Jǎan 5 - MAWUXÓWÉMA

¹ Énɛ́ ɔ́ gúdo ɔ́, Jwifu lɛ́ɛ ja sinsɛn sín xwe yětɔn ɖokpó ɖu gbé, bɔ Jezu yi Jeluzalɛ́mu.

² Jeluzalɛ́mu fínɛ́, ɖo lɛ̌ngbɔ́ lɛ́ɛ sín hɔntogbó kpá ɔ́, è kun tɔ e mɛ è nɔ lɛ wǔ ɖe ɔ́ ɖokpó ɖó fínɛ́, bɔ è nɔ ylɔ́ dó Ebléegbe mɛ ɖɔ Bɛtizata; è mɛ xɔ gaga axixwɛ ɖɔhun atɔ́ɔ́n ɖé lɛ́ɛ gbɔn tɔ ɔ́ tó.

³ Azinzɔnnɔ gěgé nɔ ɖo ayǐmlɔ́mlɔ́ ɖo xɔ énɛ́ lɛ́ɛ sá: Nukúntíntɔ́nnɔ lɛ́ɛ, sékúnɔ lɛ́ɛ, kpódó mɛ e xwe ayǐsó lɛ́ɛ kpó; [bɔ yě bǐ nɔ ɖo te kpɔ́n hwenu e sin ɔ́ ná xo dó ɔ́.

⁴ Đó wɛnsagun Mawu tɔn ɖokpó nɔ jɛ te hwe ɖé lɛ́ɛ nu, bó nɔ wá xo tɔ ɔ́. Énɛ́ ɔ́, nú sin ɔ́ dán wǔ lě tlóló ɔ́, azinzɔnnɔ e jɛ nukɔn, bó jɛ tɔ ɔ́ mɛ ɔ́, é ná bó ɖo azɔn ɖěbǔ jɛ wɛ ɔ́, azɔn tɔn nɔ gbɔ.]

⁵ Azinzɔnnɔ ɖé ka ɖo fínɛ́, bó ko ɖo azɔn jɛ wɛ sín xwe gbantɔ́n-nukún-atɔn (38) ɖíe.

⁶ Ée Jezu mɔ azinzɔnnɔ énɛ́ ɔ́ ɖo ayǐmlɔ́mlɔ́ ɖo fínɛ́, bó ka tunwun ɖɔ é kó ɖo tɔ ɔ́ tó din ɔ́, é ko lín ɔ́, é kanbyɔ́ ɛ ɖɔ: “A jlǒ bónú azɔn towe ní gbɔ a?”

⁷ Azinzɔnnɔ ɔ́ ka yí gbe n'i ɖɔ: “Aklúnɔ, un ɖó mɛɖé ɖo fí bɔ é ná sɔ́ mì dó sin ɔ́ mɛ hwenu e é nɔ xo dó ɔ́ ǎ; hwenu e un nɔ ɖo gǎn dó wɛ ɖɔ ma yi jɛ mɛ ɔ́, mɛ ɖěvo nɔ ko jɛ tɔ ɔ́ mɛ jɛ nukɔn nú mì.”

⁸ Bɔ Jezu ɖɔ n'i ɖɔ: “Sí te, sɔ́ zan towe bo zun zɔnlin.”

⁹ Azɔn ɖokpó ɔ́, azɔn tɔn gbɔ, bɔ é zé zan tɔn bó jɛ zɔnlin zun jí; gbe énɛ́ gbe ká nyí Jwifu lɛ́ɛ sín gbɔjɛzán gbe.

¹⁰ Énɛ́ ɔ́ wútu ɔ́, Jwifugán lɛ́ɛ ɖɔ nú nya e azɔn gbɔ ná ɔ́ ɖɔ: “Égbé ɔ́, gbɔjɛzán gbe wɛ; a ɖǒ ná zé zan gbɔjɛzán gbe ǎ, sɛ́n mǐtɔn gbɛ́.”

