Hwɛɖɔtɔ́ 14 - MAWUXÓWÉMA

Nǔ nukɔntɔn e Sanmusɔ́ɔn wa lɛ́ɛ

¹ Sanmusɔ́ɔn yi Timuna gbe ɖokpó, bó mɔ ɖyɔ̌vǐ Filisitɛ́ɛn ɖé.

² Ée é lɛ́ kɔ yi xwé ɔ́, é ɖɔ nú mɛjitɔ́ tɔn lɛ́ɛ ɖɔ: “Un mɔ ɖyɔ̌vǐ Filisitɛ́ɛn ɖé ɖo Timuna, bɔ nǔ tɔn nyɔ́ nukún ce mɛ. É jló mì ɖɔ mi ná yi byɔ́ ɛ nú mì bónú má da.”

³ Mɛjitɔ́ tɔn lɛ́ɛ ka ɖɔ n'i ɖɔ: “A mɔ ɖyɔ̌vǐ ɖěbǔ ɖo akɔta towe mɛ abǐ togun mǐtɔn mɛ bó ná da ǎ, bɔ é nyí Filisitɛ́ɛn énɛ́ lɛ́ɛ e ma nɔ sɛn Mawu ǎ lɛ́ɛ mɛ wɛ a nǎ da asi ɖe a?” Bɔ Sanmusɔ́ɔn ɖɔ nú tɔ́ tɔn ɖɔ: “Da ɛ nú mì, ɖó éyɛ́ sín nǔ wɛ nyɔ́ nukún ce mɛ.”

⁴ Mɛjitɔ́ tɔn lɛ́ɛ ka tunwun ɖɔ Mawu Mavɔmavɔ wɛ zé linlin énɛ́ ɔ́ dó ayi mɛ nú vǐ yětɔn, bó ná mɔ nǔɖé wú bó ɖó dó, bó ná dó ba xó Filisitɛ́ɛn lɛ́ɛ ǎ. Đó hwe énɛ́ ɔ́ nu ɔ́, Filisitɛ́ɛn lɛ́ɛ wɛ ɖo acɛ kpa nú Izlayɛ́li ví lɛ́ɛ wɛ.

⁵ Sanmusɔ́ɔn kpó mɛjitɔ́ tɔn lɛ́ɛ kpó ɖidó Timuna. Ée yě jɛ vǐwungbo e ɖo gletoxo ɔ́ kpá ɔ́ mɛ ɔ́, kinnikínní wínnyáwínnyá ɖé dó gbe bó tɔ́n lobo kplɔ́ dó Sanmusɔ́ɔn.

⁶ Yɛ Mawu Mavɔmavɔ tɔn wá Sanmusɔ́ɔn jí, bɔ é tlɛ́n kinnikínní ɔ́ lě e è nɔ tlɛ́n lɛ̌ngbɔ́ví é ɖɔhun. É ká hɛn nǔ ɖěbǔ alɔ mɛ ǎ. É ɖɔ nǔ e é wa ɔ́ nú mɛjitɔ́ tɔn lɛ́ɛ ǎ.

⁷ É wlí ali tɔn bó yi, bó ɖɔ xó nú ɖyɔ̌vǐ Filisitɛ́ɛn ɔ́. Yɔkpɔ́ ɔ́ sín nǔ nyɔ́ nukún tɔn mɛ ɖésú.

⁸ Ée azǎn ɖé jɛ ɔ́, Sanmusɔ́ɔn lɛ́ kɔ yi Timuna é kpó mɛjitɔ́ tɔn lɛ́ɛ kpó, bó ná da vǐ ɔ́; ée é ɖo ali jí xweyǐgbe ɔ́, é zɛ bó yi kpɔ́n kinnikínní kúkú ɔ́; é mɔ bɔ wǐin kó dó, ɖo xúgloxú kinnikínní ɔ́ tɔn mɛ.

⁹ É fɔ wǐin ɔ́, bó ɖíɖɔ́ ɖě ɖo ali jí. É yi xwedó mɛjitɔ́ tɔn lɛ́ɛ wú, bó ná yě bɔ yě ɖíɖɔ́; é ká tínmɛ nú yě ɖɔ wǐin ɔ́, xúgloxú kinnikínní tɔn mɛ wɛ émí fɔ ɖe ǎ.

Sanmusɔ́ɔn ɖɔ nǔbasɔ́ ɖokpó nú Filisitɛ́ɛn lɛ́ɛ

¹⁰ Sanmusɔ́ɔn sín tɔ́ yi nyɔ̌nu ɔ́ gɔ́n bɔ Sanmusɔ́ɔn ylɔ́ agɔ̌ ɖokpó dó asi ɔ́ tamɛ, ɖó mɔ̌ wɛ dɔ̌nkpɛvú lɛ́ɛ nɔ bló gbɔn.

¹¹ Ée Filisitɛ́ɛn lɛ́ɛ mɔ ɛ lě ɔ́, yě cyán dɔ̌nkpɛvú gban (30), bónú yě ná nɔ kpɔ́ xá ɛ.

