Jǎan 21 - MAWUXÓWÉMA

¹ Énɛ́ ɔ́ gúdo ɔ́, Jezu lɛ́ sɔ́ éɖée xlɛ́ ahwanvú tɔn lɛ́ɛ ɖo Tibɛliadi tɔ tó. Lě e é ka sɔ́ éɖée xlɛ́ yě gbɔn é ɖíe:

² Sinmɔ́ɔ Piyɛ́ɛ, Tɔmáa e è nɔ ylɔ́ ɖɔ hǒxo ɔ́, Natanayɛ́li e gosín Kana Galilée yíkúngban jí é, Zebeɖée ví súnnu we lɛ́ɛ, kpódó ahwanvú Jezu tɔn we ɖěvo lɛ́ɛ kpó ɖo kpɔ́.

³ Sinmɔ́ɔ Piyɛ́ɛ ɖɔ nú yě ɖɔ: “Un ná yi tɔ jǐ, bó ná yi nyi ɖɔ;” bɔ mɛ ɖě lɛ́ɛ ɖɔ n'i ɖɔ: “Mǐ lɔmɔ̌ ná xwedó we yi.” Bɔ yě yi byɔ́ tɔjíhún mɛ, bó sɛ yi tɔ ɔ́ jí; yě ká wlí nǔ ɖěbǔ zǎn énɛ́ mɛ ǎ.

⁴ Ée ayǐ ɖo kinkɛn wɛ ɔ́, Jezu wá nɔ te ɖo tɔ ɔ́ tó, ahwanvú tɔn lɛ́ɛ ka tunwun ɖɔ é wɛ ǎ.

⁵ Jezu ɖɔ nú yě ɖɔ: “Vǐ ce lɛ́ɛ mi; mi mɔ nǔɖé wlí a?” Yě ká yí gbe n'i ɖɔ: “Éeǒ! Mǐ mɔ nǔ ɖěbǔ wlí ǎ.”

⁶ É ka ɖɔ nú yě ɖɔ: “Mi bo nyi ɖɔ ɔ́ dó ɖisíxwé nú tɔjíhún ɔ́, énɛ́ ɔ́ mi ná mɔ hweví wlí.” Yě ká nyi ɖɔ ɔ́ dó ɖisíxwé nǔgbó, bɔ ɖɔ ɔ́ wlí hweví gěgé, káká bɔ yě sɔ́ sixú dɔn tɔ́n ǎ.

⁷ Énɛ́ ɔ́, ahwanvú e Jezu yí wǎn ná ɔ́ ɖɔ nú Piyɛ́ɛ ɖɔ: “Aklúnɔ wɛ!” Ée Sinmɔ́ɔ Piyɛ́ɛ se ɖɔ Aklúnɔ wɛ ɔ́, é sɔ́ awu tɔn sin dó alin, bó lɔ́n jɛ tɔ ɔ́ mɛ, ɖó é ko ɖe awu ɖ'ayǐ.

⁸ Ahwanvú ɖě lɛ́ɛ ka zɔn tɔjíhún ɔ́ mɛ wá, bó dɔn ɖɔ ɔ́, bɔ hweví gɔ́. Fí e yě ɖe dó agě ɔ́ jí ɔ́ sɔ́ lín ǎ; é ná yi mɛ̌tlu kanwe ko (100) mɔ̌.

⁹ Ée yě jɛ te ɔ́, yě mɔ myɔkán, bɔ è ɖo hweví hi ɖ'é jí wɛ; yě lɛ́ mɔ wɔ̌xúxú ɖo fínɛ́.

¹⁰ Jezu ɖɔ nú yě ɖɔ: “Mi fɔ hweví e mi wlí din lɛ́ɛ ɖě wǎ.”

¹¹ Ée Jezu ɖɔ mɔ̌ ɔ́, Sinmɔ́ɔ Piyɛ́ɛ yi byɔ́ tɔjíhún ɔ́ mɛ, bó dɔn ɖɔ ɔ́ tɔ́n, bɔ hweví kloklo kantɔn gban-nukún-atɔn (153) ɖo ɖɔ ɔ́ mɛ, có ɖɔ ɔ́ vún ǎ.

¹² Jezu ɖɔ nú yě ɖɔ: “Mi wá ɖu nǔ.” Ahwanvú lɛ́ɛ ɖokpó ka glá, bó kan mɛ e é nyí ɔ́ byɔ́ ɛ ǎ ɖó yě bǐ mɔ nǔ jɛ wú ɖɔ Aklúnɔ wɛ.

¹³ Jezu ka sɛ yá yě, bó sɔ́ wɔ̌xúxú ɔ́ nú yě, bó lɛ́ sɔ́ hweví ɔ́ lɔ nú yě.

¹⁴ Sín hwenu e Jezu fɔ́n sín kú ɔ́, azɔn atɔngɔ́ ɔ́ nɛ́ é ɖo éɖée sɔ́ xlɛ́ ahwanvú tɔn lɛ́ɛ wɛ nɛ́.

