Jǎan 12 - MAWUXÓWÉMA

¹ Dǐndínwáyixwe kpo azǎn ayizɛ́n, bɔ Jezu yi Betaníi fí e Lazáa e é fɔ́n sín kú ɔ́ nɔ́ nɔ é.

² Ée é yi fínɛ́ ɔ́, yě ná nǔɖuɖu i, bɔ é kpódó Lazáa kpó ɖo ɖuɖu wɛ, bɔ Maati ɖo ká sɛn wɛ.

³ Mali ka sɔ́ célu axivɛ́nu lǐtli vlɔ́, bɔ è sɔ́ nǎ akú dó bló ná, lobo kɔn dó afɔ tɔn lɛ́ɛ jí, bó dɔn ɖa tɔn dó súnsún ná, bɔ célu ɔ́ sín wǎn gba kpé xwé ɔ́ gbe bǐ.

⁴ Jezu sín ahwanvú Judási Isikaliɔ́ti e ɖo nǎ sa ɛ wɛ ɔ́ ɖɔ:

⁵ “Étɛ́wú è ma ka sixú sɔ́ célu énɛ́ e è nǎ mɔ gankwɛ́ afɔɖé kanwe ko (250) cóbó xɔ ɔ́ sɔ́ sa, bó má akwɛ́ tɔn nú wamamɔnɔ lɛ́ɛ ǎ?”

⁶ É ka nyí ɖɔ wamamɔnɔ lɛ́ɛ sín kan vɛ́ wɛ é ɖe, bo ɖɔ mɔ̌ ǎ; lo ɔ́, ajotɔ́ wɛ n'i, ɖó é wɛ nɔ hɛn akwɛ́ yětɔn, bó nɔ ɖo finfin ɖ'é mɛ wɛ.

⁷ Jezu ka ɖɔ: “Mi jó nyɔ̌nu ɔ́ dó ní hɛn nǔ e é ɖó ɔ́ nú gbe e gbe è nǎ ɖi mì é.

⁸ Midɛɛ lɛ́ɛ ɔ́, wamamɔnɔ lɛ́ɛ ɖo mi mɛ tɛgbɛ; nyɛ ka ɖo mi mɛ tɛgbɛ ǎ.”

Yě blá Lazáa gbé

⁹ Hwenɛ́nu ɔ́, Judéenu lɛ́ɛ gěgé se ɖɔ Jezu ɖo Betaníi, bó nyi ahwan ɖidó dɔ̌n; é ka nyí Jezu kɛ́ɖɛ́ gbé wɛ yě tɔ́n ǎ, lo ɔ́, yě jló ná yi kpɔ́n Lazáa e é fɔ́n sín kú ɔ́ lɔ.

¹⁰ Vɔ̌sánú-xwlémawutɔ́gán lɛ́ɛ ka ɖe gbeta tɔ́n, bó ná hu Lazáa lɔmɔ̌,

¹¹ ɖó éyɛ́ wútu wɛ Judéenu lɛ́ɛ gěgé jó vɔ̌sánú-xwlémawutɔ́gán yětɔn lɛ́ɛ dó, bó ɖi nǔ nú Jezu.

Jezu byɔ́ Jeluzalɛ́mu

¹² Ayǐhɔ́ngbe tɔn ɔ́, yě mɛ wɔ̌buwɔ́bú e wá xwe ɖu gbé ɖo Jeluzalɛ́mu lɛ́ɛ se ɖɔ Jezu ja fínɛ́;

¹³ bɔ yě ba děma hɛn alɔ mɛ, bo ɖo xó sú wɛ káká bo yi kpé e; bo nɔ ɖɔ: “Ozána! Susu nú Mawu! Susu nú mɛ e jǎwe ɖo Aklúnɔ nyǐkɔ mɛ é: susu nú axɔ́sú Izlayɛ́li tɔn.”

