Ezekiyɛ́li 44 - MAWUXÓWÉMA

¹ Nya ɔ́ lɛ́ kplá mì wá hɔnnúwa e ɖo zǎnzǎnhwe jí nú xwé ɔ́ é, bɔ hɔn tɔn lɛ́ɛ ɖo súsú.

² Énɛ́ ɔ́, Mawu Mavɔmavɔ ɖɔ nú mì ɖɔ: “Hɔnnúwa élɔ́ ɔ́, súsú wɛ hɔn tɔn lɛ́ɛ ná nɔ́ nɔ; è nǎ hun gbeɖé ǎ. Mɛ ɖé ná gbɔn fínɛ́ gbeɖé ǎ, ɖó nyɛ Mawu Mavɔmavɔ, Mawu Izlayɛ́li tɔn ɔ́, fínɛ́ wɛ un nɔ gbɔn. Hǔn é ní nɔ súsú.

³ É ká ɖo mɔ̌ có gǎn ɔ́ ná nɔ fínɛ́ ɖó gǎn e é nyí ɔ́ wú; é ná nɔ fínɛ́, bó ɖu vɔ̌sánú mímɛ́ ɔ́ ɖo nukɔn ce. É ná byɔ́ mɛ gbɔn hɔnnúwa ɔ́ sín ali nu, bó ná tɔ́n gbɔn ali ɖokpó énɛ́ ɔ́ nu.”

Akɔta ɖěvo lɛ́ɛ ná yi Mawu xwé gbe ǎ

⁴ Énɛ́ ɔ́ gúdo ɔ́, nya ɔ́ wá kplá mì gbɔn hɔnnúwa e ɖo taligbé ɔ́ nu yi Mawuxɔ ɔ́ lihɛ́nnu; un mɔ susu Mawu Mavɔmavɔ tɔn gɔ́ xɔ ɔ́. Énɛ́ ɔ́, un xwe agbɔ̌nnusú do.

⁵ Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, ɖǒtó ganjí, hun nukún towe ganjí, bó hun tó towe ganjí; ɖǒtó sɛ́n lɛ́ɛ kpó tito e sɔ́ ɖó ayǐ wɛ un ɖe ɖo xwé ɔ́ gbe lɛ́ɛ kpó. Sɛ́n e ɖɔ xó dó mɛ e ɖó acɛ bó ná byɔ́ Mawu xwé ɔ́ gbe é kpó mɛ e ma ɖó acɛ énɛ́ ǎ é kpó; a nǎ ɖó kɛ́n jí céɖécéɖé.

⁶ “Xó e ɖɔ wɛ nyɛ Aklúnɔ Mavɔmavɔ ɖe ɔ́, a nǎ ɖɔ nú Izlayɛ́li ví tónúmasetɔ́ énɛ́ lɛ́ɛ; xó e ɖɔ wɛ un ɖe ɔ́ ɖíe: Izlayɛ́li ví lɛ́ɛ mi, nǔ baɖabaɖa e dó sin wɛ mi ɖe lɛ́ɛ kpé mì.

⁷ Hwenu e mi ɖo nǔ e nyí ce ɖo vɔ̌ e mi sá é mɛ lɛ́ɛ xwlé mì wɛ ɔ́, hwenu e mi ɖo kanlin e mi dó sá vɔ̌ ɔ́ é sín jǒ kpó kanjɔ tɔn kpó xwlé mì wɛ ɔ́, hwe ɖokpó énɛ́ ɔ́ nu ɔ́, mi nɔ kplá akɔta ɖěvo lɛ́ɛ, mɛ énɛ́ lɛ́ɛ e ma gbo ada ǎ, bó má ká nɔ nyi sɛ́n ce ǎ lɛ́ɛ byɔ́ xwé ce gbe. Mi ɖu su nú xwé ce. Nǔ baɖabaɖa e dó sin wɛ mi ɖe lɛ́ɛ zɔ́n, bɔ akɔ e nyi kpó mi kpó jɛ ɔ́, mi hɛn gblé.

