Gbɛvíhan 1 - MAWUXÓWÉMA

Jeluzalɛ́mu wá cí asúkúsi e è jǒ dó ɔ́ ɖɔhun

¹ Áo! Jeluzalɛ́mu ɖíe wá ɖo é ɖokpónɔ e! Toxo e mɛ gbɛtɔ́ sukpɔ́ ɖe ɖ'ayǐ káká é! Éɖíe wá ɖo é ɖokpónɔ din e! É mɛ e nyǐkɔ tɔn yi jǐ ɖo akɔta lɛ́ɛ tɛ́ntin káká ɔ́, é ɖíe wá cí asúkúsi ɖɔhun e! Đ'ayǐ ɔ́, é wɛ nyí axɔ́sú nú tokpɔn lɛ́ɛ, é wɛ kpa acɛ nú yě; é ɖíe ká wá ɖo mɛ kannu din e.

² Zǎn mɛ hweɖěbǔnu ɔ́, avǐ ya wɛ jɛ́n é nɔ ɖe, ɖasin nɔ sa tɔ gbɔn nukún tɔn mɛ. Mɛ ɖěbǔ ká ɖe bó ná dó gbɔ n'i ǎ; mɛ e yí wǎn n'i lɛ́ɛ ɖě dó gbɔ n'i ǎ. Xɔ́ntɔn tɔn lɛ́ɛ bǐ hɔn jó e dó; kɛntɔ́ tɔn lɛ́ɛ wɛ yě húzú din.

³ È wlǐ mɛ e ɖo Judáa lɛ́ɛ yi to ɖěvo mɛ; ya blá ta nú yě, kannumɔ zɔ́ wɛ yě nɔ́ wa. Akɔta ɖěvo lɛ́ɛ mɛ wɛ yě ɖe; yě mɔ fí ɖé bó ná nɔ tawun ǎ. Mɛ e ɖo gbě yětɔn nya wɛ lɛ́ɛ sɔ gba yě, yě ján go dó yě, bɔ yě sɔ́ tunwun fí e yě ná gbɔn é ǎ.

⁴ Ali e è nɔ gbɔn yi Sinyɔ́ɔ lɛ́ɛ ɖo aluwɛ mɛ, mɛɖé sɔ́ nɔ́ yi ɖu xwe ɖo Sinyɔ́ɔ ǎ. È sɔ́ nɔ́ mɔ mɛɖé ɖo tokplétɛn lɛ́ɛ ǎ. Vɔ̌sánú-xwlémawutɔ́ Sinyɔ́ɔ tɔn lɛ́ɛ ɖo gbɛvo sa wɛ. Đyɔ̌vǐ Sinyɔ́ɔ tɔn lɛ́ɛ ɖo lele mɛ. Sinyɔ́ɔ ɖésú ɖo akpɔ mɔ wɛ.

⁵ Kɛntɔ́ tɔn lɛ́ɛ ɖu ɖo jǐ tɔn; kɛntɔ́ tɔn lɛ́ɛ ɖo vivo mɛ. Mawu Mavɔmavɔ wɛ ɖo ya dó n'i wɛ; é ɖo ya dó n'i wɛ ɖó nǔ nyanya tobutóbú e é dó sin lɛ́ɛ wú. Mɛ e ɖu ɖo jǐ tɔn lɛ́ɛ wlí vǐ tɔn lɛ́ɛ hɛn yi.

⁶ Nǔ e mɛ Sinyɔ́ɔ nɔ́ xɔ susu ɖe lɛ́ɛ bǐ ɖo yiyi wɛ; é ɖo kpínkpɔ́n wɛ bɔ bǐ ɖo yiyi wɛ. Gǎn tɔn lɛ́ɛ cí zungbɔ́ e ba ama kpo lɛ́ɛ ɖɔhun, yě ba ama kpo bó sɔ́ ɖó gǎn ɖé ǎ; yě sɔ́ ɖó gǎn ɖé ǎ bó ká ɖo wezun nu ɖo gbětɔ́ nukɔn.

