Hwɛɖɔtɔ́ 15 - MAWUXÓWÉMA

Sanmusɔ́ɔn ba hlɔn

¹ Azǎn ɖé jɛ wá yi, bɔ Sanmusɔ́ɔn yi ba asi tɔn kpɔ́n, ɖo hwenu e è ɖo jinukún ya wɛ é. É hɛn lɛ̌ngbɔ́ví ɖokpó wá n'i. É byɔ́ ɖɔ émí ná yi asi émítɔn gɔ́n ɖo xɔ tɔn mɛ; lo ɔ́, asi tɔn tɔ́ lɔn nǔ n'i ǎ.

² Asi tɔn tɔ́ ɔ́ gbɛ́ bó ɖɔ n'i ɖɔ: “Un vɛdó ɖɔ a kún sɔ́ yí wǎn n'i ó wɛ sín, bó kó sɔ́ ɛ ná xɔ́ntɔn towe e nɔ nǔ lɛ́ɛ nu gbe e gbe a kplá asi é. Amɔ̌, nɔví tɔn kpɛví nyɔ̌nu ɔ́ nyɔ́ ɖɛkpɛ hú i, a mɔ ɖó mɔ̌ ǎ cé? A sixú zé éyɛ́ ɖó tɛn tɔn mɛ.”

³ Sanmusɔ́ɔn ka ɖɔ: “Nú un wa nǔ ɖěbǔ nyi do nú Filisitɛ́ɛn lɛ́ɛ gayɛnu ɔ́, mɛ ɖěbǔ ná sixú kɛ nu d'é wú nú mì ǎ.”

⁴ Énɛ́ ɔ́, Sanmusɔ́ɔn yi bó wlí ayǐsájɛ afɔɖé kanwe ko (300). É fɔ zohwín gěgé; é slɛ́ ayǐsájɛ lɛ́ɛ sín sí ɖó kpɔ́ webɔ webɔ, bó blá zohwín ɖokpó ɖokpó dó sí e é slɛ́ lɛ́ɛ wú.

⁵ É tá zohwín lɛ́ɛ, bó ɖe kanlin lɛ́ɛ nyi te ɖo Filisitɛ́ɛn lɛ́ɛ sín jinukún gle mɛ, bó dó jinukún e è kplé lɛ́ɛ kpó éé kpo ɖo te ɖo hankán nu lɛ́ɛ kpó, kpódó olívutín lɛ́ɛ ɖésú kpán zo.

⁶ Bɔ Filisitɛ́ɛn lɛ́ɛ kan mɛ e wa mɔ̌ byɔ́, bɔ è yǐ gbe nú yě ɖɔ: “Sanmusɔ́ɔn wɛ. É wa nǔ gbɔn mɔ̌ ɖó asi tɔn tɔ́ Timunanu ɔ́ yí asi tɔn sín así tɔn, bó zé jó nú xɔ́ntɔn tɔn e nɔ nǔ lɛ́ɛ nu gbe e gbe é kplá asi é.” Énɛ́ ɔ́, Filisitɛ́ɛn lɛ́ɛ yi dó nyɔ̌nu ɔ́ kpó tɔ́ tɔn kpó zo gbɛɖe gbɛɖe.

⁷ Sanmusɔ́ɔn ka ɖɔ nú yě ɖɔ: “Mɔ̌ wɛ mi nɔ wa nǔ gbɔn a? Nǔ e mi bló nú mì ɔ́, un ma ba hlɔn tɔn ǎ ɔ́, un ná xwɛ ǎ.”

⁸ Ée é ɖɔ mɔ̌ ɔ́, é tɔ́n ahwan yě, bó hu mɛ gěgé ɖo yě mɛ; énɛ́ ɔ́ gúdo ɔ́, é yi cí sóxo ɖé mɛ ɖo sókan Etámu tɔn ɔ́ mɛ.

Sanmusɔ́ɔn sɔ́ tócí sín aglan dó fun ahwan ná

⁹ Filisitɛ́ɛn lɛ́ɛ wá sí ahwan te ɖo ayǐkúngban Judáa tɔn ɔ́ jí, bó sɛ́ ahwangɔnu yětɔn lɛ́ɛ dó Lɛ́xi sín gletoxo ɔ́ mɛ.

¹⁰ Súnnu e ɖo Judáa sín akɔta mɛ lɛ́ɛ kanbyɔ́ yě ɖɔ: “Nɛ̌ ka gbɔn bɔ mi wá ahwan tɔ́n mǐ gbé?” Bɔ yě yí gbe ɖɔ: “Sanmusɔ́ɔn wlí gbé wɛ mǐ ja, bó ná wa nǔ xá ɛ lě e é wa nǔ xá mǐ gbɔn é.”

