Gbɛvíhan 3 - MAWUXÓWÉMA

¹ Nyɛ wɛ awě xo, ɖó Mawu sin xomɛ, é dɔn tó nú mì.

² É kplá mì gbɔn ablu mɛ, ablu gɔngɔn mɛ.

³ Nyɛ ɖokpónɔ géé wɛ é fɔ́n bó ɖo nǔ wa xá wɛ ayǐhɔ́ngbe ayǐhɔ́ngbe.

⁴ É wa nǔ xá mì bɔ un xú gǒ sín ta káká wá afɔ; é wɛ́n xú dó lanmɛ nú mì.

⁵ É fɔ akpɔ kpódó wǔvɛ́ kpó lɛ́ lɛ̌ dó mì ahohó ɖɔhun.

⁶ É sɔ́ mì dó ablu mɛ, mɛ e ko kú sín tɛgbɛ lɛ́ɛ ɖɔhun.

⁷ É mɛ dǒ lɛ́ lɛ̌ dó mì, bónú un ma tɔ́n ó; é dó wlɔ kpinkpɛn lɛ́ɛ mì.

⁸ Un sú xó káká, un ylɔ́ ɛ káká; é ká se ɖɛ ce ǎ.

⁹ É zé awǐnnya ɖaxó ɖaxó lɛ́ɛ dó gbo ali nú mì; é sɔ́ mì ɖó ali nyanya jí.

¹⁰ É nɔ́ ɖo cícɔ́ mì wɛ lɔnmɔ ɖo wudo mɛ ɖɔhun; é nɔ́ ɖo cícɔ́ mì wɛ kinnikínní ɖo wudo mɛ ɖɔhun.

¹¹ É dó gbɛya bǐ nú mì, é hu mì ɖó akpo; un sɔ́ ɖó gbe ǎ.

¹² É dlɛ́n gǎ tɔn dó jǐ ce.

¹³ É da gǎ e ɖo glo tɔn mɛ lɛ́ɛ dó xo alin ce zlɛ́.

¹⁴ Un húzú nǔkiko nú mɛ bǐ; ayǐ hɔ́n ɔ́, nyɛ wɛ nɔ nyí han bo nɔ ɖo nu nú mɛ bǐ.

¹⁵ Akpɔ wɛ nyí nǔɖuɖu bɔ é ná mì, bɔ un ɖu káká bó gɔ́ xo; é kpé nǔvɛ́nu nú mì.

¹⁶ É bɛ́ gbadakɛ́nwó dó nu mɛ nú mì ɖɔ má ɖu bɔ aɖǔ ce bǐ fɛ́n; é lɛ afín nú mì.

¹⁷ É yí ayij'ayǐ sín así ce; un sɔ́ tunwun nǔ e è nɔ ylɔ́ ɖɔ nyɔ̌ná é ǎ.

¹⁸ Énɛ́ ɔ́, un ɖɔ: É vɔ; nǔɖé sɔ́ ɖo nǎ nyɔ́ nú mì wɛ ǎ. Un sɔ́ ɖo te kpɔ́n nǔɖé ɖo Mawu Mavɔmavɔ gɔ́n ǎ.

¹⁹ Adǎn ɖo gbigbo mì wɛ, un dán ɖěwagbɔn; un nɔ flín nǔ e ɖo gbigbo mì wɛ ɔ́, bɔ é nɔ́ cí nǔvívɛ́ kpó nǔvɛ́nu kpó ɖu wɛ un ɖe ɖɔhun.

²⁰ Nǔ e ɖo gbigbo mì wɛ ɔ́ nɔ́ ɖo ayi ce mɛ hwebǐnu, bɔ wǔ nɔ́ kú mì.

²¹ Lo ɔ́, nǔ e un jló ná flín nyɛɖée ɔ́ ɖíe, nǔ e wútu un ná ɖó nukún nǔ ɔ́ ɖíe:

²² Xomɛnyínyɔ́ Mawu Mavɔmavɔ tɔn nɔ vɔ ǎ, wǎn yíyí tɔn ɖo te káká sɔ́yi.

²³ Zǎnzǎn tɛgbɛ ɔ́, xomɛnyínyɔ́ tɔn nɔ́ húzú yɔ̌yɔ́. Mawu, gbejíninɔ towe d'agba mɛ nya!

