Hanvíví 6 - MAWUXÓWÉMA

¹ Hwi mɛ e nyɔ́ ɖɛkpɛ hú nyɔ̌nu lɛ́ɛ bǐ ɔ́, fítɛ́ wǎnyínámɔ towe ká yi? Ali tɛ́ wǎnyínámɔ towe ká gbɔn? Đɔ nú mǐ, mǐ jló ná yi ba ɛ xá we.

(Đyɔ̌vǐ ɔ́)

² Wǎnyínámɔ ce yi jikpá tɔn mɛ, fí e gběhan wǎnɖagbenɔ ɖe é, bó ná kplá gbɔ̌ tɔn lɛ́ɛ yi amagbo mɛ ɖo fínɛ́, lobo ná ba folówa ɖagbe ɖagbe lɛ́ɛ ɖo fínɛ́.

³ Nyɛ ɔ́, wǎnyínámɔ ce tɔn wɛ un nyí, bɔ élɔ́ nyí ce. Amagbo mɛ fí e folówa ɖagbe ɖagbe ɖe é wɛ é nɔ́ kplá gbɔ̌ tɔn lɛ́ɛ gbɔn.

Lě e kóɖó ɔ́ cí é (Dɔ̌nkpɛ ɔ́)

⁴ Kóɖó ce, a nyɔ́ ɖɛkpɛ mɛ! A nyɔ̌ ɖɛkpɛ Tíisa toxo ɔ́ ɖɔhun. A nyɔ̌ kpɔ́n Jeluzalɛ́mu toxo ɔ́ ɖɔhun. È ɖǒ ná nɔ sí we lě e è nɔ sí ahwanfuntɔ́ lɛ́ɛ gbɔn ɖo ahwangbénu é.

⁵ Đe nukún towe sín jǐ ce, ɖó yě ɖo ayi gbadó nú mì wɛ. Đa towe dó gbɔ̌hwan ɖo te jɛ sín Galadi só jí wɛ ɖɔhun.

⁶ Aɖǔ towe wé lɛ̌ngbɔ́hwan e è lɛ wǔ ná bó kplá xwe fún kpa ná gbé é ɖɔhun. Yě nɔ́ zɔn webɔ webɔ, ɖě nɔ́ zɔn é ɖokpó ǎ.

⁷ Klɛ̌n towe ɖo tówún tówún atínsínsɛ́n ɖɔhun ɖo avɔ e a cyɔ́n ta é glɔ́.

⁸ Axɔ́sú ɔ́, asi kanɖé ko (60) wɛ é da, bó lɛ́ ɖó asi kanwe (80) ɖěvo, bó ɖó ɖyɔ̌vǐ maxamaxa.

⁹ Amɔ̌, nú nyɛ ɔ́, nyɔ̌nu ɖokpó géé wɛ tíin ɖo gbɛ ɔ́ mɛ; é wɛ nyí ahwannɛ́ ce, é nyɔ́ nú mì bɔ nǔ vɔ ɖ'é wú. É ɖokpónɔ géé wɛ nɔ tɔn ji, é ɖokpónɔ géé wɛ nɔ tɔn yí wǎn ná. Nyɔ̌nu lɛ́ɛ mɔ ɛ ɔ́, yě nɔ́ ylɔ́ ɛ ɖɔ nǔnyɔ́nánɔ. Axɔ́si lɛ́ɛ kpó axɔ́sú ɔ́ sín asi ɖěvo lɛ́ɛ kpó mɔ ɛ ɔ́, yě nɔ́ kpa.

(Đyɔ̌vǐ lɛ́ɛ)

¹⁰ Mɛ̌ ká ja nɛ́? Nyɔ̌nu tɛ́ ká tɔ́n sín dɔ̌n bó ja ayǐtéhɔ̌nnu ɖɔhun nɛ́? É nyɔ́ ɖɛkpɛ sun ɖɔhun, é nɔ́ kɔ́n hwe ɖɔhun. È ɖǒ ná nɔ́ sí i lě e è nɔ sí ahwanfuntɔ́ lɛ́ɛ gbɔn ɖo ahwangbénu é.

(Dɔ̌nkpɛ ɔ́)

¹¹ Un jɛ te atínsínsɛ́ngbo ɔ́ mɛ; bó ná kpɔ́n atín e zɔ́n ama yɔ̌yɔ́ ɖo tɔdo ɔ́ mɛ lɛ́ɛ, un ná kpɔ́n ɖɔ vǐwuntín lɛ́ɛ kó tɔ́n kun a jí, bó ná kpɔ́n ɖɔ glenáditín lɛ́ɛ kó gba sɛ́ a jí.

¹² Un sɔ́ tunwun nǔ e ɖo wiwa mì wɛ ɔ́ bǐ ǎ: mɛjɔmɛví, a dǒ yɛyi mì.