Ezekiyɛ́li 16 - MAWUXÓWÉMA

¹ Mawu Mavɔmavɔ ɖɔ nú mì ɖɔ:

² “Hwɛ gbɛtɔ́ e, ɖe nǔ baɖabaɖa e Jeluzalɛ́mu dó sin lɛ́ɛ xlɛ́ ɛ.

³ Ɖɔ n'i ɖɔ nyɛ Aklúnɔ Mavɔmavɔ ɖɔ: Tɔ́gbó towe lɛ́ɛ sín to wɛ nyí Kanáa; fínɛ́ wɛ è ji we ɖe. Tɔ́ towe ɔ́, Amɔliti wɛ, bɔ nɔ towe nyí Hitíti.

⁴ Gbe e gbe è ji we é ɔ́, mɛɖé gbo hɔ̌nkan nú we ǎ; è zě we dó sin mɛ bo lɛ wǔ nú we ǎ, è zě jɛ dó tíntɛ́n wǔ nú we ǎ; è bǔ avɔ dó we ǎ.

⁵ Nǔ towe blá wǔ nú mɛɖé, bónú mɛ ɔ́ bló nǔ énɛ́ lɛ́ɛ ɖokpó nú we vɔ́vɔ́ ǎ. Mɛɖěbǔ yí wǎn nú we, bó wlíbo nú we ǎ. É nyɔ́ wa ɔ́, nǔ gbɛ́hɛn wɛ è mɔ we dó mɔ, bó sɔ́ we nyi gbě.

⁶ Un wá ɖo dǐndín gbɔn akpá towe wɛ, bó mɔ we ɖo sugbaja xo wɛ ɖo kanjɔ mɛ. A ɖo kanjɔ mɛ mɔ̌ có un ɖɔ hwi ná gán; un ɖɔ hwi ná gán dandan.

⁷ Un ɖɔ nú we ɖɔ: ‘Su folówa e ɖo gběhan mɛ é ɖɔhun’, bɔ a su, bó nyɔ́ ɖɛkpɛ káká: anɔ̌ towe bǐ tɔ́n, bɔ a wǔ fún bǐ. Lo ɔ́, a kpo ɖo mɛ̌ jɔgbe.

⁸ Un lɛ́ gbɔn akpá towe, bó mɔ ɖɔ a ko wínnyá bǐ bó ko su xɔ́ntɔn ɖó. Énɛ́ ɔ́, un vlɔ́n awu ce bo cyɔ́n nú we, bó hwlá mɛ̌ nú we. Un zin alɔ dó akɔ́n ɖɔ un ná nɔ gbejí nú we, lobo jɛ akɔ xá we. Lě e a hǔzú ce gbɔn é nɛ́; nyɛ Aklúnɔ Mavɔmavɔ wɛ ɖɔ mɔ̌.

⁹ “Un zé sin bó klɔ́ kanjɔ e ɖo wǔ towe ɔ́ síin, bó sá nǔsáwǔ wǎnɖagbenɔ nú we.

¹⁰ Un zé awu kíkó ɖé dó nú we, bó zé anyǔfɔkpa ɖagbe ɖagbe ɖé dó nú we, bó sɔ́ kanvɔ bo sin nú we, bó dó sɛ́dawu ɖaxó ɖé nú we.

¹¹ Un ba acɔ́ nú we: un dó alɔgan alɔ nú we, un dó wlɔ kɔ nú we.

¹² Un dó alɔganví awɔntín nú we, bó dó tógbé tómɛ nú we, bó zé axɔ́súgbákún ɖagbe ɖagbe ɖé xwé nú we.

¹³ Siká kpó kpatágan kpó wɛ a dǒ ba acɔ́ ná, kanvɔ wěwé ɖagbe ɖagbe, sɛ́da kpó avɔ kíkó kpó wɛ a dǒ. Linfín e mɛ́ ganjí ɔ́ kpó wǐin kpó olívumi kpó wɛ a nɔ ɖu. Énɛ́ ɔ́, a nyɔ̌ ɖɛkpɛ sɔ mɔ̌, bɔ axɔ́sú jɛ we.

