Jǎan 8 - MAWUXÓWÉMA

¹ Lo ɔ́, Jezu yi só e è nɔ ylɔ́ ɖɔ olívutín só ɔ́ jí.

² Ayǐhɔ́ngbe zǎnzǎn tɛɛn ɔ́, é lɛ́ kɔ yi sinsɛnxɔ mɛ, bɔ mɛ lɛ́ɛ bǐ nyi ahwan wá gɔ̌n tɔn, bɔ é jínjɔ́n ayǐ, bó jɛ nǔ kplɔ́n yě jí.

³ Hwenɛ́nu wɛ sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó kplá nyɔ̌nu ɖé wá, bó sɔ́ ɛ ɖó agun ɔ́ nukɔn; nyɔ̌nu énɛ́ ɔ́, afɔ dó gbě wɛ é ɖe bɔ yě gbo e dó.

⁴ Yě ɖɔ nú Jezu ɖɔ: “Mɛ̌si, nyɔ̌nu élɔ́ ɔ́, afɔ dó gbě wɛ é ɖe bɔ mǐ yi gbo e dó.

⁵ Mɔyízi sɛ́n ɔ́ ka ɖɔ jí mɛ mɔ̌hunkɔtɔn ɔ́, awǐnnyaglo wɛ è nǎ nyi dó hu i ná. Ani hwɛ ka lin d'é wú?”

⁶ Xó énɛ́ e yě kanbyɔ́ Jezu ɔ́, mɔ wɛ nyí bɔ yě ɖó n'i, bo na dó ɖó hwɛ n'i. Jezu ka fɛ, bo jɛ nǔ wlán dó kɔ́ mɛ jí kpódó alɔví kpó.

⁷ Ée yě ɖo nǔ kanbyɔ́ ɛ wɛ magbokɔ ɔ́, é jlɔ́ kɔ bó ɖɔ nú yě ɖɔ: “Mɛ e ɖo mi mɛ bó ma hu hwɛ kpɔ́n gbeɖé ǎ ɔ́ ní nyi awǐnnyaglo dó e jɛ nukɔn.”

⁸ Ée é ɖɔ mɔ̌ ɔ́, é lɛ́ vɔ́ fɛ, bó jɛ nǔ wlán dó kɔ́ mɛ jí.

⁹ Ée yě mɛ e kplá nyɔ̌nu ɔ́ wá nú Jezu lɛ́ɛ se mɔ̌ ɔ́, yě jɛ yiyi jí ɖokpó ɖokpó, bɛ́ sín mɛxó lɛ́ɛ jí, bɔ é wá kpo Jezu ɖokpónɔ géé kpódó nyɔ̌nu ɔ́ kpó.

¹⁰ Jezu lɛ́ jlɔ́, bó kanbyɔ́ nyɔ̌nu ɔ́ ɖɔ: “Nyɔ̌nu! Fítɛ́ mɛ lɛ́ɛ ɖe? Mɛ ɖěbǔ sɔ́ ɖó hwɛ nú we ǎ cé?”

¹¹ Nyɔ̌nu ɔ́ yí gbe n'i ɖɔ: “Yě ɖěbǔ ɖó hwɛ nú mì ǎ, Aklúnɔ.” Jezu ka ɖɔ n'i ɖɔ: “Nyɛ lɔmɔ̌ un ɖó hwɛ nú we ǎ; bo yi; bɛ́ sín din ɔ́, ma ka sɔ́ hu hwɛ ɖě ó.”]

Jezu wɛ nyí wěziza nú gbɛ ɔ́

¹² Jezu lɛ́ jɛ nǔ kplɔ́n mɛ lɛ́ɛ jí ɖo sinsɛnxɔ mɛ, bo ɖɔ nú yě ɖɔ: “Nyɛ wɛ nyí wěziza gbɛ ɔ́ tɔn; mɛ e xwedó mì ɔ́ na gbɔn zǐnflú mɛ gbeɖé ǎ, lo ɔ́ é ná mɔ wěziza e nɔ ná gbɛ jɔ gbɛ mɛ é.”

