Ezekiyɛ́li 40 - MAWUXÓWÉMA

LĚ E MAWU MAVƆMAVƆXWÉ Ɔ́ NÁ WÁ NƆ SƆ É Xónusɔ́ɖóte

¹ Ahwan wlí mǐ yi Babilɔ́nu ɔ́, xwe tɔn koatɔ́ngɔ́ (25) ɔ́ sín bǐbɛ́mɛ ɔ́, ɖo azǎn wǒgɔ́ ɔ́ e ɖo sun nukɔntɔn e ɖo xwe ɔ́ mɛ é gbe ɔ́, hlɔ̌nhlɔ́n Mawu Mavɔmavɔ tɔn wá jǐ ce, bó kplá mì yi Jeluzalɛ́mu; è gba Jeluzalɛ́mu ɔ́, é ɖo xwe wɛ̌nɛ bló wɛ pɛ́pɛ́pɛ́ gbe énɛ́ gbe.

² Mawu zé mì yi Izlayɛ́li ɖo nǔmimɔ mɛ; é sɔ́ mì yi ɖó só ɖé jí; só ɔ́ yi jǐ ɖésú; nǔ xɔ ɖɔhun ɖé lɛ́ɛ ɖo só ɔ́ sín ajaja e ɖo afɔligbé ɔ́ mɛ, toxo ɖé wɛ ɖo fínɛ́ ɖɔhun.

³ Mawu kplá mì yi fínɛ́, bɔ un mɔ nya ɖé; nya ɔ́ cí ganvɔ ɖɔhun. É hɛn lɛ̌ɛnkan kpó kpo ɖé kpó alɔ mɛ bó ná dó jlɛ́ nǔ. Nya ɔ́ ɖo te ɖo toxo ɔ́ sín hɔnnúwa kpá.

⁴ Nya ɔ́ ɖɔ nú mì ɖɔ: “Hwɛ gbɛtɔ́ e, hun nukún towe ganjí, bó ɖótó te ganjí, bó ɖó ayi te ganjí, lobo kpɔ́n nǔ e ná xlɛ́ we wɛ un ɖe é. Ɖó a nǎ mɔ ganjí wú wɛ un kplá we wá fí; énɛ́ gúdo ɔ́, a nǎ ɖɔ nǔ e a mɔ é nú Izlayɛ́li ví lɛ́ɛ.”

Mawu xwé ɔ́ sín kɔ́xota ɔ́ kpó hɔnnúwa tɔn lɛ́ɛ kpó

⁵ Nǔ e un mɔ é ɖíe: un mɔ dǒ ɖé lɛ́ lɛ̌ dó Mawu xwé ɔ́; kpo e nya ɔ́ hɛn alɔ mɛ ɔ́, ga tɔn nyí nǔjlɛ́kpo yětɔn ayizɛ́n; nǔjlɛ́kpo énɛ́ ɔ́ ga tɔn nyí mɛ̌tlu vlɔ́ bɔ kpɛví ɖé ɖ'é jí; é jlɛ́ dǒ ɔ́ gblǒ tɔn, bó jlɛ́ jǐ yiyi tɔn, bɔ dǒ ɔ́, gblǒ tɔn nyí kpo e ɖo alɔ tɔn mɛ ɔ́ ɖokpó, bɔ jǐ yiyi tɔn lɔ nyí kpo e ɖo alɔ tɔn mɛ ɔ́ ɖokpó.

⁶ Nya ɔ́ yi hɔnnúwa e ɖo zǎnzǎnhwe jí é kɔn, bó xá kpekán ɔ́ jí, bó jlɛ́ kpekán ɔ́ sín gblǒ kpɔ́n, bɔ gblǒ tɔn nyí kpo e ɖo alɔ tɔn mɛ ɔ́ ɖokpó.

⁷ Mɛcɔ́tɔ́ lɛ́ɛ sín xɔ e ɖo ali e gbɔn hɔnnúwa ɔ́ sá byɔ́ xwé ɔ́ gbe lɛ́ɛ ɖokpó ɖokpó sín ga nyí kpo e ɖo alɔ tɔn mɛ ɔ́ ɖokpó, bɔ gblǒ tɔn lɔ nyí kpo e ɖo alɔ tɔn mɛ ɔ́ ɖokpó. Dǒ e è dǒ gbo mɛcɔ́tɔ́ lɛ́ɛ sín xɔ lɛ́ɛ mɛ ɔ́, gblǒ tɔn nyí nǔjlɛ́kpo yětɔn atɔ́ɔ́n. È gbɔn hɔnnúwa ɔ́ sá xwe xwé ɔ́ gbe ɔ́, è nɔ mɔ kpekán ɖěvo có bó nɔ́ mɔ agba e sá è nɔ gbɔn yi xwé ɔ́ gbe é. Nya ɔ́ jlɛ́ kpekán énɛ́ kpɔ́n, bɔ gblǒ tɔn nyí kpo e ɖo alɔ tɔn mɛ ɔ́ ɖokpó;

