Ezekiyɛ́li 18 - MAWUXÓWÉMA

¹ Mawu Mavɔmavɔ ɖɔ nú mì ɖɔ:

² “Étɛ́wú è ka nɔ dó lǒ ɖo Izlayɛ́li ɖɔ: ‘Mɛjitɔ́ lɛ́ɛ ɖu vǐwun xɛ́lú ɔ́, vǐ yětɔn lɛ́ɛ sín aɖǔ wɛ nɔ jí?’

³ Nyɛ Aklúnɔ Mavɔmavɔ xwlé nyiɖée nú mi, bó ɖo ɖiɖɔ nú mi wɛ, mi sɔ́ ná dó lǒ énɛ́ ɖě gbeɖé kpɔ́n ɖo Izlayɛ́li ǎ.

⁴ Éɖíe, mɛ bǐ sín gbɛ wɛ ɖo alɔ ce mɛ, tɔ́ wɛ a, vǐ wɛ a, mɛ bǐ sín gbɛ wɛ ɖo alɔ ce mɛ. Mɛ e hu hwɛ é wɛ ná sú hwɛ tɔn xɔ́: mɛ ɔ́ wɛ ná kú.

⁵ “Kpɔ́ndéwú ɖokpó ɖíe: gbɛtɔ́ ɖé tíin, bó nɔ́ wa ɖagbe; é nɔ́ xwedó sɛ́n, bó nɔ́ wa nǔ jlɔ́jlɔ́;

⁶ é nɔ ɖu nǔ e è nɔ yi xwlé vodún gbɔn só jí só jí é ǎ; è nɔ sɛn vodún ɖo Izlayɛ́li có éyɛ́ nɔ́ sɛn vodún ɖě ǎ; é nɔ́ dó afɔ gbě nú mɛsi ǎ; nyɔ̌nu ɖo gǒdó mɛ ɔ́, é nɔ́ sɛkpɔ́ ɛ ǎ;

⁷ é nɔ́ táfú mɛ ǎ; è sɔ́ nǔ ɖó gbanu ɖo gɔ̌n tɔn bó wá sú axɔ́ ɔ́, é nɔ́ zé jó; é nɔ́ ja ajo ǎ; é nɔ́ ná nǔɖuɖu mɛ e xovɛ́ sin é, bó nɔ́ ná avɔ mɛ e ɖo mɛ̌ é;

⁸ é nɔ́ sa akwɛ́ nú mɛ ǎ, é nɔ́ nya akwɛ́ nú mɛ, bó nɔ́ yí akwɛ́ví ǎ; é nɔ́ ɖó alɔ ɖo nǔ nyanya mɛ ǎ; é ja hwɛ gbo gbé ɔ́, é nɔ́ kán zǐn tɔn nú zǐn, bó nɔ́ kán sa tɔn nú sa;

⁹ é nɔ́ nyi sɛ́n ce lɛ́ɛ, bó nɔ́ bló nǔ e un zɔ́n lɛ́ɛ ɖó xwi jí; gbɛtɔ́ mɔ̌hun ɔ́, hwɛjijɔnɔ wɛ; é ná nɔ gbɛ. Xó e nyɛ Aklúnɔ Mavɔmavɔ ɖɔ ɔ́ nɛ́.

¹⁰ “Amɔ̌, nú mɛ mɔ̌hun ká ɖó vǐ ɖé, bɔ vǐ ɔ́ nyí ajotɔ́ axánsúnxó, bó nɔ́ hu mɛ, bó nɔ́ ɖo nǔ nyanya lɛ́ɛ dó sin wɛ,

¹¹ tɔ́ tɔn ká nɔ́ wa nǔ mɔ̌hun ɖé ǎ; éyɛ́ ká nɔ ɖu nǔ e è nɔ xwlé vodún gbɔn só jí só jí é; é nɔ́ dó afɔ gbě nú mɛsi;

¹² é nɔ́ táfú wamamɔnɔ lɛ́ɛ kpó gbɛ̌dónánɔ lɛ́ɛ kpó; é nɔ́ jɛ ajo; è sɔ́ nǔ ɖó gbanu ɖo gɔ̌n tɔn ɔ́, é sɔ́ nɔ́ zé jó ǎ; é nɔ́ sɛn vodún, bɔ nǔ baɖabaɖa e yě nɔ́ dó sin ɖo vodún xwé lɛ́ɛ ɔ́, é lɔmɔ̌ nɔ dó sin;