¹⁴ Nyǐkɔ towe gba kpé gbɛ ɔ́ bǐ mɛ, ɖó ɖɛkpɛ towe wú; a nyɔ̌ ɖɛkpɛ bɔ nǔ bǐ vɔ ɖ'é wú, ɖó un ba acɔ́ nú we bɔ é vɛ́ jlɛ́. Xó e nyɛ Mawu Mavɔmavɔ ɖɔ é nɛ́.”

Jeluzalɛ́mu dó afɔ gbě

¹⁵ “Hwɛ Jeluzalɛ́mu ɔ́, a tunwun ɖɔ émí nyɔ́ ɖɛkpɛ, bɔ nyǐkɔ émítɔn yi jǐ; a kpɔ́n dó énɛ́ wú bó jɛ aga lɛ jí; a lɛ aga xá alitanu bǐ, bó gbɔ bó húzú yětɔn .

¹⁶ A kpɔ́n avɔ towe lɛ́ɛ mɛ, bó cyán ɖagbe ɖagbe e ɖ'é mɛ lɛ́ɛ dó ba acɔ́ nú vodún xwé e gbɔn só jí só jí lɛ́ɛ, bɔ è nɔ ɖó xó xá we ɖ'é jí . Nǔ mɔ̌hun ɖě kó jɛ kpɔ́n gbeɖé ǎ, é ká sɔ́ ná jɛ kpɔ́n ǎ.

¹⁷ Nǔzínzán ɖagbe ɖagbe e è zě siká kpó kpatágan kpó dó bló ná, bɔ un ná we lɛ́ɛ ɔ́, a sínsín dó kɔn súnnu sín bǒcyɔ ná, bó nɔ́ lɛ aga xá yě.

¹⁸ A bǔ avɔ towe e è kó lɛ́ɛ dó yě, bó kɔn ami ce kpó nǔsáwǔ wǎnɖagbenɔ ce kpó dó yě jí.

¹⁹ Linfín ɖagbe ɖagbe kpó ami kpó wǐin kpó e un ná we bɔ a nǎ nɔ́ ɖu ɔ́, a nɔ xwlé bǒcyɔ towe lɛ́ɛ, bónú é ná nyí vɔ̌sísá wǎnɖagbenɔ nú yě. Xó e nyɛ Mawu Mavɔmavɔ ɖɔ ɔ́ nɛ́.

²⁰ Vǐ súnnu kpó nyɔ̌nu kpó e a ji nú mì lɛ́ɛ ɔ́, a fɔ yě hu dó bǒcyɔ énɛ́ lɛ́ɛ. Hǔn afɔ e dó gbě wɛ a ɖe ɔ́ kpé ǎ,

²¹ bɔ vǐ nyɛ tɔn lɛ́ɛ wɛ a hu dó vodún towe lɛ́ɛ!

²² Hwenu e a ɖo gbɛ baɖabaɖa énɛ́ zán wɛ ɔ́, Jeluzalɛ́mu, hwenu e a nɔ ɖo afɔ dó gbě wɛ ɔ́, a ka sɔ́ nɔ flín vǔ towe a? A nɔ flín hwenu e a ɖo mɛ̌ jɔgbe, bó ɖo kanjɔ mɛ blí gbo gbɔn wɛ é a?

²³ “Nyɛ Aklúnɔ Mavɔmavɔ ɖɔ: Heelú we! Ée a dǒ nǔ nyanya lɛ́ɛ bǐ sin é ɔ́, gbɛ towe ɖíe wá blá wǔ bǐ din e.

²⁴ Nǔ ɖo mɔ̌ có, a kpo ɖo kɔ́ lí wɛ, bó kpo ɖo vɔ̌sákpe xo wɛ gbɔn tokplétɛn tokplétɛn; a nɔ xo bɔ é nɔ́ yi jǐ.

²⁵ A blǒ nǔ énɛ́ lɛ́ɛ gbɔn alikpléhɔ̌ntɛn lɛ́ɛ bǐ; a jǒ hwiɖée dó nú aligbɔntɔ́ lɛ́ɛ bǐ, bó fɔ́n bó ɖo aga lɛ wɛ, bó hɛn ɖɛkpɛ towe gblé.