Jezu kpódó Piyɛ́ɛ kpó

¹⁵ Ée yě ɖu nǔ ɔ́, Jezu ɖɔ nú Sinmɔ́ɔ Piyɛ́ɛ ɖɔ: “Sinmɔ́ɔ Jǎan ví! A yǐ wǎn nú mì hú lě e mɛ élɔ́ lɛ́ɛ yí wǎn nú mì gbɔn é a?” Bɔ Piyɛ́ɛ yí gbe n'i ɖɔ: “Ɛɛn Aklúnɔ; a tunwun ɖɔ un yí wǎn nú we.” Bɔ Jezu ɖɔ n'i ɖɔ: “Nǎ nǔɖuɖu lɛ̌ngbɔ́ví ce lɛ́ɛ!”

¹⁶ Jezu lɛ́ kanbyɔ́ ɛ azɔn wegɔ́ ɔ́ ɖɔ: “Sinmɔ́ɔ Jǎan ví, a yǐ wǎn nú mì ganjí a?” Bɔ Piyɛ́ɛ lɛ́ yí gbe n'i ɖɔ: “Ɛɛn Aklúnɔ, a tunwun ɖɔ un yí wǎn nú we.” Bɔ Jezu lɛ́ ɖɔ n'i ɖɔ: “Kpé nukún dó lɛ̌ngbɔ́ ce lɛ́ɛ wú.”

¹⁷ Jezu lɛ́ kanbyɔ́ ɛ azɔn atɔngɔ́ ɔ́ ɖɔ: “Sinmɔ́ɔ Jǎan ví, a yǐ wǎn nú mì a?” Ée Piyɛ́ɛ mɔ ɖɔ Jezu kanbyɔ́ émí azɔn atɔngɔ́ ɔ́ ɖɔ é yí wǎn nú émí a jí ɔ́, wǔ kú i, bɔ é gbɔ bó yí gbe n'i ɖɔ: “Aklúnɔ, a tunwun nǔ bǐ; a tunwun ɖɔ un yí wǎn nú we.” Jezu ka ɖɔ n'i ɖɔ: “Nǎ nǔɖuɖu lɛ̌ngbɔ́ ce lɛ́ɛ.

¹⁸ Má ɖɔ nǔgbó nú we, hwenu e a ɖo dɔ̌nkpɛ mɛ ɔ́, hwi ɖésú wɛ nɔ sin gǒjíblánú towe, bó nɔ́ yi fí e jló we ɔ́ bǐ; amɔ̌, hwenu e a nǎ wá kpo nyɔ̌ɖaxó ɔ́, a nǎ dlɛ́n alɔ towe lɛ́ɛ, bɔ mɛ ɖěvo ná sin gǒjíblánú nú we, bó ná dɔn we gbɔn fí e a ma jló ǎ é.”

¹⁹ Kú alɔkpa e Piyɛ́ɛ ná kú, bó ná dó ná susu Mawu ɔ́ xlɛ́ ɛ wɛ Jezu ɖe, bó dó ɖɔ mɔ̌ n'i; énɛ́ ɔ́ gúdo ɔ́, é ɖɔ n'i ɖɔ: “Xwedó mì.”

Jezu kpódó ahwanvú tɔn e é yí wǎn ná ɔ́ kpó

²⁰ Piyɛ́ɛ ka lɛ́ kɔ kpɔ́n gúdo, bó mɔ ahwanvú e Jezu yí wǎn ná ɔ́ jǎwe ɖo gǔdo yětɔn; ahwanvú énɛ́ wɛ sɛkpɔ́ Jezu hwenu e yě ɖo nǔ ɖu wɛ é, bó kanbyɔ́ ɛ ɖɔ: “Aklúnɔ, mɛ̌ ka ɖo nǎ sa we ɖu wɛ.”

²¹ Ée Piyɛ́ɛ mɔ ahwanvú énɛ́ ɔ́, é kanbyɔ́ Jezu ɖɔ: “Aklúnɔ, mɛ élɔ́ ka lo? Étɛ́ ka ná jɛ dó éyɛ́ jí?”

²² Jezu ka yí gbe n'i ɖɔ: “Ényí un jló ɖɔ éyɛ́ ní nɔ ayǐ káká bónú ma lɛ́ kɔ wá ɔ́, ani wɛ kan we ɖ'é mɛ? Hwɛ ɔ́, xwedó mì.”

²³ Xó énɛ́ gba kpé mɛ e ɖi nǔ nú Jezu lɛ́ɛ mɛ, bɔ yě ɖɔ ahwanvú énɛ́ kun ɖo nǎ kú wɛ ó; Jezu ka ɖɔ é kún ná kú ó ǎ; lo ɔ́, é ɖɔ n'i ɖɔ: “Ényí un jló ɖɔ é ní nɔ ayǐ káká bónú ma lɛ́ kɔ wá ɔ́, ani wɛ kan we ɖ'é mɛ?”

²⁴ Ahwanvú énɛ́ wɛ ɖo kúnnu ɖe nú nǔ élɔ́ lɛ́ɛ bǐ wɛ; é wɛ wlán nǔ élɔ́ lɛ́ɛ, bɔ mǐ tunwun ɖɔ xó nǔgbó wɛ é ɖɔ.

Tasúná

²⁵ Jezu lɛ́ wa nǔ gěgé ɖěvo lɛ́ɛ, bɔ ényí è gbɛ̌ d'é wú bó ná wlán ɖě bɔdó ɖě wú ɔ́, un ɖiɖɔ wěma tɔn ná sukpɔ́ káká bɔ gbɛ ɔ́ bǐ ná sixú hɛn ǎ.