Jǎan 9 - MAWUXÓWÉMA

¹ Jezu wá xweyǐgbe, bó mɔ nya ɖé, bɔ è ji nukúntíntɔ́nnɔ tɔn.

² Jezu sín ahwanvú lɛ́ɛ kanbyɔ́ Jezu ɖɔ: “Mɛ̌si, mɛ̌ wɛ hu hwɛ bɔ è ka ji nya élɔ́ nukúntíntɔ́nnɔ tɔn mɔ̌? É ɖésú wɛ hu hwɛ a, abǐ mɛ e ji i lɛ́ɛ ɖě wɛ hu hwɛ?”

³ Jezu ka yí gbe nú yě ɖɔ: “É ɖésúnɔ ɔ́ hu hwɛ wú wɛ ǎ, mɛ e ji i lɛ́ɛ ɖě ká hu hwɛ wú wɛ ǎ; é tɔ́n nukún, bónú Mawu ná dó ɖe hlɔ̌nhlɔ́n tɔn xlɛ́ dó wǔtu tɔn.

⁴ Din e kéze kpo ɖo te ɔ́, mǐ ɖó ná wa mɛ e sɛ́ mì dó ɔ́ sín azɔ̌, ɖó zǎn ko ɖo nǎ kú wɛ, bɔ mɛɖé sɔ́ ná sixú kpé nǔɖé wú bó wa ǎ.

⁵ Hwenu e un sigǎn kpo ɖo gbɛ ɔ́ mɛ ɔ́, nyɛ wɛ nyí wěziza nú gbɛ ɔ́.”

⁶ Ée Jezu ɖɔ mɔ̌ ɔ́, é tún atán kɔn nyi kɔ́ mɛ, bó dó fan babá ná, bó sá dó nukún nú nya ɔ́,

⁷ bo ɖɔ n'i ɖɔ: “Yi klɔ́ ɖo Silowée tɔnu.” (Silowée ɔ́ sín tínmɛ wɛ nyí mɛsɛ́dó.) Nya nukúntíntɔ́nnɔ ɔ́ ka yi klɔ́ ɖo tɔ ɔ́ nu nǔgbó; ée é lɛ́ kɔ ɔ́, é mɔ nǔ céɖécéɖé.

⁸ Mɛ e ɖo xwé tɔn kpá lɛ́ɛ kpódó mɛ e ko nɔ mɔ ɛ ɖo nǔ byɔ́ ɖu wɛ ɖ'ayǐ lɛ́ɛ kpó nɔ ɖɔ: “É ma ka nyí nya e nɔ jínjɔ́n ayǐ, bo nɔ ɖo nǔ byɔ́ ɖu wɛ ɔ́ nɛ́ a?”

⁹ Mɛɖě nɔ ɖɔ: “É wɛ”, mɛ ɖěvo lɛ́ɛ ka nɔ ɖɔ: “Gbeɖé, mɛɖimɛ wɛ.” É ɖésúnɔ ka ɖɔ nú yě ɖɔ: “Nyɛ jɛ́n wɛ.”

¹⁰ Yě ká kanbyɔ́ ɛ ɖɔ: “Nɛ̌ nukún towe lɛ́ɛ ka hun gbɔn?”

¹¹ Bɔ é yí gbe nú yě ɖɔ: “Mɛ e è nɔ ylɔ́ ɖɔ Jezu ɔ́ wɛ fan babá, bó sá dó nukún nú mì, bó ɖɔ nú mì ɖɔ: ‘Yi tɔ e è nɔ ylɔ́ ɖɔ Silowée ɔ́ nu, bó yi klɔ́.’ Ɖěe un ka yi tɔ ɔ́ nu bó yi klɔ́ ɔ́, un mɔ nukúnnú.”

¹² Yě ká kanbyɔ́ ɛ ɖɔ: “Fítɛ́ mɛ ɔ́ ka ɖe?” Bɔ é yí gbe nú yě ɖɔ: “Un tunwun ǎ.”

Falizyɛn lɛ́ɛ kan nǔ byɔ́ nya e Jezu hun nukún ná é

¹³ Yě kplá nya e ko nyí nukúntíntɔ́nnɔ ɖ'ayǐ ɔ́ yi jó nú Falizyɛn lɛ́ɛ.

¹⁴ Gbe e gbe Jezu ka fan babá, bó dó hun nukún n'i ɔ́, gbɔjɛzán Jwifu lɛ́ɛ tɔn gbe wɛ.

¹⁵ Énɛ́ ɔ́ wú wɛ Falizyɛn lɛ́ɛ lɔ kan nǔ byɔ́ ɛ dó lě e nukún tɔn hun gbɔn ɔ́ wú. É ka ɖɔ nú yě ɖɔ: “É fan babá bó sá dó nukún nú mì, bɔ un yi klɔ́, bó ka jɛ nǔ mɔ jí.”

