Ezekiyɛ́li 7 - MAWUXÓWÉMA

Mawu ɖɔ nǔ baɖabaɖa gǔdo gúdo tɔn ɔ́ ná jɛ

¹ Mawu Mavɔmavɔ ɖɔ nú mì ɖɔ:

² “Hwɛ gbɛtɔ́ ɔ́, ɖǒtó xó e nyɛ Aklúnɔ Mavɔmavɔ ɖo ɖiɖɔ nú Izlayɛ́li toví lɛ́ɛ wɛ é: xó bǐ fó lo; nǔ baɖabaɖa gǔdo gúdo tɔn ɔ́ jɛ gbɔn to ɔ́ bǐ mɛ lo.

³ Din ɔ́, xó mitɔn fó lo; un ná ɖe xomɛsin ce xlɛ́ mi, un ná ɖɔ hwɛ xá mi lě e walɔ e mi zǎn ɔ́ byɔ́ gbɔn é; un ná sú nǔ baɖabaɖa e mi dó sin lɛ́ɛ bǐ sín axɔ́ mi.

⁴ Nǔ mitɔn ná blá wǔ nú mì ǎ; kpɔ́n bó bló ná nɔ mɛ ǎ, ɖó nyi lɔ ná wa nǔ e mi dó sin lɛ́ɛ bǐ sín nǔ xá mi; énɛ́ ɔ́, nǔ baɖabaɖa e mi dó sin lɛ́ɛ ɔ́, mi ná sixú zé hwlá ǎ. Un ná wa nǔ mɔ̌, bɔ mi ná tunwun ɖɔ nyɛ wɛ nyí Mawu Mavɔmavɔ.

⁵ “Nǔ e nyɛ Aklúnɔ Mavɔmavɔ ɖɔ é ɖíe: Nǔ nyanya ɖokpó ja jijɛ gbé; nǔ nyanya e ma ko jɛ kpɔ́n gbeɖé ǎ é ja jijɛ gbé.

⁶ Xó bǐ fó: nǔ baɖabaɖa gǔdo gúdo tɔn ɔ́ jǎwe; é ná zɔn mi jí; é nɛ́ kó wá nɛ́!

⁷ Izlayɛ́linu e mi, gan mitɔn xo, hwe ɔ́ nu su, azǎn e gbe è nǎ ɖɔ hwɛ xá mi ɔ́ ko sɛkpɔ́; mɛɖé sɔ́ ná j'awǎ ɖě ɖo só lɛ́ɛ jí ǎ, xɛsi wɛ ɖo só lɛ́ɛ jí.

⁸ Din zaanɖé ɔ́, un ná ɖe xomɛsin ce xlɛ́ mi, bɔ mi ná tunwun ɖɔ un sin xomɛ dó mi. Un ná ɖɔ hwɛ xá mi lě e walɔ e mi zán ɔ́ byɔ́ gbɔn é. Un ná sú nǔ baɖabaɖa e mi dó sin lɛ́ɛ bǐ sín axɔ́ mi.

⁹ Nǔ mitɔn ná blá wǔ nú mì ǎ, kpɔ́n bó bló ná nɔ mɛ ǎ, ɖó nyi lɔ ná wa nǔ e mi dó sin lɛ́ɛ bǐ sín nǔ xá mi. Énɛ́ ɔ́, nǔ baɖabaɖa e mi dó sin lɛ́ɛ ɔ́, mi ná sixú zé hwlá ǎ. Un ná wa nǔ mɔ̌, bɔ mi ná tunwun ɖɔ nyɛ wɛ nyí Mawu Mavɔmavɔ, nyi wɛ ɖo nǔ wa xá mi wɛ.

¹⁰ “Azǎn ɔ́ ɖíe sɔgbe e! Nǔhɛngblézán ɔ́ sín gan xo; dǎkaxixo ɖo kan vlɔ́n wɛ, afɔ tɛ ayǐ ɔ́ wá gbɛ́gbɛ́.

¹¹ Alǎnnú sí te, bó nyí kpo ɖo dǎka lɔ mɛ bó ɖo nǔ dó sin wɛ; nǔɖé sɔ́ ná kpo ǎ: togun élɔ́ ɖě sɔ́ ná kpo ǎ; mɛ tɔn e nɔ ɖo zǐngídi ɖú wɛ lɛ́ɛ ɖě sɔ́ ná kpo ǎ; zǐngídi e ɖú wɛ è ɖe ɖo toxo ɔ́ mɛ ɔ́ ná nɔ te bɔ susu e toxo ɔ́ xɔ ɔ́ lɔ ná nɔ te.

¹² Hwe ɔ́ nu su! Ayǐ ɔ́ hɔ́n! Nǔxɔtɔ́, ma j'awǎ ó! Nǔsatɔ́, ma sa vo ó! Ɖó xomɛsin ce ná jɛ te dó mɛ bǐ jí.

¹³ Nǔsatɔ́ sɔ́ ná mɔ nǔ e é nɔ́ sa lɛ́ɛ ǎ, é ná bó kpo ɖo gbɛ ɔ́, é ná mɔ ǎ. Ɖó ée Mawu ɖɔ è nǎ vívá togun ɔ́ bǐ sín kún ɔ́, è nǎ vívá. Mɛ ɖé ná gán ɖ'é mɛ ǎ.

¹⁴ Mi ná ɖo ahwankpɛn kún wɛ kpowun, bó ɖɔ é yá, ahwan ɔ́ yá; mi ka ná mɔ mɛ ɖokpó tɔ́n bó yi ahwan fun gbé ǎ, ɖó xomɛsin ce ná jɛ te dó togun ɔ́ bǐ jí.”

