Ɛsidlási 3 - MAWUXÓWÉMA

Jozuwée kpó Zolobabɛ́li kpó vɔ́ Mawu sinsɛn ɔ́ ɖó ayǐ

¹ Đo xwe ɔ́ sín sun tɛ́nwegɔ́ ɔ́ mɛ ɔ́, Izlayɛ́li ví e ko ɖo toxo yětɔn mɛ lɛ́ɛ bǐ ɖó gbe kpɔ́, bó kplé ɖo Jeluzalɛ́mu.

² Vɔ̌sánú-xwlémawutɔ́ Jozuwée Yosadaku ví ɔ́, kpódó nɔví tɔn vɔ̌sánú-xwlémawutɔ́ ɖě lɛ́ɛ kpó, kpódó Zolobabɛ́li Calutiyɛ́li ví ɔ́ kpó, kpódó Zolobabɛ́li sín mɛ lɛ́ɛ kpó jɛ Mawu sín vɔ̌sákpe Izlayɛ́li ví lɛ́ɛ tɔn ɔ́ vɔ́ mɛ jí, bó ná nɔ xwlé vɔ̌ e è nɔ dó zo ɔ́ Mawu ɖ'é jí, lě e Mɔyízi ɖɛ̌mɛnu Mawu tɔn ɔ́ sín sɛ́n ɖɔ gbɔn é.

³ Yě ɖo xɛsi ɖi nú mɛ e ko wá hɔn hwlá cí to ɔ́ mɛ ɖ'ayǐ lɛ́ɛ wɛ, có bó ka vɔ́ vɔ̌sákpe ɔ́ mɛ ɖó dǒ dodó xóxó ɔ́ jí, bó nɔ xwlé vɔ̌ e è nɔ dó zo zǎnzǎn kpódó gbadanu kpó ɔ́ Mawu Mavɔmavɔ ɖ'é jí.

⁴ Énɛ́ ɔ́ gúdo ɔ́, ayǐhɔ́ngbe ayǐhɔ́ngbe ɔ́, Izlayɛ́li ví lɛ́ɛ nɔ xwlé vɔ̌sánú kpíkpé ɔ́ Mawu azɔn nabí e yě ɖó ná xwlé ɖo kéze ɖokpó mɛ é, bó nɔ dó ɖu azavaxwe ɔ́ ná lě e è ko wlán gbɔn dó sɛ́nwéma ɔ́ mɛ é.

⁵ Sín hwenɛ́nu ɔ́, yě nɔ́ xwlé vɔ̌sánú ayǐhɔ́ngbe ayǐhɔ́ngbe tɔn lɛ́ɛ Mawu, bó nɔ xwlé vɔ̌sánú e è ko wlán ɖɔ è na nɔ xwlé Mawu ɖo azǎn nukɔntɔn e ɖo sun ɖokpó ɖokpó mɛ ɔ́, kpódó ée è ɖǒ ná xwlé ɖo Mawu Mavɔmavɔ sín xwe lɛ́ɛ hwenu ɔ́ kpó é. Vɔ̌sánú e mɛ ɖésúnɔ nɔ jló bó nɔ hɛn wá nú Mawu Mavɔmavɔ lɛ́ɛ ɔ́, yě nɔ́ xwlé Mawu Mavɔmavɔ.

⁶ Lě e yě lɛ́ jɛ vɔ̌ e è nɔ dó zo ɔ́ xwlé Mawu jí gbɔn ɖo azǎn nukɔntɔn e ɖo xwe ɔ́ sín sun tɛ́nwegɔ́ ɔ́ gbe gbɔn ɔ́ nɛ́, có è ka tlɛ ko dó Mawu Mavɔmavɔ xwé yɔ̌yɔ́ ɔ́ do hwenɛ́nu lɔ ǎ.

È jɛ Mawu xwé ɔ́ gbá jí

⁷ Énɛ́ ɔ́ gúdo ɔ́, yě sú axɔ́ azɔ̌watɔ́ lɛ́ɛ, bɔ yě ná kpa awǐnnya lɛ́ɛ kpódó atín lɛ́ɛ kpó. Yě lɛ́ ná nǔɖuɖu kpódó ahan kpó, kpódó ami kpó Sidɔ́ɔnnu lɛ́ɛ kpódó Tíinu lɛ́ɛ kpó, bónú yědɛɛ lɛ́ɛ ná hɛn atín syɛ́nsyɛ́n Libáan tɔn lɛ́ɛ wá nú yě. Yě ná bɛ́ gbɔn xu jí káká wá ɖó Jafa xu ɔ́ tó. Dadá Pɛ́si tɔn Silúsi wɛ ná gbe tɔn yě.

