Ezekiyɛ́li 14 - MAWUXÓWÉMA

Izlayɛ́li ví lɛ́ɛ ɖó ná gbɛ́ vodún

¹ Tomɛxó Izlayɛ́li tɔn ɖé lɛ́ɛ wá gɔ̌n ce gbe ɖokpó, bó jínjɔ́n ayǐ ɖo nukɔn ce;

² énɛ́ ɔ́, Mawu Mavɔmavɔ ɖɔ nú mì ɖɔ:

³ “Hwɛ gbɛtɔ́ ɔ́, hwi ɖɔ xó ná wɛ un ɖe; yě mɛ énɛ́ lɛ́ɛ ɔ́, vodún yětɔn lɛ́ɛ jí jɛ́n ayi yětɔn ɖe. Nǔ e dɔn yě dó hwɛ mɛ lɛ́ɛ wɛ yě jó yěɖée dó ná. Un ná jó nyiɖée dó bɔ yě ná nɔ́ wá kan nǔ byɔ́ mì wɛ yě vɛdó a?

⁴ Énɛ́ ɔ́ wú ɔ́, a nǎ ɖɔ xó nú yě; a nǎ ɖɔ nú yě ɖɔ: Xó e Aklúnɔ Mavɔmavɔ ɖɔ ɔ́ ɖíe: Ényí Izlayɛ́li ví e vodún tɔn jí jɛ́n ayi tɔn nɔ ɖe, bɔ é jó éɖée dó nú nǔ e nɔ dɔn ɛ dó hwɛ mɛ lɛ́ɛ ɖě wá kan nǔ byɔ́ gbeyíɖɔ ce lɛ́ɛ ɖě ɔ́, nyɛ Mawu Mavɔmavɔ ɖésú wɛ ná yí gbe n'i. Lě e vodún e é nɔ́ sɛn lɛ́ɛ sukpɔ́ gbɔn ɔ́ wɛ un ná kpɔ́n dó ɖɔ xó n'i.

⁵ Gbe e un ná yí n'i ɔ́ ná hɛn hǔn nú Izlayɛ́li ví e jó mì dó, bó ɖó kan dó vodún yětɔn lɛ́ɛ wú lɛ́ɛ bǐ.

⁶ Énɛ́ wú wɛ a nǎ ɖɔ nú Izlayɛ́li ví lɛ́ɛ ɖɔ: ‘Aklúnɔ Mavɔmavɔ ɖo byɔ̌byɔ́ mi wɛ ɖɔ mi ní húzú jijɔ, bó jó vodún mitɔn lɛ́ɛ dó, bó lɛ́ kɔ sín walɔ baɖabaɖa mitɔn lɛ́ɛ bǐ gúdo.’

⁷ “Ɖó ényí Izlayɛ́li ví ɖé abǐ jǒnɔ e ɖo Izlayɛ́li to ɔ́ mɛ lɛ́ɛ ɖě jó mì dó, bó sɔ́ ayi tɔn ɖó vodún tɔn lɛ́ɛ jí, bó jó éɖée dó nú nǔ e nɔ dɔ́n ɛ dó hwɛ mɛ lɛ́ɛ ɖě wá gbeɖé, bó wá kan nǔ byɔ́ gbeyíɖɔ ce lɛ́ɛ ɖě, bó ná tunwun jlǒ ce ɔ́, nyɛ Mawu Mavɔmavɔ ɖésú wɛ ná yí gbe n'i!

⁸ Un ná wa nǔ xá ɛ, bɔ è nǎ nɔ́ dó gesí i, dó dó lǒ. Un ná ɖe e sín togun ce mɛ. Un bló mɔ̌ ɔ́, mi ná tunwun ɖɔ nyɛ wɛ nyí Mawu Mavɔmavɔ.

⁹ “Ényí gbeyíɖɔ ɖé jó éɖée dó, bónú mɛ ɖé dɔn ɛ d'é mɛ, bónú é ɖésú yí gbe ɔ́, nyɛ Mawu Mavɔmavɔ ná dɔn ɛ d'é mɛ d'é jí, bɔ é ná bú ali; énɛ́ ɔ́, alɔ ce ná jɛ wǔ tɔn, bɔ un ná ɖe e sín togun ce Izlayɛ́li mɛ.

¹⁰ Hǔn gbeyíɖɔ énɛ́ ɔ́ kpódó mɛ e wá kan nǔ byɔ́ ɛ ɔ́ kpó bǐ wɛ kplé bó hu hwɛ nɛ́, bɔ bǎ tɔn ná xo yě bǐ.

¹¹ Nú un bló mɔ̌ ɔ́, Izlayɛ́li ví lɛ́ɛ sɔ́ ná nɔ zɔ nú mì bó bú ali ɖě ǎ; yě sɔ́ ná wa nǔ nyi do, bó ná húzú mɛ blíblí ǎ; lo ɔ́, yě ná nyí togun ce, bɔ un nǎ nyí Mawu yětɔn. Xó e nyɛ Aklúnɔ Mavɔmavɔ ɖɔ ɔ́ nɛ́.”

