Hwɛɖɔtɔ́ 13 - MAWUXÓWÉMA

È ji Sanmusɔ́ɔn

¹ Izlayɛ́li ví lɛ́ɛ lɛ́ wa nǔ e má nyɔ́ Mawu Mavɔmavɔ nukún mɛ ǎ é; énɛ́ ɔ́ wɛ zɔ́n bɔ Mawu Mavɔmavɔ jó yě nú Filisitɛ́ɛn lɛ́ɛ xɔ xwe kanɖé.

² Nya ɖé tíin, bó ɖo gletoxo e è nɔ ylɔ́ ɖɔ Soléa ɔ́ mɛ, bɔ è nɔ ylɔ́ ɛ ɖɔ Manɔwáxi, bó ɖo akɔta Dan tɔn ɔ́ sín xwédo ɖé mɛ. Asi tɔn ji vǐ kpɔ́n gbeɖé ǎ.

³ Wɛnsagun Mawu Mavɔmavɔ tɔn ka wá tɔ́n dó nyɔ̌nu énɛ́ ɔ́ jí gbe ɖokpó, bó ɖɔ n'i ɖɔ: “Un tunwun ɖɔ a kún ɖó vǐ ó, ɖó wɛnsinɔ wɛ a nyǐ. Nǔ ɖo mɔ̌ có, a nǎ mɔ xo bó ná ji vǐ súnnu ɖokpó.

⁴ Bɛ́ sín din ɔ́, ma sɔ́ nɔ́ nu vɛ̌ɛn ɖě abǐ ahan syɛ́nsyɛ́n ɖěbǔ ó; ma ka ɖu nǔɖuɖu e nyí su é ɖěbǔ ó,

⁵ ɖó a nǎ mɔ xo bó ná ji vǐ súnnu ɖokpó. Hǎ ná jɛ ta tɔn kpɔ́n gbeɖé ǎ, ɖó vǐ énɛ́ ɔ́, è sɔ́ ɛ ɖó vo nú Mawu sín nɔ tɔn xo mɛ. É wɛ ná jɛ Izlayɛ́li ví lɛ́ɛ hwlɛ́n sín Filisitɛ́ɛn lɛ́ɛ sí jí.”

⁶ Nyɔ̌nu ɔ́ yi xwé, bó ɖɔ nú asú tɔn ɖɔ: “Đɛ̌mɛnu Mawu tɔn ɖokpó wá gɔ̌n ce; é cí wɛnsagun Mawu tɔn ɖɔhun, ɖó ninɔmɛ tɔn dó abaɖa. Un kan fí e é gosín ɔ́ byɔ́ ɛ ǎ; é ká ɖɔ nyǐkɔ tɔn nú mì ǎ.

⁷ É ɖɔ nú mì ɖɔ nyɛ na mɔ xo bó ná ji vǐ súnnu ɖokpó. É gbɛ́ nú mì ɖɔ bɛ́ sín din ɔ́, nyɛ ní má sɔ́ nu vɛ̌ɛn ɖě ó, nyɛ ní má sɔ́ nu ahan syɛ́nsyɛ́n ɖě ó; nyɛ ní má ká sɔ́ ɖu nǔɖuɖu e nyí su é ɖěbǔ ó, ɖó vǐ ɔ́, è nǎ sɔ́ ɛ ɖó vo nú Mawu, sín xo mɛ káká yi kúzán gbe tɔn.”

⁸ Énɛ́ ɔ́, Manɔwáxi asú tɔn ɔ́ sa vo nú Mawu Mavɔmavɔ ɖɔ: “Aklúnɔ, ɖɛ̌mɛnu towe e a sɛ́ dó mǐ ɖ'ayǐ ɔ́, kɛnklɛ́n bó lɛ́ sɛ́ ɛ dó mǐ bónú é ná kplɔ́n mǐ lě e mǐ nǎ nɔ gbɔn kpó vǐ súnnuví e è nǎ ji ɔ́ kpó é.”

⁹ Mawu yí gbe nú nǔ e Manɔwáxi byɔ́ ɛ é: Wɛnsagun Mawu Mavɔmavɔ tɔn lɛ́ wá nyɔ̌nu ɔ́ gɔ́n ɖo gleta. Asú tɔn ká ɖo akpá tɔn hwenɛ́nu ǎ.

¹⁰ Bɔ nyɔ̌nu ɔ́ kán wezun bó yi ɖɔ nú asú tɔn ɖɔ: “Vɛ̌ kpɔ́n! Nya e wá gɔ̌n ce azǎn nabí ɖé ɖíe ɔ́, lɛ́ wá tɔ́n dó jǐ ce.”

¹¹ Manɔwáxi ka xwedó asi tɔn azɔn ɖokpó; é sɛ yi nya ɔ́ gɔ́n, bó kanbyɔ́ ɛ ɖɔ: “Hwi wɛ ɖɔ xó nú asi ce a?” Nya ɔ́ ka yí gbe n'i ɖɔ: “Ɛɛn nyɛ wɛ.”

