Hwɛɖɔtɔ́ 16 - MAWUXÓWÉMA

Sanmusɔ́ɔn ɖe hɔntogbó Gaza tɔn ɔ́ síin

¹ Sanmusɔ́ɔn yi Gaza toxo mɛ gbe ɖokpó, bó mɔ nyɔ̌nu agalɛtɔ́ ɖé, lobo yi dɔ́ xwé tɔn gbe.

² Mɛ e ɖo toxo ɔ́ mɛ lɛ́ɛ se ɖɔ Sanmusɔ́ɔn ɖo fínɛ́. Yě xá fí ɔ́, bó tɔ wu n'i ɖo toxo ɔ́ sín hɔntogbó jí, ɖo zǎn ɔ́ bǐ mɛ. Lo ɔ́, yě wa nǔ ɖěbǔ nú Sanmusɔ́ɔn ɖo zǎn ɔ́ mɛ ǎ; yě ɖo linlin wɛ ɖɔ émí ná nɔ te jɛ zǎnzǎn, bó ná hu i.

³ Lo ɔ́, Sanmusɔ́ɔn nɔ ayǐmlɔ́mlɔ́ káká bɔ zǎn vlɔ́ ɖó we. Ée zǎn vlɔ́ ɖó we ɔ́, é sí te bó zunfán toxo ɔ́ sín hɔntogbó lɛ́ɛ kpó hɔnkpo we lɛ́ɛ kpó, bó hɔn yě sín do mɛ kpó gan e è dǒ sú hɔntogbó ɔ́ ná lɛ́ɛ kpó, bó zé ɖó abɔ̌ ta, lobo bɛ́ yě yi ɖó só e ɖo Eblɔ́n nukɔn ɔ́ ta.

Dalila slɛ́ Sanmusɔ́ɔn

⁴ Énɛ́ ɔ́ gúdo ɔ́, Sanmusɔ́ɔn wá mɔ nyɔ̌nu ɖé bó yí wǎn n'i. Dalila wɛ nyɔ̌nu ɔ́ nɔ́ nyí, bó nɔ́ nɔ Sɔlɛ́ku tɔdo mɛ.

⁵ Axɔ́sú Filisitɛ́ɛn lɛ́ɛ tɔn atɔ́ɔ́n lɛ́ɛ wá ɖɔ nú Dalila ɖɔ: “Blɛ̌ Sanmusɔ́ɔn bónú é ní ɖɔ fí e hlɔ̌nhlɔ́n alɔkpa énɛ́ ɔ́ nɔ gosín wá n'i ɔ́ kpó lě e è nǎ sixú kpé wǔtu tɔn gbɔn é kpó nú we. A se bó ɖɔ nú mǐ ɔ́, mǐ nǎ kpé wǔ tɔn bó blá ɛ. Énɛ́ ɔ́, mǐ mɛ ɖokpó ɖokpó ná ná we gankwɛ́ afatɔ́n kanwe ko (1.100).”

⁶ Ée yě ɖɔ mɔ̌ nú Dalila ɔ́, é yi kanbyɔ́ Sanmusɔ́ɔn ɖɔ: “Hlɔ̌nhlɔ́n alɔkpa énɛ́ ɔ́ e a ɖǒ ɔ́, kɛnklɛ́n bó ɖɔ fí e a ba sín ɔ́ nú mì. Étɛ́ è nǎ dó blá we, bó ná sixú kpé wǔ we?”

⁷ Sanmusɔ́ɔn yí gbe n'i ɖɔ: “Ényí è zě kan yɔ̌yɔ́ e ma kó xú ǎ é tɛ́nwe dó blá mì ɔ́, un sɔ́ ná dó hlɔ̌nhlɔ́n ǎ, bó ná cí gbɛtɔ́ kpaa ɖé ɖɔhun.”

⁸ Bɔ axɔ́sú Filisitɛ́ɛn lɛ́ɛ tɔn lɛ́ɛ hɛn kan yɔ̌yɔ́ e ma kó xú ǎ é tɛ́nwe wá nú Dalila, bɔ é dó blá Sanmusɔ́ɔn ná.