²⁶ A lɛ aga xá Ejípunu lɛ́ɛ, ɖó yě jɔ asú bɔ to yětɔn ɖo to towe kpá; a ɖo aga lɛ wɛ kpowun; a lɛ xá mɛ ɖě ɔ́, a nɔ lɛ xá mɛ ɖě, bó dó xomɛsin nú mì.

²⁷ Énɛ́ ɔ́, un ɖe xomɛsin ce xlɛ́ we: un tɛ nǔɖuɖu we; un jó we nú kɛntɔ́ towe lɛ́ɛ, un jó we nú toxo Filisitɛ́ɛn lɛ́ɛ tɔn, ɖó Filisitɛ́ɛn lɛ́ɛ ɖésú ɔ́, nǔ blíblí e wa wɛ a ɖe ɔ́ nyɔ́ yě nukún mɛ ǎ.

²⁸ Aga énɛ́ lɛ́ɛ e a lɛ ɔ́ ká kó jɛ mɛ nú we ǎ, bɔ a lɛ̌ yi lɛ aga xá Asilíinu lɛ́ɛ. Énɛ́ lɔ ka víví hwedó we,

²⁹ bɔ a lɛ̌ bɔ aga nyi do xá Babilɔ́nunu lɛ́ɛ, Babilɔ́nunu ajɔ̌watɔ́ lɛ́ɛ; có nǔ e ɖo wiwa we wɛ ɔ́ jɛ́n kpo ɖo wiwa we wɛ.

³⁰ Kóóyi Jeluzalɛ́mu! A nyɔ̌ un gbɛ́ ɖɔ nú súnnu ǎ; a wa nǔ agalɛtɔ́ e gbɛ́ hɛn hú agalɛtɔ́ lɛ́ɛ bǐ é ɖɔhun. Xó e nyɛ Aklúnɔ Mavɔmavɔ ɖɔ ɔ́ nɛ́.

³¹ A lǐ kɔ́ towe lɛ́ɛ gbɔn alikpléhɔ̌ntɛn lɛ́ɛ bǐ, bó xo vɔ̌sákpe towe lɛ́ɛ gbɔn fí bǐ; a xo bɔ é yi jǐ. A ka nɔ yí nǔɖé ɖo súnnu lɛ́ɛ sí lě e agalɛtɔ́ lɛ́ɛ nɔ́ bló gbɔn é ǎ.

³² A cí nyɔ̌nu afɔdógbětɔ́ e nɔ́ jó asú tɔn dó, bó nɔ́ yi ba súnnu ɖěvo é ɖɔhun.

³³ Agalɛtɔ́ bǐ wɛ nɔ́ yí nǔ ɖo súnnu sí; towe ka nyí mɔ̌ ǎ; hwi wɛ nɔ lɛ́ dó ajɔ yě, dó dɔn yě, bɔ yě nɔ́ gosín fí bǐ bó nɔ́ wá ɖó xó xá we.

³⁴ Aga hwɛ tɔn gbɔn vo nú agalɛtɔ́ ɖě lɛ́ɛ bǐ tɔn: súnnu lɛ́ɛ wɛ nɔ́ ba we ǎ, yě nɔ́ ná nǔɖé we ǎ, hwi wɛ nɔ ná akwɛ́ yě. Aga towe ɔ́, vo wɛ.

³⁵ “Énɛ́ ɔ́ wú ɔ́, Jeluzalɛ́mu agalɛtɔ́, se xó e ɖɔ nú we wɛ nyɛ Mawu Mavɔmavɔ ɖe é.

³⁶ Xó e nyɛ Aklúnɔ Mavɔmavɔ ɖó bó ná ɖɔ nú we ɔ́ ɖíe: A nɔ jɛ mɛ̌ jɔgbe. A nɔ ɖe wǔtu towe bǐ xlɛ́ bó nɔ́ lɛ aga xá xɔnnɔ towe kpó vodún nǔvɛ́mɔ lɛ́ɛ kpó. A nɔ ɖ'é wú káká bó nɔ́ hu vǐ towe lɛ́ɛ dó vodún towe lɛ́ɛ.