¹³ Falizyɛn lɛ́ɛ ka ɖɔ n'i ɖɔ: “A ɖo kúnnu ɖe nú hwiɖée wɛ; énɛ́ ɔ́ wú ɔ́, xó towe nyí nǔgbó ǎ.”

¹⁴ Jezu ka yí gbe nú yě ɖɔ: “É ná bó nyí kúnnu ɖe nú nyɛɖée wɛ un ɖe ɔ́, xó e ɖɔ wɛ un ɖe ɔ́, nǔgbó wɛ é nyí; ɖó un tunwun fí e un gosín ɔ́, bo ka lɛ́ tunwun fí e un xwe ɔ́. Midɛɛ lɛ́ɛ ka tunwun fí e un gosín ɔ́ ǎ; mi ka lɛ́ tunwun fí e un xwe ɔ́ ǎ.

¹⁵ Lě e gbɛtɔ́ lɛ́ɛ nɔ ɖɔ hwɛ gbɔn ɔ́ wɛ mi nɔ ɖɔ hwɛ gbɔn; nyɛ ɔ́, un nɔ ɖɔ hwɛ xá mɛɖé ǎ.

¹⁶ Ényí un ka ɖɔ hwɛ ɔ́, hwɛjijɔ wɛ un nɔ ɖɔ; ɖó un ɖo nyɛ ɖóɖó ǎ; Tɔ́ e sɛ́ mì dó ɔ́ kpódó nyɛ kpó wɛ ɖo kpɔ́.

¹⁷ È ka ko wlán dó Mawuxówéma mitɔn mɛ ɖɔ: ‘Nǔ e mɛ we ɖe kúnnu ɖokpó ɔ́ ná ɔ́, nǔgbó wɛ é nyí.’

¹⁸ Un ɖo kúnnu ɖe nú nyɛɖée wɛ, bɔ Tɔ́ e sɛ́ mì dó ɔ́ lɔ ka ɖo kúnnu ɖe nú mì wɛ.”

¹⁹ Yě kanbyɔ́ ɛ ɖɔ: “Fítɛ́ Tɔ́ towe ɔ́ ká ɖe?” Jezu yí gbe nú yě ɖɔ: “Mi tunwun mì ǎ; mi ka lɛ́ tunwun Tɔ́ ce ǎ. Ényí mi ko tunwun mì wɛ ɔ́, mi ná ko tunwun Tɔ́ ce lɔmɔ̌.”

²⁰ Hwenu e Jezu ɖo xó énɛ́ lɛ́ɛ ɖɔ wɛ ɔ́, nǔ kplɔ́n mɛ wɛ é ɖe ɖo sinsɛnxɔ ɔ́ mɛ, ɖo gbǎ e mɛ è nɔ sɔ́ akwɛ́ dó ɔ́ kpá; mɛ ɖěbǔ ka wlí i ǎ, ɖó gan tɔn ko xo ǎ.

Mi sixú yi fí e un xwe ɔ́ ǎ

²¹ Jezu ka lɛ́ ɖɔ nú yě ɖɔ: “Un xweyǐgbe; mi na ba mì, lo ɔ́, mi ná kú dó hwɛ mitɔn lɛ́ɛ mɛ, ɖó mi sixú yi fí e un xwe ɔ́ ǎ.”

²² Jwifugán lɛ́ɛ ka jɛ ɖiɖɔ jí ɖo yěɖée tɛ́ntin ɖɔ: “Éɖée hu gbé wɛ é ka ja a? Đó é ɖɔ: ‘Mi sixú yi fí e un xwe ɔ́ ǎ.’ ”

²³ Jezu yí gbe nú yě ɖɔ: “Midɛɛ lɛ́ɛ ɔ́, ayǐkúngban jí fí tɔn wɛ mi nyí, amɔ̌, nyɛ ɔ́, jǐxwé tɔn wɛ un nyí: gbɛ élɔ́ tɔn wɛ mi nyí, amɔ̌, nyɛ ɔ́, un nyí gbɛ élɔ́ tɔn ǎ.

