Jǎan 3 - MAWUXÓWÉMA

¹ Nya ɖokpó tíin ɖo Falizyɛn lɛ́ɛ mɛ, bɔ è nɔ ylɔ́ ɛ ɖɔ Nikodɛ́mu. Gbɛtɔ́ nukúnɖéjí ɖokpó wɛ é nyí ɖo Jwifu lɛ́ɛ mɛ.

² Nya énɛ́ zɔn zǎn wá Jezu gɔ́n gbe ɖokpó bó ɖɔ n'i ɖɔ: “Mɛ̌si, mǐ tunwun ɖɔ Mawu wɛ sɛ́ we dó, bónú a nǎ kplɔ́n nǔ mǐ. Đó, ényí Mawu ma ɖo kpɔ́ xá mɛɖé ǎ ɔ́, nǔdábaɖa e a nɔ jlɛ́ lɛ́ɛ ɔ́, mɛ ɔ́ sixú jlɛ́ ǎ.”

³ Jezu ka yí gbe n'i ɖɔ: “Má ɖɔ nǔgbó nú we: ényí mɛɖé má vɔ́ jɔ ǎ ɔ́, é sixú mɔ axɔ́súɖuɖu Mawu tɔn ɔ́ ǎ.”

⁴ Nikodɛ́mu ka kanbyɔ́ Jezu ɖɔ: “Nɛ̌ mɛ e ko nyí mɛxó ɔ́ ná sixú lɛ́ vɔ́ jɔ gbɔn? É ná byɔ́ nɔ tɔn sín xomɛ, bɔ è ná lɛ́ vɔ́ ɛ ji wɛ a?”

⁵ Jezu yí gbe n'i ɖɔ: “Má ɖɔ nǔgbó nú we: ényí mɛɖé má vɔ́ jɔ gbɔn sin kpódó Yɛsinsɛn kpó mɛ ǎ ɔ́, é sixú byɔ́ axɔ́súɖuɖu Mawu tɔn mɛ ǎ.

⁶ Vǐ e gbɛtɔ́ ji ɔ́, gbɛtɔ́ sin vǐ wɛ é nyí; mɛ e è ji gbɔn Yɛsinsɛn mɛ ɔ́, Yɛsinsɛn sin vǐ wɛ é nyí.

⁷ Ma lɔn bónú lɛ̌vɔ́jɔ xó énɛ́ e un ɖɔ nú we ɔ́ ní kpácá we ó.

⁸ Jɔhɔn nɔ nyi ɖo fí e jló e ɔ́, bɔ a nɔ se zǐngídi tɔn; a ka nɔ tunwun fí e é tɔ́n sín ɔ́, abǐ fí e é xwe ɔ́ ǎ. Lě e é nɔ nyí gbɔn nú mɛ e vɔ́ jɔ gbɔn Yɛsinsɛn mɛ ɔ́ nɛ́.”

⁹ Nikodɛ́mu ka kanbyɔ́ Jezu ɖɔ: “Nɛ̌ nǔ ka sixú nyí mɔ̌ gbɔn?”

¹⁰ Jezu yí gbe n'i ɖɔ: “Nɛ̌ hwi mɛ e nyí mɛ̌si ɖaxó ɖokpó nú Izlayɛ́li togun ɔ́, ma ka tunwun nǔ énɛ́ lɛ́ɛ ǎ gbɔn?

¹¹ Ma ɖɔ nǔgbó nú we: Nǔ e mǐ tunwun ɔ́ sín xó ɖɔ wɛ mǐ ɖe, bó ka ɖo nǔ e mǐ mɔ ɔ́ sín kúnnu ɖe wɛ; mi ka ɖi kúnnuɖiɖe mǐtɔn ǎ.

¹² Ényí mi ma ɖi nǔ nú mì hwenu e un ɖo gbɛmɛ fí sín xó lɛ́ɛ ɖɔ nú mi wɛ é ǎ ɔ́, nɛ̌ mi ka na wá sixú ɖi nǔ nú mì hwenu e un ná wá ɖo nǔ e ɖo sɛ́xwé lɛ́ɛ sín xó ɖɔ nú mi wɛ é gbɔn?

