Filípunu 3 - MAWUXÓWÉMA

Lě e è nǎ nyí hwɛjijɔnɔ gbɔn ɖo Mawu nukɔn é

¹ Nɔví ce lɛ́ɛ mi, din ɔ́, mi jɛ awǎ ɖo Klísu mɛ, nú é byɔ́ ɖɔ má lɛ́ vɔ́ nǔ e un ko wlán sɛ́ dó mi ɖ'ayǐ lɛ́ɛ wlán sɛ́ dó mi ɔ́, agbɔ̌n kpé mì d'é wú ǎ; é ná wa ɖagbe nú mi.

² Mi cɔ́ miɖée dó nǔnyanyawatɔ́ nɛ́ lɛ́ɛ wú; mi cɔ́ miɖée dó avǔn nɛ́ lɛ́ɛ wú; mi cɔ́ miɖée dó wútujánúmɛtɔ́ nɛ́ lɛ́ɛ wú.

³ Mǐ mɛ e nɔ sɛn Mawu ɖo Yɛ Mawu tɔn mɛ lɛ́ɛ ɔ́, mǐ wɛ gbo ada titewungbe ɔ́; mǐ wɛ nɔ xɔ susu ɖo Klísu Jezu mɛ; mǐ wɛ ma nɔ gán jɛ walɔ gbɛtɔ́ tɔn lɛ́ɛ wú ǎ.

⁴ Có nyɛ lɔmɔ̌ hɛn ɔ́, un ná gán jɛ walɔ énɛ́ lɛ́ɛ wú. Ényí mɛɖé mɔ ɖɔ gbɛtɔ́ sín walɔ énɛ́ lɛ́ɛ wɛ zɔ́n bɔ émí ɖo ganjí ɔ́, nǔ e wú nyɛ ná ɖó dó, bó ɖɔ un ɖo ganjí ɔ́ hú gǎn éyɛ́ tɔn.

⁵ Đó Izlayɛ́li ví jiji wɛ nú mì, bɔ un jɔ ɖo Bɛnjamɛ́ɛ sín hɛ̌nnu mɛ. Mɛ e ji mì lɛ́ɛ ɔ́, Eblée wɛ yě nyí. Azǎn tántɔn wɛ un ɖó, bɔ è gbo ada nú mì. Nú è nǎ xwedó sɛ́n Jwifu lɛ́ɛ tɔn ɔ́, Falizyɛn wɛ un nyí.

⁶ Un nɔ jɛ hun dó Jwifu lɛ́ɛ sín sɛ́n jí káká, bó nɔ dó ya nú agun e ɖi nǔ nú Jezu lɛ́ɛ. Mɛ ɖé nɔ mɔ nǔjɛdo ɖé ɖo wǔ ce ɖo sɛ́n ɔ́ nyinyi sín ali xo ǎ.

⁷ Đ'ayǐ ɔ́, un nɔ mɔ ɖɔ nǔ énɛ́ lɛ́ɛ nyí le nú mì; amɔ̌ din ɔ́, un nɔ mɔ nǔ énɛ́ lɛ́ɛ bǐ dó mɔ nǔ lá mɛ ná ɖó Klísu wútu.

⁸ É nyí nǔ énɛ́ lɛ́ɛ kɛ́ɖɛ́ wɛ un mɔ dó mɔ nǔ lá mɛ ná ǎ; lo ɔ́, nǔ lɛ́ɛ bǐ wɛ un mɔ dó mɔ nǔ lá mɛ ná, ɖó vǐví ɖaxó e un mɔ hwenu e un wá tunwun ɖɔ Klísu Jezu ɔ́, Aklúnɔ ce wɛ é nyí ɔ́ wútu; éyɛ́ wútu wɛ un gbɛ́ nǔ bǐ, bó nɔ́ mɔ nǔ bǐ dó mɔ babá, bó ná sixú nyí étɔn,

⁹ bó ná nɔ bǔ xá ɛ titewungbe; un sɔ́ nɔ́ lin ɖɔ tónú e un nɔ se nú sɛ́n ɔ́ wútu wɛ un nyí hwɛjijɔnɔ ɖo Mawu nukɔn ǎ; nǔɖiɖi e un ɖó nú Klísu ɔ́ wútu wɛ un nyí hwɛjijɔnɔ ɖo Mawu nukɔn. Un nyí hwɛjijɔnɔ ɖó Mawu ná mì hlɔ̌nhlɔ́n e é nɔ ná mɛ e ɖi nǔ nú Klísu lɛ́ɛ, bɔ yě ná sixú nyí hwɛjijɔnɔ é.