²⁴ Énɛ́ wútu wɛ un ko ɖɔ nú mi ɖɔ hwɛ mitɔn mɛ wɛ mi ná kú dó. Ényí mi ma ɖi nǔ ɖɔ un nyí mɛ e un nyí é ǎ ɔ́, mi ná kú dó hwɛ mitɔn lɛ́ɛ mɛ.”

²⁵ Yě ká lɛ́ kanbyɔ́ ɛ ɖɔ: “Mɛ̌ a ka nyí?” Jezu yí gbe nú yě ɖɔ: “Mɛ e un ko ɖɔ nú mi sín do ɖɔ un nyí ɔ́ wɛ un nyí.

²⁶ Un ɖó nǔ gěgé bó ná ɖɔ dó mi wú, bó ná ɖɔ hwɛ dó nǔ gěgé wú nú mi; lo ɔ́, mɛ e sɛ́ mì dó ɔ́, nǔgbóɖɔtɔ́ wɛ, bɔ nǔ e un se ɖo nu tɔn ɔ́ kɛ́ɖɛ́ ɖɔ nú gbɛ ɔ́ wɛ un ɖe.”

²⁷ Yě ká mɔ nǔ jɛ wú ɖɔ Tɔ́ ɔ́ sín xó ɖɔ nú émí wɛ é ɖe ǎ.

²⁸ Bɔ Jezu ɖɔ nú yě ɖɔ: “Hwenu e mi ná wá sɔ́ Gbɛtɔ́ví ɔ́ dó jǐ ɔ́, mi ná tunwun ɖɔ un nyí mɛ e un nyí ɔ́, bó kún nɔ́ ɖɔ nǔ ɖěbǔ ɖo nyɛ ɖésúnɔ sín acɛ mɛ ó; nǔ e Tɔ́ ɔ́ kplɔ́n mì ɔ́ kɛ́ɖɛ́ wɛ un nɔ ɖɔ.

²⁹ Mɛ e sɛ́ mì dó ɔ́ ka ɖo kpɔ́ xá mì; é jó mì dó ǎ, ɖó nǔ e nyɔ́ nukún tɔn mɛ ɔ́ wɛ un nɔ bló tɛgbɛ.”

³⁰ Ée Jezu ɖo xó ɖɔ wɛ gbɔn mɔ̌ ɔ́, mɛ gěgé ɖi nǔ n'i.

Kannumɔ lɛ́ɛ kpódó mɛ e ɖo yě ɖésú sí lɛ́ɛ kpó

³¹ Jezu ɖɔ nú Jwifu e ɖi nǔ n'i lɛ́ɛ ɖɔ: “Ényí mi se gbe nú mì ɔ́, mi nyí ahwanvú ce lɛ́ɛ nǔgbó.

³² Mi ná tunwun nǔgbó ɔ́, bɔ nǔgbó ɔ́ ná ɖe mi sín kannumɔgbénu.”

³³ Yě ká yí gbe n'i ɖɔ: “Ablaxámu ví wɛ mǐ nyí, mǐ nɔ mɛɖé kannu kpɔ́n gbeɖé ǎ; étɛ́wútu a ka ɖɔ è nǎ ɖe mǐ sín kannumɔgbénu?”

³⁴ Jezu ka ɖɔ nú yě ɖɔ: “Má ɖɔ nǔgbó nú mi: mɛ e nɔ hu hwɛ é ɖěbǔ ɔ́, hwɛ sín kannumɔ wɛ é nyí;

³⁵ lo ɔ́, mɛ e nyí kannumɔ ɔ́ nɔ́ nɔ xwé gbe sɔ́yi ǎ; xwéví wɛ nɔ́ nɔ xwé gbe sɔ́yi.