⁸ Mi ɖésúnɔ sɔ́ nɔ́ wá wa azɔ̌ nú mì ɖo xwé ce gbe ǎ; lo ɔ́, akɔta ɖěvo lɛ́ɛ wɛ mǐ sɔ́ azɔ̌ énɛ́ jó ná, bɔ yě nɔ́ bló ɖó tɛn mitɔn mɛ.

⁹ Nyɛ Aklúnɔ Mavɔmavɔ ɖɔ: mɛ e nyí akɔta ɖěvo, bó má gbo ada ǎ, bó má nɔ́ nyi sɛ́n ce lɛ́ɛ ǎ é ɖě ná wá xwé ce gbe gbeɖé ǎ; mɛ énɛ́ ɔ́ ná bo ɖo mi Izlayɛ́li ví lɛ́ɛ tɛ́ntin ɔ́, é ná byɔ́ xwé ce gbe gbeɖé ǎ.”

Tito e Levíi ví lɛ́ɛ ná nɔ́ xwedó lɛ́ɛ

¹⁰ “Levíi ví e xwedó Izlayɛ́li ví ɖě lɛ́ɛ e jó mì dó, bó ɖo vodún yětɔn lɛ́ɛ sɛn wɛ lɛ́ɛ ɔ́, nǔ e yě wa ɔ́ ji nǔɖé ɔ́, yě ná kpan.

¹¹ Azɔ̌ e un ná sɔ́ dó así nú yě ɔ́ wɛ nyí, yě ná nɔ́ wa azɔ̌ nú mì ɖo xwé ce gbe, yě ná nɔ́ nɔ hɔnnúwa lɛ́ɛ jí, bó ná nɔ wa azɔ̌ tɛnmɛ tɛnmɛ ɖo xwé ce gbe; yě ná nɔ́ hu kanlin e è nǎ dó sá vɔ̌ e è nɔ dó zo lɛ́ɛ, kpó kanlin e è nǎ dó sá vɔ̌ ɖě lɛ́ɛ é kpó; yě ná ɖo alɔ jǐ nú togun ɔ́, bó ná nɔ́ wa azɔ̌ n'i.

¹² Lo ɔ́, yědɛɛ lɛ́ɛ wɛ nɔ nukɔn nú togun ɔ́ bɔ é sɛn vodún; yě wɛ dɔn Izlayɛ́li ví lɛ́ɛ dó hwɛ mɛ; énɛ́ wú ɔ́, xó e nyɛ Aklúnɔ Mavɔmavɔ ɖɔ ɔ́ ɖíe: Un ná wa nǔ xá yě; nǔ e yě wa ɔ́ ji nǔɖé ɔ́, yě ná sɔ́ kpan.

¹³ Yě sɔ́ ná wá gɔ̌n ce bó wá wa vɔ̌sánú-xwlémawutɔ́ zɔ́ ɖě gbeɖé ǎ. Nǔ e è nɔ dó wa azɔ̌ nú mì lɛ́ɛ ɔ́, yě sɔ́ ná sɛkpɔ́ ɖě ǎ; yě sɔ́ ná wá tɛn mímɛ́ bǐ ɔ́ mɛ ɖě ǎ. Winnyánú e yě wa, bó dó nǔ baɖabaɖa lɛ́ɛ sin ɔ́ ji nǔɖé ɔ́, yě ná kpan.

¹⁴ Din ɔ́, azɔ̌ kpaa e ɖo xwé ce gbe lɛ́ɛ wɛ un ná sɔ́ dó así nú yě bɔ yě ná nɔ́ wa.”