⁸ é jlɛ́ agba ɔ́ sín gblǒ kpɔ́n;

⁹ bɔ é nyí nǔjlɛ́kpo yětɔn tántɔn; nya ɔ́ jlɛ́ dotín hɔnnúwa ɔ́ tɔn lɛ́ɛ kpɔ́n, bɔ ɖokpó ɖokpó sín gblǒ nyí nǔjlɛ́kpo yětɔn we.

¹⁰ Mɛcɔ́tɔ́ lɛ́ɛ sín xɔ e ɖo ɖisí amyɔ nú ali e gbɔn hɔnnúwa e ɖo zǎnzǎnhwe jí ɔ́ nu byɔ́ xwé ɔ́ gbe ɔ́, jlɛ̌ ɖokpó ɔ́ wɛ yě ɖó; è ɖo ali ɔ́ jí ɔ́, atɔn ɖo amyɔxwé, bɔ atɔn ɖo ɖisíxwé. Dǒ e gbo xɔ énɛ́ lɛ́ɛ mɛ lɛ́ɛ bǐ wɛ ɖó gblǒ ɖokpó ɔ́.

¹¹ Nya ɔ́ lɛ́ jlɛ́ hɔntogbó ɔ́ kpɔ́n, ɖo hɔnnúwa ɔ́ sá, bɔ gblǒ tɔn nyí nǔjlɛ́kpo yětɔn wǒ, bɔ ga tɔn nyí nǔjlɛ́kpo yětɔn wǒ atɔn.

¹² Dǒ kpɛví kpɛví ɖé lɛ́ɛ ɖo aɖisí amyɔ nú ali ɖaxó e gbɔn hɔnnúwa ɔ́ sá byɔ́ xwé ɔ́ gbe é; dǒ lɛ́ɛ gbɔn mɛcɔ́tɔ́xɔ lɛ́ɛ nukɔn bɔ jǐ yiyi yětɔn nyí nǔjlɛ́kpo yětɔn ɖokpó; mɛcɔ́tɔ́xɔ lɛ́ɛ ɖó gblǒ zɛ̌ɛ́n ga zɛ̌ɛ́n, bó nyí nǔjlɛ́kpo yětɔn ayizɛ́n.

¹³ Nya ɔ́ jlɛ́ hɔnnúwa ɔ́ sín gblǒ; é bɛ́ sín dǒdɔn gǔdo tɔn e ɖo mɛcɔ́tɔ́ lɛ́ɛ sín xɔ mɛ ɔ́ ɖokpó wú, káká yi dǒdɔn gǔdo tɔn e ɖo mɛcɔ́tɔ́xɔ e kpan nukɔn mɛcɔ́tɔ́xɔ énɛ́ ɔ́ é kɔn, bɔ é nyí nǔjlɛ́kpo yětɔn koatɔ́n (25).

¹⁴ É jlɛ́ agba ɔ́ sín ga kpɔ́n, bɔ ga tɔn nyí nǔjlɛ́kpo yětɔn ko; kɔ́xota e ɖo Mawu xwé ɔ́ gbe ɔ́ lɛ́ lɛ̌ d'agba ɔ́.

¹⁵ Bɛ́ sín hɔnnúwa ɔ́ sín kpekán nukɔntɔn ɔ́ ta, káká yi agba ɔ́ sín dǒdɔn gúdo tɔn ɔ́ kɔn ɔ́, é bló nǔjlɛ́kpo yětɔn kanɖé wǒ (50).

¹⁶ Flɛtɛ́li gbɔn hɔnnúwa wú bǐ, bɔ è dǒ ganja bǐ nu ɖo xomɛ; è ɖe flɛtɛ́li dó mɛcɔ́tɔ́xɔ lɛ́ɛ wú, bó ɖe dó dǒ e gbo mɛcɔ́tɔ́xɔ lɛ́ɛ mɛ lɛ́ɛ wú; è ɖe flɛtɛ́li d'agba ɔ́ wú. È ɖe děma gbɔn hɔnnúwa ɔ́ wú bǐ dó ba acɔ́ ná.

