Ezekiyɛ́li 47 - MAWUXÓWÉMA

¹ Nya ɔ́ lɛ́ kplá mì wá Mawuxɔ ɔ́ lihɛ́nnu; énɛ́ ɔ́, un mɔ sin ɖo tíntɔ́n sín kpekán ɔ́ glɔ́ wɛ, bó ɖo sisa wɛ ɖidó zǎnzǎnhwe jí dɔ̌n. Mawuxɔ ɔ́ zǎnzǎnhwe jí wɛ é kpan nukɔn. Sin ɔ́ ɖo sisa sín Mawuxɔ ɔ́ sín afɔligbé wɛ, bó nɔ́ sa gbɔn vɔ̌sákpe ɔ́ sín afɔligbé.

² Nya ɔ́ kplá mì tɔ́n sín xwé ɔ́ gbe gbɔn hɔnnúwa taligbé tɔn ɔ́ nu, bó kplá mì lɛ́ lɛ̌ dó xwé ɔ́ káká wá hɔnnúwa zǎnzǎnhwe jí tɔn ɔ́ kɔn, bɔ un mɔ sin ɖo sisa sín hɔnnúwa énɛ́ ɔ́ sín afɔligbé wɛ.

³ Nya ɔ́ kplá mì tunta zǎnzǎnhwe jí, fí e sa yi wɛ sin ɔ́ ɖe é, bó sɔ́ kan e ɖo alɔ tɔn mɛ é bó jlɛ́ nǔjlɛ́kpo yětɔn afatɔ́n (1.000); énɛ́ gúdo ɔ́, é kplá mì gbɔn sin ɔ́ mɛ ɖo fínɛ́; bɔ sin ɔ́ fán mì dó afɔgókɔ.

⁴ É lɛ́ jlɛ́ nǔjlɛ́kpo yětɔn afatɔ́n (1.000), bó lɛ́ kplá mì gbɔn sin ɔ́ mɛ ɖo fínɛ́, bɔ sin ɔ́ fán mì dó koli. Mǐ yi nukɔn bó lɛ́ bló nǔjlɛ́kpo yětɔn afatɔ́n (1.000), bɔ é lɛ́ kplá mì gbɔn sin ɔ́ mɛ ɖo fínɛ́, din ɔ́, sin ɔ́ fán mì dó alinkan.

⁵ É lɛ́ vɔ́ jlɛ́ nǔjlɛ́kpo yětɔn afatɔ́n (1.000), amɔ̌, un sɔ́ sixú gbɔn sin ɔ́ mɛ ɖě ǎ. Sin ɔ́ yi do ɖo fínɛ́; tɔ jɛ́n è nǎ lin có bó sixú gbɔn mɛ.

⁶ Nya ɔ́ ɖɔ nú mì ɖɔ: “Hwɛ gbɛtɔ́ví e, a kpɔ́n ganjí a?” Ée é kan mɔ̌ byɔ́ mì ɔ́, é kplá mì yi zɔ, bɔ é ná nɔ zaanɖé ɔ́, é lɛ́ kplá mì wá tɔ ɔ́ tó.

⁷ Énɛ́ ɔ́, un wá mɔ ɖɔ atín gbɔn tɔ ɔ́ tó.

⁸ Nya ɔ́ ɖɔ nú mì ɖɔ: “Tɔ élɔ́ ɔ́, to ɔ́ sín zǎnzǎnhwe jí wɛ é nɔ́ sa yi; é gbɔn Judɛ́ɛn tɔdo ɔ́ mɛ, bo yi jɛ Xu Kúkú ɔ́ mɛ. É sa yi kɔn dó Xu Kúkú ɔ́ mɛ ɔ́, é nɔ́ húzú Xu Kúkú ɔ́ sín sin, bɔ sin ɔ́ nɔ húzú sin ɖagbe .

⁹ Nǔvíɖogbɛ alɔkpa alɔkpa bǐ ná ji ɖ'é mɛ kɔn nyi kpɔ́, bɔ hweví ná nɔ́ ji kɔn nyi kpɔ́ gbɔn fí e tɔ énɛ́ sín sin ko gbɔn é bǐ. Tɔ énɛ́ sín sin sa yi fí ɖěbǔ ɖo Xu Kúkú ɔ́ mɛ ɔ́, é ná húzú sin ɔ́ ɖo fí énɛ́ bɔ é ná húzú sin ɖagbe bó ná nɔ́ ji nǔvíɖogbɛ.

¹⁰ Énɛ́ ɔ́, è nǎ nɔ́ mɔ ɖɔnyitɔ́ bɛ́ sín Eyinu-Gɛdi káká yi Eyinu-Eglayimu, bɔ yě ná nɔ́ xyá ɖɔ yětɔn lɛ́ɛ gbɔn xu ɔ́ tó. È nǎ mɔ hweví alɔkpa alɔkpa ɖo xu ɔ́ mɛ, káká bɔ é ná cí Mɛditɛlanɛ́ɛ xu mɛ ɖɔhun.

¹¹ É ká ɖo mɔ̌ có gba kpó tɔ kpó e ná gbɔn Xu kúkú ɔ́ kpá lɛ́ɛ ná húzú sin ɖagbe ǎ; fí énɛ́ lɛ́ɛ ná nyí jɛgba.