⁹ Cóbónú é ka ná bló mɔ̌ ɔ́, é ko fɔ mɛ ɖé lɛ́ɛ hwlá dó xɔnɔnɔ mɛ. Tlóló tɛn tɔn mɛ ɔ́, é sú xó ɖɔ: “Sanmusɔ́ɔn, Filisitɛ́ɛn lɛ́ɛ wá ahwan tɔ́n we gbé.” Sanmusɔ́ɔn ka hɛn kan lɛ́ɛ wɛ́n ɖi fyɔ́ wɛ yě fyɔ́ ɖɔhun. Énɛ́ ɔ́, è mɔ do nú fí e é nɔ ba hlɔ̌nhlɔ́n sín ɔ́ ǎ.

¹⁰ Dalila ɖɔ nú Sanmusɔ́ɔn ɖɔ: “A ɖǒ adingban dó blɛ́ mì. Din ɔ́, kɛnklɛ́n bó ɖɔ nǔ e è nǎ dó blá we ná ɔ́ nú mì.”

¹¹ Sanmusɔ́ɔn ka ɖɔ n'i ɖɔ: “Ényí è zě kan yɔ̌yɔ́ e è ma ko zán kpɔ́n ǎ ɔ́ dó blá mì ɔ́, un sɔ́ ná dó hlɔ̌nhlɔ́n ǎ, bó ná cí gbɛtɔ́ kpaa ɖé ɖɔhun.”

¹² Bɔ Dalila zé kan yɔ̌yɔ́ dó blá ɛ ná. Énɛ́ ɔ́ gúdo ɔ́, é sú xó bó ɖɔ: “Sanmusɔ́ɔn, Filisitɛ́ɛn lɛ́ɛ wá ahwan tɔ́n we gbé.” Cóbónú é ká ná bló mɔ̌ ɔ́, é ko lɛ́ fɔ mɛ ɖé lɛ́ɛ hwlá dó xɔnɔnɔ mɛ. Bɔ Sanmusɔ́ɔn wɛ́n kan e è dǒ blá ɛ ná lɛ́ɛ avɔkan ɖɔhun.

¹³ Dalila ɖɔ nú Sanmusɔ́ɔn ɖɔ: “A lɛ̌ ɖó adingban dó blɛ́ mì. Din ɔ́, ɖɔ xó nǔgbó nú mì; ɖɔ nǔ e è nǎ dó blá we ná ɔ́ nú mì.” Sanmusɔ́ɔn ɖɔ n'i ɖɔ: “Ényí a lɔn ɖabláblá tɛ́nwe e ɖo ta ce lɛ́ɛ ɖo avɔlɔnkpɔn mɛ ɔ́, un sɔ́ ná dó hlɔ̌nhlɔ́n ǎ, bó ná cí gbɛtɔ́ kpaa ɖé ɖɔhun.”

¹⁴ Dalila xwe Sanmusɔ́ɔn dó amlɔ mɛ, bó lɔn ɖabláblá tɛ́nwe e ɖo ta tɔn lɛ́ɛ ɖo avɔlɔnkpɔn mɛ; énɛ́ ɔ́ gúdo ɔ́, é sú xó ɖɔ: “Sanmusɔ́ɔn, Filisitɛ́ɛn lɛ́ɛ wá ahwan tɔ́n we gbé.” Bɔ Sanmusɔ́ɔn fɔ́n sín amlɔ mɛ bó hɔn avɔlɔnkpɔn ɔ́ kpó kpo ɔ́ kpó kpódó wlɔ ɔ́ kpó.

¹⁵ Dalila ka ɖɔ n'i ɖɔ: “A ɖeji dó wǔtu ce ǎ, bó ká nɔ́ ɖɔ émí yí wǎn nú mì a? Azɔn atɔn nɛ́ a blɛ̌ mì, bó gbɛ́ fí e a nɔ ba hlɔ̌nhlɔ́n ɖaxó énɛ́ ɔ́ sín ɔ́ ɖɔ nú mì nɛ́.”

