Ezekiyɛ́li 30 - MAWUXÓWÉMA

¹ Mawu Mavɔmavɔ lɛ́ ɖɔ nú mì ɖɔ:

² Hwɛ gbɛtɔ́ e, ɖɔ xó e un ɖɔ nú we é. A nǎ ɖɔ: “Xó e Aklúnɔ Mavɔmavɔ ɖɔ é ɖíe; mi dó gbɛvíhan ɖɔ: Azǎn tɛ́ ɖíe! Azǎn nyanya tɛ́ ɖíe!

³ Azǎn ɔ́ kó sɛ yá bǐ kɛ́nnɛ́kɛ́nnɛ́; Azǎn Mawu Mavɔmavɔ tɔn ɔ́ kó ja. Azǎn énɛ́ gbe ɔ́, akpɔ́kpɔ́ ná ɖó gbɔn jǐnukúnsin ɔ́ bǐ; azǎn e gbe è nǎ ɖɔ hwɛ xá togun ɖě lɛ́ɛ é wɛ.

⁴ Ahwan ná dó nǔ sin ɖo Ejípu. Hwenu e è nǎ hu gbɛtɔ́ kɔn nyi kpɔ́ ɖo Ejípu ɔ́, hwenu e è nǎ bɛ́ nǔ yětɔn lɛ́ɛ bǐ ɔ́, hwenu e è nǎ gba to ɔ́ bǐ ɔ́, mɛ bǐ ná ɖo adohu adohu jí káká yi Etiopíi.

⁵ Etiopíinu lɛ́ɛ ná kú, Pútinu lɛ́ɛ ná kú, Lǔdinu lɛ́ɛ ná kú, to e jɛ akɔ xá yě lɛ́ɛ ɔ́, mɛ e ɖ'é mɛ lɛ́ɛ lɔ ná kú; Kúvu lɛ́ɛ ná kú, togun ce sín mɛ lɛ́ɛ lɔ ná kú ɖo ahwan ɔ́ mɛ.

⁶ Xó e nyɛ Mawu Mavɔmavɔ ɖɔ ɔ́ ɖíe: Bɛ́ sín Migidɔ́lu ɖo taligbé káká wá Siɛni ɖo afɔligbé ɔ́, è nǎ hu mɛ e nɔ nya xɛ ɖo Ejípu jí lɛ́ɛ bǐ ɖo ahwan ɔ́ mɛ, bɔ nǔ e wú Ejípu gán jɛ, bó nɔ́ ɖo go yí wɛ ɔ́ bǐ ná vívá. Xó e nyɛ Aklúnɔ Mavɔmavɔ ɖɔ ɔ́ nɛ́.

⁷ Ejípu to ɔ́ bǐ ná húzú gbětótló; toxo lɛ́ɛ bǐ ná húzú aglingbigba.

⁸ Hwenu e un ná dó Ejípu to ɔ́ zo, bó hu mɛ e nɔ nya xɛ ɖo Ejípu to ɔ́ jí lɛ́ɛ bǐ ɔ́, è nǎ tunwun ɖɔ nyɛ wɛ nyí Mawu Mavɔmavɔ.

⁹ Gbe e gbe un ná gba Ejípu to ɔ́ bǐ ɔ́, un ná sɛ́ mɛ dó Etiopíi, bɔ yě ná hɛn tɔjíhún bó ná yi gba ayi dó nú Etiopíinu lɛ́ɛ, bó ɖe jiɖiɖe vɔ́tɔ́ e ɖó wɛ yě ɖe ɔ́ síin, bɔ yě bǐ ná jɛ xɛsi jí. Azǎn énɛ́ ɔ́ ko ja.

¹⁰ “Xó e nyɛ Aklúnɔ Mavɔmavɔ lɛ́ ɖɔ é ɖíe: Nabukodonɔzɔ́ɔ Babilɔ́nu xɔ́sú ɔ́ wɛ un nǎ zɔ́n bɔ é ná hu gbɛtɔ́ wɔ̌buwɔ́bú e ɖo Ejípu lɛ́ɛ.

¹¹ É kpó mɛ e nyɔ́ dǎka xo ganjí ɖo akɔta tɔn mɛ lɛ́ɛ kpó ná wá gba to ɔ́ hánnyá. Yě ná hu Ejípunu lɛ́ɛ, bɔ cyɔ ná kpé toxo ɔ́ mɛ.

¹² Un ná ɖɔ bɔ Nilu kpó ala tɔn lɛ́ɛ kpó ná xú, bɔ un ná jó Ejípunu lɛ́ɛ nú mɛdídá lɛ́ɛ. Un ná zɔ́n toɖévomɛnu lɛ́ɛ bɔ yě ná gba to ɔ́, bó ná bɛ́ dɔkun e ɖo to ɔ́ mɛ lɛ́ɛ bǐ. Xó e nyɛ Mawu Mavɔmavɔ ɖɔ ɔ́ nɛ́.

¹³ “Xó e nyɛ Aklúnɔ Mavɔmavɔ lɛ́ ɖɔ é ɖíe: Un ná sú vodún tɔn lɛ́ɛ kún dó, un ná vívá kún nú bǒcyɔ tɔn e ɖo Mɛfísi lɛ́ɛ bǐ sésé. Mɛ ɖokpó sɔ́ ná ɖe, bó ná ɖu axɔ́sú ɖo Ejípu ǎ, bɔ un ná ɖó adohu nú Ejípu to ɔ́ bǐ.

