Jǎan 4 - MAWUXÓWÉMA

Jezu kpódó nyɔ̌nu Samalíinu ɖé kpán

¹ Falizyɛn lɛ́ɛ se ɖɔ Jezu ɖo ahwan mɔ hú Jǎan wɛ, bó lɛ́ ɖo yɛhwesin lɛ nú mɛ hú Jǎan wɛ.

² Nǔgbó ɔ́, Jezu ɖésú lɛ yɛhwesin nú mɛɖé ǎ, ahwanvú tɔn lɛ́ɛ wɛ ɖo yɛhwesin lɛ nú mɛ wɛ.

³ Ée Jezu tunwun ɖɔ Falizyɛn lɛ́ɛ se mɔ̌ ɔ́, é gosín Judée bo lɛ́ kɔ yi Galilée.

⁴ Ée é ka nyí Samalíi wɛ é ɖó ná gbɔn dín yi Galilée ɔ́,

⁵ é wá yi jɛ Samalíi toxo ɖé mɛ, bɔ è nɔ ylɔ́ toxo ɔ́ ɖɔ Sicáa; Sicáa lín dó gle e Jakɔ́bu ná vǐ tɔn Jozɛ́fu é ǎ.

⁶ Fínɛ́ wɛ sɛ́tɔ Jakɔ́bu tɔn ɖe. Jezu ɖo fínɛ́ jɛ wɛ gan wěwe mɛ mɔ̌. Nǔ cikɔ n'i, bɔ é gbɔ bo jínjɔ́n tɔ ɔ́ tó.

^7-8 Ahwanvú tɔn lɛ́ɛ ka yi nǔɖuɖu xɔ gbé ɖo toxo mɛ hwenɛ́nu. Hwenɛ́nu ɖokpó ɔ́, nyɔ̌nu Samalíinu ɖé wá sin dun gbé, bɔ Jezu ɖɔ n'i ɖɔ: “Nǎ sin mì má nu.”

⁹ Nyɔ̌nu ɔ́ ka yí gbe nú Jezu ɖɔ: “Nɛ̌ hwi mɛ e nyí Jwifu ɔ́ ka wá ɖo sin byɔ́ nyɛ mɛ e nyí Samalíinu é wɛ gbɔn?” (Đó Jwifu lɛ́ɛ nɔ jɛ kpɔ́ xá Samalíinu lɛ́ɛ ǎ.)

¹⁰ Jezu ka yí gbe n'i ɖɔ: “Ényí a ko tunwun nǔ e Mawu nɔ ná mɛ ɔ́, bó tunwun nyɛ mɛ e ɖɔ nú we ɖɔ: nǎ sin mì ma nu ɔ́ wɛ ɔ́, hwi ɖésú wɛ ná ko byɔ́ sin mì bɔ un ná ko ná sin e nɔ ná gbɛ mɛ ɔ́ we.”

¹¹ Nyɔ̌nu ɔ́ ka ɖɔ nú Jezu ɖɔ: “Mɛɖaxó! A ma ka ɖó nǔɖé, bó ná dó dun sin ɔ́ ná nɛ́, tɔ ɔ́ ka lɛ́ gɔ́ngɔ́n. Fítɛ́ a ka ná ba sin e nɔ ná gbɛ mɛ é sín?

¹² Tɔ́gbó mǐtɔn Jakɔ́bu wɛ kun tɔ élɔ́ nú mǐ. É ɖésúnɔ nu sin tɔn; vǐ tɔn lɛ́ɛ kpódó kanlin tɔn lɛ́ɛ kpó nu sin tɔn. Hwɛ lin ɖɔ émí hú gǎn ɛ wɛ a?”

¹³ Jezu ka yí gbe n'i ɖɔ: “Mɛɖěbǔ nu sin élɔ́ ɔ́, kɔ ná lɛ́ xú i.

¹⁴ Mɛ e ka ná nu sin e nyɛ ná ná ɛ ɔ́, kɔ sɔ́ ná xú i gbeɖé ǎ. Sin e nyɛ ná ná ɛ ɔ́, ná húzú tɔjɔtɛn e mɛ sin e nɔ ná gbɛ mavɔ mavɔ mɛ é ná nɔ sa sín é.”

