Jǎan 14 - MAWUXÓWÉMA

¹ Jezu ɖɔ nú ahwanvú tɔn lɛ́ɛ ɖɔ: “Mi ma nú ayi mitɔn gbadó ó. Mi ɖi nǔ nú Mawu, bó ɖi nǔ nú nyɛ lɔmɔ̌.

² Nɔtɛn gěgé wɛ ɖo Tɔ́ ce xwé bɔ un ná yi bló tɛnmɛ ɖó ɖ'ayǐ nú mi; ényí nǔ ma nyí mɔ̌ ǎ ɔ́, un ná ɖɔ nú mi ǎ.

³ Nú un ko yi bló nɔtɛn ɖó ɖ'ayǐ nú mi vɔ ɔ́, un ná lɛ́ kɔ wá kplá mi, bɔ fí e un ɖe ɔ́, mi lɔmɔ̌ ná nɔ fínɛ́.

⁴ Mi ko tunwun ali e kplá mɛ yi fí e un xwe é.”

⁵ Tɔmáa ka ɖɔ: “Aklúnɔ, mǐ tunwun fí e a xwe ɔ́ ǎ, nɛ̌ mǐ ka sixú tunwun ali ɔ́ gbɔn?”

⁶ Jezu ka yí gbe n'i ɖɔ: “Nyɛ wɛ nyí ali ɔ́, bó nyí nǔgbó ɔ́, bó ka lɛ́ nyí gbɛ ɔ́. Mɛɖěbǔ sixú yi Tɔ́ ɔ́ gɔ́n nyɛ mɛ vo ǎ.

⁷ Ényí mi tunwun mì ɔ́, mi ná tunwun Tɔ́ ce lɔmɔ̌; sín din ɔ́, mi tunwun i, bó mɔ ɛ.”

⁸ Filípu ka ɖɔ n'i ɖɔ: “Aklúnɔ, xlɛ́ Tɔ́ ɔ́ mǐ; nǔ e ba wɛ mǐ ɖe ɔ́ bǐ nɛ́.”

⁹ Jezu ka yí gbe n'i ɖɔ: “Filípu, sín tɛgbɛ wɛ un ko ɖo kpɔ́ xá mi, bɔ a ka ko tunwun mì káká jɛ din ǎ. Mɛ e mɔ mì ɔ́ ko mɔ Tɔ́ ɔ́; aniwútu a ka ɖɔ: ‘Xlɛ́ Tɔ́ ɔ́ mǐ?’

¹⁰ A ɖi ɖɔ un ɖo Tɔ́ ɔ́ mɛ, bɔ Tɔ́ ɔ́ ɖo nyɛ ɖésúnɔ mɛ ǎ cé? Xó e ɖɔ nú mi wɛ un ɖe lɛ́ɛ ɔ́, xo ce mɛ wɛ un nɔ kpɔ́n kpowun, bó nɔ́ ɖɔ ǎ; lo ɔ́, Tɔ́ e ɖo nyɛ mɛ ɔ́ sín nǔwiwa wɛ.

¹¹ Mi ɖi xó e ɖɔ nú mi wɛ un ɖe, bó ɖɔ: un ɖo Tɔ́ ɔ́ mɛ, bɔ Tɔ́ ɔ́ ka ɖo nyɛ ɖésú mɛ é. Nú mi na bo ma ka jló ná ɖi xó ce ǎ hǔn, mi bo kpɔ́n dó nǔ e wa wɛ un ɖe lɛ́ɛ wú vɔ́vɔ́, bó ɖi nǔ nú mì.

¹² Ma ɖɔ nǔgbó nú mi: mɛ e ɖi nǔ nú mì ɔ́ ná jlɛ́ nǔ e jlɛ́ wɛ un ɖe lɛ́ɛ, bó ná lɛ́ jlɛ́ hú mɔ̌; ɖó un ko xwe Tɔ́ ɔ́ gɔ́n.

¹³ Bɔ nǔ e mi na byɔ́ gbɔn nyǐkɔ ce mɛ ɔ́, un ná ná bǐ mi, bónú Tɔ́ ɔ́ ná sixú xɔ susu gbɔn Vǐ ɔ́ jí.

¹⁴ Ényí mi ylɔ́ nyǐkɔ ce, bó byɔ́ nǔ ɖěbǔ ɔ́, un ná bló nú mi.”

Jezu dó Yɛsinsɛn sín akpá nú ahwanvú tɔn lɛ́ɛ

¹⁵ “Nú mi yí wǎn nú mì ɔ́, mi ná nyi sɛ́n ce lɛ́ɛ.

¹⁶ Nyɛ ka ná sa vo nú Tɔ́ ɔ́, bɔ é ná sɛ́ gbɔdónúmɛtɔ́ ɖěvo dó mi, bɔ é ná nɔ kpɔ́ xá mi tɛgbɛ.