¹¹ Nya ɔ́ ká yí gbe nú yě ɖɔ: “Mɛ e gbɔ azɔn nú mì ɔ́ wɛ ɖɔ nú mì ɖɔ: ‘Zě zan towe bo zun zɔnlin.’ ”

¹² Yě ká kanbyɔ́ ɛ ɖɔ: “Mɛ̌ ká nyí mɛ e ɖɔ nú we ɖɔ: ‘Zě zan towe bo ɖi zɔnlin’ ɔ́?”

¹³ Lo ɔ́, nya ɔ́ mɔ nǔ jɛ mɛ e gbɔ azɔn n'i ɔ́ wú ǎ, ɖó Jezu gosín fínɛ́ ɖó agun e kplé ɖo fínɛ́ ɔ́ wútu.

¹⁴ Énɛ́ ɔ́ gúdo ɔ́, Jezu wá mɔ mɛ e é gbɔ azɔn ná ɔ́ ɖo sinsɛnxɔ mɛ, bo ɖɔ n'i ɖɔ: “Đǒtó mì! Ée azɔn towe gbɔ din ɔ́, ma sɔ́ hu hwɛ ɖě ó, é ma nyí mɔ ǎ ɔ́, nǔ e nylá hú mɔ ɔ́ ná lɛ́ wá gbo we.”

¹⁵ Bɔ nya ɔ́ gosín sinsɛnxɔ ɔ́ mɛ, bó ɖɔ nú Jwifugán lɛ́ɛ ɖɔ Jezu wɛ gbɔ azɔn nú émí.

¹⁶ Nǔ e wú wɛ Jwifugán lɛ́ɛ jɛ Jezu gbé nya jí ɔ́ nɛ́, ɖó gbɔjɛzán gbe wɛ é wa nǔ énɛ́.

¹⁷ Jezu ka ɖɔ nú yě ɖɔ: “Tɔ́ ce ɖo azɔ̌ wa wɛ tɛgbɛ, bɔ nyɛ lɔ ɖo azɔ̌ wa wɛ.”

¹⁸ Xó énɛ́ wútu wɛ Jwifugán lɛ́ɛ ma sɔ́ jló ná mɔ Jezu gbɔ ǎ, bó ɖo biba ná hu i wɛ; é ka nyí gbɔjɛzán e é ɖu su na ɔ́ kɛ́ɖɛ́ wú wɛ ǎ; lo ɔ́, é nɔ́ ɖɔ Mawu nyí Tɔ́ émítɔn, bó nɔ́ sɔ́ éɖée ɖó Mawu há jí.

Acɛkpikpa Jezu tɔn

¹⁹ Jezu yí xó, bó ɖɔ nú yě ɖɔ: “Ma ɖɔ nǔgbó nú mi; Vǐ ɔ́ nɔ wa nǔɖé é ɖésúnɔ ǎ; nǔ e é mɔ bɔ Tɔ́ ɔ́ ɖo wiwa wɛ ɔ́ jɛ́n é lɔmɔ̌ nɔ wa; bɔ nǔ e Tɔ́ ɔ́ bló ɔ́, Vǐ ɔ́ lɔmɔ̌ nɔ bló.

²⁰ Đó Tɔ́ ɔ́ yí wǎn nú Vǐ ɔ́, bo nɔ ɖe nǔwiwa tɔn lɛ́ɛ bǐ xlɛ́ ɛ; é ka na lɛ́ wá ɖe nǔwiwa e hú gǎn élɔ́ lɛ́ɛ é xlɛ́ ɛ, bɔ é ná kpácá mi.

²¹ Đó lě e Tɔ́ ɔ́ nɔ fɔ́n mɛkúkú lɛ́ɛ, bó nɔ ná yě gbɛ gbɔn ɔ́, mɔ̌ ɖokpó ɔ́ wɛ Vǐ ɔ́ lɔmɔ̌ nɔ ná gbɛ mɛ e jló e lɛ́ɛ gbɔn.