²⁴ Un nɔ ɖɔ dó ayi mɛ ɖɔ: Mawu Mavɔmavɔ wɛ nyí dɔkun ce; nǔ e wú un gán jɛ wǔ tɔn ɔ́ nɛ́.

²⁵ Mawu Mavɔmavɔ nɔ nyɔ́ xomɛ dó mɛ e ɖeji dó wǔ tɔn ɔ́ wú; é nɔ́ nyɔ́ xomɛ dó mɛ e ɖo biba ɛ wɛ lɛ́ɛ wú.

²⁶ É nyɔ́ bónú è nǐ nɔ xwíí, bó nɔ te nú Mawu Mavɔmavɔ hwlɛ́n mɛ gán.

²⁷ É nyɔ́ bónú gbɛtɔ́ ní hɛn agban kpinkpɛn sín vǔ.

²⁸ Ényí Mawu ɖo dǐdó e kpɔ́n wɛ hǔn, é ní yi cí zɔ fí ɖé bó nɔ xwíí.

²⁹ Ní dó nu do bó ɖe kɔ́, ní nɔ te kpɔ́n Mawu.

³⁰ Ní sɔ́ tókpá ɖó te nú mɛ e ɖo tómɛ xo n'i wɛ é; ní jó éɖée dó nú è nǐ lɛ zun n'i.

³¹ Aklúnɔ nɔ́ jó mɛ dó káká sɔ́yi ǎ.

³² É ná bó ɖo ya dó nú mɛ wɛ ɔ́, é nɔ́ wá kú nǔbláwǔ nú mɛ, xomɛnyínyɔ́ tɔn d'agba sɔ mɔ̌.

³³ É nɔ́ jló e có é nɔ́ kɔ́n wi mɛtɔn ǎ; é nɔ́ jló e có é nɔ́ dó ya nú gbɛtɔ́ lɛ́ɛ ǎ.

³⁴ È ɖo mɛ e ahwan wlí lɛ́ɛ gbídí ɖó afɔ wú wɛ ɔ́, Aklúnɔ nɔ́ mɔ ǎ cé?

³⁵ È ɖo gbɛtɔ́ sín acɛ gba wɛ ɖo Mawu Ajalɔ̌nlɔn nukɔn ɔ́, é nɔ́ mɔ ǎ cé?

³⁶ È yi hwɛgun bó ɖo hwɛ agɔ dó wɛ ɔ́, Aklúnɔ nɔ́ mɔ ǎ cé?

³⁷ Aklúnɔ mɛ vo ɔ́, mɛ̌ ká sixú ɖɔ nǔ lě ní tíin, bɔ nǔ ɔ́ tíin?

³⁸ Mawu Ajalɔ̌nlɔn wɛ nɔ́ ɖɔ bɔ nǔ nyanya abǐ nǔ ɖagbe nɔ jɛ ǎ cé?

³⁹ Mɛ e nɔ ɖo nǔ wa nyi do wɛ cóbó ká nɔ́ kpo ɖo gbɛ ɔ́, étɛ́ sín vo é ká ná lɛ́ sa?

⁴⁰ Mi wá mǐ kpɔ́n lě e mǐ ɖo gbɛ zán gbɔn wɛ ɔ́ ganjí, bó lɛ́ kɔ wá Mawu Mavɔmavɔ gɔ́n.

⁴¹ Mi wá mǐ bɛ́ alɔ dó jǐ bó ɖɔ xó kpó ayi mǐtɔn bǐ kpó nú Mawu ɖo jǐxwé.

⁴² Mǐ tlí tó, mǐ fɔ́n gǔ dó jǐ towe; Mawu, a ká sɔ́ kɛ mǐ ǎ.

⁴³ A zě xomɛsin towe cyɔ́n; a jɛ gǔdo mǐtɔn, bó hu mǐ tɛ́; a kú nǔbláwǔ nú mǐ ǎ.

⁴⁴ A yi cí akpɔ́kpɔ́ mɛ, bónú ɖɛ mǐtɔn lɛ́ɛ ma wá gɔ̌n towe ó.