¹⁷ Nya ɔ́ kplá mì yi kɔ́xota e è byɔ́ xwé ɔ́ gbe tlóló ɔ́, è nɔ mɔ é. È tɛ́ awǐnnya kpikpa gbɔn kɔ́xota ɔ́ tó lɛ́ lɛ̌ dó; xɔ gban wɛ è mɛ lɛ́ lɛ̌ dó kɔ́xota énɛ́.

¹⁸ È tɛ́ awǐnnya kpikpa gbɔn aɖisí amyɔ nú hɔnnúwa e nu è nɔ gbɔn byɔ́ xwé ɔ́ gbe lɛ́ɛ. È byɔ̌ xwé ɔ́ gbe tlóló ɔ́, kɔ́xota e è nɔ mɔ é yi do hú kɔ́xota e ɖo xwé ɔ́ ta é.

¹⁹ Nya ɔ́ jlɛ́ tɛnmɛ e gosín xwétadó Mawu xwé ɔ́ tɔn kɔn, wá yi glegbedó Mawu xwé tɔn e ɖo zǎnzǎnhwe jí ɔ́ kɔn é, bɔ é nyí nǔjlɛ́kpo yětɔn kanwe ko (100).

²⁰ Énɛ́ ɔ́ gúdo ɔ́, é yi Mawu xwé ɔ́ sín taligbé, bó jlɛ́ hɔnnúwa e ɖo fínɛ́ é; é jlɛ́ gblǒ tɔn kpó jǐ yiyi tɔn kpó.

²¹ Mɛcɔ́tɔ́xɔ ayizɛ́n ɖo hɔnnúwa ɔ́ mɛ; atɔn ɖo ɖisíxwé nú ali e gbɔn hɔnnúwa ɔ́ sá ɔ́, bɔ atɔn ɖo amyɔxwé. È jlɛ̌ dǒ lɛ́ɛ kpó agba ɔ́ kpó, bɔ bǐ nyí nǔ ɖokpó ɔ́ xá hɔnnúwa e ɖo zǎnzǎnhwe jí ɔ́ tɔn lɛ́ɛ kpó agba tɔn lɛ́ɛ kpó. Hɔnnúwa ɔ́, ga tɔn nyí nǔjlɛ́kpo yětɔn kanɖé wǒ (50), bɔ gblǒ tɔn nyí nǔjlɛ́kpo yětɔn koatɔ́n (25).

²² Hɔnnúwa ɔ́ sín flɛtɛ́li lɛ́ɛ kpó agba tɔn kpó, kpó děma e è ɖe dó yě wú lɛ́ɛ kpó bǐ cí hɔnnúwa e ɖo zǎnzǎnhwe jí ɔ́ tɔn lɛ́ɛ ɖɔhun. Kpekán tɛ́nwe wɛ è nɔ fán bó nɔ́ byɔ́ hɔnnúwa taligbé tɔn ɔ́ mɛ, bó nɔ́ yi gbɔn agba ɔ́ sá ɖo nukɔn dɔ̌n byɔ́ xwé ɔ́ gbe.

²³ Hɔnnúwa ɖokpó kpan nukɔn hɔnnúwa e ɖo taligbé é, bɔ ali tɔn tɔ́n dó kɔ́xota e ɖo xwé ɔ́ ta é. Nya ɔ́ jlɛ́ sín hɔnnúwa taligbé tɔn ɔ́ kɔn yi hɔnnúwa e kpan nukɔn ɛ ɔ́ kɔn, bó mɔ nǔjlɛ́kpo yětɔn kanwe ko (100), lě e é ɖe gbɔn ɖo zǎnzǎnhwe jí é.

²⁴ É lɛ́ kplá mì yi afɔligbé, bɔ un mɔ hɔnnúwa ɖokpó ɖo fínɛ́; é jlɛ̌ mɛcɔ́tɔ́xɔ lɛ́ɛ kpɔ́n, bó jlɛ́ dǒ lɛ́ɛ kpɔ́n, bó jlɛ́ agba ɔ́ kpɔ́n, bɔ bǐ nyí nǔ ɖokpó ɔ́ xá ée é jlɛ́ wá yi din é.

