Ezekiyɛ́li 19 - MAWUXÓWÉMA

¹ Mawu ɖɔ nú mì ɖɔ: Hwɛ ɔ́, ji gbɛvíhan élɔ́ dó Izlayɛ́li sín gǎn lɛ́ɛ tamɛ ɖɔ:

² “Nɔ mitɔn ɔ́, kinnikínní asi nukúnɖéjí ɖokpó wɛ é nyí; kinnikínní nukúnɖéjí ɖokpó wɛ é nyí ɖo kinnikínní lɛ́ɛ mɛ. É mlɔ́ ayǐ ɖo vǐ tɔn lɛ́ɛ tɛ́ntin; é ɖo nukún kpé dó vǐ tɔn lɛ́ɛ wú wɛ.

³ É zé vǐ tɔn lɛ́ɛ ɖokpó bó kplɔ́n ɛ ganjí; kinnikínní ví ɔ́ wínnyá; é kplɔ́n ɛ lě e è nɔ wlí lan bó nɔ́ vún ɖu gbɔn é; kinnikínní wínnyáwínnyá ɔ́ jɛ gbɛtɔ́ vún ɖu jí.

⁴ Toɖévomɛnu lɛ́ɛ se xó tɔn bó ɖó mɔ n'i bó wlí i; yě dó gan awɔntín mɛ n'i bó dɔn ɛ yi Ejípu.

⁵ Nɔ tɔn nɔ te kpɔ́n ɛ káká. É ká wá mɔ ɖɔ émí kún sɔ́ sixú mɔ ɛ ó. Énɛ́ ɔ́, é gbɔ bó zé vǐ tɔn ɖěvo bó kplɔ́n, vǐ énɛ́ lɔ wá nyí kinnikínní ɖé, bó dó hlɔ̌nhlɔ́n ganjí.

⁶ É nɔ kinnikínní hwan mɛ káká bó wínnyá. É kplɔ́n lě e è nɔ wlí lan bó nɔ́ vún ɖu gbɔn é, kinnikínní wínnyáwínnyá ɔ́ jɛ gbɛtɔ́ vún ɖu jí.

⁷ É mu ahohó yětɔn lɛ́ɛ; é gba toxo yětɔn lɛ́ɛ hánnyá. É dó gbe lě ɔ́, xɛsi nɔ jɛ mɛ e ɖo to ɔ́ mɛ lɛ́ɛ bǐ jí.

⁸ Énɛ́ ɔ́, toɖévomɛnu lɛ́ɛ gosín fí tɛnmɛ tɛnmɛ bó wá xá ɛ. Yě ɖó mɔ n'i, bɔ é jɛ mɛ.

⁹ Yě dǒ gan awɔntín mɛ n'i; yě wlí i dó aja mɛ, yě zé e yi jó nú axɔ́sú Babilɔ́nu tɔn ɔ́. È zě e sú dó gan mɛ; è sú i bónú é má sɔ́ dó gbe ɖě gbɔn só jí só jí ó, é má sɔ́ dó gbe ɖo Izlayɛ́li ó.”

¹⁰ “Nɔ mitɔn cí vǐwuntín ɖé ɖɔhun; vǐwuntín e è tun nyi tɔ tó é ɖɔhun. É sɛ́n kpɔ́ gégé, é dó ama ganjí, ɖó é nɔ́ mɔ sin ganjí.

¹¹ Ala e é zɛ lɛ́ɛ kló, ala tɔn lɛ́ɛ wá húzú axɔ́súkpogɛ. Vǐwuntín énɛ́ yi jǐ hú atín ɖě lɛ́ɛ bǐ. È ɖo fí ɖěbǔ ɔ́, è nɔ mɔ sɛ́ dó, ɖó é yi jǐ, bó zɛ ala gěgé.

¹² Lo ɔ́, è hɔn zindɛ́ kpó adǎn kpó. Jɔhɔn zǎnzǎnhwe jí tɔn nyi bɔ vǐwuntín ɔ́ xú; sínsɛ́n tɔn lɛ́ɛ kɔn nyi ayǐ. Ala kloklo e é zɛ nɛ́ lɛ́ɛ bǐ xú, bó ji zo.

¹³ Vǐwuntín ɔ́ ɖíe è wǎ tun sɔ́ nyi gbětótló mɛ din e; è tun sɔ́ nyi akúgbéjí, ɖo ayǐkúngban xúxú jí.

¹⁴ Myɔ ɖé tɔ́n sín vǐwuntín ɔ́ mɛ, myɔ ɔ́ fyɔ́ ala lɛ́ɛ kpó sínsɛ́n lɛ́ɛ kpó. Vǐwuntín ɔ́ sɔ́ ɖó ala kloklo ɖě ǎ, é sɔ́ ɖó ala kloklo e ná húzú axɔ́súkpogɛ é ɖě ǎ. Xó énɛ́ wɛ ná nyí gbɛvíhan e mɛ bǐ ná nɔ́ ji é.”