¹⁶ Ée Dalila nɔ ɖo xó ɖokpó lɛ́ɛ ɖɔ nú Sanmusɔ́ɔn wɛ ayǐhɔ́ngbe ayǐhɔ́ngbe, bó ma ná agbɔ̌n ɛ ɖěbǔ ǎ, bɔ tagba e dó n'i wɛ é ɖe ɔ́ wá kpé agbɔ̌n n'i bǐ, bɔ é má sɔ́ sixú nɔ nu ǎ ɔ́,

¹⁷ é gbɔ bo ɖɔ xomɛ n'i; é ɖɔ n'i ɖɔ: “È kpa ɖa e ɖo ta ce ɔ́ kpɔ́n gbeɖé ǎ, ɖó è ko sɔ́ mì ɖó vo nú Mawu cóbɔ è ji mì. Ényí è kpa ɖa nú mì ɔ́, un sɔ́ ná ɖó hlɔ̌nhlɔ́n ǎ, bó ná cí gbɛtɔ́ kpaa ɖé ɖɔhun.”

¹⁸ Dalila mɔ ɖɔ Sanmusɔ́ɔn ɖɔ xomɛ nú émí, lobo yi ɖɔ nú axɔ́sú Filisitɛ́ɛn lɛ́ɛ tɔn lɛ́ɛ ɖɔ: “Mi sixú wá gayɛnu ɖó é ɖɔ xomɛ nú mì lo.” Nǔgbó ɔ́, yě yi Dalila gɔ́n, bɔ mɛ ɖokpó ɖokpó hɛn akwɛ́ e sín akpá e é dó n'i é.

¹⁹ Dalila xwe Sanmusɔ́ɔn dó amlɔ mɛ, bɔ é dɔ́ amlɔ jɛ akɔn tɔn, bɔ é ylɔ́ nya ɖokpó, bɔ nya ɔ́ wá xwlɛ́ ɖabláblá tɛ́nwe e ɖo Sanmusɔ́ɔn ta lɛ́ɛ síin. Din ɔ́, Dalila ɖu ɖo Sanmusɔ́ɔn jí, ɖó é sɔ́ ɖó hlɔ̌nhlɔ́n ɖěbǔ ǎ.

²⁰ Énɛ́ ɔ́, Dalila sú xó, bó ɖɔ: “Sanmusɔ́ɔn, Filisitɛ́ɛn lɛ́ɛ wá ahwan tɔ́n we gbé.” Sanmusɔ́ɔn ka fɔ́n sín amlɔ mɛ, bó vɛdó ɖɔ émí ná gló yě, bó ná gán ɖ'é mɛ lě e émí nɔ́ kó bló gbɔn ɔ́ wɛ sín; ɖó é tunwun ɖɔ Mawu Mavɔmavɔ ko ɖe alɔ sín kan émítɔn mɛ ǎ.

²¹ Lo ɔ́, Filisitɛ́ɛn lɛ́ɛ wlí i, bó tɔ́n nukún i; yě kplá ɛ yi Gaza, bó zé ganvɔ sín wlɔ dó blá ɛ ná, bó zɔ́n ɛ gǎnnugǎnnu ɖɔ é ní nɔ li nǔ ɖo sé kɔn, ɖo gankpá mɛ.

²² Hwenɛ́nu ɔ́, ɖa tɔn e è kpa lɛ́ɛ lɛ́ jɛ wǔwú jí.

Nǔ gǔdo gúdo tɔn e Sanmusɔ́ɔn wa ɔ́ kpó kú tɔn kpó

²³ Axɔ́sú Filisitɛ́ɛn lɛ́ɛ tɔn lɛ́ɛ sɛ ta kplé gbe ɖokpó, bó ná ɖu ɖuɖéjí e yě ɖó ɔ́ sín xwe, bó ná sá vɔ̌ ɖaxó ɖokpó nú vodún yětɔn Dagɔ́ni. Yě ɖo han ji wɛ ɖɔ: “Vodún mǐtɔn jó Sanmusɔ́ɔn, kɛntɔ́ mǐtɔn ɔ́ nú mǐ.”

²⁴ Ée Filisitɛ́ɛn lɛ́ɛ mɔ mɔ̌ ɔ́, yě lɔmɔ̌ jɛ susu kpa nú vodún yětɔn jí ɖɔ: “Vodún mǐtɔn jó Sanmusɔ́ɔn, kɛntɔ́ mǐtɔn ɔ́ nú mǐ; é wɛ gba to mǐtɔn, bó hu mɛ mǐtɔn lɛ́ɛ gěgé.”