¹⁷ Éyɛ́ wɛ nyí Yɛ nǔgbónɔ, bɔ mɛ e nyí gbɛ ɔ́ tɔn lɛ́ɛ sixú yí i ǎ; ɖó yě sixú mɔ ɛ ǎ; yě ká lɛ́ sixú tunwun i ǎ. Midɛɛ lɛ́ɛ ɔ́, mi ka ko tunwun i, ɖó é ɖo kpɔ́ xá mi, bó ɖo mi mɛ.

¹⁸ “Un ná jǒ mi dó nyi tɔ́cyɔvǐ nɔcyɔvǐ gbɛ mɛ ǎ; un ná lɛ́ wá mi gɔ́n.

¹⁹ Zaanɖé din ɔ́, mɛ e nyí gbɛ ɔ́ tɔn lɛ́ɛ sɔ́ ná mɔ mì ǎ; amɔ̌, midɛɛ lɛ́ɛ ɔ́, mi ná mɔ mì; ɖó un ɖo gbɛ, bɔ mi lɔmɔ̌ mi ná nɔ gbɛ.

²⁰ Azǎn énɛ́ gbe ka wá su ɔ́, mi na tunwun ɖɔ un ɖo Tɔ́ ce mɛ, bɔ mi ɖo nyɛ mɛ, bɔ nyɛ ɖo mi mɛ.

²¹ “Mɛ e hɛn sɛ́n ce lɛ́ɛ ayi mɛ, bó nɔ́ nyi yě lɛ́ɛ ɔ́, mɛ énɛ́ wɛ yí wǎn nú mì. Tɔ́ ce ná yí wǎn nú mɛ e yí wǎn nú mì ɔ́, bɔ nyɛ lɔ ná yí wǎn n'i, bó ná ɖe nyɛɖée xlɛ́ ɛ.”

²² Judi ka kanbyɔ́ Jezu ɖɔ: “Aklúnɔ, nɛ̌ ka gbɔn bɔ mǐdɛɛ lɛ́ɛ kɛ́ɖɛ́ jɛ́n a nǎ ɖe hwiɖée xlɛ́, bó ma ka ná ɖe hwiɖée xlɛ́ gbɛtɔ́ lɛ́ɛ bǐ ǎ?” (É ka nyí Judási Isikaliɔ́ti wɛ ǎ).

²³ Bɔ Jezu ka yí gbe n'i ɖɔ: “Ényí mɛɖé yí wǎn nú mì ɔ́, é ná bló ɖó xó ce lɛ́ɛ jí, bɔ Tɔ́ ce na yí wǎn n'i, bɔ mǐ ná wá gɔ̌n tɔn, bó ná nɔ kpɔ́ xá ɛ.

²⁴ Mɛ e ma ka yí wǎn nú mì ǎ ɔ́, é nɔ bló ɖó xó ce lɛ́ɛ jí ǎ. Nyɛ ɖésúnɔ gɔ́n wɛ xó e ɖɔ nú mi wɛ un ɖe lɛ́ɛ ka nɔ gosín ǎ, Tɔ́ ce e sɛ́ mì dó ɔ́ gɔ́n wɛ xó énɛ́ lɛ́ɛ nɔ gosín.

²⁵ “Un ɖɔ xó énɛ́ lɛ́ɛ nú mi, hwenu e un kpo ɖo kpɔ́ xá mi é.

²⁶ Lo ɔ́, mɛ e ná d'alɔ mi ɔ́, Yɛsinsɛn e Tɔ́ ɔ́ ná sɛ́ dó mi ɖo nyǐkɔ ce mɛ é wɛ; é ná kplɔ́n nǔ bǐ mi, bó ná flín nǔ e un ɖɔ nú mi lɛ́ɛ bǐ mi.

²⁷ “Fífá wɛ un jó dó nú mi; fífá ce wɛ un ná mi. Un ná mi lě e gbɛ ɔ́ nɔ ná mɛ gbɔn ɔ́ ǎ; ado ma hu mi ó; xɛsi ma ɖi mi ó.

²⁸ Mi se bɔ un ɖɔ nú mi ɖɔ: ‘Un xweyǐgbe; un ka ná lɛ́ kɔ wá mi gɔ́n.’ Ényí ɖɔ mi yí wǎn nú mì wɛ ɔ́, xomɛ wɛ ná ko hun mi, ɖó Tɔ́ ɔ́ gɔ́n e un xwe ɔ́ wútu, ɖó Tɔ́ ɔ́ hú gǎn mì.

²⁹ Un ko ɖɔ nǔ énɛ́ lɛ́ɛ nú mi din, cóbɔ yě ná wá jɛ, lobo nú yě wá jɛ ɔ́, mi ná ɖi nǔ.

³⁰ Un sɔ́ ɖo xó gěgé ɖé ná ɖɔ xá mi wɛ ǎ, ɖó axɔ́sú gbɛ élɔ́ tɔn ko jǎwe; é ɖó acɛ ɖěbǔ ɖo jǐ ce ǎ.

³¹ Amɔ̌, nú gbɛtɔ́ lɛ́ɛ ná dó tunwun ɖɔ un yí wǎn nú Tɔ́ ɔ́, un ná wa nǔ lě e Tɔ́ ɔ́ zɔ́n mì gbɔn é; mi sí te nú mǐ ná gosín fí.”