³⁷ Énɛ́ ɔ́ wútu ɔ́, un ná kplé xɔnnɔ towe e a jǒ hwiɖée ná lɛ́ɛ bǐ dó wǔ we, un ná kplé yě mɛ e a yí wǎn ná lɛ́ɛ kpódó mɛ e a gbɛ́ wǎn ná lɛ́ɛ kpó dó wǔ we, bɔ a nǎ ɖo tɛ́ntin yětɔn, bɔ un ná ɖe avɔ sín wǔ we ɖo yě bǐ nukún mɛ, bɔ yě ná mɔ we ɖo mɛ̌ jɔgbe.

³⁸ Jeluzalɛ́mu, tó e è nɔ dɔn nú nyɔ̌nu e dó afɔ gbe ɔ́ abǐ nyɔ̌nu e hu mɛ ɔ́ wɛ un ná dɔn nú we. Kanjɔ towe wɛ a nǎ dó sú wǔ e hwan wɛ un ɖe é kpó adǎn e jí un ɖe é kpó sín axɔ́.

³⁹ Un ná jó we nú xɔnnɔ towe lɛ́ɛ, bɔ yě ná gba kɔ́ e a lǐ lɛ́ɛ bó gba vɔ̌sákpe e a xo lɛ́ɛ. Yě ná ɖe avɔ sín wǔ we; yě ná yí sikánú e a dǒ lɛ́ɛ, bó ná jó we dó nyi mɛ̌ jɔgbe.

⁴⁰ Énɛ́ ɔ́ gúdo ɔ́, yě ná kplé to dó wǔ we; yě ná nyi hwǎn dó we; yě ná já we ɖó hwǐ wú.

⁴¹ Yě ná dó xwé towe lɛ́ɛ zo. Hwɛ e un ɖó nú we ɔ́, yě wɛ ná wa nǔ e ɖ'é mɛ ɔ́ bǐ xá we ɖo nyɔ̌nu gěgé nukún mɛ. Un ná bló mɔ̌ dó ɖó agagbɛ e zán wɛ a ɖe ɔ́ te, bɔ a sɔ́ ná nɔ́ ná nǔ xɔnnɔ towe lɛ́ɛ ɖěbǔ ǎ.

⁴² Énɛ́ ɔ́, xomɛ ce ná fá dó wǔ we, bɔ un sɔ́ ná mɔ nǔ e ná dɔn wǔhwinhwan wá nú mì é ɖě ǎ; un ná vo ɖo ayi mɛ.

⁴³ A sɔ́ flín nǔ e un nyí nú we hwenu e a ɖo vǔ é ǎ, bó blǒ nǔ énɛ́ lɛ́ɛ dó dó xomɛsin nú mì. Din ɔ́, un ná zé nǔ e a wa ɔ́ sín bǎ dó xo we. É má nyí hɛ̌nnú nɛ́ a wa gɔ́ nú nǔ baɖabaɖa e a dǒ sin lɛ́ɛ é nɛ́ ǎ cé? Xó e nyɛ Aklúnɔ Mavɔmavɔ ɖɔ é nɛ́.”

Jeluzalɛ́mu nylá hú toxo ɖě lɛ́ɛ bǐ

⁴⁴ Mawu lɛ́ ɖɔ: “Jeluzalɛ́mu, mɛ e yí wǎn nú lǒdídó lɛ́ɛ ja xó towe ɖɔ gbé ɔ́, yě ná nɔ́ ɖɔ: ‘Nɔ ɖo mɔ̌, vǐ nyɔ̌nu lɔ ɖo mɔ̌.’

⁴⁵ Nɔ towe sín vǐ jɛ́n a nyǐ nǔgbó; nyɔ̌nu énɛ́ e gbɛ́ wǎn nú asú tɔn kpó vǐ tɔn lɛ́ɛ kpó é jɛ́n ji we nǔgbó. Nǔ ɖokpó ɔ́ wɛ hwi kpó nɔví towe nyɔ̌nu lɛ́ɛ kpó nyí; nɔví towe nyɔ̌nu lɛ́ɛ gbɛ́ wǎn nú asú yětɔn lɛ́ɛ kpó vǐ yětɔn lɛ́ɛ kpó. Hitíti wɛ nú nɔ mitɔn, bɔ tɔ́ mitɔn nyí Amɔliti.