⁸ Ée yě lɛ́ kɔ wá Jeluzalɛ́mu toxo e mɛ Mawu xwé ɔ́ ɖe ɔ́ mɛ ɔ́, xwe e jɛ fínɛ́ ɔ́ sín sun wěwegɔ́ ɔ́ mɛ ɔ́, Zolobabɛ́li Calutiyɛ́li ví, Jozuwée Yosadaku ví, Jozuwée sín nɔví ɖě lɛ́ɛ e nyí vɔ̌sánú-xwlémawutɔ́ lɛ́ɛ, Levíi ví lɛ́ɛ kpódó yě mɛ e lɛ́ kɔ sín kannumɔgbénu wá lɛ́ɛ bǐ kpó jɛ azɔ̌ jí. Yě ɖe Levíi ví e xwe yětɔn bɛ́ sín ko káká sɔ́yi lɛ́ɛ, bó sɔ́ yě ɖó Mawu Mavɔmavɔ xwé gbígbá ɔ́ sín azɔ̌ nu.

⁹ Levíi ví Jozuwée, kpódó vǐ tɔn lɛ́ɛ kpó, kpódó nɔví tɔn lɛ́ɛ kpó, Kadimiyɛ́li kpó, kpódó vǐ tɔn Hodawya sín xwédo lɛ́ɛ kpó ɖó gbe kpɔ́, bó nɔ azɔ̌watɔ́ e ɖo azɔ̌ wa wɛ ɖo Mawu xwé ɔ́ wú lɛ́ɛ nu. Levíi ví e ɖo xwédo Henadadi tɔn mɛ lɛ́ɛ gɔ́ alɔ nú yě.

¹⁰ Ée xɔmɛtɔ́ lɛ́ɛ dó Mawu Mavɔmavɔ xwé ɔ́ do ɔ́, è ylɔ̌ vɔ̌sánú-xwlémawutɔ́ lɛ́ɛ wá, bɔ yě dó awu e mɛ yě nɔ́ nɔ bó nɔ wa sinsɛnzɔ́ lɛ́ɛ, bó hɛn kpɛn, bɔ Levíi ví e nyí kúnkan Asáfu tɔn lɛ́ɛ hɛn hǔn, bó ná kpa susu nú Mawu Mavɔmavɔ, lě e axɔ́sú Izlayɛ́li tɔn Davídi ko kplɔ́n yě gbɔn ɖ'ayǐ é.

¹¹ Yě ɖo han ji dó ɖo susu kpa nú Mawu wɛ, bó ɖo mlǎmlá ɛ wɛ ɖɔ: “Mawu Mavɔmavɔ nyɔ́ bɔ wǎn yíyí e é ɖó nú Izlayɛ́li ví lɛ́ɛ ɖó vivɔnu ǎ!” Togun ɔ́ lɔ ɖo awǒbóbó kpa wɛ, bó ɖo asíkpɛ́ xo wɛ, bó dó ɖo susu kpa nú Mawu Mavɔmavɔ wɛ, ɖó è ɖo xwé tɔn dó do wɛ.

¹² Vɔ̌sánú-xwlémawutɔ́ tobutóbú ɖé lɛ́ɛ, kpódó Levíi ví ɖé lɛ́ɛ kpó, kpódó hɛ̌nnugán tobutóbú ɖé lɛ́ɛ kpó tíin bó ko nyí mɛxó; yědɛɛ lɛ́ɛ mɔ Mawu xwé ɖ'ayǐ tɔn ɔ́, bɔ ée è jɛ xwé ɔ́ blóɖó jí ɖo nukún yětɔn mɛ ɔ́, yě ya avǐ ɖésú. Mɛ gěgé ɖěvo lɛ́ɛ ka ɖo awǒbóbó kpa wɛ, bo dó ɖo awǎ jɛ wɛ.

¹³ Énɛ́ ɔ́, è sixú tunwun mɛ e ɖo avǐ ya wɛ ɔ́ kpódó mɛ e ɖo awǒbóbó kpa wɛ ɔ́ kpó mɛ e ɖo awǎ jɛ wɛ ɔ́ kpó ǎ, ɖó yě mɛ bǐ wɛ ɖo xó sú wɛ wooo, bɔ è nɔ se ɖo káká zɔ.