Ezekiyɛ́li 48 - MAWUXÓWÉMA

Akɔta e ɖo totaligbé lɛ́ɛ sín ayǐkúngban

¹ “Nyǐkɔ akɔta e ɖo totaligbé lɛ́ɛ tɔn kpó ayǐkúngban e nyí yětɔn lɛ́ɛ kpó é ɖíe: Dan ɔ́, ayǐkúngban éyɛ́ tɔn ɖo totaligbé dɔ̌n bǐ, ɖo ali e gbɔn Hetlɔ́ni bó gbɔn Lɛbo-Hamáti, bó gbɔn Hasáa-Ɛnáni é kpá. Ayǐkúngban tɔn yá dó axɔ́súɖuto Damási tɔn kpó Hamáti tɔn kpó. É ná gosín to ɔ́ sín dogbó zǎnzǎnhwe jí tɔn ɔ́ jí káká yi Mɛditɛlanɛ́ɛ xu ɔ́ tó ɖo gbadahwe jí.

² Acɛ́ɛ tɔn bɔdó Dan tɔn wú, sín zǎnzǎnhwe jí káká yi gbadahwe jí.

³ Nɛfutali tɔn bɔdó Acɛ́ɛ tɔn wú, sín zǎnzǎnhwe jí káká yi gbadahwe jí.

⁴ Manasée tɔn bɔdó Nɛfutali tɔn wú, sín zǎnzǎnhwe jí káká yi gbadahwe jí.

⁵ Eflayímu tɔn bɔdó Manasée tɔn wú, sín zǎnzǎnhwe jí káká yi gbadahwe jí.

⁶ Hwlibɛ́ni tɔn bɔdó Eflayímu tɔn wú, sín zǎnzǎnhwe jí káká yi gbadahwe jí,

⁷ bɔ Judáa tɔn bɔdó Hwlibɛ́ni tɔn wú, sín zǎnzǎnhwe jí káká yi gbadahwe jí.”

Ayǐkúngban e ná nyí Mawu tɔn é

⁸ “È nǎ jó ayǐkúngban e bɔdó ayǐkúngban Judáa tɔn wú sín zǎnzǎnhwe jí káká yi gbadahwe jí ɖo Mɛditɛlanɛ́ɛ xu ɔ́ tó ɔ́ dó. Ayǐkúngban énɛ́ ɔ́ ná ɖó ga ɖokpó ɔ́ xá ayǐkúngban e è nǎ akɔta ɖokpó ɖokpó é, gblǒ tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000); è nǎ sá nyɛ Mawu Mavɔmavɔ sín xwé ɖó ayǐkúngban énɛ́ ɔ́ tɛ́ntin.

⁹ Ayǐkúngban e ná nyí nyɛ Mawu Mavɔmavɔ tɔn ɔ́, ga tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000), bɔ gblǒ tɔn ná nyí nǔjlɛ́kpo yětɔn adɔ̌kpo ɖokpó (20.000).

¹⁰ Ayǐkúngban e è nǎ sɔ́ nú vɔ̌sánú-xwlémawutɔ́ lɛ́ɛ ɖo ayǐkúngban énɛ́ ɔ́ jí ɔ́ ná ɖó nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000) sín zǎnzǎnhwe jí wá yi gbadahwe jí, bɔ sín totaligbé wá yi tofɔligbé ɔ́, é ná ɖó nǔjlɛ́kpo yětɔn děgba we afɔwó (10.000), bɔ xwé ce ná ɖo ayǐkúngban énɛ́ ɔ́ tɛ́ntin.

¹¹ Akpá énɛ́ ɔ́ xwé ɔ́, vɔ̌sánú-xwlémawutɔ́ Levíi ví Sadɔ́ku ví e è sɔ́ ɖó vo lɛ́ɛ tɔn wɛ é ná nyí. Yě wa azɔ̌ ce ganjí tɔn; yědɛɛ bló Levíi ví lɛ́ɛ ɖɔhun, bó jó nyɛ Mawu dó hwenu e Izlayɛ́li ví lɛ́ɛ jó mì dó é ǎ.

¹² Énɛ́ ɔ́ wú wɛ ayǐkúngban e è sɔ́ ɖ'ayǐ nú nyɛ Mawu ɔ́, yě ná yí tɛn mímɛ́ titewungbe ɖé ɖ'é mɛ, ɖo Levíi ví lɛ́ɛ tɔn kpá.

¹³ Tɛnmɛ Levíi ví lɛ́ɛ tɔn ná cí vɔ̌sánú-xwlémawutɔ́ lɛ́ɛ tɔn ɖɔhun. Ayǐkúngban we lɛ́ɛ ɔ́, ga yětɔn ná nyí nǔjlɛ́kpo yětɔn adɔ̌kpo ɖě děgba ɖě afatɔ́n (25.000), bɔ gblǒ yětɔn ná nyí nǔjlɛ́kpo yětɔn děgba we afɔwó (10.000).