²⁵ Ée yě bǐ ɖo awǎjijɛ mɛ mɔ̌ ɔ́, yě byɔ́ ɖɔ è nǐ kplá Sanmusɔ́ɔn wá bónú é ná dó nǔkiko nu nú émí. È ka yi kplá ɛ wá sín gankpá mɛ, bɔ é jɛ manahɛn vlɛ́ jí ɖo nukɔn yětɔn; énɛ́ ɔ́, è sɔ́ ɛ ɖó vodún xɔ yětɔn ɔ́ sín dotín lɛ́ɛ tɛ́ntin.

²⁶ Bɔ é ɖɔ nú nyaví e hɛn alɔ tɔn bó ɖo ali xlɛ́ ɛ wɛ ɔ́ ɖɔ: “Kplá mì, bó sɔ́ alɔ ce yi ɖó dotín e jí vodúnxɔ ɔ́ jínjɔ́n lɛ́ɛ wú, bónú má mɔ tɛn gán jɛ wú.”

²⁷ Súnnu kpó nyɔ̌nu kpó ká gɔ́ vodúnxɔ ɔ́ mɛ hwenɛ́nu. Axɔ́sú Filisitɛ́ɛn lɛ́ɛ tɔn atɔ́ɔ́n lɛ́ɛ ɖo fínɛ́, bɔ gbɛtɔ́ ná yi afɔwó-afatɔ́n (3.000) mɔ̌ ɖo xɔ ɔ́ ta aga, bó ɖo manahɛn e vlɛ́ wɛ Sanmusɔ́ɔn ɖe ɔ́ kpɔ́n wɛ.

²⁸ Énɛ́ ɔ́, Sanmusɔ́ɔn ɖɔ nú Mawu Mavɔmavɔ ɖɔ: “Aklúnɔ, Mawu Mavɔmavɔ, flín mì; áo! Mawu, lɛ̌ ná hlɔ̌nhlɔ́n mì gayɛnu, bónú ɖo nukúnxwixwe ɖokpó mɛ ɔ́, má zé Filisitɛ́ɛn lɛ́ɛ dó ba hlɔn kpowun ɖó nukún ce we lɛ́ɛ e yě tɔ́n ɔ́ wú.”

²⁹ Ée Sanmusɔ́ɔn ɖɔ mɔ̌ ɔ́, é ɖó alɔ dotín tɛ́ntin mɛ tɔn we e jí vodún xɔ ɔ́ ɖe lɛ́ɛ wú; é zé aɖisílɔ tɔn dó tun dotín ɖokpó, bó zé amyɔlɔ tɔn dó tun dotín ɖě ɔ́.

³⁰ Bó sú xó bó ɖɔ: “Nyɛ kpó Filisitɛ́ɛn lɛ́ɛ kpó ní kú zɛ̌ɛ́n!” Ée é ɖɔ mɔ̌ ɔ́, é sísɛ́ dotín lɛ́ɛ kpó hlɔ̌nhlɔ́n tɔn bǐ kpó, bɔ vodún xɔ ɔ́ hɔ́ jɛ axɔ́sú lɛ́ɛ kpó mɛ e ɖo xɔ ɔ́ mɛ lɛ́ɛ bǐ kpó jí. Mɛ e é hu, bɔ yě kú kpó é kpó gbe nɛ́ gbe lɛ́ɛ sukpɔ́ hú mɛ e é hu káká jɛ gbe nɛ́ gbe é.

³¹ Nɔví tɔn lɛ́ɛ kpó hɛ̌nnumɔ tɔn bǐ kpó wá sɔ́ cyɔ tɔn. Yě zě é yi ɖi dó tɔ́ tɔn Manɔwáxi sín yɔdo mɛ ɖo Soléa kpó Ɛcitawɔ́lu kpó tɛ́ntin. Xwe ko wɛ Sanmusɔ́ɔn nɔ Izlayɛ́li ví lɛ́ɛ nu xɔ.