Jaki 4 - MAWUXÓWÉMA

È ma yí wǎn nú gbɛmɛ fí sín nǔ lɛ́ɛ ó

¹ Fítɛ́ ahwan e ɖo tɛ́ntin mitɔn lɛ́ɛ kpódó jlɛ e ɖo tɛ́ntin mitɔn lɛ́ɛ kpó ka nɔ gosín? Nǔjlómɛ díngan mitɔn e ɖo ahwan fun wɛ hwebǐnu ɖo agbaza mitɔn mɛ lɛ́ɛ mɛ wɛ yě nɔ gosín.

² Mi nɔ jló mɛɖévonú; lo ɔ́, mi sixú mɔ ǎ; bɔ énɛ́ ɔ́ wú ɔ́, mi ɖo gbesisɔ mɛ, bó ná hu mɛ; nǔ nɔ jló mi; mi ka sixú mɔ ǎ, bɔ énɛ́ ɔ́ nɔ́ zɔ́n bɔ mi nɔ jɛ jlɛ ɖɔ jí, bó nɔ jɛ ahwan fun jí. Mi nɔ mɔ nǔ e ba wɛ mi ɖe ɔ́ ǎ, ɖó mi nɔ byɔ́ Mawu ǎ.

³ Mi na bo byɔ́ ɔ́, mi nɔ mɔ ǎ, ɖó ayixa nyanya wɛ mi nɔ dó byɔ́: nǔ e byɔ́ wɛ mi ɖe ɔ́, mi jló ná zán nú mi ɖésúnɔ sín gbɛɖuɖu.

⁴ Nǔ gbejímánɔ-númawutɔ́ élɔ́ lɛ́ɛ! Mi tunwun ɖɔ è zun xɔ́ntɔn xá gbɛ ɔ́, Mawu sín kɛntɔ́ wɛ è nyǐ ǎ cé? Mɛ e jló ná nyí gbɛmɛ fí sín nǔ lɛ́ɛ sín xɔ́ntɔn ɔ́ nɔ sɔ́ éɖée dó húzú Mawu sín kɛntɔ́.

⁵ Mi ma vɛdó ɖɔ yǎyá wɛ è wlǎn xó élɔ́ dó Mawuxówéma ɔ́ mɛ sín ó: è wlǎn ɖɔ: “Mawu nɔ zé wǔhwinhwan dó byɔ́ yɛ e é sɔ́ dó mǐ mɛ ɔ́ ná.”

⁶ É ɖo mɔ̌ có, é nɔ lɛ́ ná fɛ́nú e hú gǎn mɔ̌ ɔ́ mǐ; ɖó Mawuxówéma ɔ́ ɖɔ: “Mawu nɔ gbɛ́ goyítɔ́ lɛ́ɛ sín xó; lo ɔ́, é nɔ ná fɛ́nú mɛ e nɔ sɔ́ yěɖée hwe lɛ́ɛ.”

⁷ Hǔn, mi bo hwíhwɛ́ miɖée ɖó Mawu glɔ́; mi ló dǒ ɖo awǒvi nukɔn; énɛ́ ɔ́, é ná hɔn yi zɔ nú mi.

⁸ Mi sɛkpɔ́ Mawu; énɛ́ ɔ́ é ná sɛkpɔ́ mi. Mi hwɛhutɔ́ lɛ́ɛ, mi klɔ́ alɔ mitɔn lɛ́ɛ; mi yɛmɛnúwatɔ́ lɛ́ɛ, mi slá wǔ nú ayixa mitɔn lɛ́ɛ!

⁹ Mi nɔ aluwɛ mɛ; mi ya avǐ, bó ná alě; nǔ wɛ mi ɖó ná ko ǎ; avǐ wɛ mi ɖó ná ya, bó zé awǎjijɛ mitɔn dó húzú aluwɛ ná.

¹⁰ Mi sɔ́ miɖée hwe ɖo Aklúnɔ nukɔn, énɛ́ ɔ́ é ná sɔ́ mi su.

È ma ɖó hwɛ nú nɔví ɖé ó

¹¹ Nɔví lɛ́ɛ mi, mi ma nɔ ɖɔ miɖée sín nǔ nyanya ó. Mɛ e nɔ ɖɔ nɔví tɔn sín nǔ nyanya, abǐ é nɔ ɖɔ hwɛ dó e ɔ́, sɛ́n ɔ́ sín nǔ nyanya ɖɔ wɛ é ɖe, bó ɖo hwɛ ɖɔ dó sɛ́n ɔ́ wɛ. Nú a ka ɖo hwɛ ɖɔ dó sɛ́n ɔ́ wɛ hǔn, a sɔ́ nyí mɛ e ɖo tónú se n'i wɛ ɔ́ ǎ; lo ɔ́, a nyǐ mɛ e nɔ ɖɔ hwɛ dó sɛ́n ɔ́ é.

¹² Mawu ɖokpónɔ géé wɛ nɔ dó sɛ́n; é ɖokpónɔ géé wɛ nyí hwɛɖɔtɔ́; é ɖokpónɔ géé wɛ sixú hwlɛ́n mɛ bo sixú lɛ́ hu mɛ. Hwi mɛ e ɖo hwɛ ɖɔ dó nɔzo towe wɛ ɔ́, mɛ̌ wɛ a sɔ́ hwiɖée dó mɔ ná?

È ma yí go ó

¹³ Din ɔ́, mi mɛ e nɔ ɖɔ: “Égbé abǐ sɔ ɔ́, mǐ ná yi to lě mɛ; mǐ ná nɔ fínɛ́ xɔ xwe ɖokpó; mǐ ná wa ajɔ̌ bó ná mɔ akwɛ́” lɛ́ɛ ɔ́, mi ɖótó mì.

¹⁴ Mi tunwun nǔ e gbɛ mitɔn ná nyí sɔ ɔ́ ǎ! Nǔgbó ɔ́, ahǔn e nɔ sú nú hwenu kpɛɖé, bɔ zaanɖé kpowun ɔ́, é nɔ hɔ́n ɔ́ ɖɔhun wɛ mi cí.

¹⁵ Nǔ e mi ɖó ná ɖɔ ɔ́ ɖíe: “Ényí é jló Aklúnɔ ɔ́, mǐ ná nɔ gbɛ, bó ná wa lě, bó ná wa lě.”

¹⁶ Amɔ̌ din ɔ́, goyítɔ́ wɛ mi nyí, bó ɖo ajɔ̌ jlá nú miɖée wɛ. Goyíyí ka nyí nǔ ɖagbe ǎ.

¹⁷ Énɛ́ ɔ́, mɛ e tunwun nǔ ɖagbe e é ɖó ná wa ɔ́, bó ma ka nɔ wa ǎ ɔ́, hwɛ hu wɛ é ɖe.