Nǔ ɖěbǔ nǎ ɖó hwɛɖiɖɔ Mawu tɔn te ǎ

¹² Mawu Mavɔmavɔ ɖɔ nú mì ɖɔ:

¹³ “Hwɛ gbɛtɔ́ e, ényí to ɖé tíin, bɔ mɛ e ɖ'é mɛ lɛ́ɛ hu hwɛ dó mì, bó jó mì dó ɔ́, alɔ ce ná jɛ yě wǔ. Un ná hɛn nǔɖuɖu e yě kplé ɖó ayǐ lɛ́ɛ bǐ gblé; un ná sɛ́ adɔ dó to ɔ́ mɛ, bɔ gbɛtɔ́ kpó kanlin kpó bǐ ná kú.

¹⁴ Nɔwée kpó Daniyɛ́li kpó Jɔ̌bu kpó ná bó ɖo to ɔ́ mɛ ɔ́, gbejí e yě ɖe nú mì ɔ́ jɛ́n ná zɔ́n bɔ yě ná hwlɛ́n gbɛ yěɖée tɔn gán. Xó e nyɛ Aklúnɔ Mavɔmavɔ ɖɔ ɔ́ nɛ́.

¹⁵ “É gló ɔ́, un ná sɛ́ adǎnkanlin lɛ́ɛ dó to ɔ́ mɛ, bɔ yě ná hu mɛ e ɖo to ɔ́ mɛ lɛ́ɛ bǐ, bɔ mɛ ɖěbǔ sɔ́ ná glá bó byɔ́ to ɔ́ mɛ ǎ. To ɔ́ ná húzú gbětótló ɖó adǎnkanlin lɛ́ɛ wútu.

¹⁶ Ényí Nɔwée kpó Daniyɛ́li kpó Jɔ̌bu kpó ɖo fínɛ́ ɔ́, yědɛɛ lɛ́ɛ kɛ́ɖɛ́ jɛ́n ná nɔ gbɛ. Nyɛ Aklúnɔ Mavɔmavɔ ɔ́, un xwlé nyiɖée nú mi, yě ná kpé wú bó hwlɛ́n vǐ yě ɖésúnɔ tɔn gán lɔ ǎ. To ɔ́ bǐ wɛ ná húzú gbětótló.

¹⁷ “É gló ɔ́, un ná sɛ́ ahwan dó to ɔ́ mɛ, bó ná ná gbe sɔ́ja lɛ́ɛ, bɔ yě ná gbɔn to ɔ́ mɛ bó sú gbɛtɔ́ kpó kanlin kpó bǐ kún dó.

¹⁸ Ényí yě mɛ atɔn e sín nyǐkɔ un ylɔ́ lɛ́ɛ ɖo fínɛ́ ɔ́, yědɛɛ kɛ́ɖɛ́ jɛ́n ná nɔ gbɛ. Nyɛ Aklúnɔ Mavɔmavɔ ɔ́, un xwlé nyiɖée nú mi, yě ná kpé wú bó hwlɛ́n vǐ yětɔn súnnu abǐ nyɔ̌nu gán lɔ ǎ.

¹⁹ “É gló ɔ́, un ná sɛ́ jɛmɛjí dó toxo ɔ́ mɛ. Un ná sɔ́ xomɛsin ce dó wa nǔ xá to ɔ́, bó sú gbɛtɔ́ kpó kanlin kpó bǐ kún dó.

²⁰ Ényí Nɔwée kpó Daniyɛ́li kpó Jɔ̌bu kpó ɖo toxo ɔ́ mɛ ɔ́, gbejí e yě ɖe nú mì ɔ́ jɛ́n ná zɔ́n, bɔ yě ná hwlɛ́n gbɛ yěɖée tɔn gán. Nyɛ Aklúnɔ Mavɔmavɔ ɔ́, un xwlé nyiɖée nú mi, yě ná kpé wú bó hwlɛ́n vǐ yětɔn súnnu abǐ nyɔ̌nu gán ǎ.”

²¹ Énɛ́ ɔ́ gúdo ɔ́, Aklúnɔ Mavɔmavɔ ɖɔ nú mì ɖɔ: “Awě ɖaxó ɛnɛ énɛ́ lɛ́ɛ bǐ wɛ un sɛ́ dó Jeluzalɛ́mu: un sɛ́ ahwan dó, un sɛ́ adɔ dó, un sɛ́ adǎnkanlin kpó jɛmɛjí kpó dó, bó ná sú gbɛtɔ́ kpó kanlin kpó bǐ kún dó ɖo toxo ɔ́ mɛ.

²² É ka ɖo mɔ̌ có é ná kpo súnnu kpó nyɔ̌nu kpó ɖé lɛ́ɛ, bɔ è nǎ ɖe yě tɔ́n sín toxo ɔ́ mɛ; yě ná wá mi gɔ́n ɖo Babilɔ́nu fí; yě wá mi gɔ́n bónú mi mɔ ninɔmɛ yětɔn kpó walɔ yětɔn nyanya lɛ́ɛ kpó ɔ́, mi ná mɔ ɖɔ awě e un sɛ́ dó Jeluzalɛ́mu lɛ́ɛ kpó nǔ e un wa xá ɛ lɛ́ɛ kpó ɔ́, hwɛ ce jɔ.

²³ Mi ko mɔ ninɔmɛ yětɔn kpó walɔ yětɔn nyanya ɔ́ kpó ɔ́, mi ná mɔ ɖɔ nǔ e un wa xá Jeluzalɛ́mu toxo ɔ́ é ɔ́, hwɛ ce jɔ. Xó e nyɛ Aklúnɔ Mavɔmavɔ ɖɔ ɔ́ nɛ́.”