Hwɛɖɔtɔ́ 19 - MAWUXÓWÉMA

Nǔ e Bɛnjamɛ́ɛ ví e ɖo Giveya lɛ́ɛ dó sin é

¹ Hwenu e axɔ́sú ɖé ma ɖo Izlayɛ́li ǎ ɔ́, Levíi ví ɖé nɔ́ fí ɖé ɖo fínɛ́, bɔ fí ɔ́ ɖo Eflayímu sókan ɔ́ mɛ, bó ká ɖo gblǒlǒ mɛ. Asi tɔn ɖokpó gosín Bɛteleyɛ́mu ɖo Judáa.

² Nyɔ̌nu énɛ́ ɔ́ sin xomɛ dó e bó jó e dó, lobo lɛ́ kɔ yi tɔ́ tɔn xwé ɖo Bɛteleyɛ́mu, bó nɔ fínɛ́ nú sun ɛnɛ.

³ Asú tɔn ka sɔ́ nǔ, bó yi mɔ ɛ, bó ná ci kpɛ n'i lobo kplá ɛ wá yi. É kpó mɛsɛntɔ́ tɔn kpó wɛ zɔn, bɔ é hɛn tócí we. Ée é yi nyɔ̌nu ɔ́ xwé ɔ́, nyɔ̌nu ɔ́ kplá ɛ yi byɔ́ tɔ́ tɔn xɔ mɛ; ée nyɔ̌nu ɔ́ sín tɔ́ mɔ ɛ ɔ́, é yí jǒnɔ tɔn kpó awǎjijɛ kpó.

⁴ É cí jǐ tɔn nú azǎn atɔn. Levíi ví ɔ́ kpó mɛsɛntɔ́ tɔn kpó nɔ ɖu nǔ, bó nɔ nu ahan, bó nɔ dɔ́ fínɛ́.

⁵ Azǎn tɔn ɛnɛgɔ́ ɔ́ gbe ɔ́, yě fɔ́n zǎn, bɔ Levíi ví ɔ́ ko sɔ́ nǔ, bó ná ɖidó. Lo ɔ́, yɔkpɔ́ ɔ́ sín tɔ́ ɖɔ nú vǐ tɔn sú ɖɔ: “Nɔ te bó ná ɖu nǔɖé bó ná dó mɔ hlɔ̌nhlɔ́n; énɛ́ ɔ́ gúdo ɔ́, mi na jɛ ali.”

⁶ Énɛ́ ɔ́, yě mɛ we lɛ́ɛ jínjɔ́n ayǐ bó ɖu nǔ bó nu ahan ɖó kpɔ́. Ée yě ɖu nǔ ɔ́, nyɔ̌nu ɔ́ sín tɔ́ ɖɔ nú vǐ tɔn sú ɖɔ: “Ayi towe ní j'ayǐ, nú a nǐ lɛ́ yí gbe bó dɔ́ fí.”

⁷ Levíi ví ɔ́ ká jló ná yi, lo ɔ́, asi tɔn tɔ́ jɛ kɔ n'i káká bɔ é gbɔ bó yí gbe bó lɛ́ dɔ́ fínɛ́ ɖokpó d'é jí.

⁸ Azǎn atɔ́ɔ́ngɔ́ ɔ́ gbe ɔ́, é fɔ́n zǎn bó ná yi, bɔ asi tɔn tɔ́ ɖɔ n'i ɖɔ: “To ɖu nǔ hwɛ̌; mi zé yiyi ɔ́ ɖó hwelɛ́kɔ.” Énɛ́ ɔ́, yě ɖu nǔ ɖó kpɔ́.

⁹ Ée Levíi ví ɔ́ jló ná yi kpó asi tɔn kpó, kpódó mɛsɛntɔ́ tɔn kpó ɔ́, asi tɔn tɔ́ ɖɔ n'i ɖɔ: “Kpɔ́n! Gan mɛ ko sɛ yi, ablu ko ɖo dǐdó wɛ, mi gbɔ bó dɔ́ ayǐ. Ayi towe ní j'ayǐ, nú a nǐ lɛ́ dɔ́ fí ɖokpó d'é jí. Énɛ́ ɔ́, mi ná fɔ́n zǎn sɔ bó ná yi xwé.