²² Tɔ́ ɔ́ nɔ ɖɔ hwɛ xá mɛɖé ǎ. É sɔ́ hwɛɖiɖɔ ɔ́ bǐ dó así nú Vǐ ɔ́;

²³ bónú gbɛtɔ́ lɛ́ɛ bǐ ná sɔ́ Vǐ ɔ́ su, lě e yě nɔ sɔ́ Tɔ́ ɔ́ su gbɔn é ɖɔhun. Mɛ e ma sɔ́ Vǐ ɔ́ su ǎ ɔ́, é sɔ́ Tɔ́ e sɛ́ ɛ dó ɔ́ lɔ su ǎ.

²⁴ “Má ɖɔ nǔgbó nú mi: mɛ e ɖótó xó ce, bó ɖi nǔ nú mɛ e sɛ́ mì dó ɔ́ kó mɔ gbɛ mavɔ mavɔ, bɔ è sɔ́ ná ɖó hwɛ n'i ǎ, ɖó é kó xo kú zlɛ́ wá gbɛ.

²⁵ Má ɖɔ nǔgbó nú mi: hwe ɔ́ nu ɖo na su wɛ; éɖíe ka ko su e, bɔ mɛkúkú lɛ́ɛ ná se Mawu ví ɔ́ sín gbe; énɛ́ ɔ́, mɛ e ná se gbe tɔn lɛ́ɛ ná mɔ gbɛ.

²⁶ Đó lě e Tɔ́ ɔ́ ɖó acɛ, bó nɔ ná gbɛ mɛ gbɔn ɔ́, mɔ̌ ɖokpó ɔ́ wɛ é ná ɛ acɛ, bɔ élɔ́ ná ná gbɛ mɛ.

²⁷ Mawu ná acɛ ɛ, bɔ é ná ɖɔ hwɛ xá gbɛtɔ́ lɛ́ɛ, ɖó Gbɛtɔ́ví wɛ é nyí.

²⁸ Hwenu e mɛkúkú lɛ́ɛ ná se gbe tɔn, bó ná fɔ́n ɔ́ ko sɛ yá; mi ma nú é kpácá mi ó.

²⁹ Yě ná tɔ́n sín yɔdo yětɔn lɛ́ɛ mɛ; mɛ e wa nǔ ɖagbe lɛ́ɛ ɔ́, Mawu ná fɔ́n yě sín kú, bó ná ná yě gbɛ mavɔ mavɔ. Lo ɔ́, mɛ e wa nǔ nyanya lɛ́ɛ ná fɔ́n sín kú, bónú Mawu ná ɖó hwɛ nú yě.”

Nǔ e ɖe xlɛ́ ɖɔ Jezu nyí Mawu ví lɛ́ɛ é

³⁰ “Un sixú wa nǔɖé ɖo nyɛ ɖésúnɔ sín acɛ mɛ ǎ. Nǔ e Mawu ɖɔ nú mì ɔ́ wɛ un nɔ xwedó dó ɖɔ hwɛ xá mɛ, bɔ un nɔ dó hwɛjijɔ, ɖó jlǒ nyɛ ɖésúnɔ tɔn wɛ un nɔ wa ǎ; lo ɔ́, mɛ e sɛ́ mì dó ɔ́ sín jlǒ wɛ un nɔ wa.

³¹ “Ényí nyɛ ɖésú wɛ na ɖe kúnnu nú nyɛɖée ɔ́, xó e ɖɔ wɛ un ɖe ɔ́ sixú ɖe xlɛ́ ɖɔ nǔgbó ɖɔ wɛ un ɖe ǎ.

³² Mɛ ɖěvo wɛ ka ɖo kúnnu ɖe nú mì wɛ, bɔ un tunwun ɖɔ xó e é ɖɔ dó wútu ce lɛ́ɛ nyí nǔgbó.

