Filípunu 2 - MAWUXÓWÉMA

Mi sɔ́ miɖée hwe Klísu ɖɔhun, bónú Mawu ná sɔ́ mi su

¹ Nǔɖiɖi e mi ɖó nú Klísu ɔ́ nɔ́ ná hlɔ̌nhlɔ́n mi d'é jí a? Wǎn yíyí e Klísu ɖó nú mi ɔ́ nɔ́ ná akɔ́nkpinkpan mi a? Mi ɖo bǔ ɖo miɖée tɛ́ntin ɖo Yɛsinsɛn sín nǔwiwa mɛ a? Mi yí wǎn nú miɖée a? Mi nɔ nyɔ́ xomɛ dó miɖée wú a?

² Hǔn un ɖo byɔ̌byɔ́ mi wɛ ɖɔ mi ní ɖó gbe kpɔ́, bó ɖó wǎn yíyí ɖokpó ɔ́, bó ɖó ayixa ɖokpó ɔ́ kpódó linlin ɖokpó ɔ́ kpán, bó ná dó dó xomɛhunhun nú mì yi kpé.

³ Mi ma sɔ́ ce jɛ́n ná nyɔ́ sín ayixa, abǐ mɛɖée sɔ́ su dó wǔvɔ́ sín ayixa dó wa nǔ ɖěbǔ ná ó; lo ɔ́, mi nɔ sɔ́ miɖée hwe ɖo mɛ ɖě lɛ́ɛ nukɔn, bónú mɛ ɖokpó ɖokpó ní nɔ mɔ ɖɔ mɛ ɖě lɛ́ɛ hú gǎn émí.

⁴ Mɛɖěbǔ ma nɔ ba ɖagbe é ɖésúnɔ tɔn ó; lo ɔ́, mɛ ɖokpó ɖokpó ní nɔ ba ɖagbe mɛ ɖě lɛ́ɛ tɔn.

⁵ Mi ɖó ninɔmɛ e Klísu Jezu ɖó é.

⁶ Klísu ko ɖó ninɔmɛ Mawu tɔn sín do; é ka ba ɖɔ émí ná zé émíɖée ɖó Mawu há jí kpó hlɔ̌nhlɔ́n kpó ǎ.

⁷ É nyɔ́ wa ɔ́, é ɖésúnɔ ɔ́ gbɛ́ nǔ e é ɖó ɔ́ bǐ, bó zé ninɔmɛ mɛsɛntɔ́ tɔn. É húzú gbɛtɔ́, bó wá ɖi gbɛtɔ́ yǎyá kpowun ɖé ɖɔhun.

⁸ É yí gbe bó sɔ́ éɖée hwe, bó se tónú nú Mawu káká yi kú; aklúzu jí wɛ é kú ɖe lɔ .

⁹ Énɛ́ ɔ́ wú wɛ Mawu sɔ́ ɛ su, bó sɔ́ ɛ ɖó tɛn e nyí ɖaxó bǐ ɔ́ mɛ, lobo ná ɛ nyǐkɔ e hú gǎn nyǐkɔ ɖě lɛ́ɛ bǐ é,

¹⁰ bónú è ylɔ̌ Jezu sín nyǐkɔ hweɖěbǔnu ɔ́, mɛ e ɖo jǐxwé lɛ́ɛ bǐ, kpó mɛ e ɖo ayǐkúngban jí lɛ́ɛ bǐ kpó, kpódó mɛ e ɖo ayǐkúngban glɔ́ lɛ́ɛ bǐ kpán ná jɛ kpo kpó sísí kpó,

¹¹ bónú mɛ bǐ ná jlá ɖɔ Jezu Klísu wɛ nyí Aklúnɔ; énɛ́ ɔ́ wɛ ná sɔ́ Mawu Tɔ́ ɔ́ su.

Mi nyí wěziza nú gbɛ ɔ́

¹² Énɛ́ ɔ́, mɛvívɛ́ná ce lɛ́ɛ mi, hwenu e un ɖo kpɔ́ xá mi ɔ́, mi nɔ se tónú nú mì tɛgbɛ; din e un ma ka sɔ́ ɖo kpɔ́ xá mi ǎ ɔ́, é lɛ́ ɖo tají ɖɔ mi ní lɛ́ se tónú nú mì. Mi wa azɔ̌ kpó xɛsi kpó, kpódó sísɔ́sísɔ́ kpán nú hwlɛngán mitɔn ná nyí hwlɛngán kpíkpé.

¹³ Đó Mawu ɖo azɔ̌ wa ɖo mi wú wɛ tɛgbɛ, bónú mi ná sixú nɔ ɖó jló, bó ná nɔ wa nǔ e sɔgbe xá tito é ɖésúnɔ tɔn é.