¹⁵ Énɛ́ ɔ́, nyɔ̌nu ɔ́ ɖɔ nú Jezu ɖɔ: “Mɛɖaxó, kɛnklɛ́n bó ná sin énɛ́ mì, nú kɔ ma sɔ́ xú mì, bónú ma lɛ́ tɔ́n sin dun gbé wá fí ó.”

¹⁶ Jezu ka ɖɔ n'i ɖɔ: “Yi ylɔ́ asú towe wá fí.”

¹⁷ Bɔ nyɔ̌nu ɔ́ yí gbe n'i ɖɔ: “Un ma ɖó asú nɛ́;” bɔ Jezu ɖɔ n'i ɖɔ: “Un ɖó asú ǎ e a ɖɔ ɔ́, xó nǔgbó wɛ nyí bɔ a ɖɔ.

¹⁸ Đó a ko da asú atɔ́ɔ́n wá yi, bɔ mɛ e kpódó hwi kpó ɖo yiyi wɛ din ɔ́ lɔ nyí asú towe ǎ. Xó énɛ́ e a ɖɔ ɔ́, nǔgbó wɛ.”

¹⁹ Nyɔ̌nu ɔ́ ɖɔ nú Jezu ɖɔ: “Mɛɖaxó, un mɔ din ɖɔ gbeyíɖɔ Mawu tɔn wɛ a nyǐ.

²⁰ Tɔ́gbó mǐtɔn lɛ́ɛ sɛn Mawu ɖo só élɔ́ jí, bɔ mi mɛ Jwifu lɛ́ɛ ka nɔ ɖɔ fí e è ɖǒ na sɛn Mawu ɖe ɔ́ wɛ nyí Jeluzalɛ́mu.”

²¹ Jezu ka ɖɔ n'i ɖɔ: “Nyɔ̌nu; ɖi nǔ nú mì; hwenu ɖo nǎ su wɛ, bɔ é sɔ́ ná nyí só élɔ́ jí wɛ mi ná nɔ sɛn Mawu Tɔ́ ɔ́ ɖe ǎ, é ka sɔ́ ná lɛ́ nyí Jeluzalɛ́mu wɛ mi ná nɔ sɛn ɛ ɖe ǎ.

²² Mi mɛ Samalíinu lɛ́ɛ tunwun nǔ e sɛn wɛ mi ɖe ɔ́ ǎ; lo ɔ́, mǐ mɛ Jwifu lɛ́ɛ tunwun ɖɔ hwlɛngán ɔ́ Jwifu lɛ́ɛ gɔ́n wɛ é gosín.

²³ Hwe ɔ́ nu ɖo nǎ su wɛ, éɖíe ka ko su e, bɔ Mawusɛntɔ́ titewungbe lɛ́ɛ ná sɛn Tɔ́ ɔ́ gbɔn hlɔ̌nhlɔ́n Yɛ ɔ́ tɔn mɛ, bó ná sɛn ɛ ɖo nǔgbó mɛ. Đó Mawusɛntɔ́ mɔ̌hunkɔ lɛ́ɛ ba wɛ Tɔ́ ɔ́ ɖe.

²⁴ Mawu ɔ́, Yɛ wɛ é nyí; bɔ mɛ e ná sɛn ɛ lɛ́ɛ ɖó ná sɛn ɛ gbɔn hlɔ̌nhlɔ́n Yɛ ɔ́ tɔn mɛ, bó ná sɛn ɛ ɖo nǔgbó mɛ.”

²⁵ Nyɔ̌nu ɔ́ ka ɖɔ n'i ɖɔ: “Un nywɛ́ ɖɔ Mɛsíya ɔ́ ɖó ná wá: (Mɛsíya ɔ́ sín tínmɛ wɛ nyí Klísu.) Bɔ hwenu e éyɛ́ ná wá ɔ́, é ná tín nǔ bǐ mɛ nú mǐ.”

²⁶ Bɔ Jezu ɖɔ n'i ɖɔ: “Nyɛ mɛ e nyí mɔ̌ ɔ́ ɖíe ɖo xó ɖɔ nú we wɛ e.”

