Gbɛvíhan 5 - MAWUXÓWÉMA

¹ Mawu Mavɔmavɔ, ma wɔn nǔ e gbo mǐ ɔ́ ó, kpɔ́n winnyá e ɖu wɛ mǐ ɖe é!

² To e a nǎ mǐ ɔ́ húzú mɛ ɖěvo lɛ́ɛ sín to, xwé mǐtɔn lɛ́ɛ húzú mɛ e mǐ ma tunwun ǎ lɛ́ɛ sín xwé.

³ Tɔ́ mǐtɔn lɛ́ɛ kú bɔ mǐ húzú tɔ́cyɔvǐ; nɔ mǐtɔn lɛ́ɛ húzú asúkúsi.

⁴ Akwɛ́ wɛ mǐ nɔ́ ná có bó nɔ́ nu sin e ɖo dotɔ e mǐ kun lɛ́ɛ é mɛ é; atín e nyí mǐ ɖésúnɔ tɔn ɔ́, nakí tɔn ɔ́, xɔ wɛ mǐ nɔ́ xɔ.

⁵ Mɛ e ɖo ya dó nú mǐ wɛ lɛ́ɛ kpo ɖo gǔdo mǐtɔn; agbɔ̌n kpé mǐ, mǐ sɔ́ ɖó gbɔjɛ́ ǎ.

⁶ Cóbónú mǐ ná ɖu nǔ ɔ́, alɔ wɛ mǐ nɔ́ tɛ́ nú Ejípunu lɛ́ɛ kpódó Asilíinu lɛ́ɛ kpó.

⁷ Tɔ́ mǐtɔn lɛ́ɛ hu hwɛ; yě kó kú; mǐdɛɛ lɛ́ɛ wɛ ká ɖo sin tɔn sún wɛ.

⁸ Kannumɔ lɛ́ɛ wɛ ɖo acɛ kpa nú mǐ wɛ, mɛ ɖěbǔ ká yí mǐ sín yě sí ǎ.

⁹ Cóbónú mǐ nǎ mɔ nǔ ɖu ɔ́, gbɛ mǐtɔn wɛ mǐ nɔ́ sɔ́ ɖó axɔ́nu; dǎkaxotɔ́ gbětótló mɛ tɔn lɛ́ɛ nɔ́ tɔ́n ahwan mǐ.

¹⁰ Xovɛ́ nɔ́ sin mǐ káká bɔ anyǔ mǐtɔn nɔ́ wló; anyǔ mǐtɔn nɔ́ wló myɔkpó mɛ wɛ mǐ gbɔn ɖɔhun.

¹¹ Kɛntɔ́ mǐtɔn lɛ́ɛ nɔ́ hwlɛ́n kan xá nyɔ̌nu lɛ́ɛ ɖo Sinyɔ́ɔ, yě nɔ́ hwlɛ́n kan xá nyɔ̌nu lɛ́ɛ bó nɔ́ ɖó xó xá yě; Kɛntɔ́ mǐtɔn lɛ́ɛ nɔ́ hwlɛ́n kan xá ɖyɔ̌vǐ lɛ́ɛ ɖo Judáa toxo lɛ́ɛ mɛ, yě nɔ́ hwlɛ́n kan xá yě bó nɔ́ ɖó xó xá yě.

¹² Yě sɔ́ alɔ yětɔn dó dó kan kɔ nú gǎn lɛ́ɛ; yě ɖó sísí ɖěbǔ nú tomɛxó lɛ́ɛ ǎ.

¹³ Dɔ̌nkpɛvú lɛ́ɛ nɔ́ ɖíɖá ségban, yɔkpɔ́vú lɛ́ɛ nɔ́ ɖo ayǐ jɛ wɛ ɖo nakígban glɔ́.

¹⁴ Tomɛxó lɛ́ɛ sɔ́ nɔ́ yi kplé xó ɖɔ ɖě ɖo toxo ɔ́ sín hɔntogbó jí ǎ, dɔ̌nkpɛvú lɛ́ɛ ɖó han e ji wɛ yě ɖe lɛ́ɛ te.

¹⁵ Awǎjijɛ vɔ sín xo mǐtɔn mɛ, awǎ e jɛ wɛ mǐ ɖe bó ɖo we ɖú wɛ ɔ́ húzú aluwɛ.

¹⁶ Wi e ɖo ta mǐtɔn ɔ́ kɔ́n; heelú mǐ, ɖó mǐ hu hwɛ.

¹⁷ Mǐ ɖo azɔn jɛ wɛ ɖo ayi mɛ, nukún mǐtɔn sɔ́ nɔ́ mɔ nǔ ganjí ǎ,

¹⁸ ɖó Sinyɔ́ɔ só ɔ́ húzú gbětótló, é húzú ayǐsájɛ lɛ́ɛ sín avatɛn.

¹⁹ Amɔ̌, hwɛ ɔ́, Mawu Mavɔmavɔ, a nyǐ axɔ́sú káká sɔ́yi; axɔ́súɖuɖu towe ɖo te tɛgbɛ.

²⁰ Aniwú a ka ná wɔn mǐ káká sɔ́yi? Aniwú a ka ná jó mǐ dó káká sɔ́yi?

²¹ Mawu Mavɔmavɔ, lɛ̌ kɔ nú mǐ wá gɔ̌n towe, bónú mǐ nǎ lɛ́ kɔ wá nǔgbó. Lɛ̌ ná gbɛ mǐ ɖ'ayǐ tɔn ɖɔhun.

²² A nǎ gbɛ́ mǐ bǐ gbídígbídí wɛ a? Xomɛ mǐtɔn ná ɖo sinsin we wɛ káká sɔ́yi wɛ a?