³⁶ Ényí Vǐ ɔ́ ɖe mi sín kannumɔgbénu ɔ́, mi ná gosín kannumɔgbénu nǔgbó.

³⁷ Un tunwun ɖɔ Ablaxámu ví wɛ mi nyí nǔgbó; lo ɔ́, mi ɖo biba ná hu mì wɛ, ɖó mi ɖi nǔ nú xó ce lɛ́ɛ ǎ wútu.

³⁸ Nǔ e un mɔ ɖo Tɔ́ ce gɔ́n ɔ́ ɖɔ wɛ un ɖe; mi lɔmɔ̌ ka ɖo nǔ e mi se ɖo tɔ́ mitɔn nu ɔ́ bló wɛ.”

³⁹ Yě yǐ gbe n'i ɖɔ: “Ablaxámu wɛ nyí tɔ́ mǐtɔn.” Jezu ka ɖɔ nú yě ɖɔ: “Ényí Ablaxámu ví wɛ mi ko nyí nǔgbó ɔ́, mi ná ko nɔ wa nǔ Ablaxámu ɖɔhun.

⁴⁰ Amɔ̌, din ɔ́, nyɛ ka ɖɔ nǔgbó e un se ɖo Mawu nu ɔ́ nú mi; có mi ka lɛ́ ɖo biba na hu mì wɛ; Ablaxámu ka wa nǔ mɔ̌hunkɔtɔn ɖě ǎ.

⁴¹ Nǔ e tɔ́ mitɔn wa ɔ́ wa wɛ jɛ́n mi ɖe.” Ée é ɖɔ mɔ̌ ɔ́, yě yǐ gbe n'i ɖɔ: “Mǐ nyí agaví ǎ; Mawu wɛ nyí Tɔ́ ɖokpó géé e mǐ ɖó é.”

⁴² Jezu ka yí gbe nú yě ɖɔ: “Nú Mawu jɛ́n nyí Tɔ́ mitɔn nǔgbó ɔ́, mi na ko yí wǎn nú mì, ɖó Mawu gɔ́n wɛ un gosín bó wá. Jlǒ nyɛ ɖésúnɔ tɔn mɛ wɛ un wá dó ǎ; lo ɔ́, é wɛ sɛ́ mì dó.

⁴³ Étɛ́wú mi ma ka mɔ nǔ jɛ xó ce lɛ́ɛ wú ǎ? Đó xó ce nɔ vɛ́ se nú mi.

⁴⁴ Awǒvi wɛ nyí tɔ́ mitɔn, bɔ nǔ e nɔ jló e lɛ́ɛ wiwa wɛ nɔ myá nukún nú mi. Mɛhutɔ́ wɛ é ko nyí sín do, é yí wǎn nú nǔgbó ǎ, ɖó nǔgbó ɖě ɖo nu tɔn ǎ; é ná ɖó nǔvú ɔ́, nǔ ɖo gaan wɛ, ɖó é ɖésúnɔ bǐ wɛ ko nyí adingbannɔ, bo nyí adingbannɔ lɛ́ɛ sín tɔ́.

⁴⁵ Amɔ̌, nyɛ ɔ́, nǔgbó wɛ un nɔ ɖɔ; énɛ́ ɔ́ wú wɛ mi ma nɔ ɖi nǔ nú mì ǎ.

⁴⁶ Mɛ̌ ká ɖo mi mɛ, bó ná sixú ɖe xlɛ́ ɖɔ un hu hwɛ kpɔ́n? Ényí un ka ɖo nǔgbó ɖɔ wɛ ɔ́, aniwú wɛ mi ma nɔ ɖi nǔ nú mì ǎ?

⁴⁷ Mɛ e nyí Mawu tɔn ɔ́, Mawuxó wɛ é nɔ ɖótó; midɛɛ lɛ́ɛ ɔ́, mi ka nɔ ɖótó Mawuxó ɔ́ ǎ, ɖó mi nyí étɔn ǎ wú.”

