Ɛsidlási 1 - MAWUXÓWÉMA

Dadá Silúsi ná gbe ɖɔ è nǐ vɔ́ Mawu xwé ɔ́ gbá

¹ Hwenu e Dadá Pɛ́si tɔn Silúsi ɖo xwe ɖokpó bló wɛ ɖo axɔ́súzinkpo jí ɔ́, Mawu Mavɔmavɔ ɖɔ émí ná bló nǔ e émí ɖɔ gbɔn gbeyíɖɔ Jelemíi jí é. Énɛ́ ɔ́, é sɔ́ dó ayi mɛ nú Dadá Silúsi, bɔ ayixa tɔn mɔ ɖɔ émí ná zé nu émítɔn dó jlá xó élɔ́ gbɔn axɔ́súɖuto émítɔn bǐ mɛ, bó ná wlán.

² Xó e Dadá Pɛ́si tɔn Silúsi ɖɔ ɔ́ ɖíe: “Mawu Mavɔmavɔ, Mawu jǐnukúnsin tɔn ɔ́ sɔ́ axɔ́súɖuto e ɖo ayǐkúngban jí lɛ́ɛ bǐ ɖó acɛkpikpa ce mɛ; é zɔ́n mì ɖɔ nyɛ ní vɔ́ xwé ɖokpó gbá nú émí ɖó Jeluzalɛ́mu, ɖo Judáa.

³ Mi mɛ e ko sixú ɖo togun tɔn mɛ lɛ́ɛ bǐ ní lɛ́ kɔ yi Jeluzalɛ́mu ɖo Judáa, bó ná vɔ́ Mawu Mavɔmavɔ, Mawu Izlayɛ́li tɔn, Mawu e è nɔ sɛn ɖo Jeluzalɛ́mu ɔ́ sín xwé gbá, bónú é ná nɔ kpɔ́ xá mi.

⁴ Mɛ e mɛ Izlayɛ́li ví e kpo lɛ́ɛ ná ɖe ɖo fí ɖěbǔ ɔ́, mɛ énɛ́ lɛ́ɛ ɖó ná ná nǔ yě bó dó dó alɔ yě. Yě ɖó ná ná yě kpatágan, bó ná ná yě sikánú, bó ná ná yě nǔ ɖěvo ɖěvo lɛ́ɛ, bó ná ná yě kanlin, bɔ nǔ e yě ɖésúnɔ jló bó ná ná bɔ è nǎ dó gbá Mawu xwé ɔ́ ná ɖo Jeluzalɛ́mu lɛ́ɛ ɔ́, yě ná lɛ́ ná yě.”

⁵ Énɛ́ ɔ́, akɔta Judáa tɔn, kpó Bɛnjamɛ́ɛ tɔn kpó sín hɛ̌nnugán lɛ́ɛ, vɔ̌sánú-xwlémawutɔ́ lɛ́ɛ, Levíi ví lɛ́ɛ, kpódó mɛ e Mawu ko sixú sɔ́ dó ayi mɛ ná, bɔ yě ɖó jló ɖɔ émí ná yi vɔ́ Mawu Mavɔmavɔ xwé ɔ́ gbá ɖo Jeluzalɛ́mu lɛ́ɛ bǐ kpó sɔ́ nǔ bó ná yi.

⁶ Bɔ mɛ e kpó yě kpó ɖo kpɔ́ lɛ́ɛ ná nǔ yě dó d'alɔ yě. Yě ná yě nǔ e è sɔ́ kpatágan dó bló ná lɛ́ɛ kpó ée è sɔ́ siká dó bló ná lɛ́ɛ kpó, kpó nǔzínzán lɛ́ɛ kpó, kpó kanlin kpó, kpódó nǔxɔ-akwɛ́ tɛnmɛ tɛnmɛ lɛ́ɛ kpó; è lɛ̌n nǔ e yě ɖésúnɔ jló bó ná ɖó Mawu xwé ɔ́ gbígbá wútu lɛ́ɛ d'é mɛ ǎ.

⁷ Nǔzínzán e Nabukodonɔzɔ́ɔ ko bɛ́ sín Mawu Mavɔmavɔ xwé gbe ɖo Jeluzalɛ́mu, bó bɛ́ dó vodúnxɔ é ɖésú tɔn mɛ lɛ́ɛ ɔ́, Dadá Silúsi xo bǐ kplé,

⁸ bó ná gbe Mitlɛdati e ɖo Dadá ɔ́ sín dɔkun lɛ́ɛ bǐ nu ɔ́, bɔ é bɛ́ nǔ énɛ́ lɛ́ɛ jó nú axɔ́ví Judáa tɔn Cɛcibasáa.

⁹ Nǔ e é bɛ́ jó n'i lɛ́ɛ ɖíe: basya e è sɔ́ siká dó bló ná ɔ́ gban (30), ée è sɔ́ kpatágan dó bló ná ɔ́ afatɔ́n (1.000), jǐví koatɔ́n-nukún-ɛnɛ (29),

¹⁰ kɔ́fu e è sɔ́ siká dó bló ná ɔ́ gban (30), ée è sɔ́ kpatágan dó bló ná ɔ́ afɔwe wǒ (410), nǔzínzán ɖěvo ɖěvo lɛ́ɛ afatɔ́n (1.000).

¹¹ Nǔ e è sɔ́ siká dó bló ná lɛ́ɛ, kpódó ée è sɔ́ kpatágan dó bló ná lɛ́ɛ kpó bǐ bló děgba ɖě afɔ tɛ́nwe (5.400). Cɛcibasáa bɛ́ nǔ énɛ́ lɛ́ɛ bǐ sín Babilɔ́nu yi Jeluzalɛ́mu hwenu e mɛ lɛ́ɛ lɛ́ kɔ sín kannumɔgbénu é.