¹³ Mɛ ɖěbǔ yi Mawu gɔ̌n kpɔ́n gbeɖé zɛ Gbɛtɔ́ví e jɛ te sín sɛ́xwé ɔ́ wú ǎ.

¹⁴ Lě e Mɔyízi sɔ́ dan ɖó jǐ gbɔn ɖo gbětótló mɛ ɔ́, mɔ̌ ɖokpó ɔ́ wɛ è nǎ sɔ́ Gbɛtɔ́ví ɔ́ ɖó jǐ ,

¹⁵ bónú mɛ e ná ɖi nǔ n'i ɔ́ ma dɔn ó; lo ɔ́, é ní mɔ gbɛ mavɔ mavɔ.

¹⁶ Đó Mawu yí wǎn nú gbɛtɔ́ sɔ mɔ̌, bó sɔ́ Vǐɖokpónɔ tɔn jó, bónú mɛ e ná ɖi nǔ n'i lɛ́ɛ ɖěbǔ ma dɔn ó; lo ɔ́, yě bǐ ní mɔ gbɛ mavɔ mavɔ.

¹⁷ Mawu sɛ́ Vǐ tɔn dó gbɛ ɔ́ mɛ, bónú é ná wá ɖó hwɛ nú gbɛtɔ́ lɛ́ɛ ǎ; lo ɔ́, é ná wá hwlɛ́n yě gán wútu wɛ.

¹⁸ Mɛ e ɖi nǔ nú vǐ ɔ́, Mawu ná ɖó hwɛ n'i ǎ; mɛ e ma ka ɖi nǔ n'i ǎ ɔ́, Mawu ko ɖó hwɛ nú mɛ énɛ́ xóxó, ɖó é ɖi nǔ nú Vǐɖokpónɔ Mawu tɔn ǎ wútu.

¹⁹ Nǔ e ka dɔn hwɛɖónúmɛ énɛ́ wá ɔ́ wɛ nyí ɖɔ: wěziza wá gbɛ ɔ́ mɛ, gbɛtɔ́ lɛ́ɛ ka yí wǎn nú zǐnflú hú gǎn wěziza ɔ́, ɖó nǔ nyanya wiwa yětɔn lɛ́ɛ wútu.

²⁰ Nǔnyanyawatɔ́ nɔ gbɛ́ wǎn nú wěziza, bó nɔ lɔn ná sɛkpɔ́ ǎ; ɖó nǔ nyanya e é nɔ wa lɛ́ɛ táá wá jɛ wěxo.

²¹ Lo ɔ́, mɛ e nɔ xwedó nǔgbó ɖo nǔwiwa tɔn lɛ́ɛ mɛ ɔ́ nɔ́ wá wěziza nu, bónú è nǎ mɔ nǔ jɛ ɖagbewiwa tɔn lɛ́ɛ wú; ɖó nǔwiwa tɔn lɛ́ɛ sɔgbe xá Mawu sín jlǒ.”

Jezu kpódó Jǎan Yɛhwesinlɛnúmɛtɔ́ kpán

²² Énɛ́ gúdo ɔ́, Jezu kpódó ahwanvú tɔn lɛ́ɛ kpó yi Judée yíkúngban jí. Jezu nɔ fínɛ́ xá yě, bó ɖo yɛhwesin lɛ nú mɛ lɛ́ɛ wɛ.

²³ Jǎan lɔ ɖo yɛhwesin lɛ nú mɛ wɛ ɖo Ayinɔ́ni, ɖo malín málín mɛ dó Salímu; ɖó sin sukpɔ́ ɖo fínɛ́. Mɛ lɛ́ɛ nɔ yi gɔ̌n tɔn, bɔ é nɔ lɛ yɛhwesin nú yě.

