Ezekiyɛ́li 20 - MAWUXÓWÉMA

¹ Ahwan wlí mǐ Izlayɛ́li ví lɛ́ɛ yi Babilɔ́nu ɔ́, é ɖo xwe tɛ́nwe bló wɛ; sun atɔ́ɔ́ngɔ́ e ɖo xwe énɛ́ ɔ́ mɛ ɔ́ sín azǎn wǒgɔ́ ɔ́ gbé ɔ́; tomɛxó Izlayɛ́li tɔn ɖé lɛ́ɛ wá jínjɔ́n ayǐ gɔ̌n ce ɖo Babilɔ́nu dɔ̌n, bó kan nǔ byɔ́ Mawu Mavɔmavɔ.

² Énɛ́ ɔ́, Mawu Mavɔmavɔ ɖɔ nú mì ɖɔ:

³ “Hwɛ gbɛtɔ́ e, ɖɔ nú tomɛxó Izlayɛ́li tɔn lɛ́ɛ ɖɔ: Nyɛ Aklúnɔ Mavɔmavɔ ɖɔ: É má nyí nǔ kanbyɔ́ mì gbé wɛ mi tɔ́n a? Un xwlé nyiɖée nú mi, un sixú jó mi dó nú mi kan nǔ byɔ́ mì ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.

⁴ “Hwɛ gbɛtɔ́ e, ɖo gbesisɔ mɛ bó ná ɖɔ hwɛ yětɔn; ma xo kpɔ́n ó. Ɖɔ nǔ baɖabaɖa e tɔ́gbó yětɔn lɛ́ɛ dó sin lɛ́ɛ nú yě.

⁵ Ɖɔ nú yě ɖɔ: Xó e nyɛ Aklúnɔ Mavɔmavɔ ɖɔ nú tɔ́gbó yětɔn lɛ́ɛ ɔ́ ɖíe: hwenu e un sɔ́ Izlayɛ́li togun Jakɔ́bu ví lɛ́ɛ ɔ́, un zin alɔ dó akɔ́n nú yě bǐ, bó ɖe nyiɖée xlɛ́ yě ɖo Ejípu. Un zin alɔ dó akɔn nú yě ɖɔ nyɛ wɛ nyí Mawu Mavɔmavɔ, Mawu yětɔn.

⁶ Hwenɛ́nu ɔ́, un dó akpá nú yě ɖɔ un ná ɖe yě tɔ́n sín Ejípu, bó kplá yě yi to e un ko ba do ná ɖ'ayǐ ɔ́ mɛ; anɔ̌sin kpó wǐin kpó nɔ́ sa tɔ ɖo to ɔ́ mɛ. To ɔ́ nyɔ́ ɖɛkpɛ hú to lɛ́ɛ bǐ.

⁷ Un ka ɖɔ nú yě ɖɔ: ‘Mi jó nǔmɛsɛn lɛ́ɛ dó, mi jó nǔ baɖabaɖa énɛ́ lɛ́ɛ dó; mi ma sɔ́ sɛn vodún ɖě ó, mi ma sɛn vodún Ejípu tɔn lɛ́ɛ bó hɛn miɖée blí ó. Nyɛ wɛ nyí Mawu Mavɔmavɔ, Mawu mitɔn.’

⁸ “Lo ɔ́, tɔ́gbó mitɔn lɛ́ɛ fɔ́n gǔ dó jǐ ce; yě jló ná ɖótó mì ǎ; mɛ ɖěbǔ ɖo yě mɛ bó jó nǔmɛsɛn dó ǎ; yě ɖě jó nǔ baɖabaɖa énɛ́ lɛ́ɛ e nɔ́ dɔn yě lɛ́ɛ dó ǎ; yě jó Ejípu vodún lɛ́ɛ dó ǎ. Énɛ́ ɔ́, un tunwun ɖɔ un ná ɖe adǎn e jí un ɖe ɔ́ xlɛ́ yě; un ná ɖe xomɛsin e jí un ɖe ɔ́ xlɛ́ yě ɖo Ejípu bɔ é ná jɛ mɛ nú mì.

