Ezekiyɛ́li 13 - MAWUXÓWÉMA

¹ Mawu Mavɔmavɔ ɖɔ nú mì ɖɔ:

² “Hwɛ gbɛtɔ́ ɔ́, yě mɛ e nɔ ɖo yěɖée mɔ dó mɔ gbeyíɖɔ Izlayɛ́li tɔn wɛ, bó nɔ́ ɖo nǔ e wá ayi yětɔn mɛ lɛ́ɛ ɖɔ wɛ, bó nɔ́ ɖɔ nyi wɛ ɖɔ xó nú émí lɛ́ɛ ɔ́, ɖɔ nú yě ɖɔ yě ní ɖótó nyɛ Mawu Mavɔmavɔ xó.

³ Xó e nyɛ Aklúnɔ Mavɔmavɔ ɖɔ ɔ́ ɖíe: heelú gbeyíɖɔ xlonɔ énɛ́ lɛ́ɛ; nǔ e wá ayi yětɔn mɛ ɔ́ wɛ yě nɔ́ ɖɔ; ɖó nyɛ ɖe nǔɖé xlɛ́ yě ǎ.

⁴ Áo Izlayɛ́li, gbeyíɖɔ towe lɛ́ɛ cí ayǐsájɛ e ɖo sa ɖi gbɔn xwé gbigba gbe wɛ lɛ́ɛ ɖɔhun.

⁵ Yě yi bló fí e ahohó ɔ́ mu ɖe lɛ́ɛ ɖó ǎ; yě mɛ dǒ lɛ́ lɛ̌ dó mi, bónú mi ná gló ahwan azǎn e gbe Mawu Mavɔmavɔ ná dɔn tó nú mi é ǎ.

⁶ Nǔ wɛ yě nɔ́ kpa ɖɔ bó nɔ́ ɖɔ émí mɔ nǔ; nǔ e yě nɔ́ ɖɔ é ná wá jɛ lɛ́ɛ ɔ́, adingban kɛ́ɖɛ́ wɛ; adingban ɖó wɛ yě nɔ́ ɖe bó nɔ́ ɖɔ: ‘Mawu Mavɔmavɔ ɖɔ lě’; nyɛ Mawu Mavɔmavɔ ka zɔ́n nǔɖé yě ǎ. Yě nɔ́ wa mɔ̌, bó nɔ́ ɖo te nɔ kpɔ́n wɛ ɖɔ nyɛ ná wa nǔ dó ɖe xlɛ́ ɖɔ émí ɖɔ nǔgbó.

⁷ Lo ɔ́, nǔ e mɔ wɛ mi nɔ ɖe, bó nɔ́ ɖo ɖiɖɔ wɛ énɛ́ lɛ́ɛ ɔ́, mi ɖésú má tunwun ɖɔ nǔ kpa ɖɔ wɛ émí ɖe a? Mi nɔ ɖó adingban nú mɛ lɛ́ɛ, bó nɔ́ ɖɔ Mawu Mavɔmavɔ ɖɔ lě, nyɛ ka ɖɔ xó ɖé nú mi ǎ.

⁸ Énɛ́ ɔ́ wú ɔ́, un ɖo ɖiɖɔ nú mi wɛ: Mi nɔ ɖó adingban dó nu ce, mi nɔ́ kpa xó ɖɔ dó nu ce, bó nɔ́ ɖɔ nǔ wɛ émí mɔ; énɛ́ wú ɔ́, un ná húzú kpan nukɔn mi lo. Xó e nyɛ Aklúnɔ Mavɔmavɔ ɖɔ ɔ́ nɛ́.

⁹ “Un ná wa nǔ xá gbeyíɖɔ e nɔ́ ɖo nǔ kpa ɖɔ wɛ, bó nɔ́ ɖɔ nǔ wɛ émí mɔ lɛ́ɛ. Yě ná nɔ togun ce mɛ ǎ. È nǎ wlán nyǐkɔ yětɔn dó Izlayɛ́li ví lɛ́ɛ mɛ ǎ; yě ná lɛ́ kɔ wá Izlayɛ́li yíkúngban ɔ́ jí ǎ. Énɛ́ ɔ́, yě ná tunwun ɖɔ nyɛ wɛ nyí Aklúnɔ Mavɔmavɔ.

¹⁰ “Gbeyíɖɔnyíjɛtɔ́ lɛ́ɛ flú togun ce, bɔ nǔ ná bó ɖo gblěgblé wɛ ɔ́, yě nɔ́ ɖɔ nǔ ɖo nyǐnyɔ́ wɛ. Togun ce nɔ mɛ dǒ, bɔ yědɛɛ nɔ́ wá tlɛ́ kpowun.

¹¹ Ɖɔ nú mɛ e ɖo dǒ tlɛ́ wɛ lɛ́ɛ ɖɔ dǒ ɔ́ ná mu bǐ. Jǐ ɖaxó ɖokpó ná wɔ́, kɛ́njí ná ja, bɔ jɔhɔn ɖaxó ɖokpó ná nyi,

¹² bɔ dǒ ɔ́ ná mu; énɛ́ ɔ́, è nǎ kan nǔ byɔ́ mi ɖɔ: ‘Bɔ étɛ́ mi ka tlɛ́ dǒ ɔ́ dó wá ná lo?’

¹³ Nǔ e ɖɔ nú mi wɛ nyɛ Aklúnɔ Mavɔmavɔ ɖe ɔ́ ɖíe: Un ɖo xomɛsin jí; un ná sɛ́ jɔhɔn ɖaxó ɖé dó, un ná sɛ́ jǐ ɖaxó ɖé dó. Kɛ́njí ná ja kpó hlɔ̌nhlɔ́n kpó, bó ná hɛn nǔ bǐ gblé.