⁷ Jeluzalɛ́mu ɔ́, hwenu e adǎn ɖo gbigbo e wɛ ɔ́, é tunwun fí e é ná yi é ǎ. Énɛ́ ɔ́, é wá flín nǔ ɖagbe ɖagbe e é ɖó ɖ'ayǐ xóxó lɛ́ɛ bǐ. Hwenu e togun tɔn jɛ kɛntɔ́ lɛ́ɛ lɔmɛ ɔ́, mɛ ɖěbǔ wá gɔ́ alɔ n'i ǎ. Kɛntɔ́ tɔn lɛ́ɛ nɔ́ kpɔ́n ɛ bó nɔ́ ko e, ɖó é gba.

⁸ Jeluzalɛ́mu hu hwɛ dín; énɛ́ ɔ́ wú wɛ nǔ tɔn má sɔ́ nɔ́ jɛ mɛɖé tɔn jí ǎ. Mɛ e nɔ sí i ɖ'ayǐ lɛ́ɛ ɔ́, din e yě mɔ ɛ ɖo mɛ̌ jɔgbe ɔ́, yě sɔ́ mɔ ɛ dó mɔ nǔɖé ǎ. Ée é jɛ mɛ̌ din ɔ́, nǔ e kpo n'i ɔ́ ɖíe: é ná jɛ gbɛvo sa jí bó ná ba fí ɖé gbɔn.

⁹ Nǔ kwíji kwíji e é wa lɛ́ɛ hɛn awu tɔn blí; é lɛ́n nǔ e ná wá jɛ ɔ́ kpɔ́n ɖ'ayǐ ǎ. Éɖíe ká wá mɔ ajijimɛ ɖɔ émí j'ayǐ e; mɛ ɖěbǔ ká ɖe bó ná dó wǔsyɛ́n lanmɛ n'i ǎ. É ɖɔ: “Mawu Mavɔmavɔ, kpɔ́n ya e ji wɛ un ɖe ɔ́! Kpɔ́n lě e kɛntɔ́ ɖu ɖo jǐ ce gbɔn é.”

¹⁰ Mɛ e ɖu ɖo jǐ tɔn lɛ́ɛ ɖ'alɔ dɔkun tɔn lɛ́ɛ jí. Jeluzalɛ́mu mɔ jǒnɔ lɛ́ɛ byɔ́ Mawuxɔ ɔ́ mɛ. Mawu, a ma ka ko gbɛ́ ɖɔ yě kún ná byɔ́ mɛ émítɔn lɛ́ɛ mɛ ó ǎ cé?

¹¹ Togun Jeluzalɛ́mu tɔn ɔ́ bǐ ɖo azɔn wɛn wɛ; é ɖo nǔɖuɖu ba wɛ; é sɔ́ nǔ e vɛ́ n'i hú nǔ bǐ ɔ́ jó, bó ná dó mɔ nǔɖuɖu ɖu, bó ná dó mɔ hlɔ̌nhlɔ́n; Jeluzalɛ́mu sa vo nú Mawu bó ɖɔ: “Mawu Mavɔmavɔ, kpɔ́n lě e yě gbɛ́ wǎn nú mì sɔ é!”

¹² Alitanu lɛ́ɛ mi, nǔ ce blá wǔ nú mi ǎ cé? Nǔ gbo mɛɖé bɔ é syɛ́n sɔ ée gbo mì ɔ́ a? Mawu Mavɔmavɔ wɛ dɔn tó élɔ́ nú mì gbe e gbe é sin xomɛ dó mì é.

¹³ É sɛ́ myɔ ɖé dó lan ce mɛ sín jǐxwé; myɔ ɔ́ byɔ́ lan ce mɛ káká bó yi mɔ xú ce. É ɖó mɔ dó afɔ ce lɛ́ɛ glɔ́, bó zin mì dɛ́, bɔ un jɛ wɛn. É ɖe mì sín mɛ mɛ bǐ gbídígbídí, bɔ un ɖo azɔn tɔn jɛ wɛ tɛgbɛ.

¹⁴ Nukún tɔn ɖo nǔ e un wa nyi do lɛ́ɛ jí; Mawu blá nǔ e un wa nyi do lɛ́ɛ ɖó kpɔ́ bó sɔ́ nyi abɔ̌ ce ta; é ɖe hlɔ̌nhlɔ́n ce kpo, é jó mì nú mɛɖé lɛ́ɛ bɔ un sixú xo nǔ ɖo wǔ ɖo nukɔn yětɔn ǎ.

