Ezekiyɛ́li 17 - MAWUXÓWÉMA

¹ Mawu Mavɔmavɔ ɖɔ nú mì ɖɔ:

² “Hwɛ gbɛtɔ́ e, nyi nǔbasɔ́ ɖokpó dó Izlayɛ́li togun ɔ́; dǒ lǒ ɖokpó nú yě.

³ A nǎ ɖɔ nú yě ɖɔ nyɛ Aklúnɔ Mavɔmavɔ wɛ dó lǒ ɔ́ nú yě. Lǒ ɔ́ ɖíe: ‘Gangan ɖaxó ɖé tíin; awa tɔn lɛ́ɛ d'agba ɖésú; é kɛ awa ɔ́, é nɔ́ gbló káká; fún tɔn sukpɔ́ káká bó ɖó hwɛkan tɛnmɛ tɛnmɛ. Gangan ɔ́ zɔn bó yi Libáan sókan mɛ, bó yi tɔ́ dó sɛ́dlutín ɖokpó sín ɖavínu wú,

⁴ bó wɛ́n síin; é wɛ́n ala e yi jǐ hú ala ɖě lɛ́ɛ bǐ é, bó zé yi to e mɛ è nɔ wa ajɔ̌ ɖe ɔ́ mɛ, bó zé ɖó ajɔ̌watɔ́ lɛ́ɛ sín toxo ɖokpó mɛ.

⁵ Énɛ́ ɔ́ gúdo ɔ́, gangan ɔ́ zé atínvú ɖokpó ɖo Izlayɛ́li to mɛ, bó sɔ́ yi tun ɖó fí e è nɔ va atínkwín ɖó é; é tun atínvú ɔ́ ɖó tɔsisa ɖaxó ɖé tó, sólutín ɖɔhun.

⁶ Atínvú ɔ́ gbɛ, bó wá nyí vǐwuntín ɖagbe ɖagbe ɖé bó vun kan; é ká yi jǐ dín ǎ. É vun ɖidó fí e gangan ɔ́ ɖe é; atín ɔ́ dó ɖɔ do, bó nɔ́ zɛ ala.

⁷ Gangan ɖaxó ɖěvo tíin, bɔ élɔ́ ɔ́, awa tɔn lɛ́ɛ d'agba ɖésú; é ɖó fún kpɔ́ gégé. Din ɔ́, vǐwuntín ɔ́ nyi ɖɔ tɔn lɛ́ɛ dó gangan énɛ́ ɔ́ gɔ̌n, bɔ ala tɔn lɛ́ɛ tunta fí e é ɖe é. Vǐwuntín ɔ́ bló mɔ̌ ɖó é vɛdó ɖɔ émí ná mɔ sin ɖo gangan énɛ́ ɔ́ gɔ̌n hú fí e émí ɖe é wɛ sín.

⁸ Có gle ɖagbe jí wɛ é ká ɖe, bó ɖo tɔsisa ɖaxó ɖé tó, bó hɛn ɔ́, é ná zɛ ala, bó sɛ́n, bó ná nyí vǐwuntín e nyɔ́ bɔ nǔ vɔ ɖ'é wú é.’

⁹ “Nǔ e nyɛ Aklúnɔ Mavɔmavɔ ka nɔ kanbyɔ́ ɔ́ ɖíe: ‘Vǐwuntín énɛ́ ká sixú nɔ gbɛ bó ná ɖo ala vun wɛ káká sɔ́yi a? Gangan nukɔntɔn ɔ́ ná wá hɔn vǐwuntín ɔ́ ǎ cé? É ná wá hɔn vǐwuntín ɔ́, bó gbɛ sínsɛ́n tɔn lɛ́ɛ kɔn nyi ayǐ, bɔ ama tɔn lɛ́ɛ bǐ ná mlú ǎ cé? Ma ɖɔ nú we: É byɔ́ ɖɔ è nǎ dó hlɔ̌nhlɔ́n abǐ è nǎ dó ahwan gbě cóbó hɔn ǎ.

¹⁰ Vǐwuntín ɔ́ nɛ́ è tun ganjí nɛ́, é ká sixú ɖo gbɛ ná nɔ wɛ bó ná vun ǎ; jɔhɔn zǎnzǎnhwe jí tɔn nyi dó jǐ tɔn ɔ́, é ná fyɔ́ bǐ. Ayǐkúngban e jí é ɖe, bó ná vun ganjí ɔ́ jí jɛ́n é ná ɖe bó ká ná fyɔ́.’ ”

Lǒ ɔ́ sín tínmɛ

¹¹ Mawu Mavɔmavɔ ɖɔ nú mì ɖɔ:

¹² “Kanbyɔ́ tónúmasetɔ́ énɛ́ lɛ́ɛ ɖɔ yě mɔ nǔ jɛ xó énɛ́ ɔ́ mɛ ǎ wɛ a jí. Flín yě lě e axɔ́sú Babilɔ́nu tɔn byɔ́ Jeluzalɛ́mu, bó wlí axɔ́sú yětɔn kpó gǎn yětɔn lɛ́ɛ kpó hɛn yi to tɔn mɛ gbɔn é.

¹³ É sɔ́ mɛ ɖokpó ɖo axɔ́ví lɛ́ɛ mɛ, bó jɛ akɔ xá ɛ, bó ɖɔ n'i ɖɔ é ní zin alɔ dó akɔ́n ɖɔ émí ná nɔ gbejí nú akɔ e émí jɛ xá émí é, bó ká kplá gbɛtɔ́ nukúnɖéjí e ɖo to ɔ́ mɛ lɛ́ɛ hɛn yi.

