Hwliti 2 - MAWUXÓWÉMA

Hwliti cyán nǔkún ɖo Bowozi gle mɛ

¹ Nya ɖé tíin bɔ è nɔ ylɔ́ ɛ ɖɔ Bowozi; nya énɛ́ ɔ́, Nɔemíi sín asú mɛ lɛ́ɛ ɖě wɛ. Nya nukúnɖéjí ɖé wɛ; é jɛ dɔkun ɖésú.

² Hwliti Mɔwabunu ɔ́ byɔ́ gbe Nɔemíi gbe ɖokpó ɖɔ: “Nǎ gbe mì nú ma yi mɛ e ná nyɔ́ xomɛ dó wǔ ce ɔ́ sín gle mɛ, bó ná yi cyán nǔkún e nǔkún-yatɔ́ lɛ́ɛ ma mɔ bó ya ǎ lɛ́ɛ.” Nɔemíi ká yí gbe n'i ɖɔ: “Vǐ ce, bo yi.”

³ Bɔ é yi gle ɖé mɛ, bó yi cyán nǔkún ɖo fí e nǔkún-yatɔ́ lɛ́ɛ kó gbɔn dín é. Lo ɔ́, é ká wá nyí ɖɔ Bowozi, Elimɛlɛ́ki sín mɛ ɔ́ sín gle wɛ.

⁴ Ée é ná nɔ zaanɖé ɔ́, Bowozi gosín Bɛteleyɛ́mu wá. É dó gbe nǔkún-yatɔ́ lɛ́ɛ ɖɔ: “Mawu Mavɔmavɔ ní nɔ kpɔ́ xá mi.” Yě ká yí gbe n'i ɖɔ: “Mawu Mavɔmavɔ ní xo ɖɛ dó jǐ towe.”

⁵ Bowozi kanbyɔ́ nǔkún-yatɔ́gán ɔ́ ɖɔ: “Mɛ̌ ví wɛ ka nyí nyɔ̌nu énɛ́ ɔ́?”

⁶ Nǔkún-yatɔ́gán ɔ́ ká yí gbe n'i ɖɔ: “Nyɔ̌nu Mɔwabunu e kpó Nɔemíi kpó wá é wɛ.

⁷ É wá bó ɖɔ è nǐ ná gbe émí, nú émí ná cyán nǔkún e nǔkún-yatɔ́ lɛ́ɛ jó dó nyi gle mɛ lɛ́ɛ. Sín zǎnzǎn e é wá ɔ́, azɔ̌ wa wɛ jɛ́n é ɖe káká jɛ din, é gbɔjɛ́ ɖé vo ǎ.”

⁸ Bowozi ka ɖɔ nú Hwliti ɖɔ: “Yɔkpɔ́, ɖǒtó mì. Ma sɔ́ yi cyán nǔkún ɖo gle ɖěvo mɛ ó, nɔ fí xá nyɔ̌nu e ɖo azɔ̌ wa nú mì wɛ lɛ́ɛ.

⁹ Kpɔ́n fí e ya nǔkún gbɔn wɛ nyɔ̌nu lɛ́ɛ ɖe ɖo gle ɔ́ mɛ lɛ́ɛ, bó nɔ gǔdo yětɔn. Un ko ɖɔ nú azɔ̌watɔ́ ce lɛ́ɛ ɖɔ yě ní má dó tagba nú we ó. Ényí sinnugblá sín we hǔn, yi sinzɛ́n ɔ́ kɔn, bó nu sin e azɔ̌watɔ́ lɛ́ɛ dun é.”

¹⁰ Ée Bowozi ɖɔ mɔ̌ n'i ɔ́, é xwe agbɔ̌nnusú do bó ɖe kɔ́, bó ɖɔ: “Nɛ̌ a ka nyɔ́ xomɛ dó wǔ ce sɔ e? Nyɛ mɛ e nyí jǒnɔ ɔ́ a wlǐbo nú mì sɔ mɔ̌?”

¹¹ Bowozi ka yí gbe n'i ɖɔ: “Nǔ e a wa nú asú towe nɔ sín hwenu e asú towe kú ɔ́, lě e a jǒ tɔ́ towe kpó nɔ towe kpó dó, bó jó to towe dó, bó wá ɖo togun e a ma tunwun ɖ'ayǐ ǎ mɛ gbɔn ɔ́, un se bǐ.

¹² Mawu Mavɔmavɔ, Mawu Izlayɛ́li tɔn e sín awa glɔ́ a wǎ hɔn hwlá cí ɔ́, ní sú nǔ e a wa ɔ́ sín axɔ́ we, é ní ná ajɔ tɔn we, nú é ní túnflá.”