¹¹ Énɛ́ ɔ́, súnnu e ɖo Judáa sín akɔta mɛ lɛ́ɛ afɔwó-afatɔ́n (3.000) yi sóxo e mɛ Sanmusɔ́ɔn ɖe ɔ́ kɔn, ɖo sókan Etámu tɔn ɔ́ mɛ, bó ɖɔ nú Sanmusɔ́ɔn ɖɔ: “A tunwun ganjí ɖɔ Filisitɛ́ɛn lɛ́ɛ wɛ kpa acɛ nú mǐ. A mɔ nǔ e wa xá mǐ wɛ a ɖe ɔ́ a?” Sanmusɔ́ɔn ka yí gbe nú yě ɖɔ: “Nǔ e yě wa xá mì ɔ́, wɛ un wa xá yě.”

¹² Bɔ yě lɛ́ ɖɔ: “Mǐ wá fí, bó ná blá we, lobo ná zé we jó nú Filisitɛ́ɛn lɛ́ɛ.” Sanmusɔ́ɔn ɖɔ nú yě ɖɔ: “Mi dó akpá nú mì ɖɔ mi ɖésúnɔ kún ná hu mì ó.”

¹³ Yě ká ɖɔ n'i ɖɔ: “Éeǒ! Mǐ jló ná hu we ǎ. Mǐ jló ná blá we, bó zé we yi jó nú yě kpowun wɛ.” Énɛ́ ɔ́, yě zě kan yɔ̌yɔ́ we dó blá ɛ ná bó kplá ɛ sín sókan ɔ́ mɛ.

¹⁴ Ée yě wá Lɛ́xi ɔ́, Filisitɛ́ɛn lɛ́ɛ wá kpé yě kpó awǒbóbó kpó. Énɛ́ ɔ́, yɛ Mawu Mavɔmavɔ tɔn wá Sanmusɔ́ɔn jí, bɔ kan e yě dó blá alɔ tɔn lɛ́ɛ ná lɛ́ɛ jɛ ayǐ sín alɔ tɔn, lɛ̌ɛnkan e ji zo ɔ́ ɖɔhun.

¹⁵ Sanmusɔ́ɔn mɔ tócí sín aglan yaɖéyaɖé ɖé. É dlɛ́n alɔ bó sɔ́ bó dó hu gbɛtɔ́ afatɔ́n (1.000) ná.

¹⁶ Énɛ́ ɔ́ gúdo ɔ́, é sú xó bó ɖɔ: “Un zé tócí sín aglan ɖokpó dó hu gbɛtɔ́ afatɔ́n (1.000) ná, tócí sín aglan ɖokpó wɛ un dó hu gbɛtɔ́ tɛ́.”

¹⁷ Ée é ɖɔ mɔ̌ ɔ́, é zé aglan ɔ́ nyi gbě; bɔ è nɔ ylɔ́ tɛn énɛ́ ɔ́ mɛ ɖɔ Hlamati-Lɛxi, tínmɛ tɔn wɛ nyí Aglansó.

¹⁸ Sinnugblá ɖaxó ɖé sin Sanmusɔ́ɔn bɔ é sú xó ylɔ́ Mawu Mavɔmavɔ ɖɔ é ní wá gɔ́ alɔ nú émí; é ɖɔ: “Mawu, hwi wɛ zɔ́n bɔ un ɖó ɖuɖéjí ɖaxó élɔ́; bɔ din ɔ́, sinnugblá ná sin mì káká bɔ un ná jɛ mɛ élɔ́ lɛ́ɛ e má nɔ́ sɛn we ǎ lɛ́ɛ sín alɔ mɛ wɛ a?”

¹⁹ Ée Sanmusɔ́ɔn ɖɔ mɔ̌ ɔ́, Mawu zɛ fí e só Lɛ́xi tɔn ɔ́ ɖó do ɖe ɔ́, bɔ sin jɛ tíntɔ́n sín mɛ jí. Sanmusɔ́ɔn nu sin bɔ hlɔ̌nhlɔ́n lɛ́ wá n'i. È nɔ ylɔ́ tɔjɔtɛn énɛ́ ɔ́ ɖɔ “Tɔjɔtɛn Kolée tɔn”; tínmɛ tɔn wɛ nyí tɔjɔtɛn mɛ e ylɔ́ mɛ é tɔn. Tɔjɔtɛn énɛ́ ɔ́ ɖo te káká jɛ din.

²⁰ Sanmusɔ́ɔn nyí gǎn ɖo Izlayɛ́li xɔ xwe ko ɖo Filisitɛ́ɛn lɛ́ɛ hwenu.