³³ Mi sɛ́ mɛ dó Jǎan, bɔ é ɖe kúnnu nú nǔgbó ɔ́.

³⁴ É ka nyí kúnnuɖiɖe gbɛtɔ́ tɔn sín nǔ wɛ hu dó mì ǎ; lo ɔ́, un ɖɔ xó énɛ́ ɔ́, bónú Mawu ná hwlɛ́n mi gán.

³⁵ Jǎan cí zogbɛ́n e ɖo títá é ɖɔhun nú mi, bɔ mi yí gbe bó j'awǎ kpɛɖé ɖo wěziza tɔn nu.

³⁶ Nǔ ɖěvo ka ɖo kúnnu ɖe nú mì wɛ, bó hú gǎn kúnnu e Jǎan ɖe nú mì é. Azɔ̌ e Tɔ́ ce sɔ́ dó así nú mì, bɔ un ɖo wiwa wɛ lɛ́ɛ ɖe kúnnu nú mì bo ɖe xlɛ́ ɖɔ é wɛ sɛ́ mì dó nǔgbó.

³⁷ Tɔ́ e sɛ́ mì dó ɔ́ ɖésú ɖe kúnnu nú mì. Mi ka se gbe tɔn kpɔ́n ǎ; mi ka mɔ ɛ kpɔ́n ǎ;

³⁸ mi ka hɛn xó tɔn ayi mɛ ǎ; ɖó mi ɖi nǔ nú mɛ e é sɛ́ dó ɔ́ ǎ.

³⁹ Mi nɔ ɖo Mawuxówéma ɔ́ kplɔ́n wɛ, ɖó mi nɔ lin ɖɔ é mɛ wɛ émí ná mɔ gbɛ mavɔ mavɔ ɖe; lo ɔ́, Mawuxó e è wlán lɛ́ɛ ɔ́, nyɛ wɛ yě ɖe kúnnu ná.

⁴⁰ Có mi ka jló ná wá gɔ̌n ce, bó ná mɔ gbɛ jɔ gbɛ ɔ́ ǎ.

⁴¹ “Gbɛtɔ́ lɛ́ɛ ní kpa susu nú mì ba wɛ un ɖe ǎ.

⁴² Đó un tunwun mi, bó mɔ ɖɔ mi kún yí wǎn nú Mawu ó.

⁴³ Tɔ́ ce sín nyǐkɔ mɛ wɛ un wá dó, bɔ mi ka yí mì ǎ; é ka nyí mɛ ɖěvo wɛ ka wá ɖo nyǐkɔ é ɖésúnɔ tɔn mɛ ɔ́, mi ná yí i.

⁴⁴ Mi mɛ e nɔ ɖo susu kpa nú miɖée wɛ, bó ma nɔ ba nú Mawu ná sɔ́ mi su ǎ lɛ́ɛ ɔ́, nɛ̌ mi ka sixú ɖi nǔ gbɔn?

⁴⁵ Mi ma lin ɖɔ nyɛ wɛ ná dó hwɛ mi ɖo Tɔ́ ce nukɔn ó; Mɔyízi e wú wɛ mi ɖeji dó ɔ́ wɛ ná dó hwɛ mi ɖo Tɔ́ ce nukɔn.

⁴⁶ Ényí mi ko ɖi nǔ nú Mɔyízi wɛ ɔ́, mi ná ko ɖi nǔ nú nyɛ lɔmɔ̌; ɖó nǔ e Mɔyízi wlán ɔ́, nyɛ wú wɛ é ɖɔ xó dó.

⁴⁷ Ée mi ma ka ɖi nǔ e Mɔyízi wlán lɛ́ɛ ǎ ɔ́, nɛ̌ mi ka sixú ɖi xó ce lɛ́ɛ gbɔn?”