Ezekiyɛ́li 6 - MAWUXÓWÉMA

¹ Mawu Mavɔmavɔ ɖɔ nú mì ɖɔ:

² “Hwɛ gbɛtɔ́ ɔ́, lǐ lɛ́ kpan nukɔn Izlayɛ́li só lɛ́ɛ, bó dó wɛn ce mɛ e ɖo dɔ̌n lɛ́ɛ.

³ A nǎ ɖɔ: Izlayɛ́li só lɛ́ɛ mi, mi ɖótó Aklúnɔ Mavɔmavɔ xó. Aklúnɔ Mavɔmavɔ ɖo ɖiɖɔ nú mɛ e ɖo só ɖaxó ɖaxó jí lɛ́ɛ, mɛ e ɖo só kpɛví kpɛví jí lɛ́ɛ, mɛ e ɖo dodomɛ lɛ́ɛ kpódó mɛ e ɖo tɔdo mɛ lɛ́ɛ kpó ɖɔ: Nyɛ ɖíe; un ná sɛ́ ahwan dó mi, bó ná gba vodún xwé mitɔn e gbɔn só jí só jí lɛ́ɛ hánnyá.

⁴ È nǎ gba vɔ̌sákpe mitɔn lɛ́ɛ, è nǎ gba zǎlínkpɔ́nfyɔ́nú mitɔn lɛ́ɛ hánnyá. Mɛ gěgé ná ɖo mi mɛ, bó ná kú jɛ vodún mitɔn lɛ́ɛ sá mɛ.

⁵ Un ná fɔ Izlayɛ́li ví lɛ́ɛ sín cyɔ tɛ́ ɖó vodún yětɔn lɛ́ɛ sá mɛ, bó ná fúnfún xúgloxú yětɔn lɛ́ɛ lɛ́ lɛ̌ dó vɔ̌sákpe yětɔn lɛ́ɛ.

⁶ Mi ɖo fí ɖěbǔ ɖo to ɔ́ mɛ ɔ́, toxo lɛ́ɛ bǐ ná gba, mɛ ɖěbǔ sɔ́ ná nɔ́ kplé ɖo vodún xwé mitɔn e gbɔn só jí só jí lɛ́ɛ ǎ. Vɔ̌sákpe mitɔn lɛ́ɛ ná gba hánnyá, bɔ nǔɖé sɔ́ ná ɖo nǔɖé hwínnu ǎ; è nǎ gba vodún mitɔn lɛ́ɛ, bó ná sú kún yětɔn dó; è nǎ gba zǎlínkpɔ́nfyɔ́nú mitɔn lɛ́ɛ; è nǎ hɛn nǔ e mi bló lɛ́ɛ bǐ gblé.

⁷ Mi mɛ gěgé ná sún j'ayǐ bó ná kú; énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ.

⁸ Amɔ̌, un ná bló bɔ mi mɛɖé lɛ́ɛ ná gán ɖo ahwan ɔ́ mɛ, bɔ yě mɛ énɛ́ lɛ́ɛ e má cí ahwan ǎ lɛ́ɛ ná gba kpé to ɖěvo ɖěvo lɛ́ɛ mɛ.

⁹ Énɛ́ ɔ́, yě mɛ e ná kpo ɖo gbɛ bɔ ahwan ná wlí yě yi lɛ́ɛ ná nɔ́ flín mì ɖo fí e ahwan ná wlí yě yi lɛ́ɛ; yě ná nɔ́ flín lě e un wa nǔ xá yě gbɔn é; nǔgbó ɔ́, mɛ ɖé lɛ́ɛ wɛ yě nyí bó ɖo gbejí nú mì ǎ; yě jǒ mì dó bó jɛ vodún sɛn jí; énɛ́ ɔ́, nǔ baɖabaɖa e yě ɖésú dó sin lɛ́ɛ ná vlɛ́ nu yětɔn.

¹⁰ Yě ná tunwun ɖɔ nyɛ Mawu Mavɔmavɔ ɔ́, hwenu e un ɖɔ awě ná xo yě ɔ́, é kún nyí xó wɛ un ɖɔ dó jɔhɔn mɛ ó.”

¹¹ Xó e Aklúnɔ Mavɔmavɔ ɖɔ nú mì ɔ́ ɖíe: “Xo alɔ bo zin afɔ dó ayǐ bó ɖɔ: ‘Áo!’ Walɔ baɖabaɖa tɛ́ ɖíe Izlayɛ́li ví lɛ́ɛ zán e! Walɔ gblégblé tɛ́ ɖíe yě zǎn e! Ahwan, adɔ kpó jɛmɛjí kpó wɛ ná sú kún yětɔn dó.

¹² Jɛmɛjí ná hu mɛ e ɖo zɔ lɛ́ɛ, ahwan ná hu mɛ e ɖo tó fí lɛ́ɛ, adɔ ná hu mɛ e ná gán ɖo nǔ énɛ́ lɛ́ɛ mɛ lɛ́ɛ. Nǔɖé ná hɛn xomɛsin ce ɖó te ǎ.

¹³ Cyɔ yětɔn ná fúnfún kpé fí bǐ, è nǎ mɔ cyɔ yětɔn lɛ́ɛ gbɔn vodún yětɔn lɛ́ɛ xwé, cyɔ yětɔn ná lɛ́ lɛ̌ dó vɔ̌sákpe yětɔn lɛ́ɛ, cyɔ yětɔn lɛ́ɛ ná gbɔn só ɖaxó ɖaxó lɛ́ɛ jí, bó ná gbɔn só kpɛví kpɛví lɛ́ɛ jí, cyɔ yětɔn lɛ́ɛ ná gbɔn atín mǔ lɛ́ɛ kpó cɛ́nitín e dó ama lɛ́ɛ kpó sá, bó ná lɛ́ gbɔn fí ɖěvo ɖěvo e kpo bɔ yě nɔ́ sá vɔ̌ nú vodún yětɔn lɛ́ɛ gbɔn lɛ́ɛ. Hwenɛ́nu ɔ́, mɛ ɖokpó ɖokpó ná tunwun ɖɔ nyɛ wɛ nyí Mawu Mavɔmavɔ.

¹⁴ Un ná ɖe nǔ e un nyí ɔ́ xlɛ́ yě; un ná vɔ to yětɔn; mɛ ɖěbǔ sɔ́ ná nɔ fí e yě ɖe ɔ́ ǎ; bɛ́ sín gbětótló mɛ ɖo tofɔligbé káká wá Hlivla toxo mɛ, ɖo totaligbé. Énɛ́ ɔ́, mɛ bǐ ná tunwun lo ɖɔ nyɛ wɛ nyí Mawu Mavɔmavɔ.”