⁹ Un ka kpɔ́n dó nyǐkɔ ce wú, bó sɔ́ wa nǔ xá Izlayɛ́li togun ɔ́ gbɔn mɔ̌ ǎ; é má nyí mɔ̌ ǎ ɔ́, togun e mɛ yě ɖe lɛ́ɛ táá wá hu tɛ́ nú mì. Ɖó togun énɛ́ lɛ́ɛ tunwun ɖɔ un sɔ́ nyiɖée xlɛ́ Izlayɛ́li togun ɔ́, bó ná ɖe yě tɔ́n sín Ejípu wɛ.

¹⁰ Nǔgbó ɔ́, un ɖe yě tɔ́n sín Ejípu, bó kplá yě yi gbětótló mɛ.

¹¹ Un ná sɛ́n ce lɛ́ɛ yě, bó ɖɔ nǔ e un zɔ́n lɛ́ɛ nú yě, bónú mɛɖé bló ɖ'é jí ɔ́, mɛ ɔ́ ná nɔ gbɛ.

¹² Un ɖó gbɔjɛzán ayǐ, bɔ é nyí wuntun ɖé bó ɖe xlɛ́ yě ɖɔ nyɛ Aklúnɔ Mavɔmavɔ ɔ́, un sɔ́ yě ɖó vo nú nyiɖée.

¹³ Lo ɔ́, yě fɔ́n gǔ dó jǐ ce ɖo gbětótló mɛ. Yě nɔ́ dó vɛ̌ nú sɛ́n ce lɛ́ɛ kpó nǔ e un zɔ́n bɔ mɛ ɖé xwedó ɔ́, mɛ ɔ́ ná nɔ gbɛ lɛ́ɛ kpó. Yě ɖu su nú gbɔjɛzán ɔ́ hwebǐnu lě e é jló yě gbɔn é; énɛ́ ɔ́, un lin ɖɔ un ná ɖe xomɛsin ce xlɛ́ yě ɖo gbětótló ɔ́ mɛ, bó ná sú kún yětɔn dó.

¹⁴ Un ka kpɔ́n dó nyǐkɔ ce wú, bó sɔ́ wa nǔ xá Izlayɛ́li togun ɔ́ gbɔn mɔ̌ ǎ, bónú togun e mɔ mì bɔ un kplá Izlayɛ́li ví lɛ́ɛ sín Ejípu ɔ́ má hu tɛ́ nú mì ó.

¹⁵ Amɔ̌, un ɖɔ nú yě ɖo gbětótló ɔ́ mɛ dɔ̌n ɖɔ un kún sɔ́ ná kplá yě yi to e mɛ anɔ̌sin kpó wǐin kpó nɔ́ sa tɔ ɖe, bɔ un dó akpá tɔn nú yě ɔ́ mɛ ó; to e nyɔ́ ɖɛkpɛ hú to lɛ́ɛ bǐ ɔ́ wɛ.

¹⁶ Un ɖɔ bó xwlé nǔ d'é jí, ɖó yě nɔ gbejí nú sɛ́n ce lɛ́ɛ ǎ; yě xwedó nǔ e un zɔ́n yě lɛ́ɛ ǎ; yě nyi gbɔjɛzánsɛ́n ɔ́ ǎ; vodún yětɔn lɛ́ɛ jɛ́n nyí nǔ e myá nukún nú yě ɔ́.

¹⁷ Nǔ yětɔn ká blá wǔ nú mì bɔ un sɔ́ hu yě ǎ, un sɔ́ sú kún yětɔn dó ɖo gbětótló ɔ́ mɛ ǎ.”

Izlayɛ́li ví lɛ́ɛ gɔn Mawusɛ́n ɔ́ gba gbeɖé ǎ

¹⁸ “Tɔ́gbó mitɔn lɛ́ɛ ɔ́, un ɖɔ nú vǐ yětɔn lɛ́ɛ ɖo gbětótló ɔ́ mɛ ɖɔ: ‘Mi ma nyi sɛ́n tɔ́ mitɔn lɛ́ɛ tɔn ó, mi ma xwedó nǔ e yě zɔ́n mi lɛ́ɛ ó, mi ma sɛn vodún yětɔn lɛ́ɛ bó dó hɛn miɖée blí ó.

¹⁹ Nyɛ wɛ nyí Mawu Mavɔmavɔ, Mawu mitɔn; mi xwedó sɛ́n ce lɛ́ɛ, mi bló nǔ e un zɔ́n lɛ́ɛ.