⁴⁶ Dadá towe e nɛ́gbé a jɛ ɔ́ wɛ nyí Samalíi kpó vǐ tɔn nyɔ̌nu lɛ́ɛ kpó ɖo totaligbé. Nɔví towe nyɔ̌nu e jɛ nɛ́gbé towe ɔ́ ka nyí Sodɔ́mu kpó vǐ tɔn nyɔ̌nu lɛ́ɛ kpó ɖo tofɔligbé.

⁴⁷ Ényí walɔ yětɔn lɛ́ɛ kɛ́ɖɛ́ wɛ a xwedó, bó wa nǔ baɖabaɖa yě ɖɔhun ǎ, nǔ e hwɛ dó sin ɔ́ zɛ yě bǐ tɔn wú gbɔn alɔ bǐ mɛ.

⁴⁸ Nyɛ Aklúnɔ Mavɔmavɔ ɖɔ: un xwlé nyiɖée nú we! Nɔví towe Sodɔ́mu kpó vǐ tɔn nyɔ̌nu lɛ́ɛ kpó wa nǔ nyanya sɔ hwi kpó vǐ towe nyɔ̌nu lɛ́ɛ kpó ǎ.

⁴⁹ Nǔ e nɔví towe nyɔ̌nu Sodɔ́mu ɔ́ dó sin lɛ́ɛ ɖíe: é kpódó vǐ tɔn nyɔ̌nu lɛ́ɛ kpó nɔ́ yí go, ɖó yě jɛ dɔkun kpɔ́ gégé; yě ɖo nǔɖé lin wɛ ǎ. Yě nɔ́ dó alɔ wamamɔnɔ lɛ́ɛ kpó gbɛ̌dónánɔ lɛ́ɛ kpó ǎ.

⁵⁰ Yě nɔ́ ɖo yěɖée mɔ wɛ, bó nɔ́ ɖo nǔ baɖabaɖa lɛ́ɛ dó sin wɛ ɖo nukún ce mɛ. Énɛ́ ɔ́ wú wɛ un ɖe yě sín gbɛ ɔ́ mɛ bɔ hwi ɖésú mɔ.

⁵¹ Samalíi ɔ́, éyɛ́ hu hwɛ e a hu lɛ́ɛ vlɔ̌ɖówe ǎ. Nǔ baɖabaɖa e hwɛ dó sin lɛ́ɛ sukpɔ́ hú ée éyɛ́ dó sin lɛ́ɛ. Nɔví towe nyɔ̌nu Sodɔ́mu kpó Samalíi kpó ɔ́, nú è nǎ zé yě jlɛ́ dó wǔ we ɔ́, è nǎ ɖɔ yědɛɛ kún hu hwɛ ɖé ó.

⁵² Hɛ̌ngban e a nɔ ɖíɖá nɔví towe lɛ́ɛ ɔ́, hwi wɛ ná ɖíɖá din. Nǔ nyanya e a dǒ sin bɔ é hú gǎn ée nɔví towe lɛ́ɛ dó sin é zɔ́n bɔ é cí ɖɔ nɔví towe lɛ́ɛ nyí hwɛjijɔnɔ hú we. Din ɔ́, hwi wɛ ná ɖíɖá hɛ̌ngban towe bó ɖu winnyá, ɖó nǔ e a dǒ sin lɛ́ɛ zɔ́n bɔ nɔví towe lɛ́ɛ cí hwɛjijɔnɔ ɖɔhun.