¹⁴ Jezu mɔ tócíví ɖokpó bó jínjɔ́n jí, lě e è ko wlán dó Mawuxówéma ɔ́ mɛ gbɔn ɔ́ ɖɔ:

¹⁵ “Mi ma ɖi xɛsi ó Sinyɔ́ɔnu lɛ́ɛ mi, axɔ́sú mitɔn ɖíe jǎwe bó jínjɔ́n tócíví jí e!”

¹⁶ Ahwanvú Jezu tɔn lɛ́ɛ ka yá wǔ mɔ nǔ jɛ nǔ énɛ́ lɛ́ɛ e ɖo jijɛ wɛ lɛ́ɛ mɛ ǎ; lo ɔ́, hwenu e è sɔ́ Jezu su ɔ́, yě flín ɖɔ nǔ énɛ́ lɛ́ɛ e jɛ ɔ́ bǐ wɛ è ko wlán dó wú tɔn ɖ'ayǐ nǔgbó.

¹⁷ Mɛ e ɖo te hwenu e Jezu ylɔ́ Lazáa sín yɔdo mɛ, bo fɔ́n ɛ sín kú ɔ́ ɖɔ nǔ e yě mɔ ɔ́.

¹⁸ Nǔ énɛ́ wútu wɛ mɛ lɛ́ɛ nyi ahwan wá kpé e, ɖó yě se ɖɔ é jlɛ́ nǔ mɔ̌hun.

¹⁹ Falizyɛn lɛ́ɛ ka jɛ ɖiɖɔ jí ɖo yěɖée tɛ́ntin ɖɔ: “Mi ma mɔ din ɖɔ mǐ kún sixú ɖo nǔ ɖěbǔ wú na kpé wɛ ó a? Énɛ́ mɛ lɛ́ɛ bǐ ɖo xwixwedó e wɛ nɛ́!”

Glɛ̌sinu ɖé lɛ́ɛ ɖo Jezu ba wɛ

²⁰ Glɛ̌sinu ɖé lɛ́ɛ ɖo mɛ e wá Mawu sɛn gbé ɖo Jeluzalɛ́mu xwe ɔ́ hwenu lɛ́ɛ mɛ.

²¹ Yě yi mɔ Filípu e gosín Bɛtisayida ɖo Galilée yíkúngban jí ɔ́, bo ɖɔ n'i ɖɔ: “Mɛɖaxó, mǐ jló ná mɔ Jezu.”

²² Filípu ka yi ɖó xó énɛ́ te nú Andlé, bɔ yě mɛ we lɛ́ɛ zɔn kpɔ́, bo yi ɖɔ nú Jezu.

²³ Jezu ka yí gbe nú yě ɖɔ: “Hwenu e è nǎ sɔ́ Gbɛtɔ́ví ɔ́ su ɔ́ sín gan ɖíe xo lo e.

²⁴ Ma ɖɔ nǔgbó nú mi, ényí jinukún má yi do bó kú ǎ ɔ́, é nɔ ná nǔkún ǎ; kú wɛ é nɔ́ kú, cóbó nɔ gba kún.

²⁵ Mɛ e yí wǎn nú gbɛ éɖée tɔn ɔ́, gbɛ tɔn ná bú dó e; mɛ e ka gbɛ́ wǎn nú gbɛ éɖée tɔn ɖo gbɛ mɛ fí ɔ́ ná hɛn gbɛ tɔn ɖ'ayǐ nú gbɛ mavɔ mavɔ.

²⁶ Mɛ ɖé jló ná nyí mɛsɛntɔ́ ce hǔn, mɛ ɔ́ ní xwedó mì, bɔ fí e un ná nɔ ɔ́ wɛ é lɔmɔ̌ ná nɔ. Ényí mɛɖé nyí mɛsɛntɔ́ ce ɔ́, Tɔ́ ce ná sɔ́ mɛ ɔ́ su.”