¹³ Hwliti ɖɔ: “Óo! Sɛ́ ce, xomɛ jɛ́n a nyɔ̌ dó wǔ ce sɔ mɔ̌ a? A dǒ gbɔ nú mì, a zě gbe fífá dó ɖɔ xó nú mì, có nyɛ ka tlɛ sɔ azɔ̌watɔ́ towe lɛ́ɛ ɖě lɔ ǎ.”

¹⁴ Ée nǔɖuɖu hwenu su ɔ́, Bowozi ɖɔ nú Hwliti ɖɔ: “Wǎ ɖu nǔ xá mǐ; sɔ́ wɔ̌xúxú bó sún nǔsúnnú.” Ée é ɖɔ mɔ̌ ɔ́, Hwliti jínjɔ́n nǔkún-yatɔ́ lɛ́ɛ kpá, bɔ Bowozi ná ɛ nǔkún mimɛ. É ɖu káká bó gɔ́ xo bɔ é kpo.

¹⁵ Ée Hwliti lɛ́ lɛ́ kɔ ɖidó nǔkún cyán gbé ɔ́, Bowozi ɖɔ nú azɔ̌watɔ́ tɔn lɛ́ɛ ɖɔ: “Mi jó e dó nú é cyán nǔkún ɖo nǔkún e mi kplé lɛ́ɛ mɛ, mi ma dó tagba n'i ó.

¹⁶ Đésú lɔ ɔ́, ée mi kplé lɛ́ɛ ɔ́, mi ɖe ɖ'é mɛ, bó sɔ́ nyi ayǐ n'i, bónú é ná cyán. Mi ma ɖɔ xó ɖé n'i ó.”

¹⁷ É cyán nǔkún ɖo gle ɔ́ mɛ káká bɔ gbadanu su, bɔ é só nǔkún e é mɔ é, bɔ é ná yi towungoɖo gban (30) mɔ̌.

¹⁸ É zé yi xwé bó zé xlɛ́ asú tɔn nɔ; é lɛ́ zé nǔ e é ɖu kpo ɔ́ jó n'i.

¹⁹ Bɔ asú tɔn nɔ kanbyɔ́ ɛ ɖɔ: “Étɛ́! Gle tɛ́ mɛ wɛ a ka yi cyán nǔ ɖe égbé? Gle tɛ́ mɛ a ka wa azɔ̌ ɖe? Mawu Mavɔmavɔ ní xo ɖɛ dó mɛ e wlíbo nú we ɔ́ jí!” Hwliti ɖɔ nú asú tɔn nɔ ɖɔ mɛ e sín gle mɛ émí wa azɔ̌ ɖe ɔ́ nɔ́ nyí Bowozi.

²⁰ Nɔemíi ɖɔ nú Hwliti Mɔwabunu ɔ́ ɖɔ: “Mawu Mavɔmavɔ e nɔ́ kú nǔbláwǔ nú mɛ e ɖo gbɛ lɛ́ɛ kpó mɛ e ko kú lɛ́ɛ kpó ɔ́, ní xo ɖɛ dó nya énɛ́ jí.” Nɔemíi lɛ́ ɖɔ: “Nya énɛ́ ɔ́ mɛ mǐtɔn wɛ. Mɛ e ɖó ná kpé nukún mǐ wú lɛ́ɛ ɖě wɛ.”

²¹ Ée é ɖɔ mɔ̌ ɔ́, Hwliti Mɔwabunu ɔ́ lɛ́ yí xó bó ɖɔ: “Nya ɔ́ lɛ́ ɖɔ nú mì ɖɔ nyi ní ɖo nǔkún cyán wɛ ɖo azɔ̌watɔ́ lɛ́ɛ gúdo, káká jɛ hwenu e yě ná ya nǔkún fó dó é.”

²² Nɔemíi ka lɛ́ ɖɔ nú Hwliti ɖɔ: “Vǐ ce, é nyɔ́ ganjí, bo nɔ yi wa azɔ̌ xá azɔ̌watɔ́ Bowozi tɔn lɛ́ɛ, ɖó a yi mɛ ɖěvo sín gle mɛ din ɔ́, è sixú dó tagba nú we.”

²³ Lě e Hwliti nɔ yi cyán nǔkún ɖo azɔ̌watɔ́ Bowozi tɔn lɛ́ɛ gúdo gbɔn káká bɔ è ya nǔkún bǐ vɔ ɔ́ nɛ́. Asú tɔn nɔ gɔ́n jɛ́n é ká kpo ɖe.