¹⁴ Akpá énɛ́ xwé ɔ́, è nǎ sa ayǐkúngban nú mɛɖé ǎ, è nǎ ná mɛɖé ǎ, è ka ná ɖyɔ́ xá mɛɖé ǎ, ɖó ayǐkúngban énɛ́ ɔ́ nǔ tají ɖaxó ɖokpó wɛ é nyí nú mɛ bǐ, ɖó vo wɛ è sɔ́ ɖó nú nyɛ Mawu Mavɔmavɔ.”

Toxo ɔ́ kpó gǎn ɔ́ kpó sín ayǐkúngban

¹⁵ “Ayǐkúngban e è sɔ́ ɖó vo nú nyɛ Mawu ɔ́, é kpo ayǐkúngban ɖé, bɔ gblǒ tɔn nyí nǔjlɛ́kpo yětɔn děgba ɖě afatɔ́n (5.000), bɔ ga tɔn nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000). Ayǐkúngban énɛ́ ɔ́ ná nyí mɛ bǐ tɔn kpaa, bɔ è nǎ sɔ́ ɖó te nú toxo ɔ́ kpó gle e ná lɛ́ lɛ̌ dó toxo ɔ́ é kpó.

¹⁶ Ayǐkúngban énɛ́ ná ɖó gblǒ zɛ̌ɛ́n ga zɛ̌ɛ́n; é ná nyí nǔjlɛ́kpo yětɔn děgba ɖě afɔwe kanwe ko (4.500) ɖo zǎnzǎnhwe jí, děgba ɖě afɔwe kanwe ko (4.500) ɖo gbadahwe jí, děgba ɖě afɔwe kanwe ko (4.500) ɖo afɔligbé ɖo taligbé.

¹⁷ Ɖo toxo ɔ́ sín gǔdo nukɔn, aɖisí amyɔ ɔ́, è nǎ jó tɛnmɛ ɖé dó, bɔ gblǒ tɔn ná nyí nǔjlɛ́kpo yětɔn afɔɖé kanɖé wǒ (250).

¹⁸ Ɖo ayǐkúngban e è sɔ́ ɖó ayǐ nú nyɛ Mawu ɔ́ kpá ɔ́, è nǎ jó ayǐkúngban we dó, ayǐkúngban ɖokpó ná ɖo zǎnzǎnhwe jí nú toxo ɔ́, ɖokpó ná ɖo gbadahwe jí. Ayǐkúngban we énɛ́ lɛ́ɛ bǐ nǎ ɖǒ jlɛ̌ ɖokpó ɔ́, bɔ ga yětɔn ná nyí nǔjlɛ́kpo yětɔn děgba we afɔwó (10.000). Ayǐkúngban énɛ́ lɛ́ɛ jí wɛ è nǎ nɔ́ mɔ nǔ e mɛ e nɔ wa azɔ̌ ɖo toxo ɔ́ mɛ lɛ́ɛ ná ɖu é ɖe.

¹⁹ Mɛ e ɖo azɔ̌ wa wɛ ɖo toxo ɔ́ mɛ lɛ́ɛ ɔ́, yě ná bó nyí akɔta ɖěbǔ ɔ́, yě ná nɔ lɛ gle ɖo ayǐkúngban énɛ́ lɛ́ɛ jí.

²⁰ Ayǐkúngban e è sɔ́ ɖó ayǐ nú nyɛ Mawu Mavɔmavɔ é bǐ ná nyí ayǐkúngban ɖé, bó ná ɖó gblǒ zɛ̌ɛ́n ga zɛ̌ɛ́n, bó ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000); ɛnɛvlɔ́ ná nyí toxo ɔ́ sín ayǐkúngban.

²¹ Ayǐkúngban e kpo lɛ́ɛ ná nyí gǎn e ɖo to ɔ́ nu ɔ́ tɔn. Ayǐkúngban éyɛ́ tɔn lɛ́ɛ ná ɖo zǎnzǎnhwe jí kpó gbadahwe jí kpó nú ayǐkúngban e è sɔ́ ɖ'ayǐ nú nyɛ Mawu ɔ́ kpó ée è sɔ́ ɖ'ayǐ nú toxo ɔ́ é kpó; gblǒ tɔn ná nyí nǔjlɛ́kpo yětɔn adɔ̌kpo ɖokpó děgba ɖě afatɔ́n (25.000); éé ɖo zǎnzǎnhwe jí ɔ́ zɔn mɔ̌ káká yi to ɔ́ sín dogbó e ɖo zǎnzǎnhwe jí ɔ́ jí, éé ɖo gbadahwe jí ɔ́ zɔn mɔ̌ káká yi Mɛditɛlanɛ́ɛ xu ɔ́ kɔn. Énɛ́ ɔ́, ayǐkúngban e è sɔ́ ɖó vo nú mì ɔ́ kpó éé è sɔ́ ɖó vo nú xwé ce ɔ́ kpó ná ɖo éé è sɔ́ ɖó vo nú gǎn ɔ́ é tɛ́ntin.