¹² Ɖo tɔsisa e gosín Mawu xwé ɔ́ gbe é tó ɔ́, atínsínsɛ́n tɛnmɛ tɛnmɛ ná wú gbɔn aɖisí amyɔ. Yě ná lúnlún ɖa gbeɖé ǎ, yě ná nɔ́ sɛ́n hwebǐnu. Sun ɖokpó ɖokpó mɛ ɔ́, è nǎ nɔ́ gbɛ sínsɛ́n ɖo yě jí, ɖó tɔ e sa sín Mawu xwé ɔ́ gbe é wɛ ná nɔ́ sa gbɔn kɔ yětɔn. Sínsɛ́n yětɔn lɛ́ɛ ná nyí nǔɖuɖu, ama yětɔn ná nyí amasin.”

Mawu ɖɔ fí e dogbó Izlayɛ́li tɔn lɛ́ɛ ná gbɔn lɛ́ɛ

¹³ Xó e Aklúnɔ Mavɔmavɔ ɖɔ ɔ́ ɖíe: “Un ná ɖɔ fí e dogbó Izlayɛ́li to ɔ́ tɔn ná gbɔn, bɔ akɔta wěwe e ɖo to ɔ́ mɛ lɛ́ɛ ná má lɛ́ɛ nú mi. Akɔta Jozɛ́fu tɔn ɔ́, ayǐkúngban we wɛ é ná yí.

¹⁴ Mi ná má ayǐkúngban e ɖo to ɔ́ mɛ é; mɛɖé má yí hú mɛ ɖé ó. Ɖó nyi wɛ zin alɔ dó akɔ́n bó ɖɔ un na ná Izlayɛ́li to ɔ́ tɔ́gbó mitɔn lɛ́ɛ; hǔn mi wɛ ná ɖu gǔ tɔn.

¹⁵ Ɖo totaligbé ɔ́, to ɔ́ sín dogbó ná bɛ́ sín Mɛditɛlanɛ́ɛ xu ɔ́ kɔn, bó ná gbɔn ali e yi Hetlɔ́ni, Lɛbo-Hamáti kpó Sedádi kpó é;

¹⁶ é ná gbɔn Belotáyi toxo ɔ́ kpó Sivlayímu toxo ɔ́ kpó mɛ. Toxo énɛ́ lɛ́ɛ ɖo axɔ́súɖuto Damási tɔn, Hamáti tɔn kpó Hasɛ́ɛ-Tikɔ́ni tɔn kpó tɛ́ntin. Hasɛ́ɛ-Tikɔ́ni ɔ́ ɖo malín málín mɛ dó Holáni.

¹⁷ Hǔn dogbó énɛ́ ɔ́ ná bɛ́ sín Mɛditɛlanɛ́ɛ xu ɔ́ kɔn káká yi Hasáa-Ɛnáni gletoxo ɔ́ kɔn ɖo zǎnzǎnhwe jí. É fó dó axɔ́súɖuto Damási tɔn ɔ́ kpó Hamáti tɔn ɔ́ kpó kɔn ɖo taligbé; dogbó taligbé tɔn ɔ́ nɛ́.

¹⁸ Ɖo zǎnzǎnhwe jí ɔ́, dogbó ɔ́ ná bɛ́ sín fí ɖé ɖo Damási kpó Holáni kpó tɛ́ntin, bó ná gbɔn Judɛ́ɛn tɔdo ɔ́ mɛ, ɖo Galadi kpó Izlayɛ́li to ɔ́ kpo tɛ́ntin, bó ná hun káká yi Tamáa, ɖo Xu Kúkú ɔ́ tó; dogbó zǎnzǎnhwe jí tɔn ɔ́ nɛ́.

¹⁹ Ɖo tofɔligbé ɔ́, dogbó ɔ́ ná gosín Tamáa wá Mɛliba tɔ ɔ́ kɔn ɖo Kadɛ́ci, bó ná gbɔn Ejípu tɔ ɔ́ kɔn káká yi Mɛditɛlanɛ́ɛ xu ɔ́ kɔn. Dogbó afɔligbé tɔn ɔ́ nɛ́.

²⁰ Ɖo gbadahwe jí ɔ́, Mɛditɛlanɛ́ɛ xu ɔ́ wɛ ná nyí dogbó bɛ́ sín afɔligbé káká yi Lɛbo-Hamáti ɖo taligbé. Dogbó gbadahwe jí tɔn ɔ́ nɛ́.

²¹ “Mi ná má to ɔ́ ɖo akɔta mitɔn lɛ́ɛ tɛ́ntin.

²² Akɔ wɛ mi ná nyi dó má ayǐkúngban lɛ́ɛ, bɔ mɛ ɖokpó ɖokpó ná tunwun tɛnmɛ e nyí étɔn é; mi ma ka wɔn jǒnɔ e ɖo tɛ́ntin mitɔn, bó ji vǐ dó to ɔ́ mɛ lɛ́ɛ ó. Mɛ énɛ́ lɛ́ɛ ɔ́, Izlayɛ́li ví ɖɔhun wɛ è nǎ hɛn yě; mi ná hɛn yě togun ɔ́ sín vǐ ɖɔhun, bɔ ayǐkúngban e ná nyí yětɔn ɔ́, mi ná ná yě.

²³ Jǒnɔ ɖokpó ɖokpó ná mɔ nǔ e nyí étɔn é yí ɖo akɔta e mɛ é ná ɖe é. Xó e nyɛ Aklúnɔ Mavɔmavɔ ɖɔ ɔ́ nɛ́.”