¹⁴ Un ná gba Ejípu sín afɔligbé ɔ́, un ná dó Sowáan toxo ɔ́ zo, bó ná ɖó hwɛ nú Tɛ́bu toxo ɔ́.

¹⁵ Un ná dó nǔ sin xá Sínu toxo ɔ́ kpó xomɛsin kpó, ɖó é wɛ nyí ahohó e nɔ cyɔ́n alɔ Ejípu to ɔ́ jí é: un ná hu gbɛtɔ́ kɔn nyi só ɖo Tɛ́bu.

¹⁶ Un ná dó Ejípu to ɔ́ zo. Ahwi ná xo Sínunu lɛ́ɛ. È nǎ tɔ́n ali dó dǒ e è mɛ lɛ́ lɛ̌ dó Tɛ́bu toxo ɔ́ é mɛ; Mɛfísi toxo ɔ́, kéze ɖéɖé wɛ kɛntɔ́ lɛ́ɛ ná gba bó yí.

¹⁷ Dɔ̌nkpɛvú e ɖo Ɔnu toxo ɔ́ mɛ lɛ́ɛ kpó éé ɖo Pi-Bɛsɛ́ti toxo ɔ́ mɛ lɛ́ɛ kpó ná cí ahwan, bɔ ahwan ná wlí mɛ e kpo lɛ́ɛ yi to ɖěvo mɛ.

¹⁸ Zǎn ná kú kéze ɖo Tapanɛ́si gbe e gbe un ná gbídí acɛkpikpa Ejípu tɔn ɔ́ é, bɔ goyíyí tɔn ná nɔ te. Akpɔ́kpɔ́ ɖé ná cyɔ́n to ɔ́ bǐ, bɔ è nǎ wlí mɛ e ɖo gbě énɛ́ jí lɛ́ɛ yi to ɖěvo mɛ.

¹⁹ Un ná ɖó hwɛ nú Ejípu; énɛ́ ɔ́, yě ná tunwun ɖɔ nyɛ wɛ nyí Mawu Mavɔmavɔ.”

Axɔ́sú Babilɔ́nu tɔn wɛ nyí alǐnnyánú e Mawu sɔ́ dó gba Ejípu to ɔ́ é

²⁰ Ée ahwan wlǐ Izlayɛ́li ví lɛ́ɛ yi Babilɔ́nu ɔ́, xwe tɔn wǒ-ɖokpógɔ́ ɔ́ mɛ ɔ́, Mawu Mavɔmavɔ ɖɔ xó nú mì ɖo azǎn tɛ́nwegɔ́ ɔ́ e ɖo sun nukɔn tɔn ɔ́ mɛ é gbe; Mawu Mavɔmavɔ ɖɔ nú mì ɖɔ:

²¹ “Hwɛ gbɛtɔ́ e, un wɛ́n awa nú Ejípu xɔ́sú ɔ́. Bo ka kpɔ́n! Mɛ ɖé ɖe bó ná kpé nukún dó awa ɔ́ wú n'i ǎ. Mɛ ɖé ɖó nǔ mɛ n'i ǎ; mɛɖé blá n'i ǎ. Mɛ ɖé blá n'i bónú alɔ ná jɛ alɔ tɛnmɛ bónú é ná dó hɛn hwǐ ǎ.

²² Énɛ́ ɔ́ wú wɛ nyɛ Aklúnɔ Mavɔmavɔ ɖɔ: Un ná tɔ́n ahwan Ejípu xɔ́sú ɔ́; awa tɔn we lɛ́ɛ bǐ wɛ un ná wɛ́n; ée un ko wɛ́n ɖ'ayǐ é kɛ́ɖɛ́ wɛ ǎ; un ná wɛ́n ée kpo ɖo ganjí é lɔmɔ̌, bɔ hwǐ tɔn ná jɛ ayǐ.

²³ Énɛ́ ɔ́, un ná gba Ejípunu lɛ́ɛ dó kpé gbɔn akɔta ɖěvo ɖěvo lɛ́ɛ mɛ. Un ná gba yě dó gbɔn to lɛ́ɛ mɛ to lɛ́ɛ mɛ.

²⁴ Un ná dó hlɔ̌nhlɔ́n hlɔ̌nhlɔ́n jí nú axɔ́sú Babilɔ́nu tɔn, bó ná sɔ́ hwǐ nyɛ ɖésúnɔ tɔn dó así n'i, bɔ Ejípu xɔ́sú e un ko wɛ́n awa ná ɔ́ ná ɖo azɔn wɛn wɛ káká, bó ná kú ɖo kɛntɔ́ tɔn nukɔn.

²⁵ Mɔ̌ wɛ, Ejípu xɔ́sú ɔ́ sín awa lɛ́ɛ bǐ ná tɔ, bó ná sixú wa nǔɖé ǎ; un ka ná dó hlɔ̌nhlɔ́n awa mɛ nú Babilɔ́nu xɔ́sú ɔ́, bɔ é ná sɔ́ dó wa nǔ xá Ejípu. Énɛ́ ɔ́, yě ná tunwun ɖɔ nyi wɛ nyí Mawu Mavɔmavɔ.

²⁶ Un ná gba Ejípunu lɛ́ɛ dó gbɔn akɔta ɖěvo ɖěvo lɛ́ɛ mɛ. Un ná gba yě dó gbɔn to lɛ́ɛ mɛ to lɛ́ɛ mɛ. Énɛ́ ɔ́, yě ná tunwun ɖɔ nyɛ wɛ nyí Mawu Mavɔmavɔ.”