¹⁶ Falizyɛn lɛ́ɛ ɖě ɖɔ: “Mɛ e bló nǔ mɔ̌hunkɔ ɔ́ sixú gosín Mawu gɔ́n ǎ; ɖó é gba sɛ́n e ɖɔ xó dó gbɔjɛzán ɔ́ wú é.” Mɛ ɖěvo lɛ́ɛ ɖɔ: “Nɛ̌ hwɛhutɔ́ ɖé ka sixú jlɛ́ nǔ mɔ̌hunkɔtɔn lɛ́ɛ gbɔn?” Bɔ gbe yětɔn sɔ́ ɖo kpɔ́ ǎ.

¹⁷ Yě ká lɛ́ kanbyɔ́ nya e ko nyí nukúntíntɔ́nnɔ ɖ'ayǐ ɔ́ ɖɔ: “Hwɛ ɔ́, mɛ e hun nukún nú we ɔ́, étɛ́ a ka lin dó wǔ tɔn?” É ka yí gbe nú yě ɖɔ: “Gbeyíɖɔ Mawu tɔn ɖé wɛ.”

¹⁸ Nǔ ɖo mɔ̌ có Jwifugán lɛ́ɛ jló ná ɖi ɖɔ nya ɔ́ ko nyí nukúntíntɔ́nnɔ ɖ'ayǐ, cóbó wá ɖo nukúnnú mɔ wɛ ǎ, lobo ylɔ́ mɛ e ji i lɛ́ɛ,

¹⁹ bó kanbyɔ́ yě ɖɔ: “Vǐ mitɔn ɔ́ jɛ́n ɖíe a? Nukúntíntɔ́nnɔ tɔn wɛ mi ji nǔgbó a? Nɛ̌ nǔ ka nyí gbɔn bɔ é ɖo nǔ mɔ wɛ din?”

²⁰ Mɛ e ji i lɛ́ɛ ka yí gbe nú yě ɖɔ: “Vǐ mǐtɔn wɛ, bɔ mǐ ji nukúntíntɔ́nnɔ tɔn.

²¹ Amɔ̌, lě e nǔ nyí gbɔn, bɔ é wá ɖo nǔ mɔ wɛ din ɔ́, mǐ mɔ do ná ǎ; mɛ̌ to hun nukún n'i hǔn, mǐ tunwun ǎ. Mi kan xó byɔ́ ɛ, é ko ɖó xwe e ná ɖɔ xó dó éɖée nu ɔ́; é ɖésúnɔ ná tínmɛ nú mi.”

²² Mɛ e ji i lɛ́ɛ ɖɔ mɔ̌, ɖó yě ɖo xɛsi ɖi nú Jwifugán lɛ́ɛ wɛ, ɖó yě ko kplé, bó ɖɔ ɖó alɔ ɖokpó ɔ́ jí ɖɔ mɛɖé mɔ Jezu dó mɔ Klísu ná ɔ́, émí ná nya mɛ ɔ́ sín kplɔ́ngbasá émítɔn.

²³ Nǔ e wú mɛ e ji i lɛ́ɛ ɖɔ é ko ɖó xwe e ná ɖɔ xó dó éɖée nu ɔ́ nɛ́, bó ɖɔ è nǐ kan nǔ byɔ́ é ɖésúnɔ.

²⁴ Jwifugán lɛ́ɛ lɛ́ vɔ́ ylɔ́ nya e ko nyí nukúntíntɔ́nnɔ ɖ'ayǐ ɔ́ azɔn wegɔ́ ɔ́, bó ɖɔ n'i ɖɔ: “Kpa susu nú Mawu; mǐdɛɛ lɛ́ɛ ɔ́, mǐ tunwun ɖɔ dǎwe énɛ́ ɔ́, hwɛhutɔ́ wɛ.”

²⁵ Éyɛ́ ka ɖɔ nú yě ɖɔ: “E to nyí hwɛhutɔ́ oo, é to ma nyí hwɛhutɔ́ oo, un tunwun ǎ; nǔ ɖokpó géé e un tunwun ɔ́ wɛ nyí ɖɔ: nukúntíntɔ́nnɔ wɛ un nyí ɖ'ayǐ; amɔ̌ din ɔ́, un ɖo nǔ mɔ wɛ.”

²⁶ Yě lɛ́ kanbyɔ́ ɛ ɖɔ: “Nɛ̌ é ká bló gbɔn nú we? Nɛ̌ é ká hun nukún nú we gbɔn?”