¹² Sanmusɔ́ɔn ɖɔ nú yě ɖɔ: “Un ná ɖɔ nǔbasɔ́ ɖokpó nú mi. Ényí mi tunwun nǔ e ɖɔ wɛ nǔbasɔ́ ɔ́ ɖe ɔ́, bó tínmɛ nú mì cóbɔ azǎn tɛ́nwe e ná ɖu agɔ̌ ɔ́ ná wɛ mǐ ɖe ɔ́ ná kpé ɔ́, un ná ná awu xɔ akwɛ́ gban (30) mi, bó ná lɛ́ ná gban (30) ɖěvo mi bɔ mi ná nɔ ɖyɔ́ ɖě lɛ́ɛ ná.

¹³ Ényí mi ma ka tunwun ǎ ɔ́, midɛɛ lɛ́ɛ wɛ ná ná awu xɔ akwɛ́ gban (30) mì, bó ná lɛ́ ná gban (30) ɖěvo mì, bɔ un ná dó nɔ ɖyɔ́ ɖě lɛ́ɛ ná.” Yě ká ɖɔ n'i ɖɔ: “Bo ɖɔ nǔbasɔ́ towe, mǐ ɖo tó ɖó we wɛ.”

¹⁴ Sanmusɔ́ɔn ɖɔ nú yě ɖɔ: “Nǔ e è nɔ ɖu ɔ́, tɔ́n sín nǔ e nɔ ɖu nǔ ɔ́ mɛ. Nǔ e víví ɔ́ tɔ́n sín nǔ e dó hlɔ̌nhlɔ́n ɔ́ mɛ. Étɛ́ wɛ nyí nǔ ɔ́?” Dɔ̌nkpɛvú lɛ́ɛ ká ko mɔ nǔbasɔ́ ɔ́ ǎ káká bó kó bló azǎn atɔn.

¹⁵ Azǎn tɛ́nwegɔ́ ɔ́ gbe ɔ́, yě ɖɔ nú Sanmusɔ́ɔn sín asi ɖɔ: “Blɛ̌ asú towe, bó ɖɔ n'i ɖɔ é ní tín nǔbasɔ́ ɔ́ mɛ nú mǐ; é má nyí mɔ̌ ǎ ɔ́, mǐ ná dǒ hwi kpó xwédo towe bǐ kpó zo. Ya mɛ ná dɔn mǐ dó wɛ mi ɖe wú wɛ mi ylɔ́ mǐ a?”

¹⁶ Sanmusɔ́ɔn sín asi yi ɖɔ n'i kpó avǐ kpó ɖɔ: “A yǐ wǎn nú mì ɖěbǔ ǎ; a gbɛ̌ wǎn nú mì! A ɖɔ nǔbasɔ́ ɖé nú mɛ ce lɛ́ɛ, bó ka tínmɛ nú mì ǎ.” Sanmusɔ́ɔn ka ɖɔ n'i ɖɔ: “Un tínmɛ nú tɔ́ ce ǎ, un ka tínmɛ nú nɔ ce ǎ; bɔ hwi wɛ un ná tínmɛ ná a?”

¹⁷ Asi tɔn ka ya avǐ n'i káká nú azǎn tɛ́nwe e yě ɖu agɔ̌ ɔ́ é; bɔ azǎn tɛ́nwegɔ́ ɔ́ gbe ɔ́, é gbɔ bó tínmɛ n'i, ɖó é ɖo tagba dó n'i wɛ dín. Énɛ́ ɔ́, tlóló jɛ́n é yi sɔ́ ɖɔ nú mɛ tɔn lɛ́ɛ.

¹⁸ Azǎn tɛ́nwegɔ́ ɔ́ gbe ɔ́, cóbónú hwe ná yi xɔ ɔ́, mɛ e ɖo toxo ɔ́ mɛ lɛ́ɛ wá ɖɔ nú Sanmusɔ́ɔn ɖɔ: “Ani wɛ víví hú wǐin? Ani wɛ dó hlɔ̌nhlɔ́n hú kinnikínní?” É ka yí gbe nú yě bó ɖɔ: “Ényí mi ma ko zé nyibúsixwɛ ce dó lɛ gle ǎ ɔ́, mi ná sixú tunwun nǔ e ɖɔ wɛ nǔbasɔ́ ce ɖe ɔ́ ǎ.”

¹⁹ Énɛ́ ɔ́, Yɛ Mawu Mavɔmavɔ tɔn wá ta nú Sanmusɔ́ɔn bɔ é yi Acikelɔ́ni. Ée é jɛ fínɛ́ ɔ́, é hu súnnu gban (30), bó yí awu yětɔn lɛ́ɛ, lobo bɛ́ jó nú mɛ e tín nǔbasɔ́ tɔn mɛ lɛ́ɛ. Énɛ́ ɔ́ gúdo ɔ́, é lɛ́ kɔ yi tɔ́ tɔn gɔ́n kpó xomɛsin ɖaxó kpó.

²⁰ È sɔ́ asi tɔn ɔ́ ná xɔ́ntɔn tɔn e nɔ nǔ lɛ́ɛ nu gbe e gbe é kplá asi é.