Ezekiyɛ́li 23 - MAWUXÓWÉMA

¹ Mawu Mavɔmavɔ ɖɔ nú mì ɖɔ:

² “Hwɛ gbɛtɔ́ e, ɖǒtó hwenuxó nyɔ̌nu we élɔ́ lɛ́ɛ tɔn; nɔ ɖokpó ɔ́ ví wɛ nú yě.

³ Hwenu e yě wínnyá é ɔ́, yě hun aga ɖo Ejípu fí e yě ɖe é. Fínɛ́ wɛ è lǐlí alɔ anɔ̌ yětɔn wú ɖe; fínɛ́ wɛ è gbǎ avɔ nú yě ɖe.

⁴ È nɔ ylɔ́ mɛxó ɔ́ ɖɔ Oxóla, bó nɔ́ ylɔ́ bɔd'é wú ɔ́ ɖɔ Oxoliba. Mɛxó ɔ́ wɛ nyí Samalíi, bɔ bɔd'é wú ɔ́ nyí Jeluzalɛ́mu; yě mɛ we lɛ́ɛ bǐ wɛ un da bɔ yě jǐ vǐ súnnu kpó nyɔ̌nu kpó nú mì.

⁵ Lo ɔ́, Oxóla ɔ́ ɖo asi ce nyí wɛ cóbó ká nɔ́ lɛ aga. É yí wǎn nú Asilíinu lɛ́ɛ bɔ é vɛ́ jlɛ́ bó sɔ́ yě dó ɖó xɔnnɔ.

⁶ Xɔnnɔ tɔn lɛ́ɛ ɔ́, awu vɔvɔ cɛ́cɛ́ wɛ yě nɔ́ dó, ɖó tokpɔngán wɛ yě nyí, hwɛɖɔtɔ́ wɛ nú yě. Dɔ̌nkpɛvú wɛ nú yě, yě nyɔ̌ ɖɛkpɛ ɖésú, bó nyɔ́ sɔ́ kun tawun.

⁷ Oxóla nɔ nyɔ́ ɖo azɔ̌watɔ́ ɖaxó ɖaxó Asilíinu énɛ́ lɛ́ɛ sí; nú yě ɖě jló e ɔ́, é nɔ yi sɛn vodún yětɔn lɛ́ɛ, bó nɔ́ hɛn éɖée blí.

⁸ Agalɛtɔ́ gbɛ e é zán ɖo Ejípu ɔ́, é jó dó ǎ. Hwenu e é ɖo ɖyɔ̌vǐ mɛ ɖo Ejípu ɔ́, Ejípunu lɛ́ɛ nɔ́ ɖó xó xá ɛ; yě nɔ́ hɛn anɔ̌ tɔn bó nɔ́ ɖó xó xá ɛ.

⁹ Énɛ́ ɔ́, un gbɔ bo jó e nú xɔnnɔ tɔn Asilíinu e é yí wǎn ná bɔ é vɛ́ jlɛ́ lɛ́ɛ.

¹⁰ Ée un jó e nú yě ɔ́, yě ɖe e nyi mɛ̌ bó wlí vǐ tɔn súnnu kpó nyɔ̌nu kpó. Énɛ́ ɔ́ gúdo ɔ́, yě sɔ́ hwǐ dó hu i, bó sɔ́ ɛ dó dó sɛ́n dó kplɔ́n nǔ nyɔ̌nu lɛ́ɛ, ɖó è dɔn nǔ e é wa ɔ́ sín tó n'i.”

Jeluzalɛ́mu dó afɔ gbě

¹¹ “Oxoliba mɔ nǔ e jɛ dó dadá tɔn Samalíi jí lɛ́ɛ bǐ có súnnu jló mɛ éyɛ́ tɔn ɔ́, é lɛ́ dó atɔ́ɔ́nnu jí; é hɛn éɖée blí hú dadá tɔn; aga e éyɛ́ lɛ ɔ́ lɛ́ hú aga e dadá tɔn lɛ é.

