Galatinu 2 - MAWUXÓWÉMA

Pɔ́lu kpódó mɛsɛ́dó ɖě lɛ́ɛ kpán

¹ Xwe wɛ̌nɛ gúdo ɔ́, un lɛ́ kɔ yi Jeluzalɛ́mu, nyɛ kpódó Baanabási kpó; un lɛ́ kplá Títu lɔmɔ̌.

² Un yi dɔ̌n ɖó Mawu ɖe xlɛ́ mì ɖɔ un ɖó ná yi. Ée un yi ɔ́, nyɛ kpódó agunnukɔntɔ́ lɛ́ɛ kpó kɛ́ɖɛ́ kplé, bɔ Wɛn Ɖagbe e un jlá mɛ e ma nyí Jwifu ǎ lɛ́ɛ ɔ́, un tínmɛ nú yě, ɖó un jló nú azɔ̌ e un wa ɖ'ayǐ ɔ́, kpódó ée wa wɛ un ɖe din ɔ́ kpó ní nyí nǔ yǎyá ǎ.

³ Títu e kpódó nyɛ kpó zɔn ɔ́, Glɛ̌sinu wɛ; è ka ɖɔ ada jɛ́n é ná gbo dandan ǎ.

⁴ Klísusɛntɔ́-nyíjɛtɔ́ ɖé lɛ́ɛ lun byɔ́ mǐ mɛ, bó jló ná gbo ada n'i, có è ka gbo n'i ǎ. Yě jló ná ba do nú mǐ ɖésúnɔ sí e mǐ ɖe ɖo bǔ e mǐ ɖe xá Klísu Jezu ɔ́ mɛ é, bó jló ná lílɛ́ mǐ, bónú mǐ ná lɛ́ húzú kannumɔ nú Jwifu lɛ́ɛ sín walɔ.

⁵ Mǐ ka lɔn nǔ nú yě nukún xwixwe ɖokpó vɔ́vɔ́ ǎ. Mǐ ka bló nǔ e ba wɛ yě ɖe ɔ́ ǎ, bónú Wɛn Ɖagbe nǔgbó nǔgbó ɔ́ ní nɔ ayǐ nú mi.

⁶ Yě mɛ e è nɔ mɔ dó mɔ gbɛtɔ́ nukúnɖéjí énɛ́ lɛ́ɛ ɔ́: “Nǔ e yě nyí ɔ́ kan mì ǎ, ɖó Mawu nɔ ɖe mɛɖé ɖó vo ɖo mɛɖé mɛ ǎ.” Yě mɛ nukúnɖéjí énɛ́ lɛ́ɛ sɔ́ zé kplɔ́n yɔ̌yɔ́ ɖěvo gɔ́ nú ée kplɔ́n mɛ wɛ un ko ɖe ɔ́ ǎ.

⁷ É nyɔ́ wa ɔ́, yě mɔ ɖɔ Mawu sɔ́ Wɛn Ɖagbe jlájlá mɛ e ma nyí Jwifu ǎ lɛ́ɛ sín azɔ̌ dó así nú mì, lě e é sɔ́ Wɛn Ɖagbe jlájlá mɛ e nyí Jwifu lɛ́ɛ sín azɔ̌ dó así nú Sefási gbɔn é.

⁸ Đó Mawu e sɔ́ Sefási dó ɖó mɛsɛ́dó nú mɛ e nyí Jwifu lɛ́ɛ ɔ́ wɛ sɔ́ nyɛ lɔmɔ̌ dó ɖó mɛsɛ́dó nú mɛ e ma nyí Jwifu ǎ lɛ́ɛ é.

⁹ Jaki kpódó Sefási kpó, kpódó Jǎan kpán wɛ è nɔ mɔ ɖɔ yě nyí sósyɛ́n nú agun lɛ́ɛ; ée yě mɔ ɖɔ Mawu sɔ́ azɔ̌ énɛ́ dó así nú mì ɔ́, yě ná alɔ nyɛ kpódó Baanabási kpó, bó dó ɖe xlɛ́ ɖɔ azɔ̌ ɖokpó ɔ́ wa wɛ mǐ ɖe. Énɛ́ ɔ́, mǐ bǐ ɖó gbe kpɔ́, bɔ nyɛ kpódó Baanabási kpó ná yi mɛ e ma nyí Jwifu ǎ lɛ́ɛ gɔ́n, bɔ yědɛɛ lɛ́ɛ ná yi mɛ e nyí Jwifu lɛ́ɛ gɔ́n.

¹⁰ Amɔ̌ yě byɔ́ nǔ ɖokpó mǐ. Yě byɔ́ mǐ ɖɔ mǐ ní nɔ́ flín wamamɔnɔ e ɖo agun émítɔn mɛ ɖo Jeluzalɛ́mu lɛ́ɛ. Nǔ e ba ná wa wɛ un ko ɖe ɖ'ayǐ ɔ́ nɛ́.

Pɔ́lu gbɛ́ nǔ nú Sefási ɖo Antyɔ́ci

¹¹ Lo ɔ́, ée Sefási wá Antyɔ́ci ɔ́, é wa nǔ nyi do, bɔ un gbɛ́ nǔ n'i ɖo mɛ bǐ nukún mɛ.