¹⁰ Nǔ e ba wɛ un ɖe kpowun ɔ́ wɛ nyí ɖɔ ma tunwun mɛ e Klísu nyí é, bó tunwun hlɔ̌nhlɔ́n e fínfɔ́n sín kú tɔn ɖó é; un jló ɖɔ ma ji ya é ɖɔhun, bó kú kú e é kú é,

¹¹ bó ná ɖo nukún ɖó wɛ ɖɔ Mawu ná fɔ́n nyɛ lɔmɔ̌ sín kú.

È ní ɖó kan dó nǔ wú, bó ná mɔ ajɔ yí ɖo Mawu gɔ̌n

¹² Un ko mɔ nǔ e ba wɛ un ɖe ɔ́, abǐ un ko sɔgbe bɔ nǔ vɔ ɖ'é wú ɖɔ wɛ un ɖe ǎ; lo ɔ́, un kpo ɖo gǎn dó wɛ ɖo nǔ e ba wɛ un ɖe ɔ́ gúdo, bónú é ná jɛ alɔ ce mɛ; ɖó un ko ɖo Klísu Jezu sín alɔ mɛ.

¹³ Hǔn, nɔví ce lɛ́ɛ mi, un lin ɖɔ un ko mɔ nǔ e ba wɛ un ɖe ɔ́ yí ǎ; lo ɔ́, nǔ ɖokpó e wa wɛ un ɖe ɔ́ wɛ nyí ɖɔ un ɖo nǔ e ɖo gǔdo ce lɛ́ɛ wɔn wɛ, bó ɖo gǎn dó wɛ, lobo ná yi nǔ e ɖo nukɔn ce ɔ́ kɔn.

¹⁴ Énɛ́ ɔ́, un ɖo wezun jí xwe nǔ e ba wɛ un ɖe ɔ́ kɔn, bó ná dó mɔ ajɔ e Mawu ylɔ́ mǐ sín sɛ́xwé ɖɔ mǐ ná yí gbɔn Klísu Jezu jí ɔ́ yí.

¹⁵ Mǐ mɛ e ko lí dǒ ɖo nǔɖiɖi mɛ lɛ́ɛ bǐ ɔ́, mǐ ní lin nǔ ɖokpó ɔ́. É ka ɖo mɔ̌ có, ényí mɛɖé lɛ́ɛ ɖo mi mɛ, bó ɖó linlin vo ɔ́, Mawu ná ná wěziza mi d'é wú.

¹⁶ Nǔ ɖěbǔ ná bó ɖo jijɛ wɛ hǔn, mi nú mǐ nǎ wlí ali e jí mǐ kó ɖe káká jɛ din ɔ́ ɖidó fí e mǐ xwe é.

¹⁷ Nɔví ce lɛ́ɛ mi, mi bǐ ní bló nyɛ ɖɔhun. Mǐ ko ná xlɛ́ tɔn: hǔn mi sɔ́ nukún mitɔn ɖó yě mɛ e gbɛzínzán yětɔn nɔ sɔgbe xá xlɛ́ mǐtɔn énɛ́ lɛ́ɛ é jí.

¹⁸ Un ko nɔ ɖɔ nú mi hwɛhwɛ, bó ka lɛ́ ɖo vǐvɔ́ ɖɔ nú mi wɛ din kpó avǐ kpó ɖɔ mɛ gěgé tíin, bɔ gbɛzínzán yětɔn nɔ ɖe xlɛ́ ɖɔ yě nyí kɛntɔ́ Klísu e kú ɖo aklúzu jí ɔ́ tɔn .

¹⁹ Fí e yě ná yi dɔn ɖe ɔ́ wɛ yě kán wezun xwe; ɖó nǔ ɖokpó e yě nɔ sɛn ɔ́ wɛ nyí adɔgo yětɔn ; yě nɔ xɔ susu ɖo nǔ e ɖó ná hu winnyá nú yě ɔ́ mɛ, bɔ gbɛ mɛ fí sín nǔ lɛ́ɛ kɛ́ɖɛ́ jí jɛ́n ayixa yětɔn nɔ ɖe.

²⁰ Mǐdɛɛ lɛ́ɛ ɔ́, sɛ́xwé tɔn wɛ mǐ nyí, bó ɖo te kpɔ́n Mɛhwlɛ́ngántɔ́ mǐtɔn e nyí Aklúnɔ Jezu Klísu ɔ́ vɛ́návɛ́ná.

²¹ Ényí é ko wá ɔ́, é ná zán hlɔ̌nhlɔ́n tɔn e é nɔ dó sɔ́ nǔ lɛ́ɛ bǐ dó acɛ tɔn mɛ ná ɔ́, dó húzú agbaza mǐtɔn ayǐkúngban jí fí tɔn maɖógǎnɖé ɔ́ ná, bɔ agbaza mǐtɔn ná xɔ susu étɔn ɔ́ ɖɔhun.