Jezu ko tíin có Ablaxámu wá jɔ

⁴⁸ Jwifu e gbɛ́ wǎn nú Jezu lɛ́ɛ ka yí gbe n'i ɖɔ: “Ée mǐ ɖɔ Samalíinu wɛ a nyǐ, bɔ yɛ nyanya ɖo jǐ towe é ɔ́, a ma mɔ ɖɔ hwɛ mǐtɔn jɔ a?”

⁴⁹ Jezu ka yí gbe nú yě ɖɔ: “Yɛ nyanya ɖě ɖo jǐ ce ǎ; Tɔ́ ce sɔ́ su wɛ un ɖe, bɔ midɛɛ lɛ́ɛ ka ɖo hɛ̌n dó mì wɛ.

⁵⁰ Nyɛ ɖésú wɛ nɔ sɔ́ nyɛɖée su ǎ; Mawu wɛ nɔ sɔ́ mì su, bo nɔ ɖɔ hwɛ.

⁵¹ Má ɖɔ nǔgbó nú mi: ényí mɛɖé se xó ce, bó bló ɖ'é jí ɔ́, mɛ ɔ́ ná kú gbeɖé ǎ.”

⁵² Jwifu e gbɛ́ wǎn nú Jezu lɛ́ɛ yí gbe n'i ɖɔ: “Mǐ mɔ din ɖɔ yɛ nyanya wɛ ɖo jǐ towe nǔgbó; Ablaxámu ko kú wá yi, bɔ gbeyíɖɔ Mawu tɔn lɛ́ɛ bǐ ko kú, hwɛ ka wá ɖɔ din ɖɔ: ‘Ényí mɛɖé se xó ce bó bló ɖ'é jí ɔ́, mɛ ɔ́ ná kú gbeɖé ǎ.’

⁵³ Hwɛ hú gǎn tɔ́gbó mǐtɔn Ablaxámu wɛ a? Éyɛ́ ko kú, bɔ gbeyíɖɔ Mawu tɔn lɛ́ɛ lɔmɔ̌ ko kú. Mɛ̌ a ka nɔ sɔ́ hwiɖée dó mɔ?”

⁵⁴ Jezu ka yí gbe nú yě ɖɔ: “Ényí nyɛ ɖésú wɛ nɔ sɔ́ nyɛɖée su ɔ́, susu ce na xɔ akwɛ́ ǎ. Tɔ́ ce wɛ ka nɔ sɔ́ mì su. Mi ɖíe ka ɖɔ é wɛ nyí Mawu nú émí e,

⁵⁵ có mi ka tunwun i ǎ; nyɛ ɔ́, un tunwun i. Ényí un ɖɔ un kún tunwun i ó ɔ́, un ná nyí nǔvúɖótɔ́ mi ɖɔhun. Lo ɔ́, nyɛ tunwun i, bó nɔ́ bló xó tɔn lɛ́ɛ ɖ'é jí.

⁵⁶ Awǎjijɛ ɖaxó wɛ nyí nú tɔ́gbó mitɔn Ablaxámu, ɖó é ɖo nukún ɖó wiwa ce wɛ; é ka mɔ nǔgbó, bɔ xomɛ hun i.”

⁵⁷ Jwifu e gbɛ́ wǎn nú Jezu lɛ́ɛ ka kanbyɔ́ ɛ ɖɔ: “A ko ɖó xwe kanɖé wǒ (50) vɔ́vɔ́ ǎ, bó ka mɔ Ablaxámu a?”

⁵⁸ Jezu ka ɖɔ nú yě ɖɔ: “Ma ɖɔ nǔgbó nú mi: cóbónú Ablaxámu ná jɔ ɔ́, nyɛ ko tíin.”

⁵⁹ Bɔ yě fɔ awǐnnyaglo, bó ná nyi dó e; Jezu ka bɛ, bó tɔ́n sín sinsɛnxɔ ɔ́ mɛ.