²⁰ Mi zé gbɔjɛzán ɔ́ ɖó vo nú mì, bónú é ná nyí wuntun ɖé ɖo nyɛ kpó mi kpó tɛ́ntin, bónú mi ná tunwun ɖɔ nyɛ wɛ nyí Mawu Mavɔmavɔ, Mawu mitɔn.’

²¹ Lo ɔ́, vǐ yětɔn énɛ́ lɛ́ɛ lɔ fɔ́n gǔ dó jǐ ce; yě nyi sɛ́n ce lɛ́ɛ ǎ; yě bló nǔ e zɔ́n lɛ́ɛ ǎ; sɛ́n énɛ́ lɛ́ɛ wɛ gbɛtɔ́ ká ɖó ná nyi bó ná nɔ gbɛ. Yě lɛ́ nyi gbɔjɛzánsɛ́n ɔ́ ǎ. Énɛ́ ɔ́, un tunwun ɖɔ un ná ɖe adǎn e jí un ɖe ɔ́ xlɛ́ yě; un ná ɖe xomɛsin e jí un ɖe ɔ́ xlɛ́ yě ɖo gbětótló ɔ́ mɛ bɔ é ná jɛ mɛ nú mì.

²² Un ka kpɔ́n dó nyǐkɔ ce wú, bó sɔ́ wa nǔ xá yě lě e un ɖó ná wa nǔ xá yě gbɔn é ǎ, bónú togun e mɛ yě ɖe lɛ́ɛ má hu tɛ́ nú mì ó. Ɖó togun énɛ́ lɛ́ɛ tunwun ɖɔ un ɖe tɔ́gbó mitɔn lɛ́ɛ tɔ́n sín Ejípu.

²³ Lo ɔ́, un ko gblɔ́n adǎn nú yě ɖo gbětótló mɛ bó xwlé nǔ d'é jí ɖɔ un ná gba yě dó kpé akɔta lɛ́ɛ bǐ mɛ, bó fúnfún yě gbɔn to ɖěvo mɛ to ɖěvo mɛ,

²⁴ ɖó yě nyi sɛ́n ce lɛ́ɛ ǎ; yě xwedó nǔ e un zɔ́n lɛ́ɛ ǎ. Yě nyi gbɔjɛzánsɛ́n ɔ́ ǎ, tɔ́gbó yětɔn lɛ́ɛ sín vodún wɛ nyí nǔ e myá nukún nú yě ɔ́.

²⁵ Énɛ́ ɔ́ wú wɛ un ná sɛ́n e má ná wa ɖagbe nú yě ǎ lɛ́ɛ yě, bó zɔ́n nǔ e yě xwedó ɔ́, yě ma sixú nɔ gbɛ ǎ lɛ́ɛ yě.

²⁶ Un jó yě dó bɔ yě ɖu su: yě nɔ́ yi dó nukɔngbéví yětɔn súnnu lɛ́ɛ zo dó sá vɔ̌. Un jló bónú nǔ e dó sin wɛ yě ɖe ɔ́ ná ɖó adohu nú yě; énɛ́ ɔ́, yě ná tunwun ɖɔ nyɛ wɛ nyí Mawu Mavɔmavɔ.”

Mawu ná ɖó vodúnsinsɛn Izlayɛ́li ví lɛ́ɛ tɔn te

²⁷ Mawu ɖɔ nú mì ɖɔ: “Hwɛ gbɛtɔ́ e, ɖɔ nú Izlayɛ́li togun ɔ́ ɖɔ nyɛ Aklúnɔ Mavɔmavɔ ɖo ɖiɖɔ nú yě wɛ ɖɔ: Lě e tɔ́gbó mitɔn lɛ́ɛ lɔ jɛ agɔ dó mì, bó má nɔ gbejí nú mì ǎ gbɔn é ɖíe:

²⁸ Un kplá yě yi to e sín akpá un dó nú yě ɔ́ mɛ. Ée yě jɛ dɔ̌n ɔ́, yě mɔ só ɖé abǐ atín ɖé nú é dó ama ɔ́, yě nɔ́ ná nǔɖuɖu vodún yětɔn lɛ́ɛ ɖo fínɛ́, bó nɔ́ dó nǔ wǎnɖagbenɔ zo nú yě, lobo nɔ ba ahan nú yě ɖo fínɛ́, bó nɔ́ dó xomɛsin nú mì.