¹⁰ “Levíi ví ɔ́ ká gbɛ́ gayɛnu ɖɔ émí kún ná nɔ ayǐ ó, bó wlí ali ɖidó kpó asi tɔn kpó, kpódó tócí tɔn we e è blǎ kpa ná lɛ́ɛ kpó. Yě wǎ Jebuzi; fínɛ́ wɛ è nɔ ylɔ́ din ɖɔ Jeluzalɛ́mu.”

¹¹ Ée yě sɛ́ kpɔ́ toxo ɔ́, gan mɛ ko sɛ yi bǐ, bɔ mɛsɛntɔ́ ɔ́ ɖɔ nú gǎn tɔn ɖɔ: “Mǐ ní yi dɔ́ Jebuzinu lɛ́ɛ sín toxo mɛ.”

¹² Gǎn tɔn ka yí gbe n'i ɖɔ: “Éeǒ! Mǐ ná yi toxo e mɛ mɛ e ma nyí togun Mawu tɔn ǎ lɛ́ɛ ɖe, bɔ Izlayɛ́li ví lɛ́ɛ ɖě ma ɖe ɔ́ ɖěbǔ mɛ ǎ. Mǐ ná hun káká yi Giveya.”

¹³ É lɛ́ ɖɔ nú mɛsɛntɔ́ tɔn ɖɔ: “Mǐ ní tɛ́nkpɔ́n bó yi Giveya abǐ Hlama; mǐ ná dɔ̌ toxo we énɛ́ lɛ́ɛ ɖokpó mɛ.”

¹⁴ Bɔ yě wlí ali bó ɖidó. Giveya jɛ wɛ yě ɖe ɖo Bɛnjamɛ́ɛ sín ayǐkúngban jí, bɔ hwe yi xɔ.

¹⁵ Yě yi toxo énɛ́ ɔ́ mɛ, bó lin ɖɔ émí ná dɔ́ fínɛ́. Levíi ví ɔ́ byɔ́ toxo ɔ́ mɛ, bó yi nɔ te ɖo tokplétɛn ɔ́; lo ɔ́, mɛ ɖěbǔ ylɔ́ yě dó xwé gbe ǎ.

¹⁶ Dǎwe nyɔ̌xónɔ ɖé gosín gleta, bó wá toxo ɔ́ mɛ ɖo gbadanu ɖokpó énɛ́ ɔ́. Eflayímu sín sókan ɔ́ mɛ nu wɛ nyí dǎwe ɔ́. Lo ɔ́, Giveya wɛ é nɔ́ nɔ, ɖo Bɛnjamɛ́ɛ ví lɛ́ɛ sín to mɛ.

¹⁷ Dǎwe énɛ́ ɔ́ mɔ jǒnɔ e ɖo te ɖo fínɛ́ ɔ́ bó kanbyɔ́ ɛ ɖɔ: “Fítɛ́ a gosín? Fítɛ́ a xwe?”

¹⁸ Levíi ví ɔ́ ka yí gbe n'i ɖɔ: “Bɛteleyɛ́mu wɛ mǐ gosín ɖo Judáa bó wá xwe fí ɖé, ɖo Eflayímu sókan mɛ bó ká ɖo gblǒlǒ mɛ. Fínɛ́ wɛ un nɔ́ nɔ; Bɛteleyɛ́mu wɛ un wá yi, bó lɛ́ kɔ wá xweyǐgbe xwé. Mɛ ɖěbǔ ka ylɔ́ mǐ dó xwé gbe ǎ;

¹⁹ Có mǐ ka hɛn ama kpó gběhan kpó nú tócí mǐtɔn lɛ́ɛ, bó hɛn nǔɖuɖu kpó vɛ̌ɛn kpó nú nyɛ kpó asi ce kpó, kpódó mɛsɛntɔ́ ce kpán. Nǔɖé hwedó mǐ ǎ.”

²⁰ Énɛ́ ɔ́, dǎwe ɔ́ ɖɔ n'i ɖɔ: “Doo nú we! Un ná kpé nukún wǔtu towe ɖo nǔ e ná hu dó we lɛ́ɛ mɛ; a ɖǒ ná dɔ́ tokplétɛn fí ǎ.”