¹⁴ Mi wa nǔ bǐ; mi ma húnhún nǔ ɖɔ ɖo nǔ e wa wɛ mi ɖe lɛ́ɛ ɖě kɔn ó, mi ma ka dɔn nǔ ɖo ɖě kɔn ó;

¹⁵ énɛ́ ɔ́, mi ná nyí xomɛvɔ́nɔ, bó ná nyí mɛ mímɛ́, lobo ná nyí Mawu ví maɖóblɔ̌ɖowǔ ɖo gbɛtɔ́ nyanya, ayigɛ́dɛ́gɛ́dɛ́nɔ gbɛmɛ fí tɔn lɛ́ɛ tɛ́ntin. Mi ɖó ná nɔ kɔ́n ɖo tɛ́ntin yětɔn sunví ɖɔhun,

¹⁶ bó ná nɔ ɖɔ xó e nɔ ná gbɛ mɛ ɔ́ nú yě. Ényí mi wa nǔ gbɔn mɔ̌ ɔ́, xomɛ ná hun mì dó mi wú hwenu e Klísu ná lɛ́ kɔ wá dó é; nǔgbó ɔ́, é ná ɖe xlɛ́ ɖɔ azɔ̌ e un wa lɛ́ɛ, kpódó tagba e un jɛ lɛ́ɛ kpán ɖě kún nyí nǔ yǎyá ó.

¹⁷ É ná bó byɔ́ ɖɔ è nǎ hu mì dó sá vɔ̌ ná gɔ́ nú vɔ̌ e sá nú Mawu wɛ mi ɖe gbɔn nǔɖiɖi mitɔn gbla mɛ ɔ́, awǎjijɛ wɛ é nyí nú mì, bɔ mi mɛ bǐ ná jɛ awǎ xá mì.

¹⁸ Mɔ̌ ɖokpó ɔ́, mi lɔmɔ̌ mi ɖó ná jɛ awǎ, bɔ un ná jɛ awǎ xá mi.

Timɔtée kpódó Epafloditi kpó

¹⁹ Đo Aklúnɔ Jezu sín nyǐkɔ mɛ ɔ́, un ɖo linlin wɛ ɖɔ zaanɖé din ɔ́, un ná sɛ́ Timɔtée dó mi, bónú é lɛ́ kɔ wá ɔ́, xó mitɔn e é ná wá ɖɔ nú mì lɛ́ɛ ná ná akɔ́nkpinkpan nyɛ ɖésú.

²⁰ Nǔ e ɖo hǔn mɛ nú mì lɛ́ɛ ɔ́, é ɖokpónɔ géé wɛ nɔ ɖɔ xá mì, bɔ lě e nǔ ná nɔ bó ná nyɔ́ nú mi ɔ́ ɖo ayixa mɛ n'i titewungbe.

²¹ Mɛɖě lɛ́ɛ bǐ ɔ́, nǔ yě ɖésúnɔ tɔn lɛ́ɛ jɛ́n nɔ myá nukún nú yě; nǔ e nyí Jezu Klísu tɔn lɛ́ɛ ɖě nɔ́ myá nukún nú yě ǎ.

²² Mi ɖésúnɔ ɔ́, mi tunwun ninɔmɛ Timɔtée tɔn; lě e nyɛ kpó e kpó wa azɔ̌ vǐ kpó tɔ́ kpó ɖɔhun gbɔn, bó jlá Wɛn Ɖagbe ɔ́, mi tunwun.

²³ Un ɖo linlin wɛ ɖɔ nú un ko mɔ nukúnnú jɛ nǔ e ɖo te kpɔ́n mì ɔ́ wú tlóló ɔ́, un ná sɛ́ ɛ dó mi.

²⁴ Un ka ɖeji dó Aklúnɔ wú ɖɔ, ɖo malín málín mɛ din ɔ́, nyɛ ɖésúnɔ ná wá mɔ mi.

²⁵ Nɔví mǐtɔn Epafloditi e jí mi sɛ́ nǔ e hudó mì lɛ́ɛ gbɔn ɔ́, nyɛ kpó é kpó wa azɔ̌ ɖó kpɔ́, bó fun ahwan ɖó kpɔ́; din ɔ́, un mɔ ɖɔ é nyɔ́ nú ma lɛ́ kɔ n'i sɛ́ dó mi.

²⁶ É ɖó jlǒ ɖaxó ɖɔ émí ní mɔ mi bǐ, bɔ é ɖo hǔn mɛ n'i ɖésú, ɖó mi se ɖɔ é jɛ azɔn.

²⁷ É jɛ azɔn nǔgbó, bó ɖibla kú; amɔ̌, Mawu kú nǔbláwǔ n'i, é ka nyí é ɖokpó wɛ Mawu kú nǔbláwǔ ná ǎ; é kú nǔbláwǔ nú nyɛ lɔmɔ̌, bónú aluwɛ mɛ e un ko ɖe ɔ́ ní ma lɛ́ jɛ jí ó.

²⁸ É ɖo ayi mɛ nú mì ɖɔ ma yá wǔ sɛ́ ɛ dó mi, bónú mi mɔ ɛ ɔ́, xomɛ ná lɛ́ hun mi, bɔ nyɛ ɖésúnɔ ɔ́ ka sɔ́ ná nɔ aluwɛ mɛ ǎ.

²⁹ Nú é wá hǔn, mi bo yí i kpódó xomɛhunhun ɖaxó kpán, nɔví ɖo Aklúnɔ mɛ ɖɔhun. Mi ɖó ná ɖó sísí nú gbɛtɔ́ étɔn ɖɔhun lɛ́ɛ.

³⁰ Đó é ɖibla kú ɖó Klísu sín azɔ̌ tamɛ. É ɖibla sɔ́ gbɛ tɔn nyi gbě ɖo azɔ̌ e é wa xá mì, bó ná dó dó alɔ mì ɖó tɛn mitɔn mɛ é mɛ.