¹² Nǔgbó ɔ́, cóbónú mɛ e Jaki sɛ́ dó lɛ́ɛ ná gosín Jeluzalɛ́mu wá ɔ́, Sefási nɔ ɖu nǔ xá mɛ e ma nyí Jwifu ǎ lɛ́ɛ. Ée yě ka wá ɔ́, é jɛ wǔ ɖó zɔ nú mɛ e ma nyí Jwifu ǎ lɛ́ɛ jí, bó sɔ́ nɔ ɖu nǔ xá yě ǎ; ɖó é ɖo xɛsi nú mɛ e nɔ ɖɔ è ɖǒ ná gbo ada nú mɛ e ma nyí Jwifu ǎ lɛ́ɛ wɛ.

¹³ Jwifu e kpo lɛ́ɛ lɔ ɖi xɛsi, bó jɛ yɛmɛnú wa jí Sefási ɖɔhun, káká bɔ Baanabási lɔ ɖi xɛsi, bó jɛ yɛmɛnú wa jí yě ɖɔhun.

¹⁴ Ée un mɔ ɖɔ nǔ e wa wɛ yě ɖe ɔ́ kún sɔgbe xá nǔgbó e ɖo Wɛn Ɖagbe ɔ́ mɛ é ó ɔ́, un ɖɔ nú Sefási ɖo yě bǐ nukún mɛ ɖɔ: “Ényí hwi mɛ e nyí Jwifu ɔ́ ka nɔ zán gbɛ mɛ e ma nyí Jwifu ǎ ɖɔhun, bó má nɔ́ wa nǔ Jwifu ɖɔhun ǎ ɔ́, nɛ̌ a ka sixú ɖɔ nú mɛ e ma nyí Jwifu ǎ lɛ́ɛ ɖɔ yě ní wa nǔ Jwifu ɖɔhun dandan gbɔn?”

Nǔɖiɖi wɛ nɔ́ hwlɛ́n Jwifu kpódó mɛ e ma nyí Jwifu ǎ é kpó gán

¹⁵ Mǐdɛɛ lɛ́ɛ ɔ́, Jwifuví jiji wɛ mǐ nyí; mǐ nyí toɖévomɛnu e ma nɔ xwedó Mawusɛ́n ǎ lɛ́ɛ é ǎ,

¹⁶ có mǐ ka tunwun ɖɔ é kún nyí Mɔyízisɛ́n lɛ́ɛ nyinyi wɛ nɔ zɔ́n, bɔ Mawu nɔ mɔ mɛ dó mɔ hwɛjijɔnɔ ná ó. Lo ɔ́, nǔ ɖi nú Klísu Jezu wɛ nɔ zɔ́n bɔ Mawu nɔ mɔ mɛ dó mɔ hwɛjijɔnɔ ná. Énɛ́ ɔ́ wú wɛ mǐ lɔmɔ̌ ɖi nǔ nú Klísu Jezu, bó ná sixú húzú hwɛjijɔnɔ ɖó nǔɖiɖi e mǐ ɖó nú Klísu ɔ́ wútu. É nyí ɖɔ mǐ nyi sɛ́n lɛ́ɛ wútu wɛ mǐ húzú hwɛjijɔnɔ ǎ; ɖó Mawu ná mɔ mɛ ɖěbǔ dó mɔ hwɛjijɔnɔ ɖó é nɔ nyi sɛ́n lɛ́ɛ wú ǎ.

¹⁷ Lo ɔ́, ényí hwenu e mǐ ɖo biba wɛ ɖɔ mǐ ná nyí hwɛjijɔnɔ ɖo Mawu nukɔn, gbɔn Klísu jí ɔ́, è ka wá mɔ mǐ lɔmɔ̌ dó mɔ hwɛhutɔ́ ná ɔ́, énɛ́ wú wɛ è nǎ ɖɔ Klísu wɛ nɔ dɔn mɛ dó hwɛ mɛ a? Gbeɖé kpɔ́n!

¹⁸ Đó è nǎ nyi sɛ́n dó mɔ hwɛjijɔ xó e un gbɛ́ ɔ́, ényí un lɛ́ jɛ gbe yí na jí hǔn, ɖiɖe xlɛ́ wɛ un ɖe ɖɔ un lɛ́ húzú sɛ́ngbatɔ́ nɛ́.

¹⁹ Đó ɖo sɛ́n ɔ́ lixo ɔ́, un ko kú. Sɛ́n ɔ́ ɖésú wɛ ka hu mì, bónú má sixú nɔ gbɛ bó sɛn Mawu. È ká mì nyi aklúzu jí xá Klísu .

²⁰ Gbɛ e un ka ɖe din ɔ́, nyɛ ɖésúnɔ wɛ ɖo gbɛ ǎ, Klísu wɛ ɖo gbɛ ɖo nyɛ mɛ, bɔ gbɛ e un ɖe din ɖo agbaza mɛ ɔ́, nǔɖiɖi e un ɖó nú Mawu ví e yí wǎn nú mì, bó kú dó ta ce mɛ ɔ́ wú wɛ un ɖo gbɛ.

²¹ Un ná hɔn fɛ́nú Mawu tɔn nyi gbě ǎ. Đó nú sɛ́n ɔ́ wɛ nɔ zɔ́n bɔ è nɔ nyí hwɛjijɔnɔ ɖo Mawu nukɔn ɔ́, hǔn Klísu kú dó wǔvɔ́ nɛ́.