²⁷ Xó énɛ́ ɖɔ wɛ Jezu ɖe kɛ́ɖɛ́ bɔ ahwanvú tɔn lɛ́ɛ lɛ́ kɔ sín toxo mɛ wá. Ée yě mɔ ɖɔ é ɖo xó ɖɔ xá nyɔ̌nu wɛ ɔ́, é kpácá yě tlala; lo ɔ́, yě ɖě ká kanbyɔ́ ɛ ɖɔ: “Étɛ́ kanbyɔ́ nyɔ̌nu ɔ́ wɛ a ɖe.” Abǐ “Étɛ́ sín xó ɖɔ xá ɛ wɛ a ɖe a jí ǎ.”

²⁸ Nyɔ̌nu ɔ́ jó tɔyizɛ́n tɔn dó, bo yi toxo ɔ́ mɛ, bó ɖɔ nú mɛ lɛ́ɛ ɖɔ:

²⁹ “Mi vɛ́ wá kpɔ́n! Nya ɖě ɖíe! É ɖɔ nǔ e un wa ɔ́ bǐ nú mì. Klísu ɔ́ ná ko wɛ ǎ cé?”

³⁰ Ée mɛ lɛ́ɛ se mɔ̌ ɔ́, yě tɔ́n sín toxo ɔ́ mɛ nǔgbó bó ɖidó Jezu gɔ́n.

³¹ Hwenɛ́nu wɛ ahwanvú Jezu tɔn lɛ́ɛ jɛ vo sa n'i jí ɖɔ: “Mɛ̌si, bo ka ɖu nǔ bó!”

³² Jezu ka yí gbe nú yě ɖɔ: “Nǔɖuɖu e mi ma tunwun ǎ ɔ́ wɛ ɖo así ce.”

³³ Ée ahwanvú tɔn lɛ́ɛ se mɔ̌ ɔ́, yě jɛ ɖiɖɔ ɖo yěɖée tɛ́ntin jí ɖɔ: “Mɛ ɖé wɛ ka ko hɛn nǔɖuɖu wá n'i a?”

³⁴ Jezu ka ɖɔ nú yě ɖɔ: “Nǔɖuɖu ce wɛ nyí ɖɔ ma bló jlǒ mɛ e sɛ́ mì dó ɔ́ tɔn, bó ka wa azɔ̌ e é zɔ́n mì ɔ́ yi kpé.

³⁵ Mi nɔ ɖɔ: ‘káká nú sun ná yi ɛnɛ mɔ̌ din ɔ́, è nǎ ya jinukún.’ Nyɛ ka ɖo ɖiɖɔ nú mi wɛ ɖɔ mi ní kpɔ́n gle lɛ́ɛ ganjí; jinukún lɛ́ɛ ko myá go, bó kó su yiya.

³⁶ Nukún-yatɔ́ nɔ yí azɔ̌kwɛ́ tɔn, bó nɔ́ kplé nǔkún lɛ́ɛ nú gbɛ mavɔ mavɔ, bónú nǔdótɔ́ ɔ́ kpódó nukún-yatɔ́ ɔ́ kpó bǐ ná kplé, bó ná j'awǎ.

³⁷ Hǔn nǔgbó ɖɔ wɛ è ɖe, bo ɖɔ: ‘Mɛ ɖěvo nɔ dó nǔ, bɔ mɛ ɖěvo nɔ ya’.

³⁸ Un sɛ́ mi dó nukún ya gbé ɖo gle e mɛ mi ma wa azɔ̌ ɖe ǎ é. Mɛ ɖěvo lɛ́ɛ wɛ ko wa azɔ̌ ɖo gle ɔ́ mɛ, bɔ mi wá ɖo le tɔn ɖu wɛ.”

³⁹ Samalíinu e ɖo toxo énɛ́ mɛ lɛ́ɛ gěgé ɖi nǔ nú Jezu; ɖó kúnnu e nyɔ̌nu ɔ́ ɖe nú Jezu ɔ́ wútu. É wɛ nyí ɖɔ: “É ɖɔ nǔ e un wa lɛ́ɛ bǐ nú mì.”

⁴⁰ Énɛ́ ɔ́ wɛ zɔ́n, bɔ ée Samalíinu lɛ́ɛ wá yi mɔ Jezu ɔ́, yě sa vo n'i ɖɔ é ní nɔ émí gɔ́n kpɛɖé bɔ Jezu nɔ yě gɔ̌n xɔ azǎn we;

⁴¹ mɛ gěgé lɛ́ ɖi nǔ nú Jezu ɖó xó e é ɖésúnɔ ɖɔ nú yě ɔ́ wútu.