²² Ayǐkúngban Levíi ví lɛ́ɛ tɔn kpó fí e toxo ɔ́ ɖe é kpó ná gbo gǎn ɔ́ sín ayǐkúngban ɔ́ ɖó we, bɔ Judáa sín ayǐkúngban ɔ́ ná ɖo totaligbé, bɔ Bɛnjamɛ́ɛ tɔn ná ɖo afɔligbé.”

Akɔta tofɔligbé tɔn lɛ́ɛ sín ayǐkúngban

²³ “Nyǐkɔ akɔta ɖě lɛ́ɛ e kpo lɛ́ɛ tɔn kpó ayǐkúngban e nyí yětɔn lɛ́ɛ kpó ɖíe: Bɛnjamɛ́ɛ ɔ́, ayǐkúngban éyɛ́ tɔn gosín dogbó zǎnzǎnhwe jí tɔn ɔ́ jí káká yi Mɛditɛlanɛ́ɛ xu ɔ́ tó ɖo gbadahwe jí.

²⁴ Sinmɛnyɔ́ɔ tɔn bɔdó Bɛnjamɛ́ɛ tɔn wú, sín zǎnzǎnhwe jí káká yi gbadahwe jí.

²⁵ Isakáa tɔn bɔdó Sinmɛnyɔ́ɔ tɔn wú, sín zǎnzǎnhwe jí káká yi gbadahwe jí.

²⁶ Zabulɔ́ɔn tɔn bɔdó Isakáa tɔn wú, sín zǎnzǎnhwe jí káká yi gbadahwe jí.

²⁷ Gadi tɔn bɔdó Zabulɔ́ɔn tɔn wú, sín zǎnzǎnhwe jí káká yi gbadahwe jí.

²⁸ Fí e Gadi sín ayǐkúngban ná nɔ te ɔ́ wɛ ná nyí to ɔ́ sín dogbó. É ná bɛ́ sín Tamáa ɖo zǎnzǎnhwe jí, bó ná gbɔn Mɛliba tɔ ɔ́ kɔn ɖo Kadɛ́ci, bó ná wá gbɔn Ejípu tɔ ɔ́ tó káká yi Mɛditɛlanɛ́ɛ xu ɔ́ tó.

²⁹ Lě e mi ná ná ayǐkúngban e ná nyí akɔta Izlayɛ́li tɔn lɛ́ɛ ɖokpó ɖokpó tɔn ɛ gbɔn é nɛ́. Xó e nyɛ Aklúnɔ Mavɔmavɔ ɖɔ ɔ́ nɛ́.”

Jeluzalɛ́mu sín hɔnnúwa wěwe lɛ́ɛ

^30-31 “Hɔnnúwa wěwe wɛ Jeluzalɛ́mu toxo ɔ́ ná ɖó, bɔ akɔta ɖokpó sín nyǐkɔ ná nɔ́ nɔ hɔnnúwa ɖokpó jí; hɔnnúwa atɔn wɛ ná nɔ dǒdɔn e ɖo taligbé ɔ́ jí; hɔnnúwa Hwlibɛ́ni tɔn, Judáa tɔn kpó Levíi tɔn kpó: ga tɔn nyí nǔjlɛ́kpo yětɔn děgba ɖě afɔwe kanwe ko (4.500).

³² Dǒdɔn e ɖo zǎnzǎnhwe jí dɔ̌n ɔ́ lɔ ná ɖó hɔnnúwa atɔn; hɔnnúwa Jozɛ́fu tɔn, Bɛnjamɛ́ɛ tɔn kpó Dan tɔn kpó; dǒ énɛ́ lɔ sín ga nyí nǔjlɛ́kpo yětɔn děgba ɖě afɔwe kanwe ko (4.500).

³³ Dǒdɔn afɔligbé tɔn ɔ́ lɔ ɖó ga ɖokpó ɔ́; é lɔ ná ɖó hɔnnúwa atɔn: hɔnnúwa Sinmɛnyɔ́ɔ tɔn, Isakáa tɔn kpó Zabulɔ́ɔn tɔn kpó.

³⁴ Dǒdɔn gbadahwe jí tɔn ɔ́ lɔ ɖó ga ɖokpó ɔ́; é lɔ na ɖó hɔnnúwa atɔn: hɔnnúwa Gadi tɔn, Acɛ́ɛ tɔn kpó Nɛfutali tɔn kpó.

³⁵ Dǒ e lɛ́ lɛ̌ dó toxo ɔ́, ga tɔn bǐ nyí nǔjlɛ́kpo yětɔn děgba ɛnɛ afɔwó (18.000). “Sín gbe énɛ́ gbe ɔ́, è nǎ nɔ ylɔ́ toxo ɔ́ ɖɔ: ‘Mawu Mavɔmavɔ ɖo fí.’ ”