛ sín mɛ lɛ́ɛ ká tɔ́n, bó ná fun ahwan xá yě bó ká jó yěɖée dó bɔ Izlayɛ́li ví lɛ́ɛ dɔn yě yi zɔ nú Giveya. Đi azǎn ɖě lɛ́ɛ ɖɔhun ɔ́, yě jɛ sɔ́ja Izlayɛ́li tɔn lɛ́ɛ hu jí. Yě hu sɔ́ja gban (30) mɔ̌ ɖo gblǒlǒ mɛ, ɖo ali e yi Betɛ́li ɔ́ kpó ée yi Giveya ɔ́ kpó jí.

³² Yě mɔ ɖɔ émí kó ɖu ɖo Izlayɛ́li ví lɛ́ɛ jí ɖ'ayǐ tɔn lɛ́ɛ ɖɔhun. Lo ɔ́, ɖɔ wɛ Izlayɛ́li ví lɛ́ɛ ká kó ɖɔ, bó hɔn, bó dɔn Bɛnjamɛ́ɛ sín mɛ lɛ́ɛ sɛ yi zɔ nú Giveya, gbɔn ali lɛ́ɛ jí ɖo gblǒlǒ mɛ.

³³ Énɛ́ ɔ́, Izlayɛ́li sín ahwangɔnu lɛ́ɛ gosín fí tɛnmɛ tɛnmɛ e yě ɖe lɛ́ɛ, bó ná yi sɛ yěɖée kplé ɖó Baalu-Tamáa; hwe énɛ́ ɔ́ nu ɔ́, sɔ́ja e ɖo hwlǎhwlá ɖo toxo ɔ́ kpá lɛ́ɛ tɔ́n sín fí e yě ɖe lɛ́ɛ ajijimɛ, ɖo ayǐkúngban wɛnjɛ Gɛva tɔn ɔ́ kpáxwé.

³⁴ Bɔ Izlayɛ́li sín sɔ́ja e syɛ́n ganjí lɛ́ɛ děgba we afɔwó (10.000) wá Giveya nukɔn. Yě fun ahwan ɖésú ɖo fínɛ́; lo ɔ́, Bɛnjamɛ́ɛ sín mɛ lɛ́ɛ kó tunwun nǔ baɖabaɖa e ɖo yě ná gbo wɛ é ǎ.

³⁵ Mawu Mavɔmavɔ bló bɔ Bɛnjamɛ́ɛ sín mɛ lɛ́ɛ hɔn ɖo Izlayɛ́li ví lɛ́ɛ nukɔn; Izlayɛ́li ví lɛ́ɛ hu yě, bɔ gbe énɛ́ ɔ́ gbe ɔ́, sɔ́ja yětɔn adɔ̌kpo ɖě děgba ɖě afatɔ́n (25.000) jɛjí wɛ Izlayɛ́li ví lɛ́ɛ hu.

³⁶ Bɛnjamɛ́ɛ sín mɛ lɛ́ɛ wá mɔ ɖɔ émí dɔn. Izlayɛ́li ví lɛ́ɛ hɔn ɖo Bɛnjamɛ́ɛ sín mɛ lɛ́ɛ nukɔn, ɖó yě gán jɛ wú ɖɔ sɔ́ja émítɔn e ɖo hwlǎhwlá lɛ́dó Giveya lɛ́ɛ ná sí te dó yě jí.

³⁷ Sɔ́ja énɛ́ lɛ́ɛ yá wǔ ɖidó toxo ɔ́ mɛ; yě yi nyɛ sú toxo ɔ́, bó hu mɛ e ɖ'é mɛ lɛ́ɛ.

³⁸ Sɔ́ja e tɔ wu lɛ́ɛ ɔ́, nú yě ɖu ɖ'é jí ɔ́, wuntun e ná ɖe xlɛ́ ɔ́, yě kpó Izlayɛ́li ví e kpo lɛ́ɛ kpó kó ɖɔ; wuntun ɔ́ wɛ nyí ɖɔ yě ná dó nǔ zo bɔ azɔ tɔn ná yi jǐ ɖo toxo ɔ́ ta nu.