²⁷ Bɔ é yí gbe nú yě ɖɔ: “Un ko ɖɔ lě e nǔ lɛ́ɛ nyí gbɔn ɔ́ nú mi, bɔ mi dó tókúse mɛ; nɛ̌ ka gbɔn din bɔ mi jló nú ma lɛ́ vɔ́ wlí ɖɔ nú mì? Mi lɔmɔ̌ jló ná húzú ahwanvú tɔn lɛ́ɛ wɛ a?”

²⁸ Ée nya ɔ́ ɖɔ mɔ̌ nú yě ɔ́, yě bɔ zun ɖó n'i, bó ɖɔ: “Hwi wɛ nyí ahwanvú dǎwe énɛ́ tɔn, mǐdɛɛ lɛ́ɛ ɔ́, ahwanvú Mɔyízi tɔn wɛ mǐ nyí.

²⁹ Mǐdɛɛ lɛ́ɛ tunwun ɖɔ Mɔyízi wɛ Mawu ɖɔ xó ná; amɔ̌, mɛ énɛ́ ɔ́, mi tunwun fí e éyɛ́ gosín ɔ́ ǎ.”

³⁰ Nya ɔ́ ka yí gbe nú yě ɖɔ: “É kpácá mì bɔ mi tunwun fí e é gosín ɔ́ ǎ, có é ka hun nukún nú nyɛ.

³¹ Đó mǐ tunwun ganjí ɖɔ Mawu kún nɔ ɖótó hwɛhutɔ́ lɛ́ɛ ó; mɛ e ka nɔ sí Mawu bo nɔ blǒ nǔ e Mawu jlǒ lɛ́ɛ ɔ́, mɛ énɛ́ ɔ́ wɛ Mawu nɔ ɖótó.

³² È se gbeɖé kpɔ́n ɖɔ mɛɖé hun nukún nú mɛ e ko tɔ́n nukún sín nɔ tɔn xo mɛ ɔ́ ǎ.

³³ Ényí nya énɛ́ ma ka gosín Mawu gɔ́n ǎ ɔ́, é ná sixú wa nǔɖé ǎ.”

³⁴ Yě ká yí gbe n'i ɖɔ: “Hwi ɖésúnɔ bǐ ɔ́, hwɛ mɛ wɛ è ji we dó, bɔ a ka wá ja nǔ kplɔ́n mǐdɛɛ lɛ́ɛ gbé.” Bɔ yě ɖe e sín agun yětɔn mɛ.

Mɛ e ma mɔ nukúnnú jɛ Mawu wú ǎ lɛ́ɛ

³⁵ Ée Jezu se ɖɔ yě ɖe dǎwe e é hun nukún ná ɔ́ sín agun yětɔn mɛ ɔ́, é wá yi kpé e ɖo alixo, bó kanbyɔ́ ɛ ɖɔ: “A ɖi nǔ nú Gbɛtɔ́ví ɔ́ a?”

³⁶ Dǎwe ɔ́ ka yí gbe n'i ɖɔ: “Mɛɖaxó, mɛ̌ ka nyí mɛ ɔ́, ɖɔ nú mì bónú má ɖi nǔ n'i.”

³⁷ Jezu ka ɖɔ n'i ɖɔ: “Mɛ ɔ́ ɖíe mɔ wɛ a ko ɖe e; é wɛ nyí nyɛ mɛ e ɖo xó ɖɔ nú we wɛ din é.”

³⁸ Bɔ nya ɔ́ ɖɔ n'i ɖɔ: “Un ɖi nǔ nú we, Aklúnɔ,” bó jɛ kpo, bó ɖe kɔ́ n'i.

³⁹ Jezu ka ɖɔ: “Un wá gbɛ ɔ́ mɛ bó ná ɖe nǔwanyido gbɛtɔ́ lɛ́ɛ tɔn nyi wěxo, bónú mɛ e ma mɔ nǔ ǎ lɛ́ɛ ná mɔ nǔ, bónú mɛ e ka ɖo nǔ mɔ wɛ lɛ́ɛ ná húzú nukúntíntɔ́nnɔ.”

⁴⁰ Falizyɛn ɖé lɛ́ɛ ka ɖo fínɛ́ xá Jezu, bó se xó énɛ́ ɔ́, bó kanbyɔ́ ɛ ɖɔ: “Mǐ lɔmɔ̌ nyí nukúntíntɔ́nnɔ wɛ a?”

⁴¹ Jezu ka yí gbe nú yě ɖɔ: “Ényí nukúntíntɔ́nnɔ wɛ mi ko nyí ɔ́, hwɛ mitɔn sɔ́ ná kpo ɖo kɔ nú mi ǎ. Lo ɔ́, ée mi nɔ ɖɔ émí nɔ mɔ nukúnnú ɔ́, hwɛ mitɔn lɛ́ɛ kpo ɖo kɔ nú mi.”