²¹ Ée é ɖɔ mɔ̌ ɔ́, é kplá yě yi xwé gbe, bó ná gběhan xúxú tócí lɛ́ɛ. Yědɛɛ lɛ́ɛ ká klɔ́ afɔ, bó ɖu nǔ bó nu ahan.

²² Hwenu e yě ɖo nǔ ɖu wɛ ɔ́, súnnu nǔɖégótegó e ɖo toxo ɔ́ mɛ lɛ́ɛ dó ahwan gbě bó xá xwé ɔ́, bó xúxú hɔn lobo ɖɔ nú dǎwe xwétɔ́ degénɔ kpikpoe ɔ́ ɖɔ: “Nya e a yi dó xwé gbe ɔ́, ɖe e tɔ́n bónú mǐ nǎ ɖó xó xá ɛ.”

²³ Dǎwe degénɔ ɔ́ tɔ́n, bó ɖɔ nú yě ɖɔ: “Xɔ́ntɔn ce lɛ́ɛ mi, mi kɛnklɛ́n bó má wa nǔ nyanya e wa gbé mi ja ɔ́ ó. Mi ma mɔ ɖɔ nya élɔ́ ɔ́, jǒnɔ ce wɛ a? Hǔn mi bo ma dó nǔ baɖabaɖa ɖé sin xá ɛ ó.

²⁴ Mi ɖótó! Un ɖó nyɔ̌nuví ɖokpó, é tunwun súnnu kpɔ́n ǎ, bɔ nya élɔ́ ɖó asi ɖokpó. Un ná kplá yě wá nú mi bɔ nǔɖé jló mi ɔ́, mi ná sɔ́ yě dó wá ná. Lo ɔ́, mi ma dó nǔ nyanya ɖé sin xá dǎwe élɔ́ ó.”

²⁵ É ɖɔ mɔ̌ có, mɛ lɛ́ɛ jló ná se étɔn ǎ. Énɛ́ ɔ́, Levíi ví ɔ́ kplá asi tɔn yi jó nú yě ɖo kɔ́xo. Yě ɖó xó xá ɛ zɛ jlɛ̌ wú ɖo zǎn ɔ́ mɛ káká bó wa jó e dó ɖo ayǐtéhɔ̌nnu.

²⁶ Ée wun jɛ kinkɛn jí ɔ́, nyɔ̌nu ɔ́ wa jɛ ayǐ jɛ dǎwe degénɔ e xwé gbe asú tɔn ɖe ɔ́ sín hɔn jí. É nɔ fínɛ́ káká bɔ ayǐ hɔ́n.

²⁷ Ée é wá su zǎnzǎn ɔ́, asú tɔn yi hun hɔn, bó tɔ́n bó ná wlí ali tɔn. É mɔ asi tɔn ɖo ayǐmlɔ́mlɔ́ ɖo xwé ɔ́ nukɔn, bɔ alɔ tɔn lɛ́ɛ ɖo kpekán ɔ́ jí.

²⁸ Bɔ asú tɔn ɖɔ n'i ɖɔ: “Sí te, mǐ ɖo yiyi wɛ.” Lo ɔ́, nyɔ̌nu ɔ́ kɛ nu ǎ. Énɛ́ ɔ́, nya ɔ́ zé asi tɔn ɖó tócí tɔn jí, bó ɖidó xwé.

²⁹ Ée é wá jɛ xwé gbe ɔ́, é zé jǐví bó já asi tɔn sín cyɔ ɖó donu wěwe, bó sɛ́ dó akɔta Izlayɛ́li tɔn wěwe lɛ́ɛ ɖokpó ɖokpó.

³⁰ Mɛ e mɔ nǔ énɛ́ ɔ́ lɛ́ɛ bǐ ɖɔ: “Sín hwenu e Izlayɛ́li ví lɛ́ɛ ko tɔ́n sín Ejípu ɔ́ káká wá jɛ égbé ɔ́, nǔ lěhunkɔtɔn jɛ kpɔ́n gbeɖé ǎ, è ka mɔ kpɔ́n gbeɖé ǎ. Mi gbéjé xó énɛ́ ɔ́ kpɔ́n, bó mɔ miɖée lobo ɖe gbeta ɖé tɔ́n.”