²⁵ Fí énɛ́ ɔ́ ɖésú ɔ́, flɛtɛ́li gbɔn hɔnnúwa ɔ́ kpó agba ɔ́ kpó wú bǐ lɛ́ lɛ̌ dó; lě e é ɖe gbɔn ɖo zǎnzǎnhwe jí é kpó lě e é ɖe gbɔn ɖo taligbé é kpó; hɔnnúwa ɔ́, ga tɔn nyí nǔjlɛ́kpo yětɔn kanɖé wǒ (50), bɔ gblǒ tɔn nyí nǔjlɛ́kpo yětɔn.

²⁶ Kpekán tɛ́nwe wɛ è nɔ fán, bó nɔ́ byɔ́ hɔnnúwa ɔ́ mɛ, bó nɔ́ yi gbɔn agba ɔ́ sá ɖo nukɔn dɔ̌n byɔ́ xwé ɔ́ gbe.

²⁷ Hɔnnúwa ɖokpó lɛ́ kpan nukɔn hɔnnúwa énɛ́ ɔ́, bɔ è gbɔn fínɛ́ ɔ́, è nɔ yi kɔ́xota e ɖo xwé ɔ́ ta é. Nya ɔ́ jlɛ́ sín hɔnnúwa e byɔ́ xwé ɔ́ gbe ɔ́ nu yi hɔnnúwa e yi xwé ɔ́ ta é kɔn, bó mɔ nǔjlɛ́kpo yětɔn kanwe ko (100).

Mawu sín xwé ɔ́ ta kpó hɔnnúwa tɔn lɛ́ɛ kpó

²⁸ Nya ɔ́ kplá mì gbɔn hɔnnúwa e ɖo afɔligbé é nu yi kɔ́xota e ɖo xwé ɔ́ ta é. É jlɛ́ hɔnnúwa ɔ́ kpɔ́n, bɔ é nyí nǔ ɖokpó ɔ́ xá hɔnnúwa e nu è nɔ gbɔn byɔ́ xwé ɔ́ gbe lɛ́ɛ:

²⁹ É jlɛ́ mɛcɔ́tɔ́xɔ e ɖ'é mɛ lɛ́ɛ, bó jlɛ́ dǒ e è dǒ gbo mɛcɔ́tɔ́xɔ lɛ́ɛ mɛ lɛ́ɛ, kpó agba tɔn kpó, bɔ yě nyí nǔ ɖokpó ɔ́ xá hɔnnúwa ɖě lɛ́ɛ tɔn. Flɛtɛ́li gbɔn hɔnnúwa ɔ́ kpó agba tɔn kpó wú bǐ lɛ́ dó. Hɔnnúwa ɔ́, ga tɔn nyí nǔjlɛ́kpo yětɔn kanɖé wǒ (50), bɔ gblǒ tɔn nyí nǔjlɛ́kpo yětɔn koatɔ́n (25).

³⁰ Agba lɛ́ lɛ̌ dó kɔ́xota e ɖo xwé ɔ́ ta é; ga yětɔn nyí nǔjlɛ́kpo yětɔn koatɔ́n (25), bɔ gblǒ yětɔn nyí nǔjlɛ́kpo yětɔn atɔ́ɔ́n.

³¹ È gosín Mawu xwé ɔ́ ta, bó ja xwé ɔ́ sín kɔ́xota ɔ́, è nɔ gbɔn hɔnnúwa ɔ́ sá, bó nɔ́ wá agba tɔn sá bó nɔ́ jɛ te kɔ́xo ɔ́ ta. È ɖe děma gbɔn mɛcɔ́tɔ́xɔ lɛ́ɛ sín dǒ lɛ́ɛ wú ɖo ɖisí amyɔ nú ali e gbɔn hɔnnúwa ɔ́ sá é dó ba acɔ́ ná; kpekán tántɔn wɛ è nɔ fán bó nɔ́ yi hɔnnúwa ɔ́ sá.

³² Nya ɔ́ wá kplá mì gbɔn hɔnnúwa e ɖo zǎnzǎnhwe jí é li nu byɔ́ kɔ́xota e ɖo xwé ɔ́ ta é. É jlɛ́ hɔnnúwa ɔ́ kpɔ́n, bɔ é nyí nǔ ɖokpó ɔ́ xá hɔnnúwa ɖě lɛ́ɛ.