¹² Asilíi tokpɔngán lɛ́ɛ, Asilíi sín hwɛɖɔtɔ́ lɛ́ɛ kpó ahwanfuntɔ́ tɔn lɛ́ɛ kpó ɔ́, é yí wǎn nú yě bɔ é vɛ́ jlɛ́. Asilíinu énɛ́ lɛ́ɛ nɔ dó awu ɖagbe ɖagbe; dɔ̌nkpɛvú wɛ nú yě; yě nyɔ́ ɖɛkpɛ ɖésú bó nyɔ́ sɔ́ kun tawun.

¹³ É lɔmɔ̌ nɔ hɛn éɖée blí; é kpó dadá tɔn kpó bǐ wɛ sɔ́ ali ɖokpó ɔ́.

¹⁴ Amɔ̌, aga Oxoliba tɔn ɔ́ zɛ kpá. É su gbe ɖokpó, bɔ é mɔ bɔ è ɖe Babilɔ́nunu súnnu ɖé lɛ́ɛ dó dǒ wǔ, bó sá nǔ vɔvɔ dó.

¹⁵ Yě sin gǒjíblánú gbajagbaja ɖé lɛ́ɛ, bɔ tablá ɖagbe ɖagbe ɖé lɛ́ɛ ɖo ta yětɔn; ahwanfuntɔ́ Babilɔ́nu tɔn e nyɔ́ ahwan fun, bó ɖeji d'é wú lɛ́ɛ sín ɖiɖe wɛ. A mɔ yě lě ɔ́, a nǎ ɖɔ Babilɔ́nu ví jiji lɛ́ɛ wɛ.

¹⁶ Ée Oxoliba mɔ ɖiɖe yětɔn lě tlóló é ɔ́, súnnu Babilɔ́nu tɔn lɛ́ɛ jló e káká, bɔ é sɛ́ wɛn dó yě ɖo to yětɔn mɛ.

¹⁷ Énɛ́ ɔ́, Babilɔ́nunu lɛ́ɛ wá gɔ̌n tɔn, bó ɖó xó xá ɛ, bó hɛn ɛ blí. Ée yě ɖó xó xá ɛ, bó hɛn ɛ blí ɔ́, nǔ yětɔn jɛ wǔ tɔn vɛ́ jí.

¹⁸ É wa nǔ agalɛtɔ́ ɖɔhun; é jɛ mɛ̌ ɖo togun mɛ agbawungba; énɛ́ ɔ́, nǔ tɔn vɛ́ wǔ ce lě e dadá tɔn nú vɛ́ wǔ ce gbɔn é.

¹⁹ Lo ɔ́, é fɔ́n ɔ́, é nɔ́ ɖo aga te, bɔ énɛ́ nɔ́ flín mì lě e é lɛ aga gbɔn hwenu e é ɖo ɖyɔ̌vǐ mɛ ɖo Ejípu é.

²⁰ Ɖo Ejípu dɔ̌n ɔ́, súnnu e nɔ zán gbɛ kanlin ɖɔhun lɛ́ɛ wɛ é yí wǎn ná bó nɔ́ ba; kanlin ɖɔhun wɛ súnnu énɛ́ lɛ́ɛ nɔ́ ba nyɔ̌nu. È nǎ ɖɔ lɔ ɔ́, mɛ énɛ́ lɛ́ɛ nyí gbɛtɔ́ ǎ, tócí abǐ sɔ́ wɛ nú yě.”

Mawu ná dɔn tó nú Jeluzalɛ́mu

²¹ “Oxoliba, a jló ná lɛ́ zán gbɛ e a zǎn hwenu e a ɖo ɖyɔ̌vǐ mɛ ɖo Ejípu, bɔ Ejípunu lɛ́ɛ nɔ hɛn anɔ̌ towe bó nɔ́ lílí alɔ wú, bó nɔ́ ɖó xó xá we é.

