Ezekiyɛ́li 4 - MAWUXÓWÉMA

¹ Mawu ɖɔ: “Hwɛ gbɛtɔ́ ɔ́, zě blǐki ɖokpó ɖó nukɔn towe bó ɖe toxo ɖé d'é wú; ɖe Jeluzalɛ́mu toxo ɔ́ d'é wú.

² Énɛ́ ɔ́ gúdo ɔ́, a nǎ ɖe xlɛ́ ɖɔ kɛntɔ́ lɛ́ lɛ̌ dó toxo ɔ́ bǐ: a nǎ ɖe do e mɛ kɛntɔ́ ná nɔ bó tɔ́n ahwan toxo ɔ́ é; a nǎ ɖe kɔ́ e kɛntɔ́ kplé bó ná nɔ gúdo bó tɔ́n ahwan togun ɔ́ é; a nǎ ɖe dǒ e jí kɛntɔ́ ná nɔ bó kpé toxo ɔ́ wú é, bó ná ɖe ahwanfunnú lɛ́ lɛ̌ dó toxo ɔ́ bǐ.

³ Zě ganxwɛ ɖokpó dó gbo toxo ɔ́ kpó hwi ɖésúnɔ kpó dǒ ɖɔhun; bɔ nukún nyi toxo ɔ́ wú, bó ɖe xlɛ́ ɖɔ è tɔ́n ahwan toxo ɔ́; amɔ̌, hwi wɛ nyí ahwan e tɔ́n toxo ɔ́ é. Énɛ́ ní nyí xlɛ̌ ɖé nú Izlayɛ́li togun ɔ́.

⁴ “Mlɔ̌ amyɔ jí, bó zé nǔ e Izlayɛ́li togun ɔ́ wa nyi do lɛ́ɛ sín agban ɖó hwiɖée jí. Azǎn nabí e a nǎ nɔ ayǐmlɔ́mlɔ́ amyɔ jí mɔ̌ xɔ ɔ́, a nǎ hɛn hwɛ e Izlayɛ́li togun ɔ́ hu lɛ́ɛ sín agban n'i.

⁵ Azǎn nabí e un nǎ ɖɔ bɔ a nǎ nɔ mɔ̌ xɔ ɔ́ ná sɔgbe xá xwe nabí e Izlayɛ́li togun ɔ́ hu hwɛ ná é; hǔn azǎn ɖokpó ɖo xwe ɖokpó nyí wɛ; hǔn a nǎ hɛn hwɛgban Izlayɛ́li togun ɔ́ tɔn nú azǎn afɔɖé kɛnnɛ gban (390) .

⁶ Ényí a blǒ azǎn énɛ́ lɛ́ɛ fó ɔ́, a nǎ mlɔ́ aɖisí jí, bó ná hɛn hwɛgban Judáa togun ɔ́ tɔn nú azǎn kanɖé (40); un ná zé azǎn ɖokpó dó lɛ́n xwe ɖokpó.

⁷ A nǎ kpɔ́n Jeluzalɛ́mu toxo e è tɔ́n ahwan ɔ́ tlítlí, bó ná dlɛ́n alɔ towe sɛ́ dó toxo ɔ́; awa towe ɔ́, wěxo wɛ é ná ɖe bɔ a nǎ ɖɔ xó dó toxo ɔ́ wú dó nyǐkɔ ce mɛ.

⁸ Éɖíe, hwɛ ɔ́, un ná blá we, bɔ a nǎ sixú kózó ǎ káká nú azǎn nabí e a ma sixú byɔ́ gbɛtɔ́ mɛ xɔ ǎ é.

⁹ “A nǎ fɔ jinukún tɛnmɛ tɛnmɛ: blěe, ɔ́ji, fɛ́vu, lantílu, milɛ́ɛ kpódó blěe xúxú kpó, bó ná xo bǐ kplé dó gannú ɖokpó mɛ, bó ná nɔ́ dó ɖa wɔ̌xúxú ná. Nǔɖuɖu énɛ́ wɛ a nǎ ɖu káká nú azǎn afɔɖé kɛnnɛ gban (390) e a nǎ bló ɖo adaja ɖokpó jí é.

¹⁰ Nǔɖuɖu e a nǎ nɔ́ ɖu gbe ɖokpó ɔ́ ná nyí kilóo vlɔ́ ɖó ɛnɛ.

¹¹ Sin e a nǎ nɔ́ nu gbe ɖokpó ɔ́ ná ɖó jlɛ̌; sin lǐtli ɖokpó wɛ a nǎ nɔ́ nu gbe ɖokpó.

¹² Nǔɖuɖu towe ná cí ɔ́ji sín wɔ̌xúxú ɖɔhun, bɔ è nǎ zé gbɛtɔ́ sín mǐ xúxú dó ɖa ná ɖo mɛ bǐ nukún mɛ.”

¹³ Mawu Mavɔmavɔ lɛ́ ɖɔ: “Lě e Izlayɛ́li ví lɛ́ɛ ná ɖu nǔ e nyí suɖunú é gbɔn, ɖo to ɖěvo mɛ fí e un ná nya yě sɛ́ dó ɔ́ nɛ́.”

¹⁴ Ée Mawu ɖɔ mɔ̌ ɔ́, un sú xó bó ɖɔ: “Á! Aklúnɔ Mavɔmavɔ, un hɛn nyɛɖée blí kpɔ́n gbeɖé ǎ! Sín vǔ ce káká wá jɛ din ɔ́, un ɖu kanlin kúkú kpɔ́n ǎ, abǐ kanlin e gběkanlin ɖé hu ɔ́ kpɔ́n ǎ ; lan e nyí su nú mǐ lɛ́ɛ ɔ́, ɖěbǔ jɛ nu ce kpɔ́n ǎ.”

¹⁵ Mawu ka ɖɔ nú mì ɖɔ: “Éénɛ́, din ɔ́, a nǎ zé nyibúmí dó ɖyɔ́ gbɛtɔ́mí ɔ́ ná, lobo ɖa nǔɖuɖu towe ɖ'é jí.”

¹⁶ Mawu lɛ́ ɖɔ nú mì ɖɔ: “Hwɛ gbɛtɔ́ ɔ́, ɖǒtó mì: nǔɖuɖu sín kpasin e yě ɖǒ ɖo Jeluzalɛ́mu ɔ́, un ná hɛn bǐ gblé; nǔɖuɖu e yě ná nɔ́ ɖu kpó sin e yě ná nɔ́ nu gbe ɖokpó kpó ɔ́ ná ɖó jlɛ̌; énɛ́ ɔ́ ná zɔ́n bɔ yě ná ɖo adohu adohu jí.

¹⁷ Yě ná ba nǔɖuɖu kpó sin kpó, bó ná ba kpo; ɖě wa gbɔn ná hán yě; yě ná xú dó te ɖó hwɛ yětɔn lɛ́ɛ wú.”