³³ É jlɛ́ mɛcɔ́tɔ́xɔ e ɖ'é mɛ lɛ́ɛ, bó jlɛ́ dǒ e è dó gbo mɛcɔ́tɔ́xɔ lɛ́ɛ, kpó agba tɔn kpó, bɔ yě nyí nǔ ɖokpó ɔ́ xá hɔnnúwa ɖě lɛ́ɛ tɔn lɛ́ɛ. Flɛtɛ́li gbɔn hɔnnúwa ɔ́ kpó agba ɔ́ kpó wú bǐ lɛ́ dó. Hɔnnúwa ɔ́, ga tɔn nyí nǔjlɛ́kpo yětɔn kanɖé wǒ (50), bɔ gblǒ tɔn nyí nǔjlɛ́kpo yětɔn koatɔ́n (25).

³⁴ È gosín Mawu xwé ɔ́ ta, bó ja xwé ɔ́ sín kɔ́xota ɔ́, è nɔ gbɔn hɔnnúwa ɔ́ sá, bó nɔ́ wá agba tɔn sá bó nɔ́ jɛ te kɔ́xo ɔ́ ta. È ɖe děma gbɔn mɛcɔ́tɔ́xɔ lɛ́ɛ sín dǒ lɛ́ɛ wú ɖo aɖisí amyɔ nú ali e gbɔn hɔnnúwa ɔ́ sá é dó ba acɔ́ ná. Kpekán tántɔn wɛ è nɔ fán, bó nɔ́ yi hɔnnúwa ɔ́ sá.

³⁵ Nya ɔ́ wá kplá mì yi hɔnnúwa taligbé tɔn ɔ́ kɔn, bó jlɛ́ kpɔ́n, bɔ é ɖó jlɛ̌ ɖokpó ɔ́ xá ɖě lɛ́ɛ.

³⁶ É jlɛ́ mɛcɔ́tɔ́xɔ lɛ́ɛ, bó jlɛ́ dǒ e è dó gbo mɛcɔ́tɔ́xɔ lɛ́ɛ mɛ lɛ́ɛ, kpó agba tɔn kpó ɖo fí énɛ́ lɔ; flɛtɛ́li wɛ gbɔn bǐ wú lɛ́ dó. Hɔnnúwa ɔ́, ga tɔn nyí nǔjlɛ́kpo yětɔn kanɖé wǒ (50), bɔ gblǒ tɔn nyí nǔjlɛ́kpo yětɔn koatɔ́n (25).

³⁷ È gosín Mawu xwé ɔ́ ta, bó ja xwé ɔ́ sín kɔ́xota ɔ́, è nɔ gbɔn hɔnnúwa ɔ́ sá, bó nɔ́ wá agba tɔn sá bó nɔ́ jɛ te kɔ́xo ɔ́ ta. È ɖe děma gbɔn mɛcɔ́tɔ́xɔ lɛ́ɛ sín dǒ lɛ́ɛ wú ɖo aɖisí amyɔ nú ali e gbɔn hɔnnúwa ɔ́ sá é dó ba acɔ́ ná. Kpekán tántɔn wɛ è nɔ fán, bó nɔ́ yi hɔnnúwa ɔ́ sá.

³⁸ Xɔ ɖé hun d'agba xwéta hɔnnúwa taligbé tɔn ɔ́ tɔn mɛ: fínɛ́ wɛ è nɔ klɔ́ kanlin e è hu, bó ná dó sá vɔ̌ e è nɔ dó zo lɛ́ɛ ná lɛ́ɛ ɖe.

³⁹ Távo ɛnɛ ɖo agba ɔ́ sá; we ɖo akpá ɖokpó xwé bɔ we ɖo akpá ɖě ɔ́ xwé. Távo énɛ́ lɛ́ɛ jí wɛ è nɔ hu kanlin e è nǎ dǒ sá vɔ̌ lɛ́ɛ ɖe: vɔ̌ e è nɔ dó zo lɛ́ɛ kpó vɔ̌ tɛnmɛ tɛnmɛ e è nɔ sá dó hwɛ mɛtɔn lɛ́ɛ tamɛ lɛ́ɛ kpó.

⁴⁰ Távo ɛnɛ lɛ́ ɖo hɔnnúwa ɔ́ sín agba ɔ́ kɔn ɖo kɔ́xo. Nú è ɖidó xwéta hɔnnúwa taligbé tɔn ɔ́ kɔn ɔ́, távo énɛ́ lɛ́ɛ ɔ́, we ɖo aɖisíxwé bɔ we ɖo amyɔxwé.

⁴¹ Hǔn távo tántɔn wɛ è nɔ zán, bó nɔ́ hu kanlin e ná dó sá vɔ̌ nú Mawu wɛ è ɖe lɛ́ɛ ɖo yě jǐ: ɛnɛ ɖo aɖisíxwé nú hɔnnúwa ɔ́, bɔ ɛnɛ ɖo amyɔxwé.