²² Énɛ́ ɔ́ wú wɛ nyɛ Aklúnɔ Mavɔmavɔ ɖo ɖiɖɔ nú we wɛ ɖɔ: Oxoliba, un ná fɔ́n xɔnnɔ towe lɛ́ɛ dó jǐ towe; yě mɛ e a gbɛ́ wǎn ná din lɛ́ɛ ɔ́, un ná kplá yě sín fí bǐ, bɔ yě ná xísí dó we.

²³ Babilɔ́nunu lɛ́ɛ, Kaludéenu lɛ́ɛ bǐ, Pekɔ́dinu lɛ́ɛ, Coanu lɛ́ɛ kpó Koanu lɛ́ɛ kpó Asilíinu lɛ́ɛ bǐ kpó; yě dɔ̌nkpɛvú ɖagbe ɖagbe tokpɔngán lɛ́ɛ, hwɛɖɔtɔ́ lɛ́ɛ, ahwangán nukúnɖéjí lɛ́ɛ, azɔ̌watɔ́ nukúnɖéjí lɛ́ɛ; yě mɛ énɛ́ lɛ́ɛ e nyɔ́ sɔ́ kun ganjí lɛ́ɛ.

²⁴ Yě ná bɛ̌ ahwanfunnú yětɔn lɛ́ɛ bó wá tɔ́n ahwan we; yě ná hɛn ahwankɛkɛ́ví, ahwanhún tɛnmɛ tɛnmɛ; ahwanfuntɔ́ yětɔn lɛ́ɛ ná hɛn gǎglónú ɖaxó kpó kpɛví kpó, bó ná xwe ahwangbákún. Xɔnnɔ towe lɛ́ɛ ná xá we kpó ahwanfuntɔ́ énɛ́ lɛ́ɛ kpó. Un ná ná acɛ yě bɔ yě ná ɖɔ hwɛ xá we; sɛ́n yě ɖésúnɔ tɔn wɛ yě ná dó ɖɔ hwɛ xá we.

²⁵ Oxoliba, un sin xomɛ dó we, ɖó asi ce wɛ a nyǐ bó ká ɖo aga lɛ wɛ; énɛ́ wú wɛ yě ná kpa awɔntín towe, bó kpa tó towe, bó hu hwi ɖésúnɔ ɔ́ ɖó hwǐ wú. Yě ná wlí vǐ towe súnnu kpó nyɔ̌nu kpó. Yě mɛ e ná kpo lɛ́ɛ ɔ́, è nǎ dó yě zo.

²⁶ Yě ná fɔ avɔ towe kpó sikánú towe lɛ́ɛ bǐ kpó.

²⁷ Un wa mɔ̌ xá we ɔ́, nǔ blíblí e wa wɛ a ɖe lɛ́ɛ, kpó aga e a bɛ̌ lilɛ sín Ejípu ɔ́ kpó ɔ́, un ná ɖó bǐ te. Énɛ́ ɔ́, súnnu ɖě sɔ́ ná jló we ǎ, a ka sɔ́ ná flín Ejípunu lɛ́ɛ ɖě ǎ.

²⁸ “Ɖó xó e ɖɔ wɛ nyɛ Aklúnɔ Mavɔmavɔ ɖe ɔ́ ɖíe: Un ná jó we nú mɛ e a gbɛ̌ wǎn ná lɛ́ɛ, mɛ e sín xó a ma sɔ́ ba ǎ lɛ́ɛ.

²⁹ Mɛnúvɛ́mɛwú sín nǔ wɛ yě ná wa xá we. Yě ná bɛ́ nǔ e a jɛ dɛ̌n bó wá lɛ́ɛ bǐ, bó ná jó we dó nyi mɛ̌ jɔgbe, bó ná dó winnyá we ɖo togun mɛ agbawungba; nǔ blíblí e a wa lɛ́ɛ, aga e a hun ɔ́ kpó hɛ̌nnú e a wa lɛ́ɛ kpó

³⁰ wɛ ɖó we mɔ̌. A lɛ aga xá to ɖěvo mɛ nu lɛ́ɛ; a sɛn vodún yětɔn lɛ́ɛ, bó hɛn hwiɖée blí.