¹³ é nɔ́ sa akwɛ́ bó nɔ́ yí akwɛ́ví d'é jí. Vǐ mɔ̌hun ná nɔ gbɛ wɛ a vɛdó a? É ná kú dandan, ɖó nǔ baɖabaɖa énɛ́ lɛ́ɛ e é dó sin é wútu; é ná kú, é wɛ ka sɔ́ éɖée nyi gbě.

¹⁴ “Ényí vǐ énɛ́ lɔ ka ɖó vǐ ɖé, bɔ vǐ ɔ́ mɔ nǔ nyanya e wa wɛ tɔ́ tɔn ɖe lɛ́ɛ, bó má ká nɔ́ wa nǔ tɔ́ tɔn ɖɔhun ǎ,

¹⁵ é nɔ́ ɖu nǔ e è nɔ xwlé vodún gbɔn só jí só jí é ǎ, é nɔ́ sɛn vodún Izlayɛ́li tɔn lɛ́ɛ ɖě ǎ, é nɔ́ dó afɔ gbě nú mɛsi ǎ,

¹⁶ é nɔ́ táfú mɛ ǎ, é nɔ́ yí mɛ ɖé nú ɖó gbanu ǎ, é nɔ́ ja ajo ǎ, é nɔ́ ná nǔɖuɖu mɛ e xovɛ́ sin é, bó nɔ́ ná avɔ mɛ e ɖo mɛ̌ é,

¹⁷ é nɔ́ táfú wamamɔnɔ ǎ, é nɔ sa akwɛ́ ǎ, é nɔ́ nya akwɛ́ nú mɛ bó nɔ́ yi akwɛ́ví ǎ, é nɔ́ nyi sɛ́n ce lɛ́ɛ bó nɔ́ xwedó nǔ e un zɔ́n lɛ́ɛ. Vǐ mɔ̌hun ná kú ɖó hwɛ e tɔ́ tɔn hu lɛ́ɛ nu ǎ. É ná nɔ gbɛ.

¹⁸ Tɔ́ tɔn wɛ táfú mɛ, é wɛ ja ajo, é wɛ dó ya nú mɛ e tɛ́ntin é ɖe lɛ́ɛ; hǔn é wɛ ná kú ɖó nǔ e é wa lɛ́ɛ tamɛ.

¹⁹ “Mi nɔ kanbyɔ́ ɖɔ: étɛ́wú vǐ má ka ná sú hwɛ e tɔ́ tɔn hu ɔ́ sín axɔ́ ǎ? Nǔ é wú wɛ ɔ́ ɖíe: vǐ ɔ́ wa nǔ ɖó sɛ́nxwi jí; é xwedó hwɛjijɔ, é nɔ́ nyi sɛ́n ce lɛ́ɛ, bó nɔ́ bló nǔ e un zɔ́n lɛ́ɛ; énɛ́ wú wɛ é ná nɔ gbɛ.

²⁰ Mɛ e hu hwɛ é wɛ ná kú. Vǐ ná sú hwɛ e tɔ́ tɔn hu ɔ́ sín axɔ́ ǎ, tɔ́ ka ná sú hwɛ e vǐ tɔn hu ɔ́ sín axɔ́ ǎ. Mɛ e wa ɖagbe ɔ́ ná ɖu le tɔn, mɛ e wa nyanya ɔ́ ná sún sin tɔn.”

Mi nɔ wa ɖagbe

²¹ “Ényí mɛ nyanya jó nǔ nyanya wiwa dó, bó nɔ́ bló nǔ e un zɔ́n lɛ́ɛ bǐ, bó nɔ́ xwedó hwɛjijɔ bó nɔ́ wa nǔ dó sɛ́nxwi jí ɔ́, é ná kú ǎ, é ná nɔ gbɛ.

²² Ɖó din ɔ́, gbɛ ɖagbe wɛ é nɔ́ zán; énɛ́ wú ɔ́, è sɔ́ ná kpɔ́n hwɛ e é ko hu ɖ'ayǐ lɛ́ɛ ǎ, bɔ é ná nɔ gbɛ.