¹⁵ Aklúnɔ ɖe alɔ sín ahwanfuntɔ́ syɛ́nsyɛ́n e ɖo xwé ce gbe lɛ́ɛ bǐ sín kanmɛ. É sɛ́ ahwangɔnu ɖokpó dó mì, bó ná dó vívá kún nú dɔ̌nkpɛvú ce lɛ́ɛ. Nyɛ Sinyɔ́ɔ Judáa toxo ɔ́, é li mì lě e è nɔ li vǐwun gbɔn ɖo vǐwun to mɛ é.

¹⁶ Énɛ́ ɔ́ wú wɛ un ɖo avǐ ya wɛ; ɖasin ɖo sisa sín nukún ce jí wɛ; mɛ e sixú dó gbɔ nú mì bó ná hlɔ̌nhlɔ́n mì ɔ́ sɛ yi zɔ nú mì; mɛ e ná ná gbɛ mì ɔ́ sɛ yi zɔ nú mì. Ahwi xo vǐ ce lɛ́ɛ bǐ ɖó kɛntɔ́ ɖu ɖo jǐ ce.

¹⁷ Sinyɔ́ɔ ɖo alɔ nyi alɔ mɛ wɛ, mɛ ɖěbǔ ká ɖe bó ná dó wǔsyɛ́n lanmɛ n'i ǎ. Mawu Mavɔmavɔ ɖe gbe bɔ to e lɛ́ lɛ̌ dó Izlayɛ́li lɛ́ɛ lɛ́ húzú kɛntɔ́ tɔn. Yě ɖěbǔ mɔ Jeluzalɛ́mu ɔ́, ji mɛ jɛ́n nɔ́ nylá yě.

¹⁸ Mawu Mavɔmavɔ wa nǔ xá mì gbɔn mɔ̌, hwɛ tɔn ka jɔ, ɖó un ko fɔ́n gǔ dó nǔ e é ɖɔ lɛ́ɛ jí ɖ'ayǐ. Mi togun lɛ́ɛ mi, mi bǐ ní ɖótó ganjí. Mi kpɔ́n ya e ji wɛ un ɖe ɔ́: ahwan wlí ɖyɔ̌vǐ ce lɛ́ɛ kpódó dɔ̌nkpɛvú ce lɛ́ɛ kpó yi to ɖěvo mɛ.

¹⁹ Un ylɔ́ mɛ e yí wǎn nú mì ɖ'ayǐ lɛ́ɛ, có yě jó mì dó bɔ un j'ayǐ; vɔ̌sánú-xwlémawutɔ́ lɛ́ɛ kpódó gǎn lɛ́ɛ kpó ɖo nǔ e yě ná ɖu bó ná mɔ hlɔ̌nhlɔ́n ɔ́ ba wɛ, káká bó kú ɖo toxo ɔ́ mɛ.

²⁰ “Mawu Mavɔmavɔ, kpɔ́n adǎn e ɖo gbigbo mì wɛ é! Kpɔ́n wǔvɛ́ e mɔ wɛ un ɖe ɖo agbaza mɛ é; ayixa ce bǐ wɛ gbadó, ɖó lě e un fɔ́n gǔ dó jǐ we sɔ é wú. Ahwan hu vǐ ce lɛ́ɛ bǐ, è wǎ gɔ̌n ce ɔ́, è nǎ ɖɔ kúxwé wɛ.

²¹ È se azɔn e wɛn wɛ un ɖe ɔ́, mɛ ɖěbǔ ká wá dó gbɔ nú mì ǎ; kɛntɔ́ ce lɛ́ɛ bǐ se nǔ e ɖo gbigbo mì wɛ é; nǔ e a wa xá mì ɔ́ víví nú yě. Azǎn e xó a ɖɔ ɔ́ wá, nǔ e ɖo gbigbo mì wɛ ɔ́ ní gbo yě lɔmɔ̌.

²² Kpɔ́n dǎka e xo wɛ yě ɖe ɔ́ ganjí; wa nǔ xá yě lě e a wa xá mì gbɔn é; nǔ e a wa xá mì ɖó tónú e un ma se nú we ǎ wú é. A mɔ a? Azɔn wɛn wɛ jɛ́n un nɔ ɖe, un ɖo azɔn jɛ wɛ tawun.”