³¹ Dadá towe sín afɔdo mɛ wɛ a tɛ afɔ; énɛ́ wútu ɔ́, xomɛsin ce e un kpé nú dadá towe ahan ɖɔhun ɔ́, un ná kpé nú hwi lɔmɔ̌.

³² Nǔ e ɖɔ nú we wɛ nyɛ Aklúnɔ Mavɔmavɔ ɖe ɔ́ ɖíe; ɖǒtó: Kɔ́fu e mɛ dadá towe nu xomɛsin ce ɖe ahan ɖɔhun ɔ́, hwi lɔ ná nu xomɛsin ce ɖo kɔ́fu ɖokpó ɔ́ mɛ; kɔ́fu ɖaxó hotohoto ɖé wɛ bó gɔ́ bǐ. Mɛ ɖé mɔ kɔ́fu ɔ́, è nǎ nɔ ko we, è nǎ nɔ́ gbɔ́ aca ta towe, ɖó kɔ́fu ɔ́ d'agba dín.

³³ Wǔvɛ́ e a nǎ mɔ ɔ́ ná mú we ahan ɖɔhun; nǔhɛngblé kɔ́fu wɛ, wǔblánɔnú kɔ́fu wɛ; kɔ́fu e dadá towe Samalíi nu ɔ́ wɛ.

³⁴ A nǎ nu kɔ́fu ɔ́ káká dó azan, a nǎ nu káká bó gba kɔ́fu ɔ́, a nǎ sɔ́ aɖǔ towe dó gba kɔ́fu ɔ́, bó ná sɔ́ xwɛ tɔn tlɛ́n anɔ̌ ta. Xó e nyɛ Aklúnɔ Mavɔmavɔ ɖɔ ɔ́ nɛ́.

³⁵ Énɛ́ ɔ́ wú wɛ nyɛ Aklúnɔ Mavɔmavɔ ɖo ɖiɖɔ wɛ ɖɔ: Ɖó a wɔn mì bó jó mì dó wútu ɔ́, è nǎ dɔn tó nú hwi lɔ ɖó aga e a lɛ lɛ́ɛ kpó nǔ blíblí e a wa lɛ́ɛ kpó wú.”

Mawu ɖó hwɛ nú Samalíi kpó Jeluzalɛ́mu kpó

³⁶ Mawu Mavɔmavɔ ɖɔ nú mì ɖɔ: “Hwɛ gbɛtɔ́ e, sɔ́ nǔ bó ná yi ɖɔ hwɛ xá Oxóla kpó Oxoliba kpó. Ɖɔ nǔ baɖabaɖa e yě dó sin lɛ́ɛ.

³⁷ Yě bǐ wɛ dó afɔ gbě; gbɛtɔ́ kanjɔ ɖo alɔ yětɔn; yě sɛn vodún; aga lɛ xá vodún lɛ́ɛ wɛ yě ɖe, yě hu vǐ súnnu e yě ji nú mì lɛ́ɛ dó vodún.

³⁸ Nǔ e yě dó sin gbe nɛ́ gbe ɔ́ lɛ́ hú mɔ̌; yě mɛ we lɛ́ɛ ɖu su nú sinsɛnxɔ ce, bó ɖu su nú gbɔjɛzán ce.

³⁹ Nǔgbó ɔ́, hwenu e yě ɖo vǐ yětɔn súnnu lɛ́ɛ hu dó vodún yětɔn wɛ ɔ́, yě byɔ́ xwé ce gbe gbe ɖokpó ɔ́, bó ɖu su nú xwé ce. Nǔ e yě dó sin ɖo sinsɛnxɔ ce mɛ ɔ́ nɛ́.

⁴⁰ Hú mɔ̌ ɔ́, yě sɛ́ wɛn dó súnnu ɖěvo lɛ́ɛ ɖo to ɖěvo mɛ ɖɔ yě ní wá. Ée súnnu lɛ́ɛ se wɛn yětɔn lě tlóló ɔ́, yě wǎ gɔ̌n yětɔn; Oxóla kpó Oxoliba kpó ba acɔ́ ɖ'ayǐ nú súnnu lɛ́ɛ; yě lɛ wǔ ganjí bó sá nǔ dó wundama bó dó sikánú tɛnmɛ tɛnmɛ.

