Filípunu 4 - MAWUXÓWÉMA

Nǔkplɔ́nmɛ Pɔ́lu tɔn lɛ́ɛ

¹ Énɛ́ ɔ́, nɔví ce vívɛ́ná lɛ́ɛ mi, é jló mì ɖésú ɖɔ ma lɛ́ mɔ mi; mi nɔ wa nǔ, bɔ xomɛ nɔ hun mì, bɔ un nɔ xɔ susu ɖ'é mɛ tawun; mɛvívɛ́ná ce lɛ́ɛ mi, lě e mi ɖó ná syɛ́nlǐn ɖo gbɛzínzán mitɔn mɛ, ɖo Aklúnɔ mɛ gbɔn ɔ́ nɛ́.

² Evodíi kpódó Sɛntíci kpó e, un ɖo vo sa nú mi wɛ, ɖɔ mi ní kɛnklɛ́n bo ɖó gbe kpɔ́ nɔví ɖo Aklúnɔ mɛ ɖɔhun.

³ Hwi mɛ e nyí azɔ̌gbɛ́ ce gbejínɔtɔ́ ɔ́, un ɖo byɔ̌byɔ́ hwi lɔmɔ̌ wɛ ɖɔ hwi ní dó alɔ nyɔ̌nu énɛ́ lɛ́ɛ; nǔgbó ɔ́, nyɛ kpódó yě kpó fun ahwan ɖó kpɔ́, bónú Wɛn Ɖagbe ɔ́ ná gba kpé: mǐ kpó Klemáa kpó, kpódó azɔ̌gbɛ́ ce lɛ́ɛ bǐ kpán wɛ fun ahwan énɛ́ ɔ́; mɛ énɛ́ lɛ́ɛ bǐ sín nyǐkɔ wɛ Mawu wlán dó gbɛwéma ɔ́ mɛ .

⁴ Mi jɛ awǎ hwebǐnu, ɖó mi ɖo bǔ ɖo Aklúnɔ mɛ; un ɖo vǐvɔ́ ɖɔ wɛ ɖɔ mi ní jɛ awǎ.

⁵ Mi fá xomɛ dó mɛ bǐ wú. Aklúnɔ ná wá zaanɖé din.

⁶ Ado ma hu mi dó nǔ ɖěbǔ wú ó; lo ɔ́, mi ɖo ninɔmɛ ɖěbǔ mɛ hǔn, mi ní nɔ sɔ́ kúdónúmɛ sín ayixa dó xo ɖɛ, bó byɔ́ nǔ e hudó mi lɛ́ɛ Mawu.

⁷ Énɛ́ ɔ́, fífá Mawu tɔn e hú gǎn nukúnnú-mɔjɛnǔmɛ gbɛtɔ́ tɔn bǐ ɔ́ ná bló ayixa mitɔn kpódó linlin mitɔn lɛ́ɛ kpó ɖó, bɔ mi ná sixú nɔ bǔ ɖo Klísu Jezu mɛ.

⁸ Nɔví ce lɛ́ɛ mi, bó ná dó fó xó ce ɔ́, un ɖo byɔ̌byɔ́ mi wɛ ɖɔ ayixa mitɔn ní nɔ nǔ e nyɔ́, bɔ susu jɛ xá lɛ́ɛ jí: nǔ e nyí nǔgbó ɔ́ bǐ, nǔ e è nǎ ɖó sísí ná é, nǔ e sɔgbe é, nǔ e mɛ́ é, nǔ e nɔ nyɔ́ mɛ nukún mɛ é kpódó nǔ e wlí yɛ̌yi ɔ́ kpán; ayixa mitɔn ní nɔ nǔ énɛ́ lɛ́ɛ jí.

⁹ Nǔ e un kplɔ́n mi lɛ́ɛ, nǔ e mi yí ɖo gɔ̌n ce lɛ́ɛ, nǔ e mi se ɖo nu ce lɛ́ɛ, kpódó nǔ e un wa, bɔ mi mɔ lɛ́ɛ kpó ɔ́, mi zé dó wa azɔ̌ ná; énɛ́ ɔ́, Mawu e nɔ ná fífá mǐ ɔ́ ná nɔ kpɔ́ xá mi.

Pɔ́lu dó kú nú Filípunu lɛ́ɛ ɖó nǔ e yě sɛ́ dó e lɛ́ɛ wú

¹⁰ Đo bǔ e un ɖe xá Aklúnɔ ɔ́ mɛ ɔ́, un mɔ awǎjijɛ ɖaxó, ɖó mi lɛ́ jɛ ɖiɖe xlɛ́ jí lo, ɖɔ nyɛ ɖo ayi mɛ nú émí. Un tunwun ɖɔ un ɖo ayi mɛ nú mi; lo ɔ́, lě e mi ná ɖe xlɛ́ mì gbɔn ɔ́ sín ali wá sú dó mi.