Jezu ɖɔ xó dó kú tɔn wú

²⁷ Jezu ɖɔ: “Din ɔ́, ayi ce bǐ wɛ gbadó. Nɛ̌ un ka sixú ɖɔ gbɔn? Daá, xɔ mì ɖo wǔvɛ́ e jǎwe nú mì é sí wɛ un ka na ɖɔ a? Éeǒ, un ná ɖɔ mɔ̌ ǎ; énɛ́ wútu wɛ un wá.

²⁸ Hǔn Daá, bo sɔ́ nyǐkɔ towe su.” Hwenɛ́nu ɔ́, gbe ɖé ka ɖi sín jǐxwé, bó ɖɔ: “Un ko sɔ́ nyǐkɔ ce sɔ́ su; un ka ná lɛ́ sɔ́ ɛ su.”

²⁹ Ée ahwan e ɖo fínɛ́ lɛ́ɛ se gbe ɔ́, yě ɖɔ: “Jǐ wɛ ɖo gbe dó wɛ.” Mɛ ɖěvo lɛ́ɛ ka ɖɔ: “Wɛnsagun Mawu tɔn ɖé wɛ ɖɔ xó n'i.”

³⁰ Jezu ka yí xó bo ɖɔ: “Nyɛ wú wɛ gbe énɛ́ ɖi ǎ; midɛɛ lɛ́ɛ wútu wɛ.

³¹ Hwenu e Mawu ná ɖɔ hwɛ xá gbɛ élɔ́ dó ɔ́ ɖíe su e; din wɛ Mawu ná nya axɔ́sú gbɛmɛ fí tɔn ɔ́ tɔ́n.

³² Hwenu e è nǎ sɔ́ mì sín ayǐkúngban jí dó jǐ ɔ́, un ná dɔn gbɛtɔ́ lɛ́ɛ bǐ dó wǔ.”

³³ Kú alɔkpa e kú gbé Jezu ja ɔ́ xó ɖɔ wɛ é ɖe.

³⁴ Mɛ lɛ́ɛ ka yí gbe n'i ɖɔ: “Mǐ xa ɖo Mawuxówéma ɔ́ mɛ ɖɔ Klísu ɔ́ kún ná kú gbeɖé ó, bɔ hwɛ ka ɖo ɖiɖɔ nú mǐ wɛ din ɖɔ è nǎ sɔ́ Gbɛtɔ́ví ɔ́ dó jǐ. Mɛ̌ ká nyí Gbɛtɔ́ví énɛ́?”

³⁵ Jezu ka ɖɔ nú yě ɖɔ: “Wěziza kpo ɖo mi tɛ́ntin nú hwenu kpɛɖé; mi ɖi zɔnlin hwenu e wěziza kpo ɖo mi tɛ́ntin é, bónú zǐnflú má wá fyán mi ó; ɖó mɛ e ɖo zɔnlin ɖi wɛ ɖo zǐnflú mɛ ɔ́ tunwun fí e é xwe ɔ́ ǎ.

³⁶ Hǔn, din e wěziza ɔ́ kpo ɖo te nú mi ɔ́, mi bo ɖi nǔ n'i, bó ná húzú wěziza gbɛtɔ́.” Ée Jezu ɖɔ xó énɛ́ lɛ́ɛ gúdo ɔ́, é gosín fínɛ́, bó sɔ́ éɖée hwlá dó yě.

Jwifu lɛ́ɛ ɖi nǔ nú Jezu ǎ

³⁷ Jezu jlɛ́ nǔ tobutóbú énɛ́ lɛ́ɛ ɖo nukún yětɔn mɛ, có yě ká ɖi nǔ n'i ǎ;

³⁸ bónú xó e Mawu ko ɖɔ ɖ'ayǐ gbɔn gbeyíɖɔ tɔn Ezayíi jí ɔ́ ná dó jɛ; é wɛ nyí ɖɔ: “Aklúnɔ, mɛ̌ ka ɖi nǔ nú xó e mǐ ɖɔ lɛ́ɛ? Mɛ̌ Aklúnɔ ka ɖe hlɔ̌nhlɔ́n tɔn xlɛ́?”