⁴¹ Énɛ́ ɔ́ gúdo ɔ́, yě mlɔ́ ayǐ wɛn ɖo zan ɖagbe ɖagbe jí, bó sɔ́ távo ɖokpó ɖó zan ɔ́ nukɔn, bó bɛ́ zǎlínkpɔ́n kpó ami wǎnɖagbenɔ e nyí ce lɛ́ɛ kpó ɖ'é jí.

⁴² Mɛ e wá lɛ́ɛ sukpɔ́; è ɖo xósúsú yětɔn se wɛ, mɛ e ma ɖo nǔɖé lin wɛ ǎ lɛ́ɛ ɖo xó sú wɛ ɖɔhun. È dǒ wɛn sɛ́ dó Sabenyɛ́ɛ lɛ́ɛ bɔ yě gosín akúgbéjí bó wá. Yě sɔ́ alɔgan dó alɔ nú nɔví nɔví we lɛ́ɛ, bó xwe jɛ̌gbákún nú yě.

⁴³ Énɛ́ ɔ́, un kanbyɔ́ nyiɖée ɖɔ: ‘Mɛ e ko lɛ aga káká, bɔ anyǔ tɔn bǐ kó wló mɔ̌ é ɔ́, é ná lɛ́ kpo ɖo aga lɛ wɛ a?

⁴⁴ Súnnu ná kpo ɖo gɔ̌n tɔn wá wɛ mɛ dó avɔ xɔnu ɖɔhun a? Mɔ̌ wɛ súnnu ká kpo ɖo Oxóla kpó Oxoliba kpó gɔ́n wá wɛ mɛ e hun aga é ɖɔhun.’

⁴⁵ Amɔ̌, gbɛtɔ́ hwɛjijɔnɔ lɛ́ɛ ná ɖɔ hwɛ xá nyɔ̌nu we énɛ́ lɛ́ɛ, lě e è nɔ ɖɔ hwɛ xá mɛ e dó afɔ gbě é kpó mɛ e hu mɛ é kpó é ɖɔhun. Ɖó yě dǒ afɔ gbě; gbɛtɔ́ kanjɔ ɖo alɔ yětɔn.

⁴⁶ “Nǔ e nyɛ Aklúnɔ Mavɔmavɔ ɖɔ ɔ́ ɖíe: Mi kplé ahwan wɔ̌buwɔ́bú dó yě wú; è nǐ dó xɛsi ɖaxó ɖé yě; è nǐ bɛ̌ nǔ yětɔn lɛ́ɛ bǐ.

⁴⁷ Hwenu e mɛ bǐ ná kplé dó yě ɔ́, mi nyi hwǎn dó yě, mi já yě ɖó hwǐ wú; mi hu vǐ yětɔn súnnu kpó nyɔ̌nu kpó; mi dó xwé yětɔn lɛ́ɛ zo.

⁴⁸ Énɛ́ ɔ́, un ná ɖó nǔ kwíji kwíji e wa wɛ è ɖe ɖo to ɔ́ mɛ lɛ́ɛ te. É ná kplɔ́n nǔ nyɔ̌nu e ɖo to ɔ́ mɛ lɛ́ɛ, bɔ yě ɖě ná wá nǔ nyɔ̌nu we énɛ́ lɛ́ɛ ɖɔhun ǎ.

⁴⁹ Nǔ kwíji kwíji e wa wɛ Oxóla kpó Oxoliba kpó ɖe lɛ́ɛ ɔ́, yě ná sún sin tɔn. Nǔ e vodún e sɛn wɛ yě ɖe ɔ́ ji ɔ́, yě ná kpan. Énɛ́ ɔ́, mi ná tunwun ɖɔ nyɛ wɛ nyí Aklúnɔ Mavɔmavɔ.”