Gbɛvíhan 2 - MAWUXÓWÉMA

¹ Áo! Aklúnɔ sin xomɛ. É sin xomɛ bó sɛ́ ablu gɔngɔn ɖé dó Sinyɔ́ɔ. É kpíkpé nǔ e mɛ Izlayɛ́li nɔ xɔ susu ɖe ɔ́ sín jǐxwé nyi dó kɔ́ mɛ; hwenu e Aklúnɔ sin xomɛ dó Sinyɔ́ɔ ɔ́, é sɔ́ flín ɖɔ afɔɖótɛn émítɔn wɛ é nyí ǎ.

² Aklúnɔ kú nǔbláwǔ nú togun tɔn ǎ; é gba nɔtɛn togun tɔn tɔn lɛ́ɛ bǐ. Hwenu e Aklúnɔ ɖo xomɛsin jí ɔ́, é gba toxo e è mɛ ahohó lɛ́ lɛ̌ dó ɖo Judáa lɛ́ɛ bǐ; é zin axɔ́súɖuto ɔ́ kpódó gǎn e ɖ'é mɛ lɛ́ɛ kpó dɛ́, é kɔ́n wi yětɔn.

³ Hwenu e Aklúnɔ ɖo xomɛsin ɖaxó énɛ́ jí ɔ́, é hɛn nǔ e wú Izlayɛ́li nɔ ɖo afɔ tɛ ayǐ wɛ lɛ́ɛ bǐ gblé. Hwenu e kɛntɔ́ ɔ́ wá ɔ́, Aklúnɔ gbɛ́ ɖɔ émí kún ná dó alɔ togun émítɔn ó. É nyɔ́ wa ɔ́, myɔ ɖaxó ɖé wɛ é flɔ́ ɖo togun tɔn tɛ́ntin, bó fyɔ́ nǔ e gbɔn fínɛ́ é bǐ.

⁴ É tlɔ́ gǎ tɔn kɛntɔ́ ɖɔhun, bó ɖo gbesisɔ mɛ bó ná da. É hu mɛ e sín nǔ nyɔ́ nukún mǐtɔn mɛ lɛ́ɛ bǐ, bó dó ɖe xlɛ́ ɖɔ kɛntɔ́ mǐtɔn wɛ émí nyí. É gba xomɛsin tɔn kɔn nyi Sinyɔ́ɔ toxo ɔ́ jí myɔ ɖɔhun.

⁵ Aklúnɔ wa nǔ xá mǐ kɛntɔ́ ɖɔhun. É gba Izlayɛ́li to ɔ́ bǐ hánnyá. É gba hɔnmɛ lɛ́ɛ bǐ hánnyá. É mu ahohó e ɖo Izlayɛ́li lɛ́ɛ. É dɔn aluwɛ kpódó awě kpó dó fí bǐ ɖo togun Judáa tɔn ɔ́ mɛ.

⁶ É byɔ́ xwé tɔn gbe kpó hlɔ̌nhlɔ́n kpó, é gba fí e é nɔ́ kplé xá mǐ ɖe é; mɛɖé sɔ́ nɔ́ flín xwezán lɛ́ɛ ɖo Sinyɔ́ɔ ǎ, mɛɖé ká sɔ́ nɔ́ flín gbɔjɛzán lɛ́ɛ lɔ ǎ. Hwenu e Mawu Mavɔmavɔ ɖo xomɛsin jí ɔ́, é kɔ́n axɔ́sú ɔ́ kpódó vɔ̌sánú-xwlémawutɔ́ lɛ́ɛ kpó sín wi.

⁷ Aklúnɔ jó vɔ̌sákpe tɔn dó, é jó tɛn mímɛ́ tɔn dó. É jó hɔnmɛ e ɖo Sinyɔ́ɔ lɛ́ɛ dó nú kɛntɔ́ lɛ́ɛ. Kɛntɔ́ lɛ́ɛ ɖú zǐngídi ɖo Mawu Mavɔmavɔ xwé ɔ́ gbe xwe ɖu wɛ è ɖe ɖɔhun.

