Hanvíví 5 - MAWUXÓWÉMA

¹ Nɔví ce nyɔ̌nu, asixɔ́ntɔn ce, un jǎwe jikpá ce mɛ, un jǎwe bó ná ba mǐla ce, un jǎwe bó ná gbɛ nǔhwɛ́nkún ce lɛ́ɛ. Un jǎwe bó ná ɖu wǐinkpa ce kpó wǐin ce kpó; un jǎwe bó ná nu vɛ̌ɛn ce kpódó anɔ̌sin ce kpó. Xɔ́ntɔn xɔ́ntɔn e mi, mi ɖu nǔ! Mi nu vɛ̌ɛn; wǎn yíyí ní mú mi!

(Đyɔ̌vǐ lɛ́ɛ) Đyɔ̌vǐ ɔ́ hun hɔn tɔn nú dɔ̌nkpɛ ɔ́, hwenu ka ko dín (Đyɔ̌vǐ ɔ́)

² Un ɖo amlɔ dɔ́ wɛ zǎn mɛ có ayi ce ɖo wunzɛn; un se mɛɖé ɖo hɔn xúxú wɛ, wǎnyínámɔ ce wɛ ɖo hɔn xúxú wɛ; é nɔ́ ɖɔ: “Nɔví ce, kóɖó ce, ahwannɛ́ ce, a nyɔ̌ bɔ nǔ vɔ ɖ'é wú; hun hɔn nú mì! Ahǔn ɖo jija kɔn nyi ta nú mì wɛ, amǔ ɖo kunkun kɔn nyi ta nú mì wɛ, ɖa e ɖo ta ce é bǐ kó fá.”

³ Énɛ́ ɔ́, un ɖɔ: un ko ɖe awu ce ɖaxó ɔ́ sín kɔ: Nɛ̌ un ná lɛ́ vɔ́ dó gbɔn? Un ko klɔ́ afɔ ce lɛ́ɛ, nɛ̌ un ná lɛ́ hɛn yě kwíji gbɔn?

⁴ Ée un ɖɔ mɔ̌ ɔ́, wǎnyínámɔ ce sɔ́ alɔ gbɔn hɔnlinu, bɔ hǔn ce jɛ xixo jí.

⁵ Un sí te bo ná hun hɔn nú wǎnyínámɔ ce, bɔ mǐla e un sá ɔ́ jɛ kunkun jí sín alɔ ce; ami wǎnɖagbenɔ énɛ́ jɛ kunkun jí sín alɔví ce bó nɔ́ kɔn nyi fí e è nɔ hɛn bó nɔ́ hun hɔn ɔ́ é.

⁶ Un hun hɔn nú wǎnyínámɔ ce; é ká kó yi, é sɔ́ ɖo fínɛ́ ǎ. Hwenu e é ɖo xó ɖɔ wɛ ɔ́, un sɔ́ tunwun gbɛ e mɛ un ɖe ɔ́ ǎ. Un ba ɛ, un ka sɔ́ mɔ ɛ ǎ. Un ylɔ́ ɛ, é ká sɔ nú mì ǎ.

⁷ Tocɔ́tɔ́ e ɖo toxo ɔ́ mɛ gbɔn wɛ lɛ́ɛ kpé mì, yě mɛ énɛ́ lɛ́ɛ e ɖo ahohó ɔ́ cɔ́ wɛ lɛ́ɛ mɔ mì; yě xo mì, yě dó ya nú mì, yě yí avɔ e un sɔ́ nyi kɔ é.

⁸ Đyɔ̌vǐ Jeluzalɛ́mu tɔn lɛ́ɛ mi, un ɖo kɛnklɛ́n dó nú mi wɛ, nú mi mɔ wǎnyínámɔ ce ɔ́, xó tɛ́ mi ná ɖɔ n'i? Nú mi mɔ ɛ hǔn, mi ɖɔ n'i ɖɔ wǎn yíyí dó azɔn mì.

(Đyɔ̌vǐ lɛ́ɛ)

⁹ Hwi mɛ e nyɔ́ ɖɛkpɛ hú nyɔ̌nu lɛ́ɛ bǐ ɔ́, étɛ́ ká ɖo wǎnyínámɔ towe sí, bó má ɖo súnnu ɖě lɛ́ɛ sí ǎ? Étɛ́ ká ɖo así tɔn, bó má ɖo súnnu ɖě lɛ́ɛ sí ǎ, bɔ a wǎ ɖo kɛnklɛ́n dó nú mǐ wɛ?

(Đyɔ̌vǐ ɔ́)

¹⁰ Wǎnyínámɔ ce ɔ́, wǔtu tɔn ɖíɖí bó nɔ́ kɔ́n. To na bo kplé bónú é ɖ'é mɛ ɔ́, è nɔ tunwun i.

¹¹ Ta tɔn nɔ kɛn siká akú ɖɔhun; ɖa e ɖo ta tɔn ɔ́ mlí hwǐn, bó wi avǔnsákɔwó fún ɖɔhun.

¹² Nukún tɔn lɛ́ɛ nyɔ́ kpɔ́n ahwannɛ́ ɖo tɔ tó ɖɔhun, nukúnzin tɔn lɛ́ɛ cí anɔ̌sin mɛ wɛ yě ɖe ɖɔhun, yě cí kɔ́fu mɛ wɛ yě ɖe ɖɔhun.

¹³ Klɛ̌n tɔn lɛ́ɛ cí fí e è dǒ folówa wǎnɖagbenɔ ɖó ɖo jikpá mɛ é ɖɔhun; yě cí fí e è dǒ gběhan wǎnɖagbenɔ ɖó é ɖɔhun. Nufló tɔn lɛ́ɛ ɔ́, folówa wɛ, folówa e mɛ mǐla nɔ kun sín é wɛ.

¹⁴ Awa tɔn lɛ́ɛ cí sikálɔgan ɖɔhun, sikálɔgan e è blǒ awǐnnya xɔ akwɛ́ klizolíti gbɔn mɛ é ɖɔhun. Wǔtu tɔn cí ajinakúɖú ɖɔhun, ajinakúɖú e awǐnnya xɔ akwɛ́ safíi gbɔn wú bǐ ɔ́ ɖɔhun.

¹⁵ Asá tɔn lɛ́ɛ cí mǎblu dotín ɖɔhun, mǎblu dotín e è sɔ́ siká akú dó bló dodó ná é ɖɔhun. È mɔ ɛ ɔ́, é nɔ́ cí Libáan zungbó ɖɔhun; é nyɔ́ kpɔ́n sɛ́dlutín Libáan tɔn lɛ́ɛ ɖɔhun.

¹⁶ Nufló tɔn nɔ víví ɖo nu ce mɛ. Nǔ e ɖo wǔ tɔn lɛ́ɛ bǐ wɛ nɔ́ dɔn mì. Đyɔ̌vǐ Jeluzalɛ́mu tɔn lɛ́ɛ mi, lě e wǎnyínámɔ ce cí é nɛ́, lě e xɔ́ntɔn ce cí é nɛ́!