Hanvíví 7 - MAWUXÓWÉMA

¹ Sulamunu, ɖǔ we! Đǔ we bo lílɛ́ bónú mǐ ná kpɔ́n we. Mi kpɔ́n, mi mɔ è dɔn Sulamunu ɔ́, bó ɖo we ɖú xá ɛ wɛ ɖo gbɛ̌ta we sín agun mɛ wɛ a?

(Dɔ̌nkpɛ ɔ́)

² Axɔ́ví nyɔ̌nu, afɔ towe lɛ́ɛ nyɔ́ kpɔ́n ɖo afɔkpa towe lɛ́ɛ mɛ lóóo! Alin towe cí kɔjɛ́ e alɔnuzɔ́watɔ́ bló é ɖɔhun.

³ Hɔ̌nví towe cí kɔ́fu tobotobo e mɛ vɛ̌ɛn wǎnɖagbenɔ ma ɖó ná hán ɖe ǎ é ɖɔhun. Adɔgo towe cí jinukún e è kplé bó to folówa ɖagbe ɖagbe lɛ́ lɛ̌ dó é ɖɔhun.

⁴ Anɔ̌ towe lɛ́ɛ cí zungbɔ́ví we ɖɔhun, yě cí tɛ́ví hǒxo ɖɔhun.

⁵ Kɔ towe cí atɔxwɛ e è sɔ́ ajinakúɖú dó bló ná ɔ́ ɖɔhun. Nukún towe lɛ́ɛ cí Hɛcibɔ́ni sín tán lɛ́ɛ ɖɔhun. Yě cí tán e ɖo toxo ɖaxó énɛ́ nukɔn lɛ́ɛ ɖɔhun. Awɔntín towe nyɔ́ kpɔ́n atɔxwɛ Libáan tɔn e kpan nukɔn Damási ɔ́ ɖɔhun.

⁶ Ta e ɖo kɔ towe nu ɔ́ jlɔ́ Kaamɛ́li só ɖɔhun, ɖa e ɖo ta towe ɔ́ ɖi ga, é nɔ́ kɛn siká xóxó ɖɔhun. Nyɛ axɔ́sú towe ɔ́, un dɔn cí ɖa towe mɛ.

⁷ Wǎnyínámɔ ce, nyɔ̌nu fífá, a nyɔ̌ ɖɛkpɛ, a nyɔ̌ kpɔ́n mɛ.

⁸ A ɖi ga; è mɔ we ɔ́, a cí dětín ɖɔhun; anɔ̌ e ɖo akɔ́n towe mɛ lɛ́ɛ cí děhwín ɖɔhun.

⁹ Énɛ́ wɛ zɔ́n bɔ un ɖɔ: Un ná xá dětín ɔ́ jí, bó ná ɖó alɔ děhwín lɛ́ɛ wú. Anɔ̌ towe lɛ́ɛ ní nyí vǐwun nú mì. Wǎn e nɔ́ tɔ́n sín nu towe mɛ ɔ́ ní nyɔ́ se nú mì.

¹⁰ Nu towe ní nyí vɛ̌ɛn ɖagbe nú mì. Nǔgbó wɛ, nu ce ní nyí vɛ̌ɛn ɖagbe nú wǎnyínámɔ ce, bó sa gbɔn nufló tɔn ɖo amlɔ mɛ.

(Đyɔ̌vǐ ɔ́)

¹¹ Nyɛ ɔ́, wǎnyínámɔ ce tɔn wɛ un nyí, nyi ba wɛ é ɖe.

Nyɔ̌ná ɖo wǎn yíyí mɛ (Đyɔ̌vǐ ɔ́)

¹² Wǎnyínámɔ ce, wǎ! Wǎ mǐ yi dɔ́ hɛnnɛ́ɛsɛ́ lɛ́ɛ mɛ!

¹³ Ayǐ hɔn tlóló ɔ́, mǐ nǎ yi vǐwungbo mɛ, mǐ ná yi kpɔ́n ɖɔ vǐwuntín lɛ́ɛ kó wlí sɛ́ a jí; mǐ ná kpɔ́n ɖɔ sɛ́ lɛ́ɛ kó hun a jí; mǐ ná yi kpɔ́n ɖɔ glenáditín lɛ́ɛ kó gba sɛ́ a jí. Fínɛ́ wɛ un ná jó nyɛɖée nú we ɖe.

¹⁴ Wǎn yíyí sín atínsínsɛ́n lɛ́ɛ kó ɖo wǎn ɖe wɛ. Atínsínsɛ́n ɖagbe alɔkpa alɔkpa lɛ́ɛ ɖo hɔn mǐtɔn ta, atínsínsɛ́n yɔ̌yɔ́ kpó xóxó kpó. Wǎnyínámɔ ce, hwi wɛ un fɔ ɖ'ayǐ ná.