⁸ Mawu Mavɔmavɔ ɖe gbeta tɔ́n ɖɔ émí ná mu ahohó e è mɛ lɛ́ lɛ̌ dó Sinyɔ́ɔ toxo ɔ́ é; é nyi kan bo ná gbígbá Sinyɔ́ɔ toxo ɔ́ bǐ; é ɖó alɔ te cóbó hɔ́ Sinyɔ́ɔ toxo ɔ́ bǐ ǎ; é mu ahohó we e è mɛ lɛ́ lɛ̌ dó toxo ɔ́ lɛ́ɛ é.

⁹ Toxo ɔ́ sín hɔnnúwa lɛ́ɛ hɔ́, aglin mu kɔn nyi yě jí; Mawu hɛn gankpo e è nɔ dó sú hɔntogbó lɛ́ɛ wɛ́n; é hɛn bǐ cɛ́; toxo ɔ́ sín axɔ́sú ɔ́ kpódó gǎn e ɖo glɔ̌ tɔn lɛ́ɛ kpó jɛ akɔta ɖěvo lɛ́ɛ lɔ mɛ. Mɛ ɖěbǔ sɔ́ ɖe bó ná kplɔ́n sɛ́n Mawu tɔn mɛ ǎ. Gbeyíɖɔ lɛ́ɛ lɔ sɔ́ nɔ́ yí wɛn ɖě sín Mawu Mavɔmavɔ gɔ́n ǎ.

¹⁰ Tomɛxó Sinyɔ́ɔ tɔn lɛ́ɛ ɖo ayǐjínjɔ́n ɖo kɔ́ mɛ, yě ɖo nu kɛ wɛ ǎ, yě lɛ kɔ́gúdu dó ta, yě dó caki. Đyɔ̌vǐ Jeluzalɛ́mu tɔn lɛ́ɛ dó kɔ do.

¹¹ Un y'avǐ káká bɔ nukún ce ɖibla tɔ́n; ahwi xo mì, awakanmɛ ce bǐ wɛ kú ɖó nǔ e ɖo togun ce gbo wɛ é wútu; nǔgbó ɔ́, yɔkpɔ́vú lɛ́ɛ ɖo kúkú wɛ gbɔn alixo alixo ɖo toxo ɔ́ mɛ.

¹² Vǐ lɛ́ɛ nɔ kanbyɔ́ nɔ yětɔn lɛ́ɛ ɖɔ: “Fítɛ́ mǐ nǎ mɔ nǔɖuɖu ɖe? Fítɛ́ mǐ nǎ mɔ sin ɖe?” Hwenu e yě ɖo mɔ̌ ɖɔ wɛ ɔ́, hlɔ̌nhlɔ́n wɛ ɖo vivɔ ɖo yě wú wɛ, bɔ yě nɔ́ kú jɛ akɔn nú nɔ yětɔn lɛ́ɛ gbɔn alixo alixo.

¹³ Jeluzalɛ́mu e! Un sɔ́ tunwun nǔ e un ná ɖɔ nú we ɔ́ ǎ; nǔ e ɖo gbigbo we wɛ ɔ́ gbo mɛɖé ǎ. Áo! Sinyɔ́ɔ, mɛ̌ sín kpɔ́ndéwú un ka ná ná we, bó ná dó dó gbɔ nú we? Đó nǔ e ɖo gbigbo we wɛ ɔ́ d'agba sɔ xu; mɛ̌ wɛ ná sixú gbɔ azɔn nú we?

¹⁴ Gbeyíɖɔ towe lɛ́ɛ ɔ́, xó e yě nɔ́ wá ɖɔ nú we, bó nɔ́ ɖɔ nyi wɛ ɖɔ lɛ́ɛ ɔ́, nǔ yǎyá wɛ, adingban wɛ. Yě nɔ́ ɖe hwɛ e a hu lɛ́ɛ gba ǎ; ényí hwɛ towe lɛ́ɛ wɛ yě kó ɖe gba ɔ́, adǎn élɔ́ ná ɖo gbigbo we wɛ ǎ. Xó e yě nɔ́ wá ɖɔ nú we bó nɔ́ ɖɔ nyi wɛ ɖɔ lɛ́ɛ ɔ́, nǔ yǎyá wɛ, adingban wɛ.