⁴² Yě ɖɔ nú nyɔ̌nu ɔ́ ɖɔ: “É sɔ́ nyí xó e a ɖɔ nú mǐ ɔ́ wú wɛ mǐ ɖi nǔ ǎ, lo ɔ́, é ɖɔ xó bɔ mǐ ɖésúnɔ se, bó tunwun ɖɔ é wɛ nyí Mɛhwlɛ́ngántɔ́ gbɛ ɔ́ tɔn nǔgbó.”

Jezu gbɔ azɔn nú axɔ́súzɔ́watɔ́ ɖaxó ɖé sín vǐ

⁴³ Ée Jezu nɔ Samalíinu lɛ́ɛ gɔ́n xɔ azǎn we ɔ́, é gosín fínɛ́, bó ɖidó Galilée azǎn tɔn atɔngɔ́ ɔ́ gbe.

⁴⁴ É ɖésú ka ko ɖɔ ɖ'ayǐ ɖɔ mɛɖé kún nɔ sí gbeyíɖɔ Mawu tɔn ɖé ɖo to é ɖésúnɔ tɔn mɛ ó.

⁴⁵ Galiléenu lɛ́ɛ gěgé yi ɖu Dǐndínwáyixwe ɖo Jeluzalɛ́mu, bó mɔ nǔ e Jezu wa ɖo xwe ɔ́ hwenu lɛ́ɛ bǐ; énɛ́ ɔ́ wú wɛ ée é wá Galilée ɔ́, to ɔ́ mɛ nu lɛ́ɛ yí jǒnɔ tɔn ganjí.

^46-47 Axɔ́súzɔ́watɔ́ ɖé ká tíin, bó nɔ́ nɔ Kafaanawúmu, bɔ vǐ tɔn ɖo azɔn jɛ wɛ. Ée é se ɖɔ Jezu gosín Judée, bo wá xwe Galilée ɔ́, é sɔ́nǔ, bo yi mɔ ɛ, ɖo Kana, Galilée yíkúngban jí fí e Jezu sɔ́ sin dó húzú vɛ̌ɛn ná ɖe é. É dó kɛnklɛ́n n'i, ɖɔ é ní wá yi gbɔ azɔn nú vǐ émítɔn e ɖo kúzán jí ɖo Kafaanawúmu é.

⁴⁸ Jezu ka ɖɔ n'i ɖɔ: “Ényí mi ma ko mɔ nǔjíjlɛ́ lɛ́ɛ kpódó nǔdábaɖa lɛ́ɛ kpó ǎ ɔ́, mi ná ɖi nǔ ǎ.”

⁴⁹ Nya ɔ́ ká yí gbe n'i ɖɔ: “Mɛɖaxó, kɛnklɛ́n, yá wǔ bó wá kpɔ́n vǐ ce nú mì, bónú é ma kú ó.”

⁵⁰ Jezu ka yí gbe n'i ɖɔ: “Yi xwé, vǐ towe ɖo gbɛ.” Nya ɔ́ ka ɖi xó e Jezu ɖɔ n'i ɔ́, bó ɖidó xwé.

⁵¹ Xwé li jí ɔ́ wɛ é ɖe, bɔ mɛsɛntɔ́ tɔn lɛ́ɛ wá kpé e, bó ɖɔ n'i ɖɔ: “Vǐ towe ɖo gbɛ!”

⁵² Bɔ nya ɔ́ kanbyɔ́ yě ɖɔ: “Hwetɛ́nu mɔ̌ wɛ azɔn ɔ́ ka jɛ te kpɔ́n n'i jí?” Bɔ yě yí gbe n'i ɖɔ: “Sɔ hwemɛ, gan ɖokpó mɛ mɔ̌ wɛ avivɔ ɔ́ kɔ́n n'i.”

⁵³ Vǐtɔ́ ɔ́ mɔ ɖɔ hwenɛ́nu pɛ́pɛ́pɛ́ wɛ Jezu ɖɔ: “Vǐ towe ɖo gbɛ.” Bɔ é kpódó xwédo tɔn bǐ kpó ɖi nǔ nú Jezu.

⁵⁴ Nǔ wegɔ́ e Jezu jlɛ́ hwenu e é lɛ́ kɔ wá Judée, Galilée yíkúngban jí é nɛ́.