²³ Nǔ e ba wɛ un ɖe tawun ɔ́ wɛ nyí ɖɔ mɛdídá ní kú wɛ mi vɛdó a? Nǔ e ba nyɛ Aklúnɔ Mavɔmavɔ ɖe ɔ́ wɛ nyí ɖɔ mɛdídá ní húzú walɔ bó nɔ gbɛ.

²⁴ Lo ɔ́, é nyí hwɛjijɔnɔ lɛ́ kɔ sín walɔ tɔn ɖagbe ɔ́ gúdo, bó jɛ hwɛ hu jí, bó jɛ nǔ baɖabaɖa bǐ dó sin jí mɛ nyanya ɖɔhun ɔ́, é ná nɔ gbɛ wɛ a? Gbeɖé kpɔ́n! È sɔ́ ná kpɔ́n nǔ ɖagbe e é kó wa lɛ́ɛ ǎ; é ná kú, ɖó é sɔ́ ɖo gbejí ǎ, é jɛ hwɛ hu jí.

²⁵ Mi nɔ ɖɔ: ‘Aklúnɔ nɔ dó atɔ́ɔ́nnu nǔ jí.’ Izlayɛ́li togun e mi, mi ɖótó mì ganjí: nyɛ wɛ ɖo atɔ́ɔ́nnu dó nǔ jí wɛ a, abǐ mi wɛ ma ɖo nǔ wa ɖó nǔ gan jí wɛ ǎ?

²⁶ Ényí hwɛjijɔnɔ jó nǔjlɔ́jlɔ́wiwa dó, bó jɛ nǔ nyanya dó sin jí bó kú ɔ́, nǔ nyanya e é dó sin ɔ́ wɛ zɔ́n bɔ é kú.

²⁷ Ényí mɛ nyanya ka lɛ́ kɔ sín gbɛ nyanya e zán wɛ é ɖe ɔ́ gúdo, bó jɛ sɛ́n ce lɛ́ɛ nyi jí, bó jɛ nǔ jlɔ́jlɔ́ wa jí ɔ́, é ná hwlɛ́n gbɛ tɔn gán.

²⁸ Ényí é mɔ nǔ jɛ nǔ e é wa nyi do lɛ́ɛ wú bó jó nyanya wiwa dó ɔ́, é ná nɔ gbɛ, é ná kú ǎ.

²⁹ Lě e un to nǔ lɛ́ɛ gbɔn ɔ́ nɛ́, có mi Izlayɛ́li togun ɔ́, mi nɔ ɖɔ: ‘Aklúnɔ nɔ dó atɔ́ɔ́nnu nǔ jǐ.’ Nǔvú wɛ; nyɛ wɛ ɖo atɔ́ɔ́nnu dó nǔ jǐ wɛ ǎ, mi wɛ ma ɖo nǔ wa ɖó nǔ gan jí wɛ ǎ.

³⁰ Énɛ́ ɔ́ wú ɔ́, Izlayɛ́li togun e mi, lě e mɛ ɖokpó ɖokpó wa nǔ gbɔn ɔ́ wɛ un ná kpɔ́n dó ɖɔ hwɛ xá mɛ ɔ́; xó e nyɛ Aklúnɔ Mavɔmavɔ ɖɔ ɔ́ nɛ́. Mi bo húzú jijɔ; mi lɛ́ kɔ sín nǔ nyanya e wa wɛ mi ɖe lɛ́ɛ gúdo. Mi ma lɔn gbeɖé nú nǔ wa nyi do mitɔn zɔ́n bónú mi zé gbɛ mitɔn nyi gbě ó.

³¹ Mi jó walɔ nyanya mitɔn lɛ́ɛ dó, mi húzú ayixa; mi húzú linlin. Izlayɛ́li togun e mi! Étɛ́wú mi ká ná mɔ kú ɖo te mɔ̌, bó ná yi?

³² Nyɛ Aklúnɔ Mavɔmavɔ ɔ́, un ba gbeɖé ɖɔ mɛɖé ní kú ǎ; hǔn mi bo vɔ́ jɔ bó nɔ gbɛ.”