¹⁴ Un ná mu dǒ e mi tlɛ́ é, un ná mu sín aga káká yi do, bɔ è nǎ mɔ nǔ jɛ dodó ɔ́ wú. É ná mu jɛ mi jí, bó ná vó mi. Énɛ́ ɔ́, mɛ bǐ ná tunwun ɖɔ nyɛ wɛ nyí Mawu Mavɔmavɔ.

¹⁵ Un ná wa dǒ ɔ́ kpo mɛ e tlɛ́ lɛ́ɛ kpó sín nǔ lě e é jló mì gbɔn é, ɖó adǎn e jí un ná ɖe ɔ́ wú. Un ná ɖɔ nú mi ɖɔ: ‘Acɔnkwín! Dǒ ɔ́ sɔ́ ɖo te ǎ, mɛ e tlɛ́ lɛ́ɛ lɔ sɔ́ ɖe ǎ.

¹⁶ Gbeyíɖɔnyíjɛtɔ́ Izlayɛ́li tɔn e nɔ ɖo lě e nǔ ná wá nɔ gbɔn nú Jeluzalɛ́mu é ɖɔ wɛ lɛ́ɛ ɔ́, yě ɖě sɔ́ ɖe ǎ. Ɖ'ayǐ ɔ́, yě nɔ́ mɔ nǔ bó nɔ́ ɖɔ nǔ bǐ ɖo yiyi wɛ ganjí; lo ɔ́, nǔ ɖokpó ká ɖo yiyi wɛ ǎ.’ Xó e nyɛ Aklúnɔ Mavɔmavɔ ɖɔ ɔ́ nɛ́.”

Mawu ɖɔ xó dó nyɔ̌nu azětɔ́ lɛ́ɛ wú

¹⁷ Mawu ɖɔ nú mì ɖɔ: “Din ɔ́, hwɛ gbɛtɔ́ e, nyɔ̌nu Izlayɛ́li tɔn e nɔ ɖo nǔ e ɖo ayi yětɔn mɛ lɛ́ɛ ɖɔ wɛ, bó nɔ́ ɖɔ émí ɖo Mawu wɛn dó wɛ lɛ́ɛ ɔ́, ɖe yě gba ɖo nyǐkɔ ce mɛ.

¹⁸ Ɖɔ nú yě ɖɔ nyɛ Aklúnɔ Mavɔmavɔ ɖɔ: Heelú mi! Mi nɔ lɔn kan, bó nɔ́ sin dó alɔgókɔ nú mɛ; mi nɔ lɔn tablá mɛxó tɔn kpó yɔkpɔ́vú tɔn kpó, bó nɔ́ xwe nú yě; mi nɔ bló mɔ̌, bó ná sixú wlí lǐndɔ̌n yětɔn. Mi vɛdó ɖɔ émí ná dó kan mɛ e ɖo togun ce mɛ lɛ́ɛ sín lǐndɔ̌n, bó ná hwlɛ́n midɛɛ lɛ́ɛ tɔn gán wɛ a?

¹⁹ Mi nɔ yí jinukún alɔgogo kpɛɖé, abǐ wɔ̌xúxú gǒ ɖokpó ɖé ɖo mɛ lɛ́ɛ sí, bó nɔ́ dó hɛn nyǐkɔ ce blí ɖo togun ce mɛ. Mi nɔ yí nǔ énɛ́ lɛ́ɛ, bó nɔ́ hu mɛ e è ma ɖó ná hu ǎ lɛ́ɛ, bó nɔ́ jó mɛ e è ɖǒ ná hu lɛ́ɛ dó nyi gbɛ. Mi nɔ ɖó adingban nú togun ce bɔ yě lɔ nɔ ɖi nǔ nú mi.

²⁰ Énɛ́ ɔ́ wú ɔ́, nyɛ Aklúnɔ Mavɔmavɔ ɔ́, un ɖo ɖiɖɔ nú mi wɛ; un gbɛ́ wǎn nú kan mitɔn e mi nɔ dó wlí mɛ ná xɛ ɖɔhun lɛ́ɛ; un ná hɛn bǐ wɛ́n; un ná ɖe lǐndɔ̌n e mi wlí lɛ́ɛ nyi te.

²¹ Un ná vún tablá lɛ́ɛ; un na bló mɔ̌ bó ná ɖe togun ce sín acɛ mitɔn mɛ. Yě sɔ́ ná nyí xɛ bó ná nɔ aja mɛ nú mi ǎ. Énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ.

²² Mi nɔ ɖó adingban dó dó awakanmɛ kú nú mɛ e nɔ wa nǔ jlɔ́jlɔ́ lɛ́ɛ; nyɛ ka lin nǔ nyanya ɖěbǔ dó yě wú ǎ. Mi nɔ dó wǔsyɛ́n lanmɛ nú mɛ nyanya lɛ́ɛ, bɔ yě nɔ́ lɛ́ ɖó kan dó gbɛ nyanya zínzán wú; gbɛ yětɔn wɛ mi ɖó axɔ́ nu.

²³ Din ɔ́, nǔmimɔ e yě nɔ́ kpa ɖɔ lɛ́ɛ, kpó nǔ e mi nɔ ɖɔ yě ná wá jɛ sɔ lɛ́ɛ bǐ kpó sín xó fó lo. Un ná ɖe togun ce sín acɛ mitɔn mɛ. Énɛ́ ɔ́, mi ná tunwun ɖɔ nyɛ wɛ nyí Mawu Mavɔmavɔ.”