³⁹ Hwenu e yě ɖo ahwan ɔ́ fun wɛ bɔ Izlayɛ́li ví lɛ́ɛ ɖo agɔ jó wɛ ɔ́, Bɛnjamɛ́ɛ sín mɛ lɛ́ɛ hu mɛ gban (30) mɔ̌ ɖo yě mɛ, bó mɔ ɖɔ émí kó ɖu ɖ'é jí ɖě lɛ́ɛ ɖɔhun.

⁴⁰ Lo ɔ́, hwenɛ́nu ɔ́, azɔ e xó yě ɖɔ ɔ́ jɛ mlǐmlí jí ɖo Giveya ta nu akpɔ́kpɔ́ ɖɔhun. Bɛnjamɛ́ɛ sín mɛ lɛ́ɛ lɛ́ kɔ kpɔ́n gǔdo, bó mɔ azizɔ e ɖo fínfɔ́n wɛ ɖo toxo yětɔn e myɔ vun blá bǐ é ta nu é.

⁴¹ Bɔ Izlayɛ́li ví lɛ́ɛ húzú kpan nukɔn Bɛnjamɛ́ɛ sín mɛ lɛ́ɛ, bɔ xɛsi ɖaxó ɖé jɛ Bɛnjamɛ́ɛ sín mɛ lɛ́ɛ jí, ɖó yě mɔ nǔ baɖabaɖa e ɖo yě gbo wɛ é.

⁴² Yě hɔn ɖo Izlayɛ́li ví lɛ́ɛ nukɔn, bó ɖidó gbětótló mɛ. Lo ɔ́, yě yi jɛ ahwankánɖó wɔ̌buwɔ́bú ɖé lɛ́ɛ kpó sɔ́ja e gosín toxo ɔ́ mɛ lɛ́ɛ kpó sín alɔ mɛ, bɔ yě hu yě tɛ́.

⁴³ Izlayɛ́li ví lɛ́ɛ xá Bɛnjamɛ́ɛ sín mɛ lɛ́ɛ; yě jɛ gǔdo yětɔn bó ɖo yě hu dó ali wɛ, lobo ná agbɔ̌n ɖěbǔ yě ǎ káká yi jɛ fí ɖé, ɖo zǎnzǎnhwe jí nú Gɛva.

⁴⁴ Énɛ́ ɔ́, Bɛnjamɛ́ɛ sín sɔ́ja adɔ̌kpo ɛnɛ afɔwó (18.000) kú; yě bǐ wɛ ká nyí súnnu glegbenu.

⁴⁵ Bɛnjamɛ́ɛ sín mɛ ɖé lɛ́ɛ hɔn bó tunta gbětótló mɛ, ɖo awǐnnya Hlimumɔ́ni tɔn kpáxwé. È hu mɛ děgba ɖě afatɔ́n (5.000) tɛ́ dó ali ɖo yě mɛ. È jɛ mɛ e kpo lɛ́ɛ gúdo káká wá Gidɔ́mu, bó lɛ́ hu afɔwó (2.000) tɛ́ ɖo yě mɛ.

⁴⁶ Bɛnjamɛ́ɛ sín mɛ e è hu tɛ́ gbe énɛ́ ɔ́ gbe lɛ́ɛ bló sɔ́ja adɔ̌kpo ɖě děgba ɖě afatɔ́n (25.000).

⁴⁷ Amɔ̌, ɖo mɛ e hɔn ɖidó gbětótló mɛ lɛ́ɛ mɛ ɔ́, gbɛtɔ́ nǔwɔntɔn (600) gán ɖo yě mɛ, bó wá awǐnnya Hlimumɔ́ni tɔn jí, bó nɔ fínɛ́ nú sun ɛnɛ.

⁴⁸ Izlayɛ́li ví lɛ́ɛ húzú kpan nukɔn Bɛnjamɛ́ɛ sín mɛ e kpo lɛ́ɛ; yě nɔ́ gbɔn toxo lɛ́ɛ ɖokpó ɖokpó mɛ, bó nɔ hu súnnu lɛ́ɛ bǐ tɛ́, bó nɔ hu kanlin lɛ́ɛ bǐ tɛ́. Ée yě blǒ mɔ̌ fó ɔ́, yě dǒ toxo e ɖo gbě ɔ́ jí lɛ́ɛ bǐ zo.