²⁹ Énɛ́ ɔ́, un kanbyɔ́ yě ɖɔ: ‘Étɛ́ ba wɛ mi ka nɔ ɖe gbɔn só jí só jí?’ Bɔ bɛ́ sín hwenɛ́nu ɔ́, è nɔ ylɔ́ tɛn énɛ́ lɛ́ɛ mɛ ɖɔ vodún xwé e gbɔn só jí só jí lɛ́ɛ.

³⁰ Hǔn din ɔ́, ɖɔ nú Izlayɛ́li togun ɔ́ ɖɔ nyɛ Aklúnɔ Mavɔmavɔ ɖɔ: Mi ma ɖo miɖée hɛn blí wɛ tɔ́gbó mitɔn lɛ́ɛ ɖɔhun a? Mi ma ɖo vodún yětɔn lɛ́ɛ sɛn wɛ a?

³¹ Izlayɛ́li togun e mi, ée mi ɖo nǔɖuɖu ná vodún mitɔn lɛ́ɛ wɛ, bó ɖo vǐ mitɔn lɛ́ɛ dó zo dó sá vɔ̌ nú yě wɛ, bó dó ɖo miɖée hɛn blí wɛ ɔ́, mi vɛdó ɖɔ nú mi wá kan nǔ byɔ́ mì ɔ́, un ná yí gbe nú mi wɛ sín a? Gbeɖé kpɔ́n. Nyɛ Aklúnɔ Mavɔmavɔ ɔ́, un xwlé nyiɖée nú mi, un ná lɔn nú mi ǎ. Xó e nyɛ Aklúnɔ Mavɔmavɔ ɖɔ ɔ́ nɛ́.

³² Mi nɔ ɖɔ: Mǐ jló ná cí togun ɖě lɛ́ɛ ɖɔhun, mǐ ná cí akɔta e ɖo to ɖěvo mɛ lɛ́ɛ ɖɔhun, mǐ lɔ ná nɔ́ ɖo atín sɛn wɛ, bó ná nɔ́ ɖo awǐnnya sɛn wɛ; lo ɔ́, nǔ e lin wɛ mi ɖe ɔ́ ná jɛ gbeɖé ǎ.

³³ Nyɛ Aklúnɔ Mavɔmavɔ ɔ́, un xwlé nyiɖée nú mi ɖɔ: Acɛkpikpa kpó hlɔ̌nhlɔ́n kpó adǎn kpó wɛ un ná dó kpa acɛ nú mi.

³⁴ Mɔ̌ ɖokpó ɔ́, un ná sɔ́ acɛkpikpa kpó hlɔ̌nhlɔ́n kpó adǎn kpó dó kplé mi sín to ɖěvo ɖěvo e mɛ mi gba kpé gbɔn lɛ́ɛ.

³⁵ Un ná kplá mi yi ɖó vo nú akɔta ɖě lɛ́ɛ ɖo gbětótló mɛ, bó ná húzú kpan nukɔn mi bó ɖɔ hwɛ xá mi.

³⁶ Un ná ɖó hwɛ nú mi lě e un ɖó hwɛ nú tɔ́gbó mitɔn lɛ́ɛ gbɔn ɖo gbětótló Ejípu tɔn mɛ é. Xó e nyɛ Aklúnɔ Mavɔmavɔ ɖɔ é nɛ́.

³⁷ Un ná xa mi kpɔ́n lě e gbɔ̌nyitɔ́ nɔ́ xa gbɔ̌ tɔn lɛ́ɛ kpɔ́n gbɔn é; un ná hɛn mi syɛ́nsyɛ́n, bɔ mi ná nɔ gbejí nú akɔ e mǐ jɛ é.

³⁸ Un ná ɖe mɛ e fɔ́n gǔ dó jǐ ce ɖo mi mɛ lɛ́ɛ kpó mɛ e jɛ agɔ dó mì lɛ́ɛ kpó sín mi mɛ. Un ná ɖe yě sín to ɖěvo ɖěvo e mɛ yě ɖe din lɛ́ɛ mɛ; amɔ̌, yě sɔ́ ná yi Izlayɛ́li yíkúngban ɔ́ jí ǎ. Énɛ́ ɔ́, mi ná tunwun ɖɔ nyɛ wɛ nyi Mawu Mavɔmavɔ.

