Hanvíví 3 - MAWUXÓWÉMA

¹ Un ɖo amlɔ dɔ́ wɛ zǎn mɛ bó kú dlɔ̌, bó ɖo mɛ e un yí wǎn ná ɔ́ ba wɛ ɖo adɔ̌zan ce jí; un ba ɛ, un ka mɔ ɛ ǎ.

² Énɛ́ ɔ́, un gbɔ bo ɖɔ un ná sí te, bó ná ba ɛ gbɔn toxo ɔ́ bǐ mɛ; un ná ba ɛ gbɔn alixo alixo, bó ná ba ɛ gbɔn tokplétɛn tokplétɛn; un ná ba mɛ e un yí wǎn ná é; un ba ɛ, un ka mɔ ɛ ǎ.

³ Tocɔ́tɔ́ e nɔ́ ɖo toxo ɔ́ mɛ gbɔn wɛ lɛ́ɛ mɔ mì, bɔ un kán byɔ́ yě ɖɔ: “Mi mɔ mɛ e un yí wǎn ná ɔ́ nú mì vlafo a?”

⁴ Un zɛ yě wǔ zaan bó mɔ wǎnyínámɔ ce. Un hɛn alɔ tɔn; un sɔ́ jó e dó ǎ, un kplá ɛ káká yi nɔ ce xɔ mɛ, xɔ e mɛ nɔ ce mɔ xo ce ɖe ɔ́ mɛ.

⁵ Đyɔ̌vǐ Jeluzalɛ́mu tɔn lɛ́ɛ mi, kɛnklɛ́n wɛ un dó nú mi; mi kpɔ́n dó tɛ́ wú, bó kpɔ́n dó zungbɔ́ wú, bó ma fɔ́n wǎn yíyí ó; mi ma fɔ́n wǎn yíyí cóbónú é ɖésúnɔ ɖó jlǒ tɔn ó.

(Đyɔ̌vǐ lɛ́ɛ)

⁶ Mɛ̌ ká nɛ́! Mɛ̌ ká nɛ́ jǎwe sín gbětótló mɛ nɛ́? Mɛ̌ ká jǎwe azizɔ ɖo mlǐmlí wɛ ɖɔhun nɛ́? Mɛ̌ ká jǎwe mǐla kpó zǎlínkpɔ́n kpó ɖo azɔ mlí wɛ ɖɔhun nɛ́? Mɛ̌ ká jǎwe bɔ è ɖo célu axivɛ́xivɛ́ lɛ́ɛ sín wǎn se wɛ mɔ̌?

⁷ Axɔ́sú Salomɔ́ɔ wɛ ɖo kpɔn mɛ ja; súnnu glegbenu kanɖé ko (60) wɛ lɛ́ lɛ̌ dó e; ahwanfuntɔ́ syɛ́nsyɛ́n Izlayɛ́li tɔn lɛ́ɛ wɛ.

⁸ Yě bǐ wɛ hɛn hwǐ. Yě bǐ wɛ nyɔ́ ahwan fun. Yě bǐ blá hwǐ, bó ná fun ahwan xá adǎn e sixú wá gbo yě zan mɛ lɛ́ɛ.

⁹ Atín Libáan tɔn wɛ Salomɔ́ɔ ɖɔ bɔ è dǒ bló kpɔn ɔ́ ná.

¹⁰ Nǔ e jí kpɔn ɔ́ jínjɔ́n ɔ́, kpatágan wɛ è dǒ bló, bó zé siká dó bló nǔ e wú è nɔ gán jɛ é; avɔ vɔvɔ cɛ́cɛ́ ɖé wɛ è dǒ bló zinkpo tɔn ná; ɖyɔ̌vǐ Jeluzalɛ́mu tɔn e yí wǎn nú axɔ́sú ɔ́ lɛ́ɛ wɛ bló xo tɔn mɛ ɖó.

¹¹ Đyɔ̌vǐ Sinyɔ́ɔ tɔn lɛ́ɛ mi! Mi tɔ́n! Mi wá kpɔ́n axɔ́sú Salomɔ́ɔ! É xwe axɔ́súgbákún tɔn, axɔ́súgbákún tɔn e nɔ tɔn ná ɛ gbe e gbe é wlí alɔ é; gbe e gbe é ɖo awǎjijɛ ɖaxó ɖé mɛ é.