⁴⁵ A sɔ́ mǐ dó húzú zunkɔ́, nǔvɛ́mɔ ɖo togun ɖě lɛ́ɛ tɛ́ntin.

⁴⁶ Kɛntɔ́ mǐtɔn lɛ́ɛ bǐ nɔ́ ɖɔ xó nyanya dó mǐ wú.

⁴⁷ Nǔ e ɖo te kpɔ́n mǐ lɛ́ɛ ɖíe: xɛsi, do gɔngɔn, nǔ mǐtɔn bǐ ná gblé kpódó nǔ baɖabaɖa lɛ́ɛ kpó.

⁴⁸ Đasin nɔ gosín nukún ce jí, bó nɔ́ sa tɔ ɖɔhun, ɖó nǔ e ɖo togun ce gbo wɛ ɔ́ wú.

⁴⁹ Nukún ce lɛ́ɛ gbɔ bó húzú tɔjɔtɛn, ɖasin jɛ́n nɔ́ ɖo sisa sín nukún ce jí wɛ hwebǐnu; gbɔjɛ́ ɖěbǔ ɖ'é mɛ ǎ.

⁵⁰ Đasin ɖo wǐwá yi wɛ káká bɔ Mawu Mavɔmavɔ mɔ sín jǐxwé.

⁵¹ Nú un mɔ nǔ e ɖo jijɛ dó mɛ e ɖo toxo ce mɛ lɛ́ɛ jí wɛ ɔ́, nǔ ce nɔ́ blá wǔ káká.

⁵² Mɛ e nɔ mɔ̌ kpowun bó dó kɛn mì lɛ́ɛ jɛ gǔdo ce mɛ ɖo xɛ nya wɛ ɖɔhun.

⁵³ Yě sɔ́ mì dó sitɛ́nu mɛ gbɛɖe gbɛɖe, bó sɔ́ awǐnnya nyi jǐ ce.

⁵⁴ Sin ɔ́ hɛn mì káká wá ta, bɔ un ɖɔ: Gbɛ ce vɔ!

⁵⁵ Mawu Mavɔmavɔ, un ɖo sitɛ́nu ɔ́ mɛ dɔ̌n, bó sú xó ylɔ́ we.

⁵⁶ Ma dó tókúse azɔn e wɛn wɛ un ɖe é mɛ ó, ma dó tókúse alě e ná wɛ un ɖe é mɛ ó. Ée un sú xó ylɔ́ we ɔ́, a se.

⁵⁷ Gbe e gbe un sú xó ylɔ́ we ɔ́, a sɛkpɔ́ mì bó ɖɔ nú mì ɖɔ: “Ma ɖi xɛsi ó!”

⁵⁸ Aklúnɔ, a jɛ ahwan jǐ ce, a hwlɛ̌n gbɛ ce gán.

⁵⁹ Mawu Mavɔmavɔ, a mɔ nǔ e yě wa xá mì ɔ́; gbo hwɛ nú mì.

⁶⁰ A mɔ lě e yě ɖo kɛn li dó kɛn mɛ nú mì wɛ gbɔn é, a mɔ lě e yě blá gbě ce gbɔn é.

⁶¹ Mawu Mavɔmavɔ, a se zun e zun mì wɛ yě ɖe lɛ́ɛ; a se gbě ce e blá wɛ yě ɖe lɛ́ɛ.

⁶² Ayǐhɔ́ngbe ayǐhɔ́ngbe ɔ́, kɛntɔ́ ce lɛ́ɛ nɔ́ ɖo xó ɖɔ dó wǔ ce wɛ, bó nɔ́ ɖo nyanya ce lin wɛ.

⁶³ Kpɔ́n! Yě ɖo ayǐjínjɔ́n oo, yě ɖo te oo, xó jɛ́n nɔ́ nyí han ɖo nu yětɔn.

⁶⁴ Mawu Mavɔmavɔ, a nǎ sú nǔ e yě wa ɔ́ sín axɔ́ yě.

⁶⁵ A nǎ xwe nǔ dó ayi yětɔn nu; a nǎ dó nǔ nyanya sin xá yě.

⁶⁶ A nǎ jɛ gǔdo yětɔn kpódó xomɛsin kpó; a nǎ sú kún yětɔn dó sín ayǐkúngban jí.