²⁴ È ko wlí Jǎan dó gankpá mɛ hwenɛ́nu ǎ.

²⁵ Énɛ́ ɔ́, Jǎan sín ahwanvú ɖé lɛ́ɛ wá ɖo nǔ dɔn xá Jwifu ɖokpó wɛ, dó wǔsláslá wú.

²⁶ Yě wǎ yi Jǎan gɔ́n, bó ɖɔ n'i ɖɔ: “Mɛ̌si, nya e kpódó hwi kpó nɔ Judɛ́ɛn tɔ ɔ́ gúdo dɔ̌n, bɔ a ɖe kúnnu n'i ɔ́ lɔmɔ̌ ɖo yɛhwesin lɛ nú mɛ wɛ, bɔ mɛ lɛ́ɛ bǐ ɖo gɔ̌n tɔn yi wɛ.”

²⁷ Jǎan ka yí gbe nú yě ɖɔ: “Mawu má ná nǔɖé mɛɖé ǎ ɔ́, é sixú mɔ ǎ.

²⁸ Mi ɖésúnɔ ná ɖe kúnnu nú mì ɖɔ un ɖɔ: ‘Un nyí Klísu ɔ́ ǎ; lo ɔ́, Mawu sɛ́ mì dó, bɔ un jɛ nukɔn n'i.’

²⁹ Asisúnɔ tɔn wɛ nyí asi ɔ́; lo ɔ́, asisúnɔ sín xɔ́ntɔn e ɖo asisúnɔ ɔ́ kpá, bó ɖo gbe tɔn se wɛ ɔ́, xomɛ nɔ hun i. Mɔ̌ wɛ xomɛ hun nyɛ lɔmɔ̌ din ɔ́ nɛ́; bɔ xomɛhunhun ce ɔ́, nǔ bǐ vɔ ɖ'é wú.

³⁰ É jɛ xá ɖɔ éyɛ́ ní ɖo susu xɔ wɛ, bónú susu nyɛtɔn ná ɖo ɖiɖe kpo wɛ.”

Mɛ e gosín sɛ́xwé é

³¹ “Mɛ e gosín sɛ́xwé ɔ́ hú gǎn mɛ bǐ. Mɛ e ka ɖo ayǐkúngban jí ɔ́, ayǐkúngban jí tɔn wɛ é nyí, bó nɔ́ ɖɔ ayǐkúngban jí sín xó. Hǔn, mɛ e gosín sɛ́xwé wá ɔ́ hú gǎn mɛ bǐ nǔgbó.

³² Éyɛ́ ɔ́, nǔ e é mɔ ɔ́, kpódó nǔ e é se ɔ́ kpó sín kúnnu wɛ é nɔ ɖe; bɔ mɛ ɖěbǔ ka ɖi nǔ nú kúnnuɖiɖe tɔn ǎ.

³³ Mɛ ɖěbǔ yí kúnnuɖiɖe tɔn ɔ́, mɛ ɔ́ nɔ ɖe xlɛ́ ɖɔ nǔ e Mawu ɖɔ ɔ́, nǔgbó wɛ.

³⁴ Mɛ e Mawu sɛ́ dó ɔ́, Mawuxó wɛ é nɔ ɖɔ; ɖó Mawu nɔ ɖó jlɛ̌ nú Yɛ tɔn e é nɔ ná mɛ e é sɛ́ dó ɔ́ ǎ.

³⁵ Tɔ́ ɔ́ yí wǎn nú Vǐ ɔ́, bó sɔ́ nǔ lɛ́ɛ bǐ dó alɔ tɔn mɛ.

³⁶ Mɛ e ɖi nǔ nú Vǐ ɔ́, mɔ gbɛ mavɔ mavɔ; mɛ e ma ka se tónú nú vǐ ɔ́ ǎ ɔ́, é ná mɔ gbɛ mavɔ mavɔ ǎ; lo ɔ́, xomɛsin Mawu tɔn ɖo jǐ tɔn.”