¹¹ É ka nyí nǔɖé wɛ hudó mì wɛ zɔ́n bɔ un ɖo mɔ̌ ɖɔ wɛ ǎ, ɖó un ko kplɔ́n nyɛɖée, bɔ nǔ e un ɖó ɔ́ nɔ kpé mì.

¹² Un nyɔ́ wamamɔnɔgbɛ zán, bó nyɔ́ dɔkunnɔgbɛ zán. Un kplɔ́n nyɛɖée, bɔ ɖo fí ɖěbǔ e un ná ɖe ɔ́, kpódó ninɔmɛ ɖěbǔ e mɛ un ná ɖe ɔ́ kpán nɔ́ nyɔ́ nú mì; un gɔ́ xo ganjí oo, un ɖo xovɛ́ oo, ényí nǔ kpé mì kpo abǐ é hwedó mì oo, é nɔ nyɔ́ nú mì.

¹³ Mɛ e nɔ ná hlɔ̌nhlɔ́n mì ɔ́ wɛ nɔ zɔ́n, bɔ un nɔ sixú kpé nǔ énɛ́ lɛ́ɛ bǐ wú.

¹⁴ É ka ɖo mɔ̌ có, alɔ e mi dó mì ɖo nǔ e ɖo gbigbo mì wɛ lɛ́ɛ mɛ ɔ́, nǔ ɖagbe wɛ mi wa.

¹⁵ Filípunu lɛ́ɛ mi, mi ɖésúnɔ ɔ́, mi tunwun ganjí ɖɔ ée un gosín Masedwani, hwenu e è jɛ Wɛn Ɖagbe ɔ́ jlá jí ɔ́, midɛɛ lɛ́ɛ kɛ́ɖɛ́ wɛ nyí agun e dó alɔ mì é; midɛɛ lɛ́ɛ ɖokpónɔ wɛ mɔ do nú akwɛ́ e un nɔ mɔ ɔ́ kpó ée un nɔ zán é kpó.

¹⁶ Hwenu e un ɖo Tɛsaloniki ɖ'ayǐ ɔ́, nǔ e nɔ hudó mì lɛ́ɛ ɔ́, azɔn mɔ̌kpán wɛ mi sɛ́ dó mì.

¹⁷ É nyí nǔ e mi ná ná mì lɛ́ɛ ba wɛ un ɖe kpowun ǎ; lo ɔ́, un jló ɖɔ nǔ ɖagbe e wa wɛ mi ɖe lɛ́ɛ ní jɛ jí nú ɖagbe mitɔn.

¹⁸ Un mɔ nǔ e mi sɛ́ dó mì lɛ́ɛ bǐ, bɔ é kpé mì kpo; din e Epafloditi hɛn nǔ e mi ná mì lɛ́ɛ wá nú mì ɔ́, nǔ e ɖo tají nú mì lɛ́ɛ bǐ ɖo así ce; nǔ e mi ná mì lɛ́ɛ cí vɔ̌sánú wǎnɖagbenɔ ɖɔhun, bó cí vɔ̌sísá e nɔ nyɔ́ Mawu nukún mɛ, bɔ é nɔ yí gbe ná ɔ́ ɖɔhun.

¹⁹ Mawu ce ɔ́, dɔkun ɖo así tɔn bó túnflá; é ná ná nǔ e hudó mi lɛ́ɛ bǐ mi ɖo susu tɔn mɛ, gbɔn Klísu Jezu jí.

²⁰ Susu nú Mawu Tɔ́ mǐtɔn káká yi mavɔ mavɔ. Amǐ.

Pɔ́lu dó gbe sɛ́ dó Filípunu dó sú ta nú wěma ɔ́

²¹ Mi dó gbe mɛɖeɖóvo Mawu tɔn e nyí Klísu Jezu tɔn lɛ́ɛ bǐ nú mì. Nɔví e ɖo kpɔ́ xá mì lɛ́ɛ dó gbe sɛ́ dó mi.

²² Mɛɖeɖóvo Mawu tɔn e ɖo fí lɛ́ɛ bǐ, ɖo tají ɔ́, yě mɛ e ɖo Dadá Hlɔ̌ma tɔn sín hɔnmɛ lɛ́ɛ dó gbe sɛ́ dó mi.

²³ Fɛ́nú Aklúnɔ Jezu Klísu tɔn ní nɔ kpɔ́ xá mi bǐ.