¹² Manɔwáxi lɛ́ yí xó bó ɖɔ: “É nyɔ́! Hwenu e xó e a ɖɔ lɛ́ɛ ná jɛ ɔ́, sɛ́n tɛ́ lɛ́ɛ wɛ mǐ ɖó ná xwedó dó hɛn vǐ ɔ́ ná? Étɛ́ wɛ mǐ ɖó ná wa n'i?”

¹³ Wɛnsagun Mawu Mavɔmavɔ tɔn ɔ́ ka ɖɔ nú Manɔwáxi ɖɔ: “Asi towe ɖó ná gɔn nǔ e sín sɛ́n un dó n'i lɛ́ɛ bǐ ɖu;

¹⁴ vǐwuntín sínsɛ́n ɖě ná jɛ nu tɔn ǎ, é ná nu vɛ̌ɛn ǎ; é ná nu ahan syɛ́nsyɛ́n ǎ; é ná ɖu nǔɖuɖu e nyí su é ɖěbǔ ǎ. É ní nyi sɛ́n e un dó n'i lɛ́ɛ ganjí.”

¹⁵ Énɛ́ ɔ́, Manɔwáxi ɖɔ nú wɛnsagun ɔ́ ɖɔ: “Kɛnklɛ́n bó nɔ te kpɛɖé bó ná ɖu nǔ. Mǐ nǎ ɖa lɛ̌ngbɔ́ví ɖokpó nú we.”

¹⁶ Wɛnsagun ɔ́ ka ɖɔ n'i ɖɔ: “Nú un na bo nɔ te din ɔ́, un sixú ɖu nǔ e a nǎ xwlé mì ɔ́ ǎ. Lo ɔ́, nú a jlǒ ɔ́, a sixú sá vɔ̌ e è nɔ dó zo ɔ́ nú Mawu Mavɔmavɔ.” Manɔwáxi ka tunwun ɖɔ wɛnsagun Mawu Mavɔmavɔ tɔn wɛ ɖo xó ɖɔ nú émí wɛ ǎ,

¹⁷ bó ɖɔ n'i ɖɔ: “Đɔ nyǐkɔ towe nú mì, bónú hwenu e xó e a ɖɔ lɛ́ɛ ná jɛ ɔ́, mǐ ná sixú kpa susu nú we.”

¹⁸ Wɛnsagun ɔ́ yí xó bó ɖɔ: “Étɛ́wú a jlǒ ná tunwun nyǐkɔ ce? Nyǐkɔ ɖé wɛ bó búdo.”

¹⁹ Manɔwáxi zé lɛ̌ngbɔ́ví ɔ́ kpó nǔníná ɔ́ kpó dó sá vɔ̌ ná nú Mawu Mavɔmavɔ ɖo awǐnnya jí. Hwenu e Manɔwáxi kpó asi tɔn kpó ɖo kpínkpɔ́n wɛ ɔ́, nǔ dó abaɖa ɖé jɛ.

²⁰ Ée myɔ ɖo vɔ̌sákpe ɔ́ jí gosín wɛ, bó ɖo jǐ yi wɛ ɔ́, wɛnsagun Mawu Mavɔmavɔ tɔn byɔ́ mɛ, bó ɖidó jǐxwé. Ée Manɔwáxi kpó asi tɔn kpó mɔ mɔ̌ ɔ́, yě j'ayǐ bó xwe agbɔ̌nnusú do.

²¹ Wɛnsagun Mawu Mavɔmavɔ tɔn ka sɔ́ tɔ́n dó yě jí ɖě ǎ. Manɔwáxi ka wá mɔ nǔ jɛ wú ɖɔ wɛnsagun Mavɔmavɔ tɔn wɛ.

²² Bó ɖɔ nú asi tɔn ɖɔ: “Mǐ kú, ɖó mǐ mɔ Mawu.”

²³ Asi tɔn ka ɖɔ n'i ɖɔ: “Ényí Mawu Mavɔmavɔ ko jló ná hu mǐ wɛ ɔ́, é ná yí vɔ̌ e mǐ sá n'i ɔ́ kpó ée mǐ ná ɛ ɔ́ kpó ǎ; é ná ɖe nǔ énɛ́ lɛ́ɛ bǐ xlɛ́ mǐ ǎ; é ka ná ɖɔ xó mɔ̌hunkɔ lɛ́ɛ nú mǐ din ǎ.”

²⁴ Nyɔ̌nu ɔ́ ji vǐ súnnu ɖokpó, bó sun nyǐ i ɖɔ Sanmusɔ́ɔn. Vǐ ɔ́ su, bɔ Mawu Mavɔmavɔ dó acɛ jǐ tɔn.

²⁵ Ahwankpá Dan tɔn ɔ́ mɛ wɛ é ɖe, ɖo Soléa kpó Ɛcitawɔ́lu kpó tɛ́ntin, hwenu e yɛ Mawu Mavɔmavɔ tɔn wá jǐ tɔn bɔ é wa azɔ̌ nukɔntɔn ɔ́ é.