³⁹ Izlayɛ́li togun e mi, xó e ɖɔ nú mi wɛ nyɛ Aklúnɔ Mavɔmavɔ ɖe ɔ́ ɖíe: É jló mi hǔn mɛ ɖokpó ɖokpó ní ɖo vodún tɔn lɛ́ɛ sɛn wɛ. Amɔ̌, é wá yá ɔ́, mǐ ná kpɔ́n ɖɔ mi ná sixú kpo ɖo gbǐgbɛ́ wɛ ɖɔ émí kún ná se tónú nú mì ó a jí; mǐ nǎ kpɔ́n ɖɔ mi ná kpo ɖo nǔɖuɖu ná vodún mitɔn lɛ́ɛ wɛ, bó ná ɖo nyǐkɔ nyɛ mɛ mímɛ́ ɔ́ tɔn dó xo kɔ́ wɛ a jí.

⁴⁰ Ɖó só mímɛ́ ce jí, só ɖaxó e ɖo Izlayɛ́li e jí wɛ Izlayɛ́li to ɔ́ bǐ ná wá sɛn mì ɖe; fínɛ́ wɛ mi mɛ e ná ɖo Izlayɛ́li lɛ́ɛ ná wá sɛn mì ɖe. Xó e nyɛ Aklúnɔ Mavɔmavɔ ɖɔ é nɛ́. Un ná yí mi kpó xomɛ kpó ɖo fínɛ́. Un ná ɖo te kpɔ́n ɖɔ mi ná hɛn nǔ e nyɔ́ hú nǔ bǐ ɖo nǔ e ɖo mi sí lɛ́ɛ mɛ lɛ́ɛ wá nú mì ɖo fínɛ́, bó ná ɖo te kpɔ́n nǔ e mi ná hɛn dó wá sá vɔ̌ nú mì lɛ́ɛ bǐ ɖo fínɛ́. Un ná yí nǔníná mitɔn lɛ́ɛ, kpó nǔ e nyɔ́ hú nǔ bǐ ɖo nǔ e mi wá xwlé mì lɛ́ɛ mɛ lɛ́ɛ kpó.

⁴¹ Lě e un ko ɖɔ gbɔn ɔ́, un ná ɖe mi sín akɔta ɖěvo ɖěvo lɛ́ɛ mɛ, bó ná ɖe mi sín to ɖěvo ɖěvo e mɛ è gba mi dó kpé gbɔn lɛ́ɛ bǐ mɛ, bó ná kplé mi ɖó fí. Énɛ́ ɔ́ gúdo ɔ́, un ná yí vɔ̌ wǎnɖagbenɔ e mi ná nɔ́ sá nú mì lɛ́ɛ kpó xomɛnyínyɔ́ kpó. Un wa nǔ gbɔn mɔ̌ nú mi ɔ́, un ná ɖe xlɛ́ akɔta ɖě lɛ́ɛ bǐ ɖɔ nyɛ nyí Mawu mɛ mímɛ́ ɔ́.

⁴² Un ná kplá mi yi Izlayɛ́li, to e un ɖɔ un ná ná tɔ́gbó mitɔn lɛ́ɛ, bó xwlé nǔ d'é jí ɔ́ mɛ; hwenɛ́nu ɔ́, mi ná tunwun ɖɔ un nyí Mawu Mavɔmavɔ.

⁴³ Énɛ́ ɔ́, mi ná flín gbɛ e mi ko zán ɖ'ayǐ ɔ́, kpó walɔ nyanya e hɛn mi blí lɛ́ɛ kpó. Nǔ nyanya énɛ́ lɛ́ɛ e mi dó sin lɛ́ɛ ná zɔ́n bɔ mi ɖésúnɔ sín nǔ ná nɔ́ vɛ́ mi ɖésúnɔ wú.

⁴⁴ Un ná kpɔ́n dó gbɛ nyanya e mi Izlayɛ́li ví lɛ́ɛ zán ɔ́ kpó walɔ mitɔn blíblí lɛ́ɛ kpó wú dó wa nǔ xá mi ǎ. Lo ɔ́, nyǐkɔ ce wú wɛ un ná kpɔ́n dó, dó wa nǔ xá mi. Énɛ́ ɔ́, mi bǐ ná tunwun ɖɔ nyɛ wɛ nyí Mawu Mavɔmavɔ. Xó e nyɛ Aklúnɔ Mavɔmavɔ ɖɔ ɔ́ nɛ́.”