Hanvíví 8 - MAWUXÓWÉMA

¹ Ényí nɔví ce, nɔ ce xomɛ tɔn wɛ a nyǐ din ɔ́, un mɔ we ɖo toxo mɛ ɔ́, un hɛn ɔ́, un ná kplá así kɔ nú we, bɔ mɛɖé ká ná vɛ nǔ dó mǐ ǎ;

² un ná kplá we bɔ mǐ ná yi nɔ ce xɔ mɛ, bɔ mɛɖé ká ná nɔ́ vɛ nǔ dó mǐ ǎ. Mǐ jɛ dɔ̌n ɔ́, a nǎ kplɔ́n heɖíɖó mì, bɔ un ná ná vɛ̌ɛn ce wǎnɖagbenɔ ɔ́ we, bɔ a nǎ nu; un ná ná glenádi ce sín ahan we, bɔ a nǎ nu.

³ Xɔ́ntɔn ce sɔ́ amyɔlɔ tɔn ɖó kɔ nú mì, bó sɔ́ aɖisílɔ tɔn dó dɔn mì dó wǔ.

⁴ Đyɔ̌vǐ Jeluzalɛ́mu tɔn lɛ́ɛ mi, kɛnklɛ́n wɛ un dó nú mi, mi ma fɔ́n wǎn yíyí ó, mi ma fɔ́n wǎn yíyí cóbónú é ɖésúnɔ ɖó jlǒ tɔn ó.

(Đyɔ̌vǐ lɛ́ɛ)

⁵ Mɛ̌ ká nɛ́! Mɛ̌ ká jǎwe sín gbětótló mɛ nɛ́? Nyɔ̌nu tɛ́ ká ɖo wǎnyínámɔ tɔn sín awa mɛ jǎwe nɛ́? Atín e è nɔ ɖu sínsɛ́n tɔn ɔ́ sá wɛ un fɔ́n we ɖe; fínɛ́ wɛ nɔ towe mɔ xo towe ɖe, fínɛ́ wɛ mɛ e ji we ɔ́ mɔ xo towe ɖe.

Wǎn yíyí ɖó hlɔ̌nhlɔ́n (Đyɔ̌vǐ ɔ́)

⁶ Sɔ́ mì tɛ́ ɖó akɔ́n towe nu, nú má cí wuntun ɖɔhun ɖo wǔ towe, gbɔ nú má tɛ́ dó wǔ towe alɔgan ɖɔhun. Đó wǎn yíyí ɖó hlɔ̌nhlɔ́n kú ɖɔhun. Nǔ e hun zo dó mɛ ɔ́, è nɔ hɛn ɖó te ǎ, kú ɖɔhun wɛ é ɖe. Nǔ e hun zo dó mɛ ɔ́, zo wɛ, myɔ hɛhɛ wɛ.

⁷ Sin e ɖo agbetawoyó mɛ ɔ́ sixú xo wǎn yíyí sín myɔ cí ǎ. Sin e ɖo tɔsisa lɛ́ɛ mɛ ɔ́ sixú ɖi bú i ǎ. Gbɛtɔ́ ná bó bɛ́ nǔ e ɖo así tɔn lɛ́ɛ bǐ jó, bó ná dó xɔ wǎn yíyí ná ɔ́, wǎngbígbɛ́ jɛ́n é ná mɔ.

(Nɔví súnnu lɛ́ɛ)

⁸ Mǐ ɖǒ nɔví ɖokpó, é kpo ɖo vǔ; é kó tɔ́n anɔ̌ ǎ. Asúdida hwenu tɔn ká su ɔ́, nɛ̌ mǐ ká ná bló gbɔn n'i?

⁹ Hwe ɔ́ nu su ɔ́, nú ahohó wɛ é nyí ɔ́, mǐ nǎ zé kpatágan dó ɖó ata ná dó ba acɔ́ n'i. É ká nyí hɔn ɖé wɛ é nyí ɔ́, mǐ nǎ zě sɛ́dluxwlɛ dó sú ná.

(Đyɔ̌vǐ ɔ́)

¹⁰ Nyɛ ɔ́, ahohó wɛ un nyí; anɔ̌ ce lɛ́ɛ wɛ nyí atɔxwɛ tɔn. Énɛ́ ɔ́, wǎnyínámɔ ce sɔ́ mì dó ɖó toxo e mɛ fífá ɖe é.

¹¹ Salomɔ́ɔ ɖó vǐwungbo ɖokpó ɖo Baalu-Hamɔ́ni . É zé vǐwungbo ɔ́ dó alɔ mɛ nú vǐwunglecɔ́tɔ́ lɛ́ɛ. Gankwɛ́ afatɔ́n (1.000) wɛ è nɔ ná ɛ bó nɔ́ gbɛ vǐwun tɔn.

¹² Hwɛ Salomɔ́ɔ ɔ́, a hɛn ɔ́, a nǎ yí gankwɛ́ towe afatɔ́n (1.000) lɛ́ɛ, bó ná afɔɖé (200) vǐwunglecɔ́tɔ́ lɛ́ɛ. Amɔ̌, vǐwungbo nyɛtɔn ɔ́, nyɛ ɖésúnɔ lɔ mɛ wɛ é ɖe.

(Dɔ̌nkpɛ ɔ́)

¹³ Kóɖó ce, hwi mɛ e nɔ nɔ jikpá mɛ ɔ́, gbɛ̌ ce lɛ́ɛ ɖo gbe towe ba ná se wɛ. Amɔ̌, nyɛ ɖokpó wɛ a nǎ ɖɔ xó ná.

(Đyɔ̌vǐ ɔ́)

¹⁴ Wǎnyínámɔ ce, hɔn! Dǒ wezun tɛ́ abǐ zungbɔ́ví ɖɔhun gbɔn só wǎnɖagbenɔ lɛ́ɛ jí.