Hanvíví 4 - MAWUXÓWÉMA

¹ Kóɖó ce, a nyɔ̌ ɖɛkpɛ mɛ nya! A nyɔ̌ ɖɛkpɛ tawun. Nukún towe lɛ́ɛ nyɔ́ kpɔ́n ahwannɛ́ ɖɔhun ɖo avɔ e a cyɔ́n ta é glɔ́. Đa towe dó gbɔ̌hwan ɖo te jɛ sín Galadi só jí wɛ ɖɔhun.

² Aɖǔ towe wé lɛ̌ngbɔ́hwan e è lɛ wǔ ná bó kplá xwe fún kpa ná gbé é ɖɔhun. Yě nɔ́ zɔn webɔ webɔ, ɖě nɔ́ zɔn é ɖokpó ǎ.

³ Nufló towe cí avɔxwɛ vɔvɔ lɛ́ɛ́n ɖé ɖɔhun; nu towe nyɔ́ kpɔ́n. Klɛ̌n towe ɖo tówún tówún atínsínsɛ́n ɖɔhun ɖo avɔ e a cyɔ́n ta é glɔ́.

⁴ Kɔ towe cí Davídi sín atɔxwɛ ɖɔhun, è gbǎ bɔ é jínjɔ́n ayǐ ganjí. Kɔjɛ́ towe lɛ́ɛ cí gǎglónú afatɔ́n e è kplá atɔxwɛ ɔ́ wú lɛ́ɛ ɖɔhun, ahwanfuntɔ́ syɛ́nsyɛ́n lɛ́ɛ sín gǎglónú wɛ.

⁵ Anɔ̌ towe lɛ́ɛ cí zungbɔ́ví we ɖɔhun, yě cí tɛ́ví hǒxo e ɖo ama ɖu wɛ ɖo folówa gbo mɛ lɛ́ɛ ɖɔhun.

⁶ Hwenu e yɛ ná fá ɔ́, hwenu e yɛ ná jɛ ga ɖi jí ɔ́, un ná yi mǐla só ɔ́ kɔn, un ná yi zǎlínkpɔ́n kpó ɔ́ kɔn.

⁷ Kóɖó ce, a nyɔ̌ ɖɛkpɛ kpɔ́n! Blɔ̌ ɖěbǔ ɖo wǔ towe ǎ.

⁸ Asixɔ́ntɔn ce, xwedó mì, gosín Libáan só ɔ́ jí bó xwedó mì; jɛ te sín Amana só ɔ́ jí; jɛ te sín Seníi só ɔ́ kpó Ɛmɔ́ɔ só ɔ́ kpó jí. Gosín kinnikínní sín nɔtɛn énɛ́ lɛ́ɛ; gosín só énɛ́ lɛ́ɛ jí, kpɔ lɛ́ɛ wɛ nɔ́ nɔ fínɛ́.

⁹ Nɔví ce nyɔ̌nu, asixɔ́ntɔn ce, a kpɔ́n mì lě ɔ́, ayi ce nɔ gbadó. Jɛ̌ e a dǒ kɔ lɛ́ɛ ɔ́, un mɔ nǔdójɛ̌nu e ɖo yě nu lɛ́ɛ ɖokpó lě ɔ́, hǔn ce nɔ́ xo.

¹⁰ Nɔví ce nyɔ̌nu, asixɔ́ntɔn ce, wǎn e a yí nú mì ɔ́ nɔ́ dó vǐví lan ce mɛ, wǎn e a yí nú mì ɔ́ nɔ́ mú mì hú vɛ̌ɛn; wǎn towe nyɔ́ se nú mì hú célu bǐ.

¹¹ Asixɔ́ntɔn ce, un kí si nú we dó nufló jí ɔ́, nufló towe nɔ́ víví ɖi wǐin akú; wǐin kpó nyibúnɔ́sin kpó wɛ ɖo ɖɛ̌ towe glɔ́. Nǔ e a dǒ lɛ́ɛ nɔ́ hwɛ́n zungbó Libáan tɔn sín wǎn.

¹² Nɔví ce nyɔ̌nu, asixɔ́ntɔn ce, jikpá ɖé wɛ a nyǐ bó ɖo súsú, tɔjɔtɛn ɖé wɛ a nyǐ bó ɖo súsú, tɔ ɖé wɛ a nyǐ bó ɖo vo nú mì.

¹³ Ala e a zɛ lɛ́ɛ nɔ́ sa gbɔn glenádigbo mɛ; glenádi e sínsɛ́n tɔn nɔ́ víví káká é gbo mɛ: hɛnnɛ́ɛ kpó náa kpó ɖo fínɛ́.

¹⁴ È nɔ mɔ náa, saflán kpó kanɛ́lu wǎnɖagbenɔ kpó ɖo fínɛ́, è nɔ mɔ sinnamɔmi kpó atín tɛnmɛ tɛnmɛ e nɔ́ ná zǎlínkpɔ́n lɛ́ɛ kpó ɖo fínɛ́, è nɔ mɔ mǐla kpódó alowɛ́si kpó ɖo fínɛ́. Nǔ ɖagbe tɛnmɛ tɛnmɛ lɛ́ɛ bǐ ɖo fínɛ́;

¹⁵ Hwi wɛ nyí tɔjɔtɛn e nɔ sa gbɔn jikpá lɛ́ɛ mɛ é; hwi wɛ nyí tɔ e mɛ sin zinzin ɖe é; hwi wɛ nyí sin e nɔ sa sín Libáan é.

(Đyɔ̌vǐ ɔ́)

¹⁶ Jɔhɔn totaligbé tɔn e, sí te! Jɔhɔn tofɔligbé tɔn e, wǎ! Sí te bó nyi dó jikpá ce mɛ bónú wǎn ɖagbe e ɖo jikpá ce mɛ lɛ́ɛ ná gba kpé. Wǎnyínámɔ ce, byɔ́ jikpá towe mɛ! Wǎ ɖu atínsínsɛ́n ɖagbe ɖagbe e ɖ'é mɛ lɛ́ɛ.