Ezekiyɛ́li 2 - MAWUXÓWÉMA

¹ Mɛ e ɖo xó ɖɔ wɛ ɔ́ ɖɔ nú mì ɖɔ: “Hwi gbɛtɔ́ ɔ́ , sí te bó nɔ te, un ɖó xó ɖé bó ná ɖɔ nú we.”

² Ée mɛ ɔ́ ɖɔ mɔ̌ nú mì tlóló ɔ́, yɛ Mawu tɔn wá jǐ ce, bó zé mì sí te, bɔ un jɛ tó ɖó mɛ e ɖo xó ɖɔ nú mì wɛ é jí.

³ Énɛ́ ɔ́, mɛ ɔ́ ɖɔ nú mì ɖɔ: “Hwi gbɛtɔ́, un sɛ́ we dó Izlayɛ́li ví lɛ́ɛ gɔ́n; yě fɔ́n gǔ dó jǐ ce, yě se tónú ǎ; yě kpó tɔ́gbó yětɔn lɛ́ɛ kpó fɔ́n gǔ dó jǐ ce, bó kpo ɖo mɔ̌ káká jɛ égbé.

⁴ Vǐ ɖé wɛ yě nyí, bó nɔ́ se tónú ǎ; yě gbɛ́ hɛn. Un sɛ́ we dó yě gɔ́n, bɔ a ja xó ɖɔ nú yě gbé ɔ́, a nǎ nɔ́ ɖɔ nú yě ɖɔ: ‘Xó e Aklúnɔ Mavɔmavɔ ɖɔ é ɖíe.’

⁵ A ɖɔ mɔ̌ nú yě ɔ́, yě sixú ɖótó we, yě ká sixú lɛ́ gɔn tó ɖó we, ɖó yě nɔ́ se tónú ǎ; amɔ̌, yě ná tunwun ɖɔ gbeyíɖɔ Mawu tɔn ɖokpó ɖo émí mɛ.

⁶ “Hwɛ gbɛtɔ́ ɔ́, ma ka ɖi xɛsi nú yě ó; ma nú adǎn e gblɔ́n nú we wɛ yě ɖe lɛ́ɛ dó xɛsi nú we ó. Mɛ énɛ́ lɛ́ɛ ɔ́, wunkan kpó hɔnkéklě kpó wɛ yě nyí. Amɔ̌, ma nú adǎn e gblɔ́n nú we wɛ yě ɖe lɛ́ɛ dó xɛsi nú we ó, ma nú nukún e dó kpɔ́n we wɛ vǐ tónúmasetɔ́ énɛ́ lɛ́ɛ ɖe ɔ́ dó xɛsi nú we ó.

⁷ Xó e un ná ɖɔ nú we ɔ́, a nǎ ɖɔ nú yě; yě sixú ɖótó we, yě ká sixú lɛ́ gɔn tó ɖó we, ɖó yě nɔ́ se tónú ǎ.

⁸ “Hwɛ gbɛtɔ́ ɔ́, ɖǒtó xó e ɖɔ nú we gbé un ja ɔ́, ma cí vǐ énɛ́ lɛ́ɛ e má nɔ́ se tónú ǎ lɛ́ɛ ɖɔhun ó. Kɛ nu towe bó ná ɖu nǔ e ná we gbé un ja é.”

⁹ Ée mɛ ɔ́ ɖɔ mɔ̌ ɔ́, un mɔ alɔ ɖé dlɛ́n wěma mlámlá ɖé dó mì.

¹⁰ Alɔ ɔ́ vlɔ́n wěma ɔ́ ɖo nukɔn ce bɔ è wlǎn vosisa, alěníná kpó azɔnwinwɛn kpó sín xó d'é jí gbɔn gǔdo nukɔn.