¹⁴ É bló mɔ̌ bónú axɔ́súɖuto ɔ́ sín hlɔ̌nhlɔ́n ná nɔ bǎ mɛ, bónú to ɔ́ má sɔ́ fɔ́n gǔ ó; énɛ́ ɔ́, to ɔ́ ná nɔ gbejí nú akɔ e Babilɔ́nu xɔ́sú ɔ́ jɛ xá ɛ é.

¹⁵ Lo ɔ́, axɔ́sú yɔ̌yɔ́ ɔ́ fɔ́n gǔ dó Babilɔ́nu xɔ́sú ɔ́ jí, bó sɛ́ mɛ dó Ejípu ɖɔ è nǐ sɛ́ sɔ́ kpó sɔ́ja kpó dó émí ní sukpɔ́. É ká ná kpa ɛ a? Mɛ e wa nǔ gbɔn mɔ̌ ɔ́ ná mɔ nu tɔn a? É gba akɔ e é jɛ é; é sixú gán ɖ'é mɛ cé?

¹⁶ “Nǔ e nyɛ Aklúnɔ Mavɔmavɔ ɖo ɖiɖɔ wɛ é ɖíe; un xwlé nyiɖée ɖɔ: Judáa xɔ́sú ɔ́ ná yi kú ɖo Babilɔ́nu xɔ́sú e sɔ́ ɛ ɖó zinkpo jí ɔ́ to mɛ; ɖó é nɔ gbejí nú akɔ e é jɛ ɔ́ ǎ. Énɛ́ ɔ́ wú ɔ́, Babilɔ́nu wɛ Judáa xɔ́sú ɔ́ ná yi kú jɛ.

¹⁷ Hwenu e sɔ́ja Babilɔ́nu tɔn lɛ́ɛ ná kplé kɔ́, bó cí gúdo, lobo ná kun do bó cí mɛ, bó ná hu mɛ kɔn nyi kpɔ́ é ɔ́, Ejípu xɔ́sú ɔ́ ɖó ahwangɔnu syɛ́nsyɛ́n kɔn nyi kpɔ́, có yě sixú gló nǔ nú Judáa xɔ́sú ɔ́ ǎ,

¹⁸ ɖó Judáa xɔ́sú ɔ́ nɔ gbejí nú nǔ e é zin alɔ dó akɔ́n bó ɖɔ é ǎ; é gba akɔ e é jɛ é, có é ɖésú wɛ yí gbe ná; nǔ énɛ́ e é wa ɔ́, ná kpa ɛ ǎ.

¹⁹ “Énɛ́ ɔ́ wútu wɛ nyɛ Aklúnɔ Mavɔmavɔ ɖo ɖiɖɔ wɛ ɖɔ: un xwlé nyiɖée nú we ɖɔ, axɔ́sú Judáa tɔn nɔ gbejí nú nǔ e é zin alɔ dó akɔ́n ɖo nyǐkɔ ce mɛ ɖɔ émí ná bló é ǎ. É ká ji nǔɖé ɔ́, un ná zé kpan n'i.

²⁰ Un ná ɖó mɔ n'i, bó ná wlí i. Un ná kplá ɛ yi Babilɔ́nu, bó ná ɖó hwɛ n'i ɖó gbejí e é má nɔ nú mì ǎ é wú.

²¹ È nǎ hu sɔ́ja tɔn e alɔ se kpɛ́n ná lɛ́ɛ ɖo ahwangbénu, bɔ mɛ e kpo lɛ́ɛ ná gba kpé wɛ̌kɛ́zo ɛnɛ lɛ́ɛ bǐ mɛ. Énɛ́ ɔ́, yě ná tunwun ɖɔ nyɛ Mawu Mavɔmavɔ wɛ ɖɔ xó nú émí.”

Akpá e Mawu dó lɛ́ɛ

²² “Xó e nyɛ Aklúnɔ Mavɔmavɔ ɖɔ ɔ́ ɖíe: Un ná wɛ́n sɛ́dlutín sín alavínu ɖokpó ; ɖavínu wɛ un ná wɛ́n ala ɔ́ ɖe, bó ná yi tun ɖó só ɖaxó ɖokpó jí.

²³ Un ná zé yi tun ɖó Izlayɛ́li só ɖaxó ɖokpó jí, bɔ é ná zɛ ala bó ná sɛ́n. É ná nyí sɛ́dlu ɖagbe ɖagbe ɖokpó. Xɛ alɔkpa alɔkpa bǐ ná nɔ́ wá ɖó ɖ'é jí. Nǔ e kó sixú nyí xɛ lɛ́ɛ bǐ ná wá nɔ yɛtɛn tɔn.

²⁴ Énɛ́ ɔ́, atín e ɖo zunkan mɛ lɛ́ɛ bǐ ná tunwun ɖɔ nyɛ wɛ nyí Mawu Mavɔmavɔ. Un nɔ mu atín e yi jǐ dín lɛ́ɛ, bó nɔ́ bló bɔ ée hwe hú bǐ lɛ́ɛ nɔ su. Un nɔ ɖe sin sín atín e ɖo mǔ fɛɛn ɔ́ mɛ, bó nɔ́ ná hinhɔ́n dó ée xú ɔ́ mɛ. Nyɛ Mawu Mavɔmavɔ wɛ ɖo xó ɖɔ wɛ, un ɖɔ nǔɖé ɔ́, un ka nɔ bló.”