⁵³ Un ná lɛ́ sɔ́ toxo énɛ́ lɛ́ɛ ɖo tɛn e mɛ yě kó ɖe ɖ'ayǐ lɛ́ɛ mɛ: un ná húzú ninɔmɛ Sodɔ́mu kpódó vǐ tɔn nyɔ̌nu lɛ́ɛ kpó tɔn. Énɛ́ ɔ́ gúdo lo ɔ́, Jeluzalɛ́mu, un nǎ lɛ́ sɔ́ hwi lɔmɔ̌ ɖó tɛn e mɛ a ko ɖe ɖ'ayǐ ɔ́ mɛ,

⁵⁴ bɔ winnyá ná hu we, ɖó nǔ tobutóbú e a dǒ sin lɛ́ɛ wú. Nǔ e ná gbo we ɔ́ ná súnsún ɖasin nú nɔví towe lɛ́ɛ kpó vǐ yětɔn lɛ́ɛ kpó.

⁵⁵ Nɔví towe nyɔ̌nu Sodɔ́mu kpó Samalíi kpó, kpó vǐ yětɔn nyɔ̌nu lɛ́ɛ kpó ná jɛ lě e yě kó ɖe gbɔn ɖ'ayǐ é. Hwi lɔ kpó vǐ towe nyɔ̌nu lɛ́ɛ kpó ná lɛ́ jɛ lě e mi ko ɖe gbɔn ɖ'ayǐ é.

⁵⁶ Hwenu e a ɖo afɔ tɛ ayǐ wɛ ɔ́, a nɔ hu tɛ́ nú nɔví towe nyɔ̌nu Sodɔ́mu;

⁵⁷ a ko bló mɔ̌ cóbɔ è wǎ mɔ nǔ jɛ nǔ e dó sin wɛ a ɖe lɛ́ɛ wú. Din ɔ́, hwi wɛ Silíi toxo lɛ́ɛ kpó gletoxo yětɔn lɛ́ɛ kpó ná hu tɛ́ ná; Filisitɛ́ɛn lɛ́ɛ lɔ ná hu tɛ́ nú we; Filisitɛ́ɛn e lɛ́ lɛ̌ dó we bó nɔ́ ɖe xlɛ́ ɖɔ émí gbɛ́ wǎn nú we lɛ́ɛ ná hu tɛ́ nú we.

⁵⁸ Din ɔ́, nǔ baɖabaɖa e a dǒ sin lɛ́ɛ ɔ́, hɛ̌nnú e a dǒ sin lɛ́ɛ ɔ́, nǔ e yě ji ɔ́, a nǎ sɔ́ kpan. Xó e nyɛ Aklúnɔ Mavɔmavɔ ɖɔ ɔ́ nɛ́.

⁵⁹ “Aklúnɔ Mavɔmavɔ lɛ́ ɖɔ: lě e a wa nǔ gbɔn ɔ́ wɛ nyɛ lɔ ná wa nǔ xá we gbɔn, ɖó hwɛ ɔ́, a nɔ gbejí nú nǔ e a ɖɔ é ǎ, bó gba akɔ e nyi kpó hwi kpó jɛ é.

⁶⁰ Amɔ̌, nyɛ ɔ́, un flín akɔ e un jɛ xá we sín hwenu e a ɖo vǔ é; énɛ́ wú ɔ́, un ná jɛ akɔ ɖěvo xá we, bɔ é ná nɔ ayǐ káká sɔ́yi.

⁶¹ Hwenu e nɔví towe nyɔ̌nu mɛxó kpó yɔkpɔ́vú kpó ná wá gɔ̌n towe é ɔ́, a nǎ flín gbɛ e a ko zán ɖ'ayǐ é, bɔ é ná hu winnyá nú we. Un ná sɔ́ yě dó ɖó vǐ nú we; é nɛ́ ká ɖo akɔ e un jɛ xá we ɔ́ mɛ ǎ.

⁶² Un ná jɛ akɔ xá we, bɔ a nǎ tunwun ɖɔ nyɛ wɛ nyí Mawu Mavɔmavɔ.

⁶³ Énɛ́ ɔ́, a nǎ flín gbɛ e a ko zán ɖ'ayǐ é, bɔ é ná hu winnyá nú we; hwenu e un ná sɔ́ hwɛ towe lɛ́ɛ kɛ we ɔ́, a nǎ dán ɖě wa gbɔn káká bɔ nukikɛ ná gló we. Xó e nyɛ Aklúnɔ Mavɔmavɔ ɖɔ ɔ́ nɛ́.”