⁴² Távo ɛnɛ e è sɔ́ ɖó te nú vɔ̌ e è nɔ dó zo lɛ́ɛ ɔ́, awǐnnya kpikpa wɛ è dǒ bló yě. Távo énɛ́ lɛ́ɛ ɔ́, nukún mɛ yětɔn nyí gblǒ zɛ̌ɛ́n ga zɛ̌ɛ́n, bó nyí nǔjlɛ́kpo yětɔn ɖokpó adaɖé, bɔ jǐ yiyi yětɔn nyí nǔjlɛ́kpo yětɔn ɖokpó. È nɔ fɔ alǐnnyánú e è nɔ dó wa lanzɔ́ lɛ́ɛ ɖó távo énɛ́ lɛ́ɛ jí.

⁴³ Do ɖé gbɔn távo lɛ́ɛ tó bǐ lɛ́ lɛ̌ dó; do ɔ́ gbló sɔ alɔkpákpá mɛ; è nɔ bɛ́ kanlin e hu lɛ́ɛ sín lan ɖó távo énɛ́ lɛ́ɛ jí.

⁴⁴ Nya ɔ́ lɛ́ kplá mì yi kɔ́xota e ɖo xwe ɔ́ ta é; è gosín hɔnnúwa e mɛ è nɔ gbɔn yi xwé ɔ́ ta ɔ́ mɛ ɔ́, è nɔ mɔ hanjitɔ́ lɛ́ɛ sín xɔ lɛ́ɛ ɖo fínɛ́; ɖokpó ɖo hɔnnúwa taligbé tɔn ɔ́ kpá, bó kpan nukɔn afɔligbé; wegɔ́ ɔ́ ɖo hɔnnúwa afɔligbé tɔn ɔ́ kpá, bó kpan nukɔn taligbé.

⁴⁵ Nya ɔ́ ɖɔ nú mì ɖɔ: “Xɔ e kpan nukɔn afɔligbé ɔ́, vɔ̌sánú-xwlémawutɔ́ e jí azɔ̌ jɛ ɖo Mawuxɔ mɛ lɛ́ɛ tɔn wɛ.

⁴⁶ Xɔ e kpan nukɔn taligbé é ká nyí vɔ̌sánú-xwlémawutɔ́ e nɔ́ wa azɔ̌ ɖo vɔ̌sákpe ɔ́ jí lɛ́ɛ tɔn. Levíi ví lɛ́ɛ mɛ ɔ́, mɛ e nyí Sadɔ́ku ví lɛ́ɛ kɛ́ɖɛ́ jɛ́n ná nɔ́ yi tɛn mímɛ́ ɔ́ mɛ, bó ná nɔ́ wa azɔ̌ nú Mawu Mavɔmavɔ.”

Mawuxɔ ɔ́

⁴⁷ Nya ɔ́ jlɛ́ kɔ́xota e ɖo xwé ɔ́ ta é kpɔ́n, bó mɔ ɖɔ é ɖó gblǒ zɛ̌ɛ́n ga zɛ̌ɛ́n, bɔ é nyí nǔjlɛ́kpo yětɔn kanɖé wǒ (50). Vɔ̌sákpe ɖé ɖo Mawuxɔ ɔ́ nukɔn.

⁴⁸ Nya ɔ́ kplá mì yi Mawuxɔ ɔ́ sín agba sá. É jlɛ́ ali e nu è nɔ gbɔn yi agba ɔ́ sá é: agba ɔ́ sín dǒ lɛ́ɛ ɔ́, gblǒ yětɔn nyí nǔjlɛ́kpo yětɔn atɔ́ɔ́n, bɔ ali e nu è nɔ gbɔn yi agba ɔ́ sá ɔ́, gblǒ tɔn nyí nǔjlɛ́kpo yětɔn wǒ-ɛnɛ. Dǒ e ɖo aɖisí amyɔ nú ali ɔ́ sín gblǒ é nyí nǔjlɛ́kpo yětɔn atɔn.

⁴⁹ Agba ɔ́, ga tɔn nyí nǔjlɛ́kpo yětɔn ko, bɔ gblǒ tɔn nyí nǔjlɛ́kpo yětɔn wěwe. Kpekán wǒ wɛ è nɔ fán, bó nɔ́ yi agba ɔ́ sá. È mɛ dotín we ɖó ali ɔ́ nu: ɖokpó ɖo aɖisíxwé, ɖokpó ɖo amyɔxwé.