Mɛ ɖébǔ ná hwe ɖo tódɔnnúmɛ Mawu tɔn ɔ́ mɛ ǎ

¹⁵ “Ahwan ná tɔ́n gbɔn gle lɛ́ɛ mɛ; jɛmɛjí kpó adɔ kpó ná ɖo mɛ hu wɛ gbɔn xwé gbe xwé gbe. Mɛ e ɖo gle mɛ lɛ́ɛ ná kú ɖo ahwangbénu. Adɔ kpó azɔn kpó ná hu mɛ e ɖo toxo mɛ lɛ́ɛ.

¹⁶ Mɛ e kpo ɖo gbɛ ɖo yě mɛ lɛ́ɛ ná hɔn yi cí sókan mɛ, tɔdomɛ sín ahwannɛ́ lɛ́ɛ ɖɔhun; mɛ ɖokpó ɖokpó ná ɖo alě ná wɛ, ɖó nǔ e é wa nyi do ɔ́ wú.

¹⁷ Alɔ yětɔn lɛ́ɛ bǐ ná ba gǎn kpo; koligó yětɔn lɛ́ɛ ɖě ná nɔ́ xo dó ɖě wú.

¹⁸ Yě ná bɛ́ ati kplá; xɛsi ɖaxó ɖé ná ɖo yě jí; winnyá ná ɖo nukún yětɔn ta; yě ná xwlɛ́ ta, ɖó yě ɖo aluwɛ mɛ.

¹⁹ Yě ná fúnfún kpatágan yětɔn gbɔn ali jí ali jí. Yě ná sɔ́ siká yětɔn dó mɔ zunkɔ́. Xomɛsin Mawu Mavɔmavɔ tɔn sín azǎn gbe ɔ́, kpatágan yětɔn kpó siká yětɔn kpó sixú hwlɛ́n yě gan ǎ. Yě ná ba nǔ e yě ná ɖu bó gɔ́ xo ɔ́ kpo; yě ná ba nǔ e ná ná vivo lǐndɔ̌n yětɔn ɔ́ kpo, ɖó kpatágan kpó siká kpó wɛ dɔn yě dó hwɛ mɛ.

²⁰ Sikánú ɖagbe ɖagbe e yě nɔ́ dó lɛ́ɛ wɛ zɔ́n bɔ yě nɔ́ ɖo afɔ tɛ ayǐ wɛ. Yě fɔ sikánú yětɔn énɛ́ lɛ́ɛ dó bló vodún ná, vodún suɖunú, nǔvɛ́mɔ ná. Énɛ́ ɔ́ wú wɛ un ná zé vodún yětɔn énɛ́ lɛ́ɛ dó húzú zunkɔ́ nú yě.

²¹ Un ná jó toxo ɔ́ nú akɔta ɖěvo lɛ́ɛ, bɔ yě ná fɔ nǔ e ɖ'é mɛ lɛ́ɛ bǐ. Mɛ ma nyí mɛɖé énɛ́ lɛ́ɛ ná bɛ́ nǔ e ɖo toxo ɔ́ mɛ lɛ́ɛ bǐ, bó ɖu su nú toxo ɔ́.

²² Hwenu e è nǎ ɖu su nú xwé ce ɔ́, un ná ɖe kɔ sín yě wú, ajotɔ́ axánsúnxó ɖé lɛ́ɛ ná yi fínɛ́, bó ná ɖu su ná.

²³ Mi bló wlɔ e è nǎ dó mi lɛ́ɛ, ɖó mɛhutɔ́ kɛ́ɖɛ́ wɛ ɖo to ɔ́ mɛ. Yě ɖo alǎnnú wa wɛ gbɔn fí bǐ ɖo toxo ɔ́ mɛ.

²⁴ Énɛ́ ɔ́ wú ɔ́, un ná sɛ́ togun e nɔ xo dǎka titewungbe lɛ́ɛ dó to ɔ́ mɛ, bɔ yě ná yǐ xwé yětɔn lɛ́ɛ. Un ná hu acɛ nú gǎnhúnǔtɔ́ énɛ́ lɛ́ɛ e nɔ́ ɖo afɔ tɛ ayǐ wɛ lɛ́ɛ, bɔ è nǎ ɖu sú nú vodún xwé yětɔn lɛ́ɛ.

²⁵ Xɛsi ɖo to ɔ́ jí ná jɛ wɛ lo! Yě ná ba fí e yě ná mɔ fífá ɖe ɔ́, yě ká ná mɔ ǎ.

²⁶ Nǔ nyanya ná jɛ ɖě jɛ ɖě gúdo; è nǎ se wɛn nyanya ɖě jɛ ɖě gúdo. Yě ná nɔ́ yi kanbyɔ́ gbeyíɖɔ Mawu tɔn lɛ́ɛ ɖɔ Mawu ka ɖe nǔɖé xlɛ́ yě dó nǔ e ɖo jijɛ wɛ ɔ́ wú nú émí ají. Vɔ̌sánú-xwlémawutɔ́ sɔ́ ná kplɔ́n nǔɖé mɛ ǎ. Tomɛxó lɛ́ɛ lɔ sɔ́ ná tunwun nǔnywɛ́ ɖé bó ná ná mɛ ǎ.

²⁷ Axɔ́sú ɔ́ ná byɔ́ aluwɛ mɛ; wǔ ná kú vǐ e ɖo do tɔn mɛ ná nɔ wɛ é; toví bǐ sín alɔ ná ɖo sísɔ́sísɔ́ wɛ. Lě e walɔ e yě zán ɔ́ byɔ́ gbɔn ɔ́ wɛ un ná wa nǔ xá yě gbɔn. Un ná ɖó hwɛ nú yě lě e é jɛ xá gbɔn é. Énɛ́ ɔ́, yě ná tunwun ɖɔ nyɛ wɛ nyí Mawu Mavɔmavɔ.”