¹⁵ Jeluzalɛ́mu, aliwáyitɔ́ lɛ́ɛ mɔ we ɔ́, yě nɔ́ xo alɔ, yě nɔ́ húnhún ta, bó nɔ́ kwínkwín lobo nɔ ɖɔ: “A! Toxo e è nɔ ylɔ́ ɖ'ayǐ ɖɔ ɖɛkpɛ vɔ é jɛ́n ɖíe a? Toxo e è nɔ ylɔ́ ɖɔ awǎjijɛ gbɛ ɔ́ bǐ tɔn é jɛ́n ɖíe a?”

¹⁶ Kɛntɔ́ towe lɛ́ɛ bǐ nɔ́ ɖɔ xó nyanya dó wǔ we; yě ɖo kwínkwín wɛ; yě jɛ ma dó jǐ towe, bó nɔ́ ɖɔ: “Mǐ sɔ́ ɛ mi nɛ́! Azǎn e nɔ te kpɔ́n wɛ mǐ ɖe ɔ́ ɖíe; azǎn ɔ́ kpé, mǐ sɔgba ɛ lo.”

¹⁷ Mawu Mavɔmavɔ bló nǔ e é lin ɖɔ émí ná bló é; é bló nǔ e é kó ɖɔ ɖ'ayǐ xóxó ɖɔ émí ná bló é: é gba toxo ɔ́ ma kú nǔbláwǔ n'i. É wa nǔ xá we dó dó xomɛhunhun nú kɛntɔ́ towe lɛ́ɛ, é dó goyíyí goyíyí jí nú mɛ e ma mɔ we gbɔ ǎ lɛ́ɛ.

¹⁸ Sinyɔ́ɔ toxo ɖo xó sú sɛ́ dó Aklúnɔ wɛ. Ahohó Sinyɔ́ɔ tɔn e, ɖasin ní húzú tɔsisa bó nɔ sa sín nukún towe jí zǎn kpó kéze kpó. Ma ná gbɔjɛ́ ɖěbǔ hwiɖée ó, ma ɖó avǐ e ya wɛ a ɖe ɔ́ te ó.

¹⁹ Sí te, sú xó ylɔ́ Aklúnɔ, sú xó ylɔ́ Aklúnɔ gan bǐ mɛ, ɖɔ nǔ e ɖo xo towe mɛ lɛ́ɛ bǐ n'i; dlɛ̌n alɔ towe lɛ́ɛ bó sa vo sɛ́ dó Aklúnɔ; sa vo sɛ́ dó Aklúnɔ dó hwlɛ́n vǐ towe lɛ́ɛ gán, vǐ towe e ɖo adɔ kú wɛ gbɔn alixo alixo lɛ́ɛ gán.

²⁰ Mawu Mavɔmavɔ! Hwi ɖésú bo kpɔ́n, mɛ̌ e mɛ̌ e wa nǔ xá wɛ a ka ɖe gbɔn mɔ̌? Nyɔ̌nu lɛ́ɛ nɔ́ ɖu vǐ e yě ɖésúnɔ ji bó wlíbo ná é sín lan; è nɔ hun káká yi hu vɔ̌sánú-xwlémawutɔ́ abǐ gbeyíɖɔ ɖo xwé towe gbe. Nǔ ná nɔ mɔ̌ a?

²¹ Yɔkpɔ́vú kpódó degénɔ kpó ɖo títɛ́ gbɔn kɔ́ mɛ kɔ́ mɛ ɖo alixo alixo. È hu ɖyɔ̌vǐ ce lɛ́ɛ kpódó dɔ̌nkpɛvú ce lɛ́ɛ kpó ɖo ahwangbénu. Gbe e gbe a sin xomɛ ɔ́, a hu yě; a gbo gbe yě ma kú nǔbláwǔ nú yě.

²² A da kɛntɔ́ ce lɛ́ɛ sín fí bǐ agɔ̌ wɛ a ylɔ̌ ɖɔhun. Mawu Mavɔmavɔ, gbe e gbe a ɖo xomɛ sin wɛ ɔ́, mɛɖé hwe ɖ'é mɛ ǎ, mɛɖé ká gán ɖ'é mɛ ǎ, vǐ e un wlíbo ná lɛ́ɛ ɔ́, kɛntɔ́ sú kún yětɔn dó.