³⁹ Yě sixú ɖi nǔ nǔgbó ǎ, ɖó Ezayíi lɛ́ ɖɔ:

⁴⁰ “Mawu va nukún yě, nú yě má mɔ nukúnnú ó; é cyɔ́n nǔ ayi yětɔn jí, nú yě ma mɔ nukúnnú jɛ nǔ mɛ ó. Mawu ɖɔ: ‘Un bló mɔ̌, bónú yě ma lɛ́ kɔ wá gɔ̌n ce nú má gbɔ azɔn nú yě ó.’ ”

⁴¹ Ezayíi ɖɔ xó énɛ́ lɛ́ɛ, ɖó é mɔ susu e Jezu ɖó é, bó ɖɔ xó dó wǔ tɔn.

⁴² Nǔ ɖo mɔ̌ có Jwifugán lɛ́ɛ gěgé ɖi nǔ nú Jezu; yě ká ɖe nǔɖiɖi yětɔn xlɛ́ ǎ, Falizyɛn lɛ́ɛ táá wá nya yě tɔ́n sín kplɔ́ngbasá lɛ́ɛ.

⁴³ Đó susu xɔ ɖo gbɛtɔ́ lɛ́ɛ gɔ́n myá nukún nú yě hú susu xɔ ɖo Mawu gɔ́n.

Jezu xó lɛ́ɛ wɛ ná ɖɔ hwɛ xá mɛ

⁴⁴ Jezu zé gbe yi jǐ, bo ɖɔ: “Mɛ e ɖi nǔ nú mì ɔ́, nyɛ kɛ́ɖɛ́ wɛ é ɖi nǔ ná ǎ; é lɛ́ ɖi nǔ nú mɛ e sɛ́ mì dó é.

⁴⁵ Mɛ e mɔ mì ɔ́, mɔ mɛ e sɛ́ mì dó ɔ́ lɔmɔ̌.

⁴⁶ Nyɛ ɔ́, un wá gbɛ ɔ́ mɛ wěziza ɖɔhun, bónú mɛ e ɖi nǔ nú mì ɔ́ ma nɔ zǐnflú mɛ ó.

⁴⁷ Ényí mɛɖé se xó ce, bó ma bló ɖ'é jí ǎ ɔ́, nyɛ wɛ ná ɖó hwɛ n'i ǎ, ɖó un tɔ́n hwɛ ɖó nú mɛ gbé bó wá gbɛ ɔ́ mɛ ǎ; gbɛ ɔ́ hwlɛngán gbé wɛ un ja bó wá.

⁴⁸ Mɛ e gbɛ́ mì, bó ma yí xó ce lɛ́ɛ ǎ ɔ́, é ko ɖó nǔ e na ɖɔ hwɛ xá ɛ lɛ́ɛ; xó e un ɖɔ lɛ́ɛ wɛ ja hwɛ ɖɔ xá ɛ gbé ɖo azǎn gǔdo gúdo tɔn ɔ́ gbe.

⁴⁹ Đó nyɛ ɖésúnɔ sín acɛ mɛ ɖɔ xó dó wɛ un ɖe ǎ; lo ɔ́, nǔ e Tɔ́ e sɛ́ mì dó ɔ́ zɔ́n ɖiɖɔ mì ɔ́ ɖɔ wɛ un ɖe.

⁵⁰ Un ka tunwun ɖɔ nǔ e Tɔ́ e sɛ́ mì dó ɔ́ zɔ́n ɔ́ nɔ ná gbɛ mavɔ mavɔ. Hǔn, xó e ɖɔ nú mi wɛ un ɖe lɛ́ɛ bǐ ɔ́, lě e Tɔ́ ce zɔ́n mì gbɔn ɔ́ ɖɔ gbɔn wɛ un ɖe.”