Hwliti 3 - MAWUXÓWÉMA

Hwliti dɔ́ Bowozi sín afɔligbé

¹ Nɔemíi ɖɔ nú Hwliti gbe ɖokpó ɖɔ: “Vǐ ce, un jló ɖɔ a nǐ da asú bó vo.

² Lě e a ko tunwun gbɔn ɔ́, Bowozi e jó we dó bɔ a cyán nǔkún ɖo azɔ̌watɔ́ tɔn nyɔ̌nu lɛ́ɛ gúdo ɔ́, mɛ mǐtɔn wɛ. Égbé gbadanu ɔ́, é ná yi só nǔkún ɖo kɔ́xota ɖo gle tɔn mɛ.

³ Din ɔ́, nǔ e a nǎ wa ɔ́ ɖíe: yi lɛ wǔ, bó sá nǔ, bó ba acɔ́ ganjí. Énɛ́ ɔ́ gúdo ɔ́, a nǎ yi fí e só nǔkún ɖe wɛ é ɖe é. Ma ka lɔn nú é mɔ we cóbó ɖu nǔ bó nu ahan fó ó.

⁴ É xwe ayǐ mlɔ́ gbé ɔ́, a nǎ kpɔ́n fí e é ná mlɔ́ ɔ́ ganjí. Énɛ́ ɔ́ gúdo ɔ́, a nǎ sɛkpɔ́ ɛ bó ɖe avɔ sín afɔ tɔn jí, bó ná mlɔ́ afɔ tɔn ligbé. A blǒ mɔ̌ ɔ́, é ɖésú ná ɖɔ nǔ e a nǎ wa ɔ́ nú we.”

⁵ Hwliti yí gbe n'i ɖɔ émí ná bló nǔ e é ɖɔ nú émí ɔ́ bǐ.

⁶ Hwliti ka yi kɔ́xota fí e Bowozi nɔ́ só nǔkún ɖe é bó bló nǔ e asú tɔn nɔ zɔ́n ɔ́ bǐ pɛ́pɛ́pɛ́.

⁷ Bowozi ɖu nǔ bó nu ahan, bɔ xomɛ hun i ganjí, bɔ é yi mlɔ́ jinukún tɔn e é kplé ɔ́ kpá. Hwliti sɛkpɔ́ ɛ dɛ̌dɛ̌, bó ɖe avɔ sín afɔ tɔn jí, bó mlɔ́ afɔ tɔn ligbé.

⁸ Ée zǎn vlɔ́ ɖó we ɔ́, Bowozi nyí fɔ́n hawun, bó nya dó nukɔn bó mɔ nyɔ̌nu ɖo ayǐmlɔ́mlɔ́ ɖo afɔ tɔn ligbé.

⁹ Ée é mɔ mɔ̌ ɔ́, é ɖɔ: “Hwi mɛ̌ ká nɛ́?” Nyɔ̌nu ɔ́ ká yí gbe n'i ɖɔ: “Nyɛ mɛsɛntɔ́ towe Hwliti wɛ, kɛnklɛ́n yí mì dó xɔ towe sá, ɖó a ɖǒ acɛ bó ná kpé nukún wǔ ce.”

¹⁰ Bowozi ɖɔ n'i ɖɔ: “Mawu Mavɔmavɔ ní xo ɖɛ dó jǐ towe se a yɔkpɔ́. Nǔ e a blǒ din ɔ́ lɛ́ ɖe lě e a yǐ wǎn nú asú towe mɛ lɛ́ɛ, bó ɖo gbejí nú yě gbɔn ɔ́ xlɛ́, hú nǔ e a ko bló ɖ'ayǐ é. Đó a yi ba dɔ̌nkpɛvú wamamɔnɔ abǐ dɔkunnɔ ɖé ǎ.

¹¹ Din ɔ́ yɔkpɔ́, ma ɖi xɛsi ó, un ná bló nǔ e a nǎ ɖɔ ɔ́ bǐ nú we, ɖó mɛ bǐ wɛ tunwun ɖɔ nyɔ̌nu jijɔɖagbenɔ wɛ nú we.

¹² Nǔgbó wɛ, un ɖó acɛ bó ná kpé nukún wǔ we, amɔ̌, mɛ ɖěvo ɖe bó sɛkpɔ́ we hú nyɛ.

¹³ Dɔ̌ fí, sɔ zǎnzǎn tɛɛn ɔ́, un ná yi mɔ ɛ, nú é yí gbe, bó ná kpé nukún wǔ we ɔ́, é ná bló. Nú é má ká jló ǎ ɔ́, nyɛ ná kpé nukún wǔ we, Mawu Mavɔmavɔ Gbɛɖe ɔ́ nukɔn ɖíe ɖɔ ɖe wɛ un ɖe e. Amɔ̌, to mlɔ́ ayǐ hwɛ̌ nú ayǐ ní hɔ́n.”

¹⁴ Bɔ Hwliti mlɔ́ afɔ tɔn ligbé fínɛ́ káká bɔ ayǐ hɔ́n. É ká yá wǔ fɔ́n zǎn bó sí te cóbɔ gbɛmɛ hɔ́n. Bowozi ka ɖɔ n'i ɖɔ: “Mɛ ɖé ní má tunwun ɖɔ nyɔ̌nu wá dɔ́ fí ó.”

¹⁵ É lɛ́ ɖɔ n'i ɖɔ: “Tún avɔ ɖaxó e a gbǎ ɔ́ bó hɛn ganjí.” É tɛ́ avɔ ɔ́ bɔ Bowozi jlɛ́ nǔkún towungoɖo kanɖé wǒ (50) jɛjí d'é mɛ, lobo ɖíɖá ɛ bɔ é yi xwé.

¹⁶ É wá asú tɔn nɔ gɔ́n, bɔ asú tɔn nɔ kanbyɔ́ ɛ ɖɔ: “Vǐ ce, nɛ̌ nǔ lɛ́ɛ ká yi gbɔn?” Hwliti wlí nǔ e Bowozi wa n'i ɔ́ bǐ ɖɔ nú asú tɔn nɔ.

¹⁷ É lɛ́ ɖɔ n'i ɖɔ: “É tlɛ lɛ́ ná mì nǔkún towungoɖo kanɖé wǒ (50) jɛjí élɔ́, bó ɖɔ nyi kún ná lɛ́ kɔ wá mɔ we alɔgbá ó.”

¹⁸ Nɔemíi ɖɔ n'i ɖɔ: “Vǐ ce, nɔ te bó ná kpɔ́n; Bowozi ma ɖɔ xó énɛ́ ɔ́ gbo égbé ǎ ɔ́, é ɖo nǎ gbɔjɛ́ wɛ ǎ.”