Tito e vɔ̌sánú-xwlémawutɔ́ lɛ́ɛ ná nɔ́ xwedó lɛ́ɛ

¹⁵ “Vɔ̌sánú-xwlémawutɔ́ Levíi ví e nyí Sadɔ́ku ví lɛ́ɛ ɔ́, hwenu e Izlayɛ́li ví lɛ́ɛ jó nyɛ Mawu Mavɔmavɔ ɔ́ dó bó ɖo ali bú wɛ ɔ́, yědɛɛ lɛ́ɛ xwedó xwé ce sín sɛ́n lɛ́ɛ. Énɛ́ ɔ́ wú ɔ́, yě kɛ́ɖɛ́ wɛ ná nɔ́ wa azɔ̌ nú mì, yě wɛ ná nɔ́ sɔ́ kanlin e è hu dó sá vɔ̌ lɛ́ɛ sín jǒ kpó hun kpó xwlé mì. Xó e nyɛ Aklúnɔ Mavɔmavɔ ɖɔ ɔ́ nɛ́.

¹⁶ Yě ɖokpónɔ wɛ ná nɔ́ byɔ́ xwé ce gbe, bó ná nɔ́ sɛkpɔ́ távo ce, bó ná nɔ́ xwedó tito e un ɖó ayǐ bɔ è nǎ nɔ xwedó dó wa azɔ̌ ɖo xwé ce gbe lɛ́ɛ.

¹⁷ Cóbónú yě ná dó asá hɔnnúwa e yi kɔ́xota e ɖo xwé ɔ́ ta ɔ́ sín kpekán ɔ́, kanvɔ wěwe wɛ yě ná dó. Hwenu e yě ná ɖo azɔ̌ wa wɛ ɖo kɔ́xota e ɖo xwé ɔ́ ta ɔ́ abǐ xɔ ce mɛ ɔ́, yě ná dó gbɔ̌fúnvɔ ǎ.

¹⁸ Avɔ e yě ná dó blá ta ná ɔ́, kpó éé yě ná nɔ sin ali ɔ́ kpó ɔ́, kanvɔ wɛ é ná nyí. Nǔ e yě ná nɔ́ dó ɔ́, ɖě ná nɔ́ ná yǒzo yě ǎ, yě táá wá jɛ dɛ̌n.

¹⁹ Cóbónú yě ná wá kɔ́xo fí e togun ɔ́ nɔ́ kplé ɖe ɔ́, yě ná to ɖe nǔ e yě dó dó wa azɔ̌ lɛ́ɛ hwɛ̌; yě ná ɖe nǔ lɛ́ɛ dó xɔ e è sɔ́ ɖó te nú nǔ énɛ́ lɛ́ɛ é mɛ, bó ná bɛ́ nǔ ɖěvo dó. É má nyí mɔ̌ ǎ ɔ́, togun ɔ́ táá wá ɖó alɔ vɔ̌sánú-xwlémawutɔ́ sín awu yětɔn lɛ́ɛ wú .

²⁰ “Vɔ̌sánú-xwlémawutɔ́ lɛ́ɛ ná nɔ́ xwlɛ́ ta ǎ, lo ɔ́ cóbónú ɖa yětɔn ná ɖi ga dín ɔ́, yě ná nɔ́ kpa bɔ é ná fɛ́ wǔ.

²¹ Yě ɖě ná nɔ́ nu vɛ̌ɛn cóbó ná nɔ́ yi kɔ́xota e ɖo xwé ɔ́ ta é ǎ.

²² Vɔ̌sánú-xwlémawutɔ́ ɖě ná da asúkúsi ǎ, ɖě ká ná da nyɔ̌nu e asú gbɛ́ é ɖě ǎ. Izlayɛ́li ví ɖyɔ̌vǐ wɛ yě ná nɔ́ da, abǐ mɛ e asú tɔn nyí vɔ̌sánú-xwlémawutɔ́ bó kú é.

²³ “Vɔ̌sánú-xwlémawutɔ́ lɛ́ɛ ná kplɔ́n vogbingbɔn e ɖo nǔ e è ɖe ɖó vo nú mì é kpó nǔ e nyí nǔ kpaa é kpó togun ce, bó ná lɛ́ xlɛ́ yě vogbingbɔn e ɖo nǔ e nyí nǔ mímɛ́ e kpó nǔ e nyí nǔ blíblí é kpó mɛ é.

²⁴ Ényí tagba ɖé tíin ɔ́, yě wɛ ná nɔ́ gbo hwɛ, yě ná nɔ́ xwedó sɛ́n ce lɛ́ɛ, bó ná gbo hwɛ dó jlɔ̌jlɔ́ jí. Yě ná nɔ́ ɖu sinsɛnxwe lɛ́ɛ lě e sɛ́n ɔ́ zɔ́n gbɔn é, bó ná nɔ́ kpé nukún dó gbɔjɛzánsɛ́n ɔ́ wú, bɔ togun ce ná nɔ́ nyi.

²⁵ “Vɔ̌sánú-xwlémawutɔ́ ɖě ná ɖó alɔ cyɔ wú ǎ; é má nyí mɔ̌ ǎ ɔ́, é ná ɖu su. Amɔ̌, nú tɔ́ tɔn, abǐ nɔ tɔn abǐ vǐ tɔn ɖé, abǐ nɔví tɔn sunnú ɖé, abǐ nɔví tɔn nyɔ̌nu e má kó da asú ǎ ɔ́ ɖě wɛ ɔ́, é hɛn ɔ́, é ná ɖó alɔ cyɔ énɛ́ lɛ́ɛ wú.

²⁶ Ényí nǔ wá cí mɔ̌ ɔ́, é ná slá wǔ, bó ná nɔ te nú azǎn tɛ́nwe cóbó ná lɛ́ jɛ azɔ̌ wa jí.

²⁷ Gbe e gbe é ná yi kɔ́xota e ɖo xwé ɔ́ ta ɔ́, é ná sá hwɛsɔ́kɛmɛvɔ́ tɔn. Xó e nyɛ Aklúnɔ Mavɔmavɔ ɖɔ ɔ́ nɛ́.

²⁸ Vɔ̌sánú-xwlémawutɔ́ lɛ́ɛ ná ɖó ayǐkúngban ɖě ǎ; nyɛ Mawu Mavɔmavɔ wɛ ná nyí nǔ e yě ná ɖó é. Mi ma ná ayǐkúngban ɖěbǔ yě ɖo Izlayɛ́li ó; nyɛ wɛ nyí nǔ e yě ɖó ɔ́.

²⁹ Vɔ̌sánú-xwlémawutɔ́ lɛ́ɛ ná nɔ́ ɖu nǔníná jinukún tɔn e è hɛn wá nú mì lɛ́ɛ kpó kanlin e è dǒ sá hwɛsɔ́kɛmɛvɔ́ ná lɛ́ɛ kpó sín lan. Nǔ e è sɔ́ ɖó vo nú mì ɖo Izlayɛ́li to ɔ́ mɛ ɔ́ bǐ wɛ ná nyí yětɔn.

³⁰ Nǔkún nukɔntɔn e ná nɔ́ nyɔ́ ɖo gle mɛ lɛ́ɛ ná nɔ́ nyí vɔ̌sánú-xwlémawutɔ́ lɛ́ɛ tɔn, bɔ nǔjɔ e è nǎ ná mì ɖo Izlayɛ́li tomɛ lɛ́ɛ bǐ ná nyí yětɔn. Mɛ lɛ́ɛ ná nɔ́ ná yě linfín yětɔn e nyɔ́ hú bǐ é, bɔ nyɛ Mawu Mavɔmavɔ ná nɔ́ xo ɖɛ dó xwé yětɔn jí.

³¹ Amɔ̌, vɔ̌sánú-xwlémawutɔ́ lɛ́ɛ ɖó ná ɖu xɛ kúkú ǎ, yě ká ná ɖu lan kúkú ǎ; é sixú nyí gběkanlin ɖé wɛ é hu, é ká sixú nyí é